ಉದ್ಯಾವರ್ ‘ದ ಶವರ್‍ಸ್’ ಆಂಗ್ಣಾಂತ್ ಕವಿತೆಚೊ ಶಿಂವೊರ್
ಹ್ಯಾಚ್ ಆಗೊಸ್ತಾಚೆ ಸೊಳಾ ತಾರಿಕೆರ್ ಉದ್ಯಾವರ್ ‘ದ ಶವರ್‍ಸ್’ ಘರ್‍ಚ್ಯಾ ಆಂಗ್ಣಾಂತ್ ಕವಿತಾ ಟ್ರಸ್ಟಾನ್ ಮಾಂಡುನ್ ಹಾಡಲ್ಲಿ ಕವಿಗೋಷ್ಟಿ, ಕವಿಂನಿ ಅಪ್ರೂಪ್ ವಿಷಯಾಂ ಭೊಂವ್ತಿಂ ವಿಣಲ್ಲ್ಯಾ ಬಳ್ವಂತ್ ಕವಿತಾಂಕ್ ಲಾಗೊನ್, ಕವಿ ವಿಲ್ಸನ್ ಕಟೀಲಾನ್ ಆಪ್ಲೆ ವಿಶಿಷ್ಟ್ ಶೈಲೆನ್ ಆನಿ ಜಾಣ್ವಾಯೆನ್ ಭರ್‍ಅಲ್ಲ್ಯಾ ಉತ್ರಾಂನಿ ಚಲೊವ್ನ್ ವೆಲ್ಲ್ಯಾನ್, ಚಿತ್ರಕಾರ್ ವಿಲ್ಸನ್ ಕಯ್ಯಾರಾನ್ ಥೊಡ್ಯಾ ಗೀತಾಂಕ್ ರಂಗಾಂನಿ ಜೀವ್ ದಿಲ್ಲ್ಯಾನ್ ತಶೆಂಚ್ ಉದ್ಯಾವರ್‍ಚ್ಯಾ ಪಾಚ್ವ್ಯಾ ಭೊಂವಾರಾಂತ್ಲ್ಯಾ ಶೀತಳ್ ಹವ್ಯಾಕ್ ಲಾಗೊನ್ ಯಾದ್‍ಗಾರ್ ಜಾಂವ್ಕ್ ಪಾವ್ಲಿ.
ಕವಿ ರೊಬರ್ಟ್ ಫೆರ್ನಾಂಡಿಸಾಚ್ಯಾ ‘ದ ಶವರ್‍ಸ್’ ಘರ್‍ಚ್ಯಾ ಆಂಗ್ಣಾಂತ್ ಚಲ್‍ಲ್ಲೆ ಹೆ ಕವಿಗೋಷ್ಟಿಚೆ ಸುರ್‍ವೆರ್ ಟ್ರಸ್ಟಾಚೊ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಯೆವ್ಕಾರ್ ಮಾಗ್ಲೊ. ಕವಿತಾ ಟ್ರಸ್ಟಾಚೊ ಶೆವೊಟ್ ತಶೆಂ ವಾವ್ರ್ ತಾಣೆ ಲೊಕಾ ಹುಜಿರ್ ದವರ್‍ಲೊ.
ತರ್‍ನೊ ತಶೆಂ ಶಾಣೊ ಕವಿ ವಿಲ್ಸನ್ ಕಟೀಲಾನ್ ಹೆ ಕವಿಗೋಷ್ಟಿಚೆಂ ಸುಂಕಾಣ್ ಧರ್‍‍ಲ್ಲೆಂ. ‘ಖಂಯ್ಚೇಂಯ್ ಕಾರ್‍ಯೆಂ ಸುರು ಕರ್‍ತಾನಾ ದೆವಾಚೊ ಉಗ್ಡಾಸ್ ಕಾಡ್ಚಿ ಏಕ್ ರಿವಾಜ್ ಆಸಾ. ಪುಣ್ ಹೆ ಕವಿಗೋಶ್ಟಿಕ್ ಹಿ ಗರ್‍ಜ್ ಮ್ಹಣ್ ದಿಸನಾ. ದೆಕುನ್ ಆಮಿ ದೆವಾಚೊ ಉಗ್ಡಾಸ್ ಕಾಡ್ಚೊ ನಾಕಾ. ಆನಿ ದೆವಾನ್‍ಯ್ ಆಮ್ಚೊ ಉಗ್ಡಾಸ್ ಕಾಡ್ಚೊ ನಾಕಾ. ಆಮ್ಕಾ ಆಮ್ಚೆ ಇತ್ಲ್ಯಾಕ್ ಜಿಯೆಂವ್ಕ್ ಸೊಡ್ಲ್ಯಾರ್ ಪುರೊ. ದೇವ್ ಆಜ್‍ಕಾಲ್ ಕಶ್ಟಾರ್ ಆಸಾ. ಆನಿ ತೊ ಕವಿಂಕ್ ಭಿಯೆತಾ. ಕಿತ್ಯಾಕ್ ಮ್ಹಳ್ಯಾರ್ ದೆವಾನ್ ರಚ್‍ಲ್ಲ್ಯಾ ರಾಜಾಚೆರ್ ಕವಿ ಖೊಡ್ ಕಾಡ್ತಾ ಆನಿ ಮ್ಹಣ್ಟಾ - ಮನ್ಶಾವಿಣೆಂ ದೆವಾಕ್ ಅಸ್ಮಿತಾಯ್ ನಾ’ ಅಶೆಂ ತಾಣೆಂ ಸಾಂಗ್ಲೆಂ.
ಫುಡೆಂ ಉಲೊವ್ನ್ ‘ದೆವಾನ್ ಫುಂಕುನ್ ಸಂಸಾರಿ ಸೊಡ್‍ಲ್ಲ್ಯಾ ಪುಗ್ಗ್ಯಾಂಕ್ ಕವಿ ಸುವಿ ಜಾತಾ. ಹಾಕಾ ಭಿಯೆಲ್ಲೊ ದೇವ್ ಕಿತೆಂ ಕರ್‍ತಾ? ಥೊಡ್ಯಾಂಚ್ಯಾ ಬೊಲ್ಸಾಂತ್ ಉತ್ರಾಂಚಿ ರಾಸ್ ಚೆಪುನ್ ಸಂಸಾರಿ ಧಾಡ್ಟಾ. ತಸಲೊ ಮನಿಸ್ ರೆತಿರಿಸ್ತ್ ಜಾತಾ. ಉಲೊವ್ಪಾಂತ್ ಹುಶಾರ್ ಮನಿಸ್ ಹೊ ಬೊಬಾಟ್ಟಾ ಆನಿ ಬೊಬಾಟ್ಟಾ. ‘ಸಬ್ದ್ ಮನಿಸ್ ಜಾಲೊ’ ಮ್ಹಣ್ಟಾ. ರೆತಿರಿಸ್ತ್ ಏಕ್ ಸಾಂಗೊಂಕ್ ಶೆಂಭರ್ ಉತ್ರಾಂ ವಾಪರ್‍ತಾ ತರ್ ಕವಿ ಎಕಾ ಉತ್ರಾನ್ ಶೆಂಭರ್ ಸಾಂಗ್ತಾ. ಹ್ಯೊ ದೊನ್‍ಯ್ ಗಜಾಲಿ ಎಕಾಮೆಕಾ ತಾಳ್ ಪಡನಾಂತ್’ - ಅಶೆಂ ಕವಿ ವಿಲ್ಸನಾನ್ ಸಾಂಗ್ಲೆಂ.
‘ಉತ್ರಾಂ ಆವಾಜ್ತಾತ್ ರೆತಿರಿಸ್ತಾಂಚ್ಯಾ ಬೊಲ್ಸಾಂತ್ / ಅರ್‍ತ್ ಮೊನೊಚ್ ಉರ್‍ತಾ ಕವಿಚ್ಯಾ ಕಾಳ್ಜಾಂತ್’ - ಅಶೆಂ ಚುಟ್ಕುಲಾದ್ವಾರಿಂ ಆಪ್ಲ್ಯಾ ಉಲೊವ್ಪಾಚೊ ಗಿರೊಪ್ ಸಾದರ್ ಕೆಲ್ಲ್ಯಾ ತಾಣೆ ‘ರೆತಿರಿಸ್ತಾಂಕ್ ಆಯ್ಕೊಂಕ್ ಸಲೀಸ್ ಆನಿ ಕವಿಕ್ ಸಮ್ಜೊಂಕ್ ತ್ರಾಸ್. ಹ್ಯೊ ರೆತಿರಿ, ಮಾಗ್ಣೆಂ, ತೇರ್‍ಸ್. ನೊವೆನಾಂ, ಸೀರಿಯಲಾಂ- ಹ್ಯಾ ಸರ್‍ವಾಂ ಪ್ರಾಸ್ ಹಾಂಗಾಸರ್ ಖರ್‍ಚುಂಚಿ ಎಕ್-ದೇಡ್ ವೊರಾಂಚಿ ಕವಿಗೋಶ್ಟಿ ಬೋವ್ ಪ್ರಮುಖ್ ಜಾತಾ. ಕಿತ್ಯಾಕ್ ಮ್ಹಳ್ಯಾರ್ ಕವಿತಾ ಜಿಣಿಯೆಚಿ ರೂಚ್ ಚಡಯ್ತಾ ಆನಿ ಜೀಣ್ ಅನ್ಭೋಗ್ ಕರುಂಕ್ ಶಿಕಯ್ತಾ’ ಅಶೆಂ ಮ್ಹಳೆಂ.
ಹ್ಯಾ ಸಂದರ್ಭಾರ್ ಚಲ್‍ಲ್ಲೆ ಕವಿಗೋಷ್ಟಿಂತ್ ಕ್ಲೊಡಿ ಬ್ರಹ್ಮಾವರ್, ಎಚ್ಚೆಮ್ ಪೆರ್ನಾಲ್, ವಿಲ್ಸನ್ ಕಿನ್ನಿಗೋಳಿ, ಕ್ಯಾಥರಿನ್ ರೊಡ್ರಿಗಸ್, ಅರುಣ್ ದಾಂತಿ, ಒಲಿವೇರಾ ಫ್ಲೇವಿಯಾ, ಮೆಲ್ವಿನ್ ಪೆರ್ನಾಲ್, ಆಲ್ವಿನ್ ದಾಂತಿ, ರೊಬರ್ಟ್ ಫೆರ್ನಾಂಡಿಸ್, ಮೆಲ್ವಿನ್ ರೊಡ್ರಿಗಸ್, ಗ್ಲೇಡಿಸ್ ರೇಗೊ ಆನಿ ವಿಲ್ಸನ್ ಕಟೀಲಾನ್ ಭಾಗ್ ಘೆತ್ಲೊ.
ಅರುಣ್ ದಾಂತಿನ್ ಗಾಯ್ಲಲ್ಯಾ ಪದಾಂಕ್ ಚಿತ್ರಕಾರ್ ವಿಲ್ಸನ್ ಕಯ್ಯಾರಾನ್ ಖಿಣಾನ್ ಕಾನ್ವಸಾಚೆರ್ ರಂಗಾಳ್ ದೋನ್ ಚಿತ್ರಾಂ ಸೊಡಯ್ಲಿಂ. ಹ್ಯಾ ಚಿತ್ರಾಂಚಿ ಕವಿ ಎಚ್ಚೆಮ್ ಪೆರ್ನಾಲಾನ್ ಅರ್ಥಾಂಚ್ಯಾ ಗುಂದ್ಯಾಚೆರ್ ವಿಸ್ಕಳಾವ್ಣಿ ಕೆಲಿ. ಹಿಂ ದೋನ್‍ಯ್ ಚಿತ್ರಾಂ ಹ್ಯಾಚ್ ಸಂದರ್ಭಾರ್ ಲಿಲಾಂವ್ ಘಾಲಿಂ.
ಫ್ಲೊಸ್ಸಿ ಟೀಚೆರ್ ತಶೆಂ ಆಗ್ನೆಲ್ ಫೆರ್ನಾಂಡಿಸಾನ್ ಆಪಾಪ್ಲೆ ಅನ್ಭೋಗ್ ಹ್ಯಾವೆಳಾ ವಾಂಟುನ್ ಘೆತ್ಲೆ.