ವೆಮುಲಾಚೆಂ ಮರಣ್ ವೆವಸ್ಥೆ ವಿರೋಧ್ ಉಟಯಿಲ್ಲೊ ಆವಾಜ್: ಕವಿತಾ ಟ್ರಸ್ಟಾಚೆ ಕವಿಗೋಷ್ಟಿಂತ್ ಎಚ್ಚೆಮ್
ಕವಿತಾ ಟ್ರಸ್ಟಾನ್ ಮಾಂಡುನ್ ಹಾಡಲ್ಲಿ ಮಾರ್ಚ್ ಮ್ಹಯ್ನ್ಯಾಚಿ ಕವಿಗೋಷ್ಟಿ, ವಾಚನ್ ಕೆಲ್ಲ್ಯಾ ಕವಿತಾಂ ಖಾತೀರ್ ಮಾತ್ರ್ ನ್ಹಯ್ ಆಸ್ತಾಂ, ಕವಿತೆಚೆರ್ ಚಲಲ್ಲ್ಯಾ ಮಹತ್ವಾಚ್ಯಾ ಸಂವಾದಾ ಖಾತೀರ್ ರಂಗ್ಲಿ. ಹ್ಯಾಚ್ 2016 ಮಾರ್ಚ್ ಮ್ಹಯ್ನ್ಯಾಚೆ 13 ತಾರಿಕೆರ್ ಮಂಗ್ಳುರ್ ಶೆರಾಂತ್ಲ್ಯಾ ಹಂಪನ್‍ಕಟ್ಟಾ ಲಾಗ್ಸಾರ್ ಆಸ್ಚ್ಯಾ ಗ್ಯಾಲರಿ ಓರ್ಕಿಡಾಂತ್ ಚಲಲ್ಲಿ ಹಿ ಕವಿಗೋಷ್ಟಿ ಕವಿ ಜೇಸನ್ ಸಿಕ್ವೇರಾನ್ ಚಲೊವ್ನ್ ವೆಲಿ. ಉಪ್ರಾಂತ್ ಆಂಡ್ರ್ಯೂ ಡಿಕುನ್ಹಾನ್, ಎಚ್ಚೆಮ್ ಪೆರ್‍ನಾಳಾ ಸಾಂಗಾತಾ ಕವಿತೆಚೆರ್ ಸಂವಾದ್ ಚಲೊವ್ನ್ ಹಾಜರ್ ಆಸಲ್ಲ್ಯಾಂಕ್ ಚಿಂತ್ನಾಂಚ್ಯಾ ನವ್ಯಾ ಸಂಸಾರಾಕ್ ಆಪೊವ್ನ್ ವೆಲೆಂ.
ಸುರ್‍ವೆರ್ ಟ್ರಸ್ಟಿ ತಶೆಂ ಗ್ಯಾಲರಿ ಓರ್ಕಿಡಾಚೊ ಮ್ಹಾಲಕ್ ವಿಲಿಯಮ್ ಪಾಯ್ಸಾನ್ ಯೆವ್ಕಾರ್ ದಿತಚ್, ಮೆಲ್ವಿನ್ ರೊಡ್ರಿಗ್ಸಾನ್ ಕವಿತಾ ಟ್ರಸ್ಟಾಚ್ಯಾ ಶೆವೊಟಾವಿಶಿಂ ತಶೆಂ ವಾವ್ರಾವಿಶಿಂ ವಿವರ್ ದಿಲೊ.
ಎಲ್ಯೆರ್ ತಾಕೊಡೆನ್ ಥೊಡಿಂ ಚುಟ್ಕುಲಾಂ ವಾಚ್ಲ್ಯಾ ಉಪ್ರಾಂತ್ ನವೀನ್ ಕುಲ್ಶೇಕರಾನ್ 'ತರ್ನೊ ಬೊಂಗೊ' ಆನಿ 'ಆಮ್ಚ್ಯಾ ಪಾತ್ಕಾಕ್ ಶಿಕ್ಷಾ' ಸಾದರ್ ಕೆಲ್ಯೊ. ರಿಚ್ಚಿ ಪಿರೇರಿನ್ ಥೊಡಿಂ ಚುಟ್ಕುಲಾಂ ಆನಿ 'ಕವಿಚೊ ಖೆಳ್' ಮ್ಹಳ್ಳಿ ಕವಿತಾ ವಾಚ್ಲಿ ತರ್ ವಿಲ್ಸನ್ ಕಟೀಲಾಚಿ 'ವೆಪಾರ್' ಕವಿತಾ ಮಾರ್ಮಿಕ್ ಜಾವ್ನಾಸ್ಲಿ. ಫೆಲ್ಸಿ ಲೋಬೊನ್, ಗಾಂವಾಂತ್ ಉಟಲ್ಲ್ಯಾ ದಗಲ್ಬಾಜಿ, ಭೃಷ್ಟಾಚಾರ್, ಅನೈತಿಕತೆಚ್ಯಾ ವಾದಾಳಾವಿಶಿಂ ಕವಿತಾ ವಾಚ್ತಾನಾ, ಆಂಡ್ರ್ಯೂ ಎಲ್. ಡಿಕುನ್ಹಾನ್ ಆಪ್ಲ್ಯಾ ಆಯೆರಾಚೊ ಬೂಕ್ ಪುಸ್ತಕಾಂತ್ಲಿ, 'ಖುರ್‍ಸಾಂವ್ಚೆಂ ಯೋಜನ್' ಕವಿತಾ ವಾಚುನ್ ಸಾಂಗ್ಲಿ. ಚಾರ್ಲಿ ಸೊಜ್, ಯೆಯ್ಯಾಡಿನ್ 'ಎತ್ತಿನ ಹೊಳೆ' ಕಾಮ್ಗಾರಿವಿಶಿಂ ಕವಿತಾ ಸಾದರ್ ಕೆಲಿ ಜಾಲ್ಯಾರ್, ಗೀತಾ ಕಿಣಿನ್ 'ಚಂಚಲ್ ಮನ್' ಆನಿ 'ಸಪಣ್' ಕವಿತಾ ವಾಚ್ಲ್ಯೊ. ಮೆಲ್ವಿನ್ ರೊಡ್ರಿಗಸಾನ್ ಸ್ವಾಭಿಮಾನ್ ಪಾಚಾರ್‍ಚ್ಯೊ ದೋನ್ ಕವಿತಾ 'ಮ್ಹಜೆಂ ಘರ್' ಆನಿ 'ಫಿಂತಾಂ' ತಾಚ್ಯಾ ವಾಟ್ ಪುಸ್ತಕಾಂತ್ಲ್ಯೊ ವಾಚ್ಲ್ಯೊ. ಜೇಸನ್ ಸಿಕ್ವೇರಾನ್ 'ದಂಧ್ಯಾಂಚೆಂ ಶೆರ್' ಆನಿ 'ವಸಂತ್' ಕವಿತಾ ವಾಚ್ಲ್ಯೊ ಆನಿ ಎಚ್ಚೆಮ್ ಪೆರ್‍ನಾಳಾನ್ ಆಯ್ಲೆವಾರ್ ಕವಿತಾ.ಕೊಮ್ ಜಾಳಿ ಜಾಗ್ಯಾರ್ ಪರ್ಗಟ್ ಜಾಲ್ಲಿ 'ಕಾರಣ್ ನಾಸ್ತಾಂ ಮರ್‍ಚೆಂ ಕಶೆಂ?' ಕವಿತಾ ಸಾದರ್ ಕೆಲಿ. ಜೇಸನ್ ಸಿಕ್ವೇರಾನ್ ಆಪ್ಲೆಚ್ ಶೈಲೆನ್ ಕವಿಗೋಷ್ಟಿ ಚಲೊವ್ನ್ ವ್ಹರ್‍ತಾನಾ, ಕಾವ್ಯಾಕ್ ಸಂಬಂಧ್ ಜಾಲ್ಲೆ ಥೊಡೆ ವಿಚಾರ್ ಮುಖಾರ್ ದವರ್‍ಲೆ.
ಎಚ್ಚೆಮ್ ಪೆರ್‍ನಾಳಾಚೆ ಕವಿತೆಚೆರ್ ಆಂಡ್ರ್ಯೂ ಎಲ್. ಡೀಕುನ್ಹಾನ್ ಸಂವಾದ್ ಚಲೊವ್ನ್ ವೆಲೊ. ರೋಹಿತ್ ವೆಮುಲಾಚೆಂ ಮರಣ್ ಜೀವ್ಘಾತ್ ಮ್ಹಣುನ್ ಲೆಕ್ಚ್ಯಾಕಯ್ ವೆವೆಸ್ಥೆ ವಿರೋಧ್ ಉಟಯಿಲ್ಲೊ ಆವಾಜ್ ಮ್ಹಣ್ ಲೆಕ್ಚೆಂ ಬರೆಂ ಮ್ಹಣ್ ಸಾಂಗಲ್ಲ್ಯಾ ಎಚ್ಚೆಮ್ ಪೆರ್‍ನಾಳಾನ್ 'ಹಾಂವ್ ಕವಿತಾ ಕಿತ್ಯಾಕ್ ಬರಯ್ತಾಂ' ಮ್ಹಣುನ್ ಸಾಂಗುಂಕ್ ವಚುನ್ - ಖಂಯ್ಚೇಂಯ್ ಏಕ್ ಘಡಿತ್ ಪಳೆವ್ನ್ ಏಕ್ ಮನೀಸ್ ಸ್ಪಂದನ್ ಕರ್‍ತಾನಾ, ತೊ ಅಸ್ವಸ್ಥ್ ಜಾತಾ. ತ್ಯೆ ಅಸ್ವಸ್ಥಕಾಯೆಂತ್ ಆನ್ಯೇಕ್ಲ್ಯಾಚಿ ದೂಕ್ ತಾಚಿಚ್ ಜಾತಾ. ಹಾಕಾ ಸಂವೇದನ್ ಮ್ಹಣ್ತಾತ್. ಹ್ಯಾ ಸಂವೇದನಾಂತ್ಲ್ಯಾನ್ ಏಕ್ ಸಂವಾದ್ ಚಲುನ್ ಏಕ್ ಕೃತಿ ಮ್ಹಳ್ಯಾರ್ ಏಕ್ ಕವಿತಾ ಭುಂಯ್ ಪಡ್ತಾ. ಹಿ ಕವಿತಾ ವಾಚ್ತಲ್ಯಾಕ್ ಹಾಲೊಂವ್ಕ್ ಪಾವ್ಲಿ ಜಾಲ್ಯಾರ್ ತೊ ಕ್ರಮೇಣ್ ಅಸ್ವಸ್ಥ್ ಜಾವ್ನ್ ತಾಕಾ ಪ್ರತಿಕ್ರಿಯಾ ದೀಂವ್ಕ್ ಪುರೊ. ಹೆಂ ಏಕ್ ಚಕ್ರ್. ಸೃಷ್ಟಿಶೀಳತೆಚೆಂ ಚಕ್ರ್ - ಅಶೆಂ ಸಾಂಗಲಾಗ್ಲೊ. ವಿಮರ್ಶಾವಿಶಿಂ ಉಲೊವ್ನ್ ವೆವೆಗ್ಳ್ಯಾ ವಿಮರ್ಶಾ ಶಾಳೆಂವಿಶಿಂ ಸಾಂಗುನ್ ಕೊಂಕಣಿ ಸಾಹಿತ್ಯಾಕ್ ಸಾಂಸ್ಕೃತಿಕ್ ಥಳಾಚೆರ್ ಕರ್‍ಚೊ ವಿಮರ್‍ಸೊ ಗರ್ಜ್ ಆಸಾ ಮ್ಹಣ್ ತಾಣೆಂ ಸಾಂಗ್ಲೆಂ.
ಹ್ಯೆ ಕವಿಗೋಷ್ಟಿಕ್ ಕವಿ ನ್ಹಯ್ ಆಸ್ತಾಂ - ಹೇಮಾಚಾರ್ಯ, ಎಡ್ಡಿ ಸಿಕೇರ್, ವಿನ್ಸಿ ಪಿಂಟೊ ಆಂಜೆಲೊರ್, ಐವನ್ ಸಲ್ಡಾನ್ಹಾ, ಫಾ. ಸ್ಟೀವನ್ ಕಾರ್ಮೆಲಿತ್, ಡೆನಿಸ್ ಮೊಂತೇರೊ, ರಾಮಚಂದ್ರ ಭಂಡಾರ್ಕಾರ್, ವಾಯ್ಲೆಟ್ ಪಾಯ್ಸ್, ಟ್ರಸ್ಟಿ ಎವ್ರೆಲ್ ರೊಡ್ರಿಗಸ್, ಸುರೇಶ್, ಪಿಂಟೊ ವಾಮಂಜೂರ್, ಜೆ. ಎಫ್. ಡಿಸೊಜಾ ಅತ್ತಾವರ್, ರೊನ್ ರೊಚ್ ಕಾಸ್ಸಿಯಾ ಹಾಜರ್ ಆಸಲ್ಲಿಂ.
ಮೆಲ್ವಿನ್ ರೊಡ್ರಿಗಸಾನ್ ಆಂಡ್ರ್ಯೂ ಎಲ್ ಡಿಕುನ್ಹಾ, ಎಚ್ಚೆಮ್ ಪೆರ್‍ನಾಳ್ ಆನಿ ಜೇಸನ್ ಸಿಕ್ವೇರಾಕ್ ಪುಸ್ತಕಾಂ ದೀವ್ನ್ ಮಾನ್ ಕೆಲೊ.
वेमुलाचें मरण वेवस्थे विरोध उटयिल्लो आवाज: कविता ट्रस्टाचे कवीगोष्टींत एच्चेम
कविता ट्रस्टान मांडून हाडल्ली मार्च म्हयन्याची कवीगोष्टी, वाचन केल्ल्या कवितां खातीर मात्र न्हय आसतां, कवितेचेर चलल्ल्या महत्वाच्या संवादा खातीर रंगली. ह्याच २०१६ मार्च म्हयन्याचे १३ तारिकेर मंगळूर शेरांतल्या हंपनकट्टा लागसार आसच्या गॅलरी ऑर्कीडांत चलल्ली ही कवीगोष्टी कवी जेसन सिकवेरान चलोवन वेली. उपरांत आंडऱ्यू डिकुन्हान, एच्चेम पेरनाळा सांगाता कवितेचेर संवाद चलोवन हाजर आसल्ल्यांक चिंतनांच्या नव्या संसाराक आपोवन वेलें.
सुरवेर ट्रस्टी तशें गॅलरी ऑर्कीडाचो म्हालक विलियम पायसान येवकार दितच, मेल्विन रोड्रिगसान कविता ट्रस्टाच्या शेवोटाविशीं तशें वावराविशीं विवर दिलो. एल्येर ताकोडेन थोडीं चुटकुलां वाचल्या उपरांत नवीन कुलशेकरान 'तर्नो बोंगो' आनी 'आमच्या पात्काक शिक्षा' सादर केल्यो. रिच्ची पिरेरीन थोडीं चुटकुलां आनी 'कविचो खेळ' म्हळ्ळी कविता वाचली तर विल्सन कटीलाची 'वेपार' कविता मार्मीक जावनासली. फेल्सी लोबोन, गांवांत उटल्ल्या दगलबाजी, भृश्टाचार, अनैतिकतेच्या वादाळाविशीं कविता वाचताना, आंडऱ्यू एल. डिकुन्हान आपल्या 'आयेराचो बू' पुस्तकांतली, 'खुरसांवचें योजन' कविता वाचून सांगली. चारली सोज, येय्याडीन 'एत्तीना होळे' कामगारिविशीं कविता सादर केली जाल्यार गीता किणीन 'चंचल मन' आनी 'सपण' कविता वाचल्यो. मेल्विन रोड्रिगसान स्वाभिमान पाचारच्यो दोन कविता 'म्हजें घर' आनी 'फिंतां' ताच्या 'वाट' पुस्तकांतल्यो वाचल्यो. जेसन सिकवेरान 'दंध्यांचें शेर' आनी 'वसंत' कविता वाचल्यो आनी एच्चेम पेरनाळान आयलेवार कविता.कॉम जाळी जाग्यार पर्गट जाल्ली 'कारण नासतां मरचें कशें?' कविता सादर केली. जेसन सिकवेरान आपलेच शैलेन कवीगोष्टी चलोवन व्हरताना, काव्याक संबंध जाल्ले थोडे विचार मुखार दवरले.
एच्चेम पेरनाळाचे कवितेचेर आंडऱ्यू एल. डिकुन्हान संवाद चलोवन वेलो. रोहीत वेमुलाचें मरण जीवघात म्हणून लेकच्याकय वेवेस्थे विरोध उटयिल्लो आवाज म्हण लेकचें बरें म्हण सांगल्ल्या एच्चेम पेरनाळान 'हांव कविता कित्याक बरयतां' म्हणून सांगुंक वचून - खंयचेंय एक घडीत पळेवन एक मनीस स्पंदन करताना, तो अस्वस्थ जाता. त्ये अस्वस्थकायेंत आन्येकल्याची दूक ताचीच जाता. हाका संवेदन म्हणतात. ह्या संवेदनांतल्यान एक संवाद चलून एक कृती म्हळ्यार एक कविता भुंय पडता. ही कविता वाचतल्याक हालोवंक पावली जाल्यार तो क्रमेण अस्वस्थ जावन ताका प्रतिक्रिया दीवंक पुरो. हें एक चक्र. सृषटिशीळतेचें चक्र - अशें सांगलागलो. विमर्शाविशीं उलोवन वेवेगळ्या विमर्शा शाळेंविशीं सांगून कोंकणी साहित्याक सांसकृतीक थळाचेर करचो विमरसो गर्ज आसा म्हण ताणें सांगलें.
ह्ये कवीगोष्टीक कवी न्हय आसतां - हेमाचाऱ्या, एड्डी सिकेर, विन्सी पिंटो आंजेलोर, आयवन सलडान्हा, फा. स्टीवन कार्मेलीत, डेनीस मोंतेरो, रामचंद्र भंडार्कार, वायलेट पायस, ट्रस्टी एवरेल रोड्रिगस, सुरेश, पिंटो वामंजूर, जे. एफ. डिसोजा अत्तावर, रोन रोच कास्सिया हाजर आसल्लीं.