ಕವಿತಾ ವಾಚನ್ ಸರ್ತ್: ಮಡ್ಗಾಂವ್ ಥಾವ್ನ್ ಧಾ ಯುವಜಣಾಂ ಫೈನಲಾಕ್
ಮಡ್ಗಾಂವ್ ಶೆರಾಚ್ಯಾ ಕೊಂಕಣಿ ಭಾಷಾ ಮಂಡಳ್ ಸಭಾ ಸಾಲಾಂತ್ ಹ್ಯಾಚ್ ಸಪ್ಟೆಂಬರ್ 4 ತಾರಿಕೆರ್ ಚಲಲ್ಲ್ಯಾ ರೋಹನ್ ಆನಿ ಲವೀಟಾ ಮೊಂತೇರೊ ಪಾಂಚ್ವ್ಯಾ ಅಖಿಲ್ ಭಾರತ್ ಕೊಂಕಣಿ ಕವಿತಾ ವಾಚನ್ ಸರ್ತೆಂತ್ ಧಾ ಯುವಜಣಾಂಕ್ 2016 ವರ್ಸಾಚೆ ಜನೆರ್ 10 ತಾರಿಕೆರ್ ಚಲುಂಕ್ ಆಸ್ಚ್ಯಾ ಕವಿತಾ ಫೆಸ್ತಾಂತ್ ಚಲ್ಚ್ಯಾ ಫೈನಲ್ಸಾಕ್ ವಿಂಚುನ್ ಕಾಡ್ಲ್ಯಾಂತ್.
ಕೊಂಕಣಿ ಭಾಷಾ ಮಂಡಳ್ ಗೊಂಯ್, ಹಾಂಚ್ಯಾ ಸಹಕಾರಾನ್ ಚಲ್ಚ್ಯಾ ಹ್ಯೆ ಸರ್ತೆಂತ್ ಸುರ್‍ವೆರ್ ಕೊಂಕಣಿ ಭಾಷಾ ಮಂಡಳಾಚೊ ಅಧ್ಯಕ್ಷ್ ಚೇತನ್ ಆಚಾರ್ಯ ಹಾಂಣಿ ಯೆವ್ಕಾರ್ ದಿಲೊ. ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸ್ ಹಾಂಣಿ ಕವಿತಾ ಟ್ರಸ್ಟಾಚೊ ವಾವ್ರ್ ತಶೆಂ ಸರ್ತೆಚ್ಯಾ ನೆಮಾಂಚೊ ವಿವರ್ ದಿಲೊ ಆನಿ ಸಹಕಾರ್ ದಿಲ್ಲ್ಯಾ ಕೊಂಕಣಿ ಭಾಷಾ ಮಂಡಳಾಚೊ ಉಪ್ಕಾರ್ ಆಟಯ್ಲೊ.
ಹೆ ಸರ್ತೆಂತ್ ಚೌಗುಳೆ ಕೊಲೆಜ್, ಫಾ ಆಗ್ನೆಲ್ ಕೊಲೆಜ್ ಪಿಲಾರ್, ಗೊಂಯ್ ವಿಶ್ವವಿದ್ಯಾಲಯ್, ಕೆಪೆಂಚಿ ಸರ್ಕಾರಿ ಮಹಾವಿದ್ಯಾಲಯ್, ಕಾರ್ಮೆಲ್ ಕೊಲೆಜ್, ನುವೆಂ, ನಾರಾಯಣ್ ಜಾಂಟ್ಯೆ ಕೊಲೆಜ್ ಬಿಚೊಲಿಂ, ಶ್ರೀ ಮಲ್ಲಿಕಾರ್ಜುನ್ ಕೊಲೆಜ್, ಕಾಣ್‌ಕೋಣ್, ಎಮ್. ಇ. ಎಸ್. ಕೊಲೆಜ್ ಜುವಾರಿನಗರ್ - ಹಾಂಗಾಚ್ಯಾ ಆಟೆಚಾಳೀಸ್ ವಿದ್ಯಾರ್ಥಿಂನಿ ಭಾಗ್ ಘೆತಲ್ಲೊ.
ಫೈನಲಾಕ್ ವಿಂಚುನ್ ಆಯಿಲ್ಲ್ಯಾ ಧಾ ಜಣಾಂಚಿಂ ನಾಂವಾಂ ಹೆಪರಿಂ ಆಸಾತ್:
ಎವಿಟಾ ಡಿಸೋಜಾ, ಫಾ ಆಗ್ನೆಲ್ ಕೊಲೆಜ್ ಪಿಲಾರ್
ವೃಕ್ಷ ಕರ್ಮಲಿ, ಚೌಗುಳೆ ಕೊಲೆಜ್, ಮಡ್ಗಾಂವ್
ಸುಶ್ಮಿತಾ ಪೈ ಕಾಣೆ, ಚೌಗುಳೆ ಕೊಲೆಜ್, ಮಡ್ಗಾಂವ್
ವೈಷ್ಣವಿ ಕಾಕೊಡೆ, ಚೌಗುಳೆ ಕೊಲೆಜ್, ಮಡ್ಗಾಂವ್
ಸುಹೇಲ್ ಮಡ್ಕಯ್ಕಾರ್, ಫಾ ಆಗ್ನೆಲ್ ಕೊಲೆಜ್ ಪಿಲಾರ್
ಜೊಸ್ಮಿತಾ ಫೆರ್ನಾಂಡಿಸ್, ಗೊಂಯ್ ವಿಶ್ವವಿದ್ಯಾಲಯ್
ಅಂತರಾ ಭಿಡೆ, ಚೌಗುಳೆ ಕೊಲೆಜ್, ಮಡ್ಗಾಂವ್
ಸುಪ್ರಿಯಾ ಕಾಣ್ಕೋಣ್ಕಾರ್, ಗೊಂಯ್ ವಿಶ್ವವಿದ್ಯಾಲಯ್
ಪ್ರಾದ್ನ್ಯಾ ತಾರಿ, ಗೊಂಯ್ ವಿಶ್ವವಿದ್ಯಾಲಯ್
ದತ್ತರಾಜ್ ನಾಯ್ಕ್, ಸರ್ಕಾರಿ ಮಹಾವಿದ್ಯಾಲಯ್, ಕೆಪೆಂ
ವಿಲಿಯಮ್ ಪಾಯ್ಸ್, ಕಿಶೂ ಬಾರ್ಕೂರ್ ಆನಿ ಎಂಡ್ರ್ಯೂ ಎಲ್. ಡಿಕುನ್ಹಾ ವೊರಯ್ಣಾರ್ ಜಾವ್ನ್ ಆಸಲ್ಲೆ ತರ್, ಎವ್ರೆಲ್ ರೊಡ್ರಿಗಸ್ ಆನಿ ವಿತೊರಿ ಕಾರ್ಕೊಳಾನ್ ಸರ್ತ್ ಚಲೊವ್ನ್ ವ್ಹರ್‍ಚ್ಯಾಂತ್ ಮಜತ್ ಕೆಲಿ. ಭಾಗ್ ಘೆತಲ್ಲ್ಯಾ ಸರ್‍ವಾಂಕ್ ಕೊಂಕಣಿ ಭಾಷಾ ಮಂಡಳ್ ಕಾರ್ಯಕಾರಿ ಸಮಿತಿಚೊ ಸಾಂದೊ ಅನ್ವೇಷಾ ಸಿಂಗ್‌ಬಾಳ್ ಆನಿ ಕೊಂಕಣಿ ಭಾಷಾ ಮಂಡಳ್ ಇಸ್ಕೊಲಾಚೊ ಮುಖೆಲ್ ಪ್ರಾಧ್ಯಾಪಕ್ ಅನಂತ್ ಅಗ್ನಿ ಹಾಂಣಿ ಪ್ರಮಾಣ್ ಪತ್ರಾಂ ವಾಂಟ್ಲಿಂ.
कविता वाचन सर्त : मडगांव थावन धा युवजणां फैनलाक
मडगांव शेराच्या कोंकणी भाषा मंडळ सभा सालांत ह्याच सप्टेंबर 4 तारकेर चलल्ल्या रोहन आनी लवीटा मोंतेरो पांचव्या अखिल भारत कोंकणी कविता वाचन सर्तेंत धा युवजणांक 2016 वर्साचे जानेर 10 तारकेर चलूंक आसच्या कविता फेस्तांत चलच्या फैनल्साक विंचून काडल्यांत.
कोंकणी भाषा मंडळ, गोंय हांच्या सहकारान चलच्या हे सर्तेंत सुरवेर कोंकणी भाषा मंडळाचो अध्यक्ष चेतन आचार्य हांणी येवकार दिलो. कविता ट्रस्ट अध्यक्ष मेल्विन् रोड्रीगस हांणी कविता ट्रस्टाचो वावर तशें सर्तेच्या नेमांचो विवर दिलो आनी सहकार दिल्ल्या कोंकणी भाषा मंडळाचो उपकार आटयलो.
हे सर्तेंत चौगुळे कॉलेज, फा आग्नेल कॉलेज् पिलार, गोंय विश्व विद्यालय, केपेंची सरकारी महाविद्यालय, कार्मेल कॉलेज नुवें, नारायण् झांट्ये कॉलेज बोचोलीं, श्री मल्लीकार्जुन कॉलेज, काणकोण, एम्. ई. एस्, कॉलेज जुवारीनगर - हांगाच्या आटेचाळीस विध्यार्थिंनी भाग घेतल्लो.
फैनल्साक् विंचून आयल्ल्या धा जणांचीं नांवां हेपरीं आसात:
एविटा डिसोजा, फा आग्नेल कॉलेज पिलार
वृक्षा कर्मळी, चौगुळे कॉलेज, मडगांव
सुश्मिता पै कणे, चौगुळे कॉलेज, मडगांव
वैश्णवी काकोडे, चौगुळे कॉलेज, मडगांव
सुहेल मडकयकर, फा आग्नेल कॉलेज, पिलार
जोस्मिता फॅरनांडीस, गोंय विश्वविद्यालय
अंतरा भिडे, चौगुळे कॉलेज, मडगांव
सुप्रिया काणकोणकार, गोंय विश्वविद्यालय
प्राद्न्या तारी, गोंय विश्वविद्यालय
दत्तराज नायक, सर्कारी महाविद्यालय, केपें
विलियम पायस्, किशू बार्कूर आनी एंड्र्यू डिकून्हा वोरयणार जावन आसल्ले तर्, एवरेल रोड्रीगस आनी वितोरी कार्कळान सर्त चलोवन व्हरच्यांत मजत केली. भाग घेतल्ल्या सरवांक कोंकणी भाषा मंडळ कार्यकारी समितीचो सांदो अन्वेषा सिंगबाळ् आनी कोंकणी भाषा मंडळ इस्कोलाचोअ मुखेल प्राध्यापक अनंत अग्नी हांणी प्रमाण पत्रां वांटलीं.