ಕವಿ ಜೀವ್ ಆಸ್ತಾನಾಂಚ್ ಜಾಯ್ತೆ ಪಾವ್ಟಿಂ ಮರ್‍ತಾ: ಬಜ್ಜೋಡಿಂತ್ ಚಲಲ್ಲೆ 'ಕವಿತಾ ಭಿಂಗಾರಿಂತ್' ಜೊ. ಸಿ. ಸಿದ್ದಕಟ್ಟೆ
ಹ್ಯಾಚ್ ಮಾಯ್ ಮ್ಹಯ್ನ್ಯಾಚೆ 15 ತಾರಿಕೆರ್, ಕವಿತಾ ಟ್ರಸ್ಟ್ ಆನಿ ‘ನಮಾನ್ ಬಾಳೊಕ್ ಜೆಜು’ ಕೊಂಕ್ಣಿ ಮ್ಹಯ್ನ್ಯಾಳ್ಯಾಚ್ಯಾ ಸಾಂಗಾತ್ಪಣಾಖಾಲ್ ಭುರ್ಗ್ಯಾಂಚೊ ಕವಿತಾ ಮೇಳ್ ಚಲ್ಲೊ. ಸಾಂಜೆಚ್ಯಾ ಸಾಡೆ-ಚ್ಯಾರ್ ವೊರಾಂಕ್ ಬಾಳ್ ಮರಿ ಇಗರ್ಜ್, ಬಜ್ಜೋಡಿ ಹಾಂಗಾಚ್ಯಾ ಸಭಾಸಾಲಾಂತ್ ಚಲಲ್ಲ್ಯಾ ಹ್ಯಾ ಕಾರ್ಯಾಕ್ ‘ಕವಿತಾ ಭಿಂಗಾರಿ’ ಮ್ಹಣ್ ವೊಲಾಯಿಲ್ಲೆಂ. ಹ್ಯಾ ಆಪುರ್ಬಾಯೆಚ್ಯಾ ಕಾರ್ಯಾಂತ್ ಬಜ್ಜೋಡಿ ತಶೆಂ ಆಸ್‍ಪಾಸ್ಚ್ಯಾ ಗಾಂವ್ಚ್ಯಾ ಥೊಡ್ಯಾ ಭುರ್ಗ್ಯಾಂನಿ ಭಾಗ್ ಘೆವ್ನ್ ಜಮ್ಲೆಲ್ಯಾಂಕ್ ಕವಿತೆಚೆಂ ರೊಸಾಳ್ ಜೆವಣ್ ವಾಡ್ಲೆಂ.
ಸುರ್‍ವೆರ್ ವಿನ್ಸಿ ಪಿಂಟೊ ಆಂಜೆಲೊರ್ ಹಾಣೆ ಕಾರ್ಯಾಪಾಟ್ಲ್ಯಾ ಶೆವೊಟಾವಿಶಿಂ ಮ್ಹಾಯೆತ್ ದಿಲಿ ಆನಿ ಹಾಜರ್ ಆಸ್ಲಲ್ಯಾಂಕ್ ಯೆವ್ಕಾರ್ ಮಾಗ್ಲೊ. ಕವಿ ನೆಲ್ಲು ಪೆರ್ಮನ್ನೂರ್ ಹಾಚ್ಯೆ ಕವಿತೆಕ್ ಬಾಪ್ ಜೊ.ಸಿ. ಸಿದ್ದಕಟ್ಟೆ ಹಾಂಣಿ ತಾಳೊ ಬಸಯಿಲ್ಲೆಂ, ‘ಕೊಂಕ್ಣಿಕ್ ನಮಾನ್’ ಗೀತ್ ಕ್ಲಿಯೋನ್ ಡಿ’ಸಿಲ್ವಾ ಹಾಣೆಂ ಗಾವ್ನ್ ಕಾರ್ಯಾಕ್ ಸುರ್ವಾತ್ ದಿಲಿ. ತ್ಯಾ ಉಪ್ರಾಂತ್ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಂಣಿ ಕವಿತೆಕ್ ಲಗ್ತಿ ಥೊಡ್ಯೊ ಗಜಾಲಿ ತಶೆಂಚ್ ಕವಿತಾ ಟ್ರಸ್ಟಾಚ್ಯಾ ವಾವ್ರಾವಿಶಿಂ ಮ್ಹಾಯೆತ್ ಆಟಾಪ್ಚೆಂ ಉಲೊವ್ಪ್ ಕೆಲೆಂ. 'ಕವಿಂಚೆಂ ಮನ್ ತಶೆಂ ಕವಿತೆನ್ ದಿಂವ್ಚೆಂ ಸುಖ್, 'ನಮಾನ್ ಬಾಳೊಕ್ ಜೆಜು' ಬರ್‍ಯಾನ್ ವೊಳ್ಕತಾ. ಕವಿಂಕ್ ತಶೆಂ ಕವಿತೆಕ್ ಹೆಂ ಪತ್ರ್ ಬರ್ಪೂರ್ ಮರ್ಯಾದ್ ದಿತಾ ಆನಿ ಹುಮೆದಿನ್ ಭರ್‍ತಾ. ತ್ಯಾದೆಕುನ್ 'ನಮಾನ್ ಬಾಳೊಕ್ ಜೆಜು' ಪತ್ರಾ ಸಾಂಗಾತಾ ಅಸಲೊ ಏಕ್ ಸುವಾಳೊ ಕವಿತಾ ಟ್ರಸ್ಟಾನ್ ಘಡೊವ್ನ್ ಹಾಡ್ಲಾ' ಅಶೆಂ ಮ್ಹಣಾಲೊ ಮೆಲ್ವಿನ್ ರೊಡ್ರಿಗಸ್. ತ್ಯಾ ಉಪ್ರಾಂತ್ ಧಾ ಭುರ್ಗ್ಯಾಂನಿ ವಿಂಚ್ಣಾರ್ ಕವಿಂಚ್ಯೊ ವೆವೆಗ್ಳ್ಯೊ ಕವಿತಾ ಆಪಾಪ್ಲೆ ಶೈಲೆಂನಿ ಪೇಶ್ ಕೆಲ್ಯೊ. ಚ್ಯಾರ್ ವರ್ಸಾಂಚ್ಯಾ ಭುರ್ಗ್ಯಾಥಾವ್ನ್ ಧರ್ನ್ ಪಂದ್ರಾ ವರ್ಸಾಂ ಭಿತರ್ಲ್ಯಾ ಭುರ್ಗ್ಯಾಂನಿ ಹಾಂತುಂ ಭಾಗ್ ಘೆತಲ್ಲೊ. ತಿಂ ಭುರ್ಗಿಂ ಆಸಾತ್: ಶಿವೋನ್ ಸೆರಾವೊ, ಮೂಡಬಿದ್ರಿ, ಓಸ್ಟಿನ್ ಡಿಕುನ್ಹಾ ಇಜಯ್, ಸಾರಾ ಡಿಸೋಜಾ, ಕ್ರೀತನ್ ಡಿಸೋಜಾ, ರೆನಾಲ್ಡ್ ಲೋಬೊ, ನೇಹಾ ಮೆಂಡೋನ್ಸಾ, ಎಸ್ಟನ್ ಮಸ್ಕರೇನ್ಹಸ್, ಜೊಸ್ವಿನ್ ಪಿಂಟೊ, ರಿಶಾಲ್ ಸುವರ್ಣ, ನೀಶಲ್ ಕ್ರಾಸ್ತಾ.
ನಾಮ್ಣೆಚೊ ದಿಗ್ದರ್ಶಕ್ ಜೋನ್ ಎಮ್. ಪೆರ್ಮನ್ನೂರ್ ಆನಿ ಜೊ.ಸಿ. ಸಿದ್ದಕಟ್ಟೆ ಹಾಂಚ್ಯೆ ಮ್ಹಿನತೆನ್ ಏಕ್ ವಿಶಿಸ್ಟ್ ಕವಿತಾ ರೂಪಕ್ ಭುರ್ಗ್ಯಾಂನಿ ಮಾಂಚಿಯೆರ್ ಸಾದರ್ ಕೆಲೆಂ. ಕವಿ ಆಂಡ್ರ್ಯೂ ಎಲ್. ಡಿ’ ಕುನ್ಹಾ ಹಾಂಚ್ಯಾ ‘ಕೆಂಚಾ ಆನಿ ಬೊಲ್ಲಾ’ ಕವಿತೆಕ್ ವಿವಿಧ್ ಆಯಾಮಾಂನಿ ತುಕುನ್ ಗುಂತ್ಲಲೆಂ ಆಪುರ್ಬಾಯೆನ್ ಮಾಂಡುನ್ ಹಾಡ್'ಲ್ಲೆಂ. ಕವಿತಾ ಪೇಶ್ ಕೆಲ್ಲ್ಯಾ ಆನಿ ರೂಪಕಾಂತ್ ಪಾತ್ರ್ ಘೆತ್'ಲ್ಲ್ಯಾ ಭುರ್ಗ್ಯಾಂಕ್ ಬಾಳ್ ಮರಿ ಫಿರ್ಗಜ್, ಬಜ್ಜೋಡಿಚೊ ಉಪಾಧ್ಯಕ್ಷ್ ಹಾಣಿಂ ಕಾಣಿಕ್ ದಿಲಿ. ಜೊಸ್ವಿನ್, ಜೆನ್ಸನ್, ಲ್ಯಾರನ್, ಕ್ರೀತನ್ ಡಿಸೋಜಾ, ಏನ್ನನ್, ಕ್ಲಿಯೋನ್, ಏಸ್ಟನ್, ಶ್ರೇಯಸ್, ಆವ್ನೆಲ್, ನೀಶಲ್ ಕ್ರಾಸ್ತಾ, ರಿಶಾಲ್ ಸುವರ್ಣ, ನೇಹಾ - ಹ್ಯಾ ಭುರ್ಗ್ಯಾಂನಿ ಹ್ಯಾ ರೂಪಕಾಂತ್ ಭಾಗ್ ಘೆತಲ್ಲೊ. ಕೆವಿನ್ ಪಿಂಟೊನ್ ಹ್ಯಾ ಸಂದರ್ಭಾರ್ ಕೆನ್ನಿಚೆಂ ಫಾಮಾದ್ ಏಕ್ ಪದ್ ಗಾವ್ನ್ ಹಾಜರ್ ಆಸಲ್ಲ್ಯಾಂಕ್ ಖುಶಿ ಕೆಲೆಂ.
ಹಾಜರ್ ಆಸ್'ಲ್ಲ್ಯಾ ‘ನಮಾನ್ ಬಾಳೊಕ್ ಜೆಜು’ ಮ್ಹಯ್ನ್ಯಾಳ್ಯಾಚೊ ಸಂಪಾದಕ್ ಮಾನಾದಿಕ್ ಬಾಪ್ ಸ್ಟೀವನ್ ಪಿರೇರ್ ಹಾಂಕಾಂ, ಕೊಂಕ್ಣಿ ಕವಿತಾ ಶೆತಾಕ್ ಪತ್ರಾ ಮುಕಾಂತ್ರ್ ಬಳಿಶ್ಟ್ ಪಾಟಿಂಬೊ ದಿಲ್ಲ್ಯಾಕ್ ಶಾಲ್ ಪಾಂಗ್ರುನ್ ಮಾನ್ ಕೆಲೊ. ವಿಲ್ಸನ್ ಕಟೀಲ್, ಮೆಲ್ವಿನ್ ರೊಡ್ರಿಗಸ್ ಆನಿ ಬಾಪ್ ಜೊ. ಸಿ. ಸಿದ್ದಕಟ್ಟೆ ಹ್ಯಾ ಸಂದರ್ಭಾರ್ ಮಾಂಚಿಯೆರ್ ಆಸಲ್ಲೆ.
ತ್ಯಾ ಉಪ್ರಾಂತ್ ವ್ಹಡಾಂಚಿ ಕವಿತಾ ಗೋಶ್ಟಿ ಬಾಪ್ ಜೊ.ಸಿ. ಸಿದ್ದಕಟ್ಟೆ, ಕಾರ್ಮೆಲಿತ್ ಹಾಂಚ್ಯಾ ಮುಕೆಲ್ಪಣಾರ್ ಚಲ್ಲಿ. 'ಕವಿ ಮರನಾ, ಅಶೆಂ ಆಮಿ ಸಾಂಗ್ತಾಂವ್. ಹೆಂ ಸತ್. ಕವಿ ಆಪ್ಲ್ಯಾ ಕವಿತಾಂ ಮಾರಿಫಾತ್ ಸದಾಂಕಾಳ್ ಜಿಯೆತಾ. ಪುಣ್ ಜೀವಂತ್ ಆಸ್ಚೊ ಕವಿ ಜಾಯ್ತೆ ಪಾವ್ಟಿಂ ಮರ್‍ತಾ. ಆಪ್ಲ್ಯಾ ಭೊಂವಾರಾಂತ್ಲ್ಯಾ ಸಂಗ್ತಿಂಕ್ ಕಾನ್-ದೊಳೆ ಧಾಂಪುನ್, ಕಾಂಯಿಂಚ್ ಸ್ಪಂದನ್ ಕರಿನಾಸ್ತಾಂ ವೊಗೊಚ್ ಬಸಲ್ಲ್ಯಾವೆಳಾರ್ ತೊ ಮರ್‍ತಾ' ಅಶೆಂ ಮ್ಹಣಾಲೊ ಬಾಪ್ ಜೊ. ಸಿ. ಸಿದ್ದಕಟ್ಟೆ. ತೊ ಕವಿಗೋಷ್ಟಿಚೊ ಅಧ್ಯಕ್ಷ್ ಜಾವ್ನ್ ಉಲಯ್ತಾಲೊ. ಕವಿ - ಫೆಲ್ಸಿ ಲೋಬೊ ದೆರೆಬಯ್ಲ್, ರೋಶು ಬಜ್ಪೆ, ಆಂಡ್ರ್ಯೂ ಎಲ್. ಡಿ’ ಕುನ್ಹಾ, ಮೆಲ್ವಿನ್ ರೊಡ್ರಿಗಸ್, ವಿಲ್ಸನ್ ಕಟೀಲ್, ನವೀನ್ ಪಿರೇರಾ ಸುರತ್ಕಲ್, ಆಲ್ವಿ ದಾಂತಿ ಪೆರ್ನಾಲ್ ಆನಿ ಸ್ವತಾ ಜೊ. ಸಿ. ಸಿದ್ದಕಟ್ಟೆ ಹಾಣಿಂ ಆಪ್ಲ್ಯೊ ಕವಿತಾ ಪೇಶ್ ಕೆಲ್ಯೊ. ಗುಲೊಬ್ ದೀವ್ನ್ ಗೋಶ್ಟಿಂತ್ ಭಾಗ್ ಘೆತ್'ಲ್ಲ್ಯಾ ಕವಿಂಕ್ ಬಾಪ್ ಸ್ಟೀವನಾನ್ ಧಿನ್ವಾಸ್ಲೆಂ.
ಆಖ್ಖೆಂ ಕಾರ್ಯೆಂ ದಾಯ್ಜಿ ವಾಂಗ್ಡಿ ವಿನ್ಸಿ ಪಿಂಟೊ, ಆಂಜೆಲೊರ್ ಹಾಣೆಂ ಚಲವ್ನ್ ವ್ಹೆಲೆಂ. ಹ್ಯಾ ಕಾರ್ಯಾಕ್ ಕವಿ ಎಡ್ಡಿ ಸಿಕೇರ್, ಎಚ್ಚೆಮ್ ಪೆರ್‍ನಾಳ್, ಕಾದಂಬರಿಕಾರ್ ರೊನ್ ರೊಚ್ ಕಾಸ್ಸಿಯಾ, ಟ್ರಸ್ಟಿ ಎವ್ರೆಲ್ ರೊಡ್ರಿಗಸ್ ಹಾಜರ್ ಆಸಲ್ಲಿಂ.
ತಸ್ವಿರ್‍ಯೊ: ಜೊಸ್ವಿನ್ ಪಿಂಟೊ, ಬಜ್ಜೋಡಿ
कवी जीव आसतानांच जायते पावटीं मरता: बज्जोडी 'कविता भिंगारिंत' जो. सी. सिद्दकट्टे
ह्याच माय म्हयन्याचे १५ तारिकेर, कविता ट्रस्ट आनी ‘नमान बाळोक जेजू’ कोंकणी म्हयन्याळ्याच्या सांगात्पणाखाल भुरग्यांचो कविता मेळ चल्लो. सांजेच्या साडे-च्यार वोरांक बाळ मरी इगर्ज, बज्जोडी हांगाच्या सभासालांत चलल्ल्या ह्या काऱ्याक ‘कविता भिंगारी’ म्हण वोलायिल्लें. ह्या आपुरबायेच्या काऱ्यांत बज्जोडी तशें आसपासच्या गांवच्या थोड्या भुरग्यांनी भाग घेवन जमलेल्यांक कवितेचें रोसाळ जेवण वाडलें.
सूरवेर विन्सी पिंटो आंजेलोर हाणे काऱ्यापाटल्या शेवोटाविशीं म्हायेत दिली आनी हाजर आसलल्यांक येवकार मागलो. कवी नेल्लू पेर्मन्नूर हाच्ये कवितेक बाप जो.सी. सिद्दकट्टे हांणी ताळो बसयिल्लें, ‘कोंकणीक नमान’ गीत क्लियोन डी’सिलवा हाणें गावन काऱ्याक सुर्वात दिली. त्या उपरांत कवी मेल्विन रोड्रीगस हांणी कवितेक लगती थोड्यो गजाली तशेंच कविता ट्रस्टाच्या वावराविशीं म्हायेत आटापचें उलोवप केलें. 'कविंचें मन तशें कवितेन दिंवचें सूख, 'नमान बाळोक जेजू' बरयान वोळकता. कविंक तशें कवितेक हें पत्र बर्पूर मऱ्याद दिता आनी हुमेदीन भरता. त्यादेकून 'नमान बाळोक जेजू' पत्रा सांगाता असलो एक सुवाळो कविता ट्रस्टान घडोवन हाडला' अशें म्हणालो मेल्विन रोड्रीगस्स. त्या उपरांत धा भुरग्यांनी विंचणार कविंच्यो वेवेगळ्यो कविता आपापले शैलेंनी पेश केल्यो. च्यार वरसांच्या भुरग्या थावन धर्न पंद्रा वर्सां भितरल्या भुरग्यांनी हांतूं भाग घेतल्लो. तीं भुर्गीं आसात: शिवोन सेरावो, मूडबिद्री, ऑस्टीन डिकुन्हा इजय, सारा डिसोजा, क्रीटन डिसोजा, रेनोल्ड, नेहा मेंडोन्सा, एस्टन मस्करेन्हस, जोस्वीन पिंटो, रेशल सुवर्ण, नीशल.
नामणेचो दिगदर्शक जोन एम. पेर्मन्नूर आनी जो.सी. सिद्दकट्टे हांच्ये म्हिनतेन एक विशिस्ट कविता रूपक भुरग्यांनी मांचियेर सादर केलें. कवी आंडऱ्यू एल. डी’ कुन्हा हांच्या ‘केंचा आनी बोल्ला’ कवितेक विवीध आयामांनी तुकून गुंतललें हें रूपक आपुरबायेन मांडून हाड'ल्लें. कविता पेश केल्ल्या आनी रूपकांत पात्र घेत'ल्ल्या भुरग्यांक बाळ मरी फिर्गज, बज्जोडिचो उपाध्यक्ष हाणीं काणीक दिली. जोस्वीन, जेन्सन, ल्यारन, क्रीटन, एनन, क्लियोन, एस्टन, श्रेयस, आवनेल, नीशल, रेशल, नेहा - ह्या भुरग्यांनी ह्या रूपकांत भाग घेतल्लो. क्लियोन डिसिलवान ह्या संदर्भार केन्निचें फामाद एक पद गावन हाजर आसल्ल्यांक खुशी केलें.
हाजर आस'ल्ल्या ‘नमान बाळोक जेजू’ म्हयन्याळ्याचो संपादक मानादीक बाप स्टीवन पिरेर हांकां, कोंकणी कविता शेताक पत्रा मुकांत्र बळिश्ट पाटिंबो दिल्ल्याक शाल पांग्रून मान केलो. विल्सन कटील, मेल्विन रोड्रीगस आनी बाप जो. सी. सिद्दकट्टे ह्या संदर्भार मांचियेर आसल्ले.
त्या उपरांत व्हडांची कविता गोश्टी बाप जो.सी. सिद्दकट्टे, कार्मेलीत हांच्या मुकेल्पणार चल्ली. 'कवी मरना, अशें आमी सांग्तांव. हें सत. कवी आपल्या कवितां मारिफात सदांकाळ जियेता. पूण जीवंत आसचो कवी जायते पावटीं मरता. आपल्या भोंवारांतल्या संग्तिंक कान-दोळे धांपून, कांयिंच स्पंदन करिनासतां वोगोच बसल्ल्यावेळार तो मरता' अशें म्हणालो बाप जो. सी. सिद्दकट्टे. तो कविगोषटिचो अध्यक्ष जावन उलयतालो. कवी - फेल्सी लोबो देरेबयल, रोशू बजपे, आंडऱ्यू एल. डी’ कुन्हा, मेल्विन रोड्रिगस, विल्सन कटील, नवीन पिरेरा सुरत्कल, ऑलवी दांती पेर्नाल आनी स्वता जो. सी. सिद्दकट्टे हाणीं आपल्यो कविता पेश केल्यो. गुलोब दीवन गोश्टिंत भाग घेत'ल्ल्या कविंक बाप स्टीवनान धिन्वासलें.
आख्खें काऱ्यें दायजी वांगडी विन्सी पिंटो, आंजेलोर हाणें चलवन व्हेलें. ह्या काऱ्याक कवी एड्डी सिकेर, एच्चेम पेरनाळ, कादंबरिकार रोन रोच कास्सिया, ट्रसटी एवरेल रोड्रिगस हाजर आसल्लीं.
तस्वीऱ्यो : जोस्वीन पिंटो, बज्जोडी