ಕವಿತಾ ಟ್ರಸ್ಟಾಚಿ ಕವಿತಾ ವಾಚನ್ ಸರ್ತ್: ಮಂಗ್ಳುರ್ ಥಾವ್ನ್ ಬಾರಾ ಜಣಾಂ ಫೈನಲಾಕ್
ಕವಿತಾ ಟ್ರಸ್ಟ್ ಹಾಂಣಿ ಕೊಂಕಣಿ ನಾಟಕ್ ಸಭಾ ಮಂಗ್ಳುರ್ ಹಾಂಚ್ಯಾ ಸಹಯೋಗಾಖಾಲ್ ಕೊಂಕಣಿ ಕವಿತಾ ವಾಚನ್ ಸರ್ತ್ ಹ್ಯಾಚ್ ಸಪ್ಟೆಂಬರ್ 4 ತಾರಿಕೆರ್ ಆಯ್ತಾರಾ ಸಕಾಳಿಂ ಡೊನ್ ಬೊಸ್ಕೊ ಸಾಲಾಂತ್ ಮಾಂಡುನ್ ಹಾಡಲ್ಲಿ. ಪಂದ್ರಾ ವರ್ಸಾಂ ಸಕಯ್ಲ್ಯಾ ಭುರ್ಗ್ಯಾಂಕ್, ಪಂದ್ರಾ ಥಾವ್ನ್ ತೀಸ್ ವರ್ಸಾಂ ಭಿತರ್‍ಲ್ಯಾ ಯುವಜಣಾಂಕ್ ತಶೆಂ ತೀಸ್ ವರ್ಸಾಂ ವಯ್ಲ್ಯಾಂಕ್ - ಅಶೆಂ ತೀನ್ ವಿಭಾಗಾಂನಿ ಹಿ ಸರ್ತ್ ಚಲ್ಲಿ.
ಸುರ್‍ವೆರ್ ಕೊಂಕಣಿ ನಾಟಕ್ ಸಭೆಚೊ ಆದ್ಲೊ ಅಧ್ಯಕ್ಷ್ ಫಾ ವೈಟಸ್ ಪ್ರಭುದಾಸ್ ಹಾಂಣಿ ಸರ್ವಾಂಕ್ ಯೆವ್ಕಾರ್ ಮಾಗ್ಲೊ. "ವೊರಯ್ಣಾರ್ ಸ್ಪರ್ಧಿಕಾಂಚಿಂ ಸಾಂಗಾತಿ. ಜಿಕ್ಚೆಂ ಯಾ ಸಲ್ವುಂಚೆಂ ಪ್ರಮುಖ್ ನ್ಹಯ್, ಅಸಲ್ಯಾ ಸ್ಪರ್ಧ್ಯಾಂನಿ ಭಾಗ್ ಘೆಂವ್ಚೆಂ ಎಕ್ಲ್ಯಾಕ್ ಮೆಳ್ಯೆತಾ ಜಾಲ್ಲೆಂ ವ್ಹರ್ತೆಂ ಇನಾಮ್. ಕೊಂಕಣಿ ಕವಿತಾ ಲೊಕಾಮೊಗಾಳ್ ಜಾತೇ ಆಸಾ ತಿ ವ್ಹರ್ತೆ ದಾಧೊಸ್ಕಾಯೆಚಿ ಗಜಾಲ್" ಅಶೆಂ ತಾಂಣಿ ಸಾಂಗ್ಲೆಂ. ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಸರ್ತೆಚಿಂ ನೆಮಾಂ ಸಾಂಗ್ಲಿಂ ಮಾತ್ರ್ ನ್ಹಯ್ "ಕೊಂಕಣಿ ನಾಟಕ್ ಸಭಾ ತಸಲೊ ಪಾವನ್ಶೆಂ ವರ್ಸಾಂಚೊ ಇತಿಹಾಸ್ ಆಸ್ಚೊ ಸಂಸ್ಥೊ ಆನಿ ಕವಿತೆಚೆ ಸಮಗ್ರ್ ವಾಡಾವಳಿ ಖಾತೀರ್ ವಾವುರ್‍ಚೆಂ ಕವಿತಾ ಟ್ರಸ್ಟ್ - ಹಾಂಣಿ ಸಾಂಗಾತಾ ಮೆಳುನ್ ಮಾಂಡುನ್ ಹಾಡ್ಚೊ ಹೊ ಸ್ಪರ್ಧೊ ಲೊಕಾಮೊಗಾಳ್ ಜಾಯೀತ್ ಆಸಾ" ಮ್ಹಣು ಸಾಂಗುನ್ ಕೊಂಕಣಿ ನಾಟಕ್ ಸಭೆಚೊ ಉಪ್ಕಾರ್ ತಾಣೆ ಆಟಯ್ಲೊ.
ಭುರ್ಗ್ಯಾಂಚ್ಯಾ ವಿಭಾಗಾಂತ್ ತೆರಾ ಜಣಾಂನಿ, ಯುವಜಣಾಂಚ್ಯಾ ವಿಭಾಗಾಂತ್ ತೆರಾ ಜಣಾಂಣಿ ಆನಿ ವ್ಹಡಾಂಚ್ಯಾ ವಿಭಾಗಾಂತ್ ಪಂದ್ರಾ ಜಣಾಂನಿ ವಾಂಟೊ ಘೆತಲ್ಲೊ. ಕವಿತಾ ಟ್ರಸ್ಟಾಚಿಂ ಟ್ರಸ್ಟಿ - ವಿಲಿಯಮ್ ಪಾಯ್ಸ್, ಎವ್ರೆಲ್ ರೊಡ್ರಿಗಸ್ ಆನಿ ಕಿಶೋರ್ ಗೊನ್ಸಾಲ್ವಿಸ್ ಹಾಂಣಿ ವೊರಯ್ಣಾರ್ ಜಾವ್ನ್ ಸಹಕಾರ್ ದಿಲ್ಲೊ. ವಿತೊರಿ ಕಾರ್ಕೊಳ್ ಹಾಣೆ ಸರ್ತೆಚೆಂ ಸೂತ್ರ್ ಸಂಚಾಲನ್ ಘೆತಲ್ಲೆಂ. ಎಂಡ್ರ್ಯೂ ಎಲ್ ಡಿಕುನ್ಹಾನ್ ಧನ್ಯವಾದ್ ದಿಲೆ.
ಹೊ ಸ್ಪರ್ಧೊ ಕವಿತಾ ಟ್ರಸ್ಟಾನ್ ತಿಸ್ರ್ಯಾ ವರ್ಸಾ ಮಾಂಡುನ್ ಹಾಡ್ಚ್ಯಾ ನೆಲ್ಸನ್ ಅನಿ ಲವೀನಾ ರೊಡ್ರಿಕ್ಸ್ - ಚಾಫ್ರಾ ದೆಕೊಸ್ತಾ ಸ್ಮಾರಕ್ ಭುರ್ಗ್ಯಾಂಚಿ ಕೊಂಕಣಿ ಕವಿತಾ ವಾಚನ್ ಸರ್ತ್ ತಶೆಂಚ್ ಸವ್ಯಾ ವರ್ಸಾ ಮಾಂಡುನ್ ಹಾಡ್ಚ್ಯಾ ರೋಹನ್ ಆನಿ ಲವೀಟಾ ಮೊಂತೇರೊ ಯುವಜಣಾಂಚಿ ಕೊಂಕಣಿ ಕವಿತಾ ವಾಚನ್ ಸರ್ತ್ - ಹ್ಯೆ ಸರ್ತೆಂಚ್ಯಾ ಪ್ರಾಥಮಿಕ್ ಹಂತಾಚ್ಯಾ ಸ್ಪರ್ಧ್ಯಾ ಬರಾಬರ್ ಚಲ್ಲೊ.
ಭಾಗ್ ಘೆತಲ್ಲ್ಯಾ ಸರ್ವಾಂಕ್ ಫಾ ವೈಟಸ್ ಪ್ರಭುದಾಸ್ ಹಾಂಣಿ ಕವಿತಾ ಪಬ್ಲಿಕೇಶನ್ಸ್ ಹಾಂಣಿ ಪರ್ಗಟ್ ಕೆಲ್ಲೆಂ ವಲ್ಲಿ ವಗ್ಗಾಚೆಂ "ನೆಕೆತ್ರಾಂ" ಕವಿತೆಚೆಂ ಪುಸ್ತಕ್ ಆನಿ ಪ್ರಮಾಣ್ ಪತ್ರಾಂ ದಿಲಿಂ. ಹ್ಯಾ ಸಂದರ್ಭಾರ್ ಕೊಂಕಣಿ ನಾಟಕ್ ಸಭೆಚೊ ಕಾರ್ಯದರ್ಶಿ ಸುನೀಲ್ ಮಿನೇಜಸ್ ಹಾಜರ್ ಆಸಲ್ಲೊ.
ಪಂದ್ರಾ ವರ್ಸಾಂ ಸಕಯ್ಲ್ಯಾಂ ಭುರ್ಗ್ಯಾಂಚೊ ವಿಭಾಗ್:
ಪಯ್ಲೆಂ: ಏಲ್ಡನ್ ವಿನೊಯ್ ಡಿಸೋಜಾ, ಬಜ್ಪೆ
ದುಸ್ರೆಂ: ಓಸ್ಟಿನ್ ಡಿಕುನ್ಹಾ, ಇಜಯ್
ತಿಸ್ರೆಂ: ಲಿಯೋನಾ ಎಲಿಸನ್ ಡಿಸೋಜಾ, ಇಜಯ್
ಪಂದ್ರಾ ಥಾವ್ನ್ ತೀಸ್ ವರ್ಸಾಂ ಭಿತರ್‍ಲ್ಯಾ ಯುವಜಣಾಂಚೊ ವಿಭಾಗ್:
ಪಯ್ಲೆಂ: ಎಮ್ಲಿನ್ ಡಿಸೋಜಾ, ಆಂಜೆಲೊರ್
ದುಸ್ರೆಂ: ನಿಲಿಶಾ ಆಂಜೆಲಿನ್ ಡಿಸೋಜಾ, ಇಜಯ್
ತಿಸ್ರೆಂ: ಪ್ರೀತಿ ಮಾರ್ತಾ ಡಿಸೋಜಾ, ಸಾಂತ್ ಆನ್ನ್ ಶಿಕ್ಷಣ್ ಸಂಸ್ಥೊ
ತೀಸ್ ವರ್ಸಾಂ ವಯ್ಲ್ಯಾಂಚೊ ವಿಭಾಗ್:
ಪಯ್ಲೆಂ: ಐರಿನ್ ಪಿಂಟೊ, ಬಜ್ಜೋಡಿ
ದುಸ್ರೆಂ: ಎಡಿಲೇಡ್ ಡೆಸಾ, ಇಜಯ್
ತಿಸ್ರೆಂ: ಸಂತೋಶ್ ಪಿ. ವೇಗಸ್, ಬಜ್ಜೋಡಿ
ಹ್ಯಾ ವಿಜೇತಾಂಕ್ ಸಪ್ಟೆಂಬರ್ 24 ತಾರಿಕೆರ್ ಡೊನ್ ಬೊಸ್ಕೊ ಹೊಲಾಂತ್ ಸಾಂಜೆಚ್ಯಾ 6:15 ವೊರಾಂಚೆರ್ ಚಲ್ಚ್ಯಾ ಕಾರ್ಯಕ್ರಮಾವೆಳಾರ್ ಇನಾಮಾಂ ವಾಂಟ್ತಲೆ.
ನೆಲ್ಸನ್ ಆನಿ ಲವೀನಾ ರೊಡ್ರಿಕ್ಸ್ - ಚಾಫ್ರಾ ದೆಕೊಸ್ತಾ ಸ್ಮಾರಕ್ ಭುರ್ಗ್ಯಾಂಚ್ಯಾ ಕೊಂಕಣಿ ಕವಿತಾ ವಾಚನ್ ಸರ್ತೆಚ್ಯಾ ಫೈನಲ್ಸಾಕ್ ವಿಂಚುನ್ ಆಯಿಲ್ಲಿಂ:
ಏಲ್ಡನ್ ವಿನೊಯ್ ಡಿಸೋಜಾ, ಬಜ್ಪೆ; ಓಸ್ಟಿನ್ ಡಿಕುನ್ಹಾ, ಇಜಯ್ ; ಲಿಯೋನಾ ಎಲಿಸನ್ ಡಿಸೋಜಾ, ಇಜಯ್; ವೆನ್ಸಿಟಾ ಡಾಯಸ್, ಆಂಜೆಲೊರ್, ನಿಶೆಲ್ ಫ್ಲೋರಾ ದಾಲ್ಮೇದಾ, ಕುಲ್ಶೇಕರ್ ಆನಿ ಏಶ್ಟನ್ ಮಸ್ಕರೇನ್ಹಾಸ್, ಬಜ್ಜೋಡಿ
ರೋಹನ್ ಆನಿ ಲವೀಟಾ ಮೊಂತೇರೊ ಯುವಜಣಾಂಚ್ಯಾ ಅಖಿಲ್ ಭಾರತ್ ಕೊಂಕಣಿ ಕವಿತಾ ವಾಚನ್ ಸರ್ತೆಚ್ಯಾ ಫೈನಲ್ಸಾಕ್ ವಿಂಚುನ್ ಆಯಿಲ್ಲಿಂ:
ಎಮ್ಲಿನ್ ಡಿಸೋಜಾ, ಆಂಜೆಲೊರ್; ನಿಲಿಶಾ ಆಂಜೆಲಿನ್ ಡಿಸೋಜಾ, ಇಜಯ್; ಪ್ರೀತಿ ಮಾರ್ತಾ ಡಿಸೋಜಾ, ಸಾಂತ್ ಆನ್ನ್ ಶಿಕ್ಷಣ್ ಸಂಸ್ಥೊ; ಶ್ವೇತಾ ಪೈ ಎಮ್., ಕೆನರಾ ಕೊಲೆಜ್; ಏಡ್ಲಿನ್ ಡಿಸೋಜಾ, ಆಂಜೆಲೊರ್; ಫೆವಿಶಾ ಫೆರ್ನಾಂಡಿಸ್, ಬಜ್ಜೋಡಿ
ಹಿಂ ಫೈನಲ್ಸ್ ನವೆಂಬರ್ ಮ್ಹಯ್ನ್ಯಾಚೆ 6 ತಾರಿಕೆರ್ ವಿಶ್ವ ಕೊಂಕಣಿ ಕೇಂದ್ರಾಂತ್ ಚಲ್ಚಿಂ ಆಸುನ್, ನಗ್ದೆನ್ ಇನಾಮಾಂ, ಸರ್ವಾಂಕ್ ರಾವ್ಪಾಚಿ, ಜೆವ್ಣಾಚಿ ವೆವಸ್ಥಾ, ಪಯ್ಣಾ ಭಾತೆಂ, ಪ್ರಮಾಣ್ ಪತ್ರಾಂ ಲಾಭ್ತಲಿಂ.
ತಸ್ವೀರ್‍ಯೊ: ಜೆರಾಲ್ಡ್ ಕೊನ್ಸೆಸೊ / ವಿಲಿಯಮ್ ಪಾಯ್ಸ್
कविता ट्रस्टाची कविता वाचन सर्त : मंगळूर थावन बारा जाणां फैनलाक
कविता ट्रस्ट हांणी कोंकणी नाटक सभा मंगळूर हांच्या सहयोगाखाल कोंकणी कविता वाचन सर्त ह्याच सप्टेंबर ४ तारिकेर आयतारा सकाळीं डॉन बॉस्को सालांत मांडून हाडल्ली. पंद्रा वर्सां सकयल्या भुरग्यांक, पंद्रा थावन तीस वर्सां भितरल्या युवजणांक तशें तीस वर्सां वयल्यांक - अशें तीन विभागांनी ही सर्त चल्ली.
सुरवेर कोंकणी नाटक सभेचो आदलो अध्यक्ष फा. वैटस प्रभुदास हांणी सर्वांक येवकार मागलो. "वोरयणार स्पर्धिकांचीं सांगाती. जिकचें या सलवुंचें प्रमूख न्हय, असल्या स्पर्ध्यांनी भाग घेंवचें एकल्याक मेळ्येता जाल्लें व्हर्तें इनाम. कोंकणी कविता लोकामोगाळ जाते आसा ती व्हर्ते दाधोस्कायेची गजाल" अशें तांणी सांगलें. कविता ट्रस्ट अध्यक्ष मेल्विन रोड्रिगसान सर्तेचीं नेमां सांगलीं मात्र न्हय "कोंकणी नाटक सभा तसलो पावनशें वर्सांचो इतिहास आसचो संस्थो आनी कवितेचे समग्र वाडावळी खातीर वावूरचें कविता ट्रस्ट - हांणी सांगाता मेळून मांडून हाडचो हो स्पर्धो लोकामोगाळ जायीत आसा" म्हण सांगून कोंकणी नाटक सभेचो उपकार ताणे आटयलो.
भुरग्यांच्या विभागांत तेरा जणांनी, युवजणांच्या विभागांत तेरा जणांणी आनी व्हडांच्या विभागांत पंद्रा जणांनी वांटो घेतल्लो. कविता ट्रस्टाचीं ट्रस्टी - विलियम पायस, एवरेल रोड्रिगस आनी किशोर गोन्सालवीस हांणी वोरयणार जावन सहकार दिल्लो. वितोरी कार्कोळ हाणे सर्तेचें सूत्र संचालन घेतल्लें. एंडऱ्यू एल डिकुन्हान धन्यवाद दिले.
हो स्पर्धो कविता ट्रस्टान तिसऱ्या वर्सा मांडून हाडच्या नेल्सन अनी लवीना रोड्रिक्स - चाफ्रा देकोस्ता स्मारक भुरग्यांचि कोंकणी कविता वाचन सर्त तशेंच सव्या वर्सा मांडून हाडच्या रोहन आनी लवीटा मोंतेरो युवजणांची कोंकणी कविता वाचन सर्त - ह्ये सर्तेंच्या प्राथमीक हंताच्या स्पर्ध्या बराबर चल्लो.
भाग घेतल्ल्या सर्वांक फा. वैटस प्रभुदास हांणी कविता पब्लिकेशन्स हांणी पर्गट केल्लें वल्ली वग्गाचें "नेकेत्रां" कवितेचें पुस्तक आनी प्रमाण पत्रां दिलीं. ह्या संदर्भार कोंकणी नाटक सभेचो काऱ्यदर्शी सुनील मिनेजस हाजर आसल्लो.
पंद्रा वर्सां सकयल्यां भुरग्यांचो विभाग:
पयलें: एल्डन विनॉय डिसोजा, बजपे
दुसरें : ऑस्टीन डिकुन्हा, इजय
तिसरें : लियोना एलिसन डिसोजा, इजय
पंद्रा थावन तीस वर्सां भितरल्या युवजणांचो विभाग:
पयलें: एम्लीन डिसोजा, आंजेलोर
दुस्रें: निलिशा आंजेलीन डिसोजा, इजय
तिस्रें: प्रीती मार्ता डिसोजा, सांत आन्न शिक्षण संस्थो
तीस वर्सां वयल्यांचो विभाग:
पयलें: ऐरीन पिंटो, बज्जोडी
दुसरें : एडिलेड डेसा, इजय
तिसरें : संतोश पी. वेगस, बज्जोडी
ह्या विजेतांक सप्टेंबर २४ तारिकेर डॉन बॉस्को हॉलांता सांजेच्या ६:१५ वोरांचेर चलच्या काऱ्यक्रमावेळार इनामां वांटतले.
नेल्सन आनी लवीना रोड्रिक्स - चाफ्रा देकोस्ता स्मारक भुरगयंच्या कोंकणी कविता वाचन सर्तेच्या फैनल्साक विंचून आयिल्लीं:
एल्डन निनॉय डिसोजा, बजपे; ऑस्टीन डिकुन्हा, इजय ; लियोना एलिसन डिसोजा, इजय; वेन्सिटा डायस, आंजेलोर, निशेल फ्लोरा दाल्मेदा, कुलशेकर आनी एश्टन मस्करेन्हास, बज्जोडी
रोहन आनी लवीटा मोंतेरो युवजणांच्या अखिल भारत कोंकणी कविता वाचन सर्तेच्या फैनल्साक विंचून आयिल्लीं:
एम्लीन डिसोजा, आंजेलोर; निलिशा आंजेलीन डिसोजा, इजय; प्रीती मार्ता डिसोजा, सांत आन्ना शिक्षण संस्थो; श्वेता पै एम., केनरा कॉलेज; एडलीन डिसोजा, आंजेलोर; फेविशा फेर्नांडीस, बज्जोडी
हीं फैनल्स नवेंबर म्हयन्याचे ६ तारिकेर विश्व कोंकणी केंद्रांत चलचीं आसून, नगदेन इनामां, सर्वांक रावपाची, जेवणाची वेवस्था, पयणा भातें, प्रमाण पत्रां लाभतलीं.
तस्वीऱ्यो: जेराल्ड कोन्सेसो / विलियम पायस