ಅಂತರ್ ಕೊಲೆಜ್ ಕವಿತಾ ಸರ್ತಿಂತ್ ವಿಲ್ಮಾ ಬಂಟ್ವಾಳ್ ಪಯ್ಲೆಂ

ಅಂತರ್ ಕೊಲೆಜ್ ಕವಿತಾ ಸರ್ತಿಂತ್ ವಿಲ್ಮಾ ಬಂಟ್ವಾಳ್ ಪಯ್ಲೆಂ

ಸಾಂ ಲುವಿಸ್ ಕೊಲೆಜಿಚ್ಯಾ ವಿಲ್ಮಾ ಲವೀನಾ ಡಿಸೋಜಾನ್ ಅಂತರ್ ಕೊಲೆಜ್ ಕೊಂಕಣಿ ಕವಿತಾ ಸರ್ತಿಂತ್ ಪಯ್ಲೆಂ ಇನಾಮ್ ಆಪ್ಣಾಯ್ಲಾಂ.  ಕವಿತಾ ಟ್ರಸ್ಟ್ ಆನಿ ಕೊಂಕಣಿ ಸಂಘ್, ಸಾಂ. ಲುವಿಸ್ ಕೊಲೆಜ್ ಹಾಂಣಿ ಹ್ಯಾಚ್ ಮಾರ್ಚಾಚೆ 6 ತಾರಿಕೆರ್ ಕೊಲೆಜಿಚ್ಯಾ ಎರಿಕ್ ಮಥಾಯಸ್ ಸಾಲಾಂತ್ ಮಾಂಡುನ್ ಹಾಡ್ಲಲ್ಯಾ `ಕಾವ್ಯಾಳ್ ಸಂಭ್ರಮ್ ' ಸುವಾಳ್ಯಾ ವೆಳಾರ್ ಚಲಲ್ಲ್ಯಾ ಕವಿತಾ ವಾಚನ್ ಸರ್ತಿಂತ್ ಜಿಲ್ಲ್ಯಾಚ್ಯಾ ಚಡುಣೆಂ ಆಟ್ ಕೊಲೆಜಿಂ ಥಾವ್ನ್ ತೆವೀಸ್ ವಿದ್ಯಾರ್ಥಿಂನಿ ಭಾಗ್ ಘೆತಲ್ಲೊ.  ದುಸ್ರೆಂ ಇನಾಮ್ ತೆಚ್ ಕೊಲೆಜಿಚ್ಯಾ ಕ್ಲೆಮೆಂಟ್  ಫೆರ್ನಾಂಡಿಸಾನ್ ಆಪ್ಣಾಯ್ಲೆಂ ತರ್, ತಿಸ್ರೆಂ ಇನಾಮ್ ಎಸ್. ಡಿ. ಎಮ್. ಕಾನೂನ್ ಕೊಲೆಜಿಚ್ಯಾ ಡ್ಯಾರಲ್ ಜೀವನ್ ಡಿಸೋಜಾಕ್ ಫಾವೊ ಜಾಲೆಂ.

ಕೊಂಕಣಿ ಕವಿ, ಫಾ. ಆಲ್ವಿ ಕಾರ್ಮೆಲಿತ್ ಮುಖೆಲ್ ಸೈರೊ ಜಾವ್ನ್ ಆಯಿಲ್ಲ್ಯಾ ಹ್ಯಾ ಕಾರ್ಯಾವೆಳಾ ಭಾಗ್ ಘೆತಲ್ಲ್ಯಾ ಸರ್ವಯ್ ವಿದ್ಯಾರ್ಥಿಂಕ್ ಪ್ರಮಾಣ್ ಪತ್ರಾಂ ವಾಂಟ್ಲಿಂ ಮಾತ್ರ್ ನ್ಹಯ್, ಜಿಕ್ಲಲ್ಯಾಂಕ್ ಇನಾಮಾಂ ತಶೆಂ ಯಾದಸ್ತಿಕಾ ದಿಲ್ಯೊ.  `ಕವಿತಾ ಕಿತೆಂ ಮ್ಹಣೊನ್ ಸಾಂಗೊಂಕ್ ಕಷ್ಟ್. ತಿ ಮೌನಾಪರಿಂ. ಫುಡಾರಾಚ್ಯಾ ವಿಶೇಸ್ ಪ್ರತಿಭಾವಂತ್ ಕವಿಂ ಸಾಂಗಾತಾ ಆಸ್ಚೆಂಚ್ ವಿಶೇಸ್ ಅನ್ಭೋಗ್ ದಿತಾ' ಮ್ಹಣ್ ಉಚಾರಲ್ಲ್ಯಾ ಫಾ. ಆಲ್ವಿನ್ ವಿದ್ಯಾರ್ಥಿಂನಿ ಪುಸ್ತಕಾಂ ವಾಚ್ಚಿ ಸವಯ್ ರುತಾ ಕರಿಜಾಯ್.  ವಾಚ್ಲ್ಯಾ ಶಿವಾಯ್ ಆಮಿ ಕವಿ ಜಾಂವ್ಕ್ ಸಾಧ್ಯ ನಾ ಮ್ಹಣೊನ್ ಸಾಂಗ್ಲೆಂ.

ಸಾಂ ಲುವಿಸ್ ಕೊಲೆಜಿಚೊ ದುಡ್ವಾ ಸಲ್ಹಾದಾರ್ ಫಾ ವೊಲ್ಟರಾನ್ ಅಧ್ಯಕ್ಷಪಣ್ ಘೆತಲ್ಲೆಂ.  ವಿದ್ಯಾರ್ಥಿಂಚೆಂ ಸಾಹಸ್ ಆನಿ ತಾಂಚ್ಯಾ ಸಾಂಗಾತಾ ಹಾತ್ ಮೆಳೊಂವ್ಕ್ ಕವಿತಾ ಟ್ರಸ್ಟಾನ್ ದಾಕಯಿಲ್ಲೆಂ ಬರೆಂ ಮನ್ ಹೊಗ್ಳಿಕೆಕ್ ಫಾವೊ ಜಾಲ್ಲೆಂ, ಅಶೆಂ ತಾಣೆಂ ಸಾಂಗ್ಲೆಂ.

ದೊನ್ಪಾರಾಂಚ್ಯಾ ಆದೆಸಾಂತ್ ಚಲಲ್ಲ್ಯಾ ಹ್ಯಾ ಕವಿತಾ ಸರ್ತಿಂತ್ ದೋನ್ ಭಾಗ್ ಆಸಲ್ಲೆ. ಪಯ್ಲ್ಯಾ ಭಾಗಾಂತ್ ವಿದ್ಯಾರ್ಥಿಂನಿ ತಾಂಚ್ಯೊ ಕವಿತಾ ಪಯ್ಲೆಂಚ್ ಬರೊವ್ನ್ ಧಾಡಲ್ಲ್ಯೊ.  ತಾಂಚಿ ವೊರವ್ಣಿ ಪಯ್ಲೆಂಚ್ ಕರ್ನ್ ಜಾಲ್ಲಿ. ಪಯ್ಲ್ಯಾ ಆನಿ ದುಸ್ರ್ಯಾ ಅಶೆಂ ದೋನಯ್ ಭಾಗಾಂನಿ ಅತ್ಯಧಿಕ್ ಅಂಕ್ ಆಪ್ಣಾಯಿಲ್ಲ್ಯಾಂಕ್ ಇನಾಮಾ ಖಾತೀರ್ ವಿಂಚುನ್ ಕಾಡ್ಲೆಂ. ಕವಿತಾ ವಾಚನ್ ಸ್ಪರ್ಧ್ಯಾಕ್ ವೊರಯ್ಣಾರ್ ಜಾವ್ನ್ ಆಂಡ್ರು ಎಲ್ ಡಿಕುನ್ಹಾ, ಕಿಶೂ ಬಾರ್ಕೂರ್ ಆನಿ ವಿಲಿಯಮ್ ಪಾಯ್ಸ್ ಆಯಿಲ್ಲೆ.  ಪ್ರಮುಖ್ ಇನಾಮಾಂ ವಿಣೆಂ ಪಾಂಚ್ ಪ್ರೋತ್ಸಾಹಕ್ ಇನಾಮಾಂಯ್ ಹ್ಯಾವೆಳಾರ್ ವಾಂಟ್ಲಿಂ.  ಶ್ರೀನಿವಾಸ್ ಮ್ಯಾನೆಜಮೆಂಟ್ ಕೊಲೆಜಿಚ್ಯಾ ನೆಲ್ಸನ್ ಪ್ರಸನ್ನ್ ವಾಸ್, ಸಾಂ ಲುವಿಸ್ ಕೊಲೆಜಿಚ್ಯಾ ಡೆನ್ಝಿಲ್ ಜೈಸನ್ ಫೆರ್ನಾಂಡಿಸ್ ಆನಿ ಶಾರೊನ್ ಒಲಿವೇರಾ, ಸಾಂ ಜುಜೆ ಕೊಲೆಜ್ ಬಜ್ಪೆಚ್ಯಾ ರೋಹನ್ ಡಿಸೋಜಾ ಆನಿ ಕೆನರಾ ಕೊಲೆಜಿಚ್ಯಾ ವೆಂಕಟೇಶ್ ನಾಯಕ್ ಹಾಂಣಿ ಹಿಂ ಇನಾಮಾಂ ಜೊಡ್ಲಿಂ.

ವೊರಯ್ಣಾರಾಂ ತರ್ಫೆನ್ ಆಂದ್ರು ಡಿಕುನ್ಹಾ ಉಲಯ್ಲೊ. ಸುರ್‍ವೆರ್ ಕೊಂಕಣಿ ಸಂಘ್ ಹಾಚಿ ಅಧ್ಯಕ್ಷಿಣ್ ಮಾನೆಸ್ತಿಣ್ ಸೆವ್ರಿನ್ ಪಿಂಟೊನ್ ಯೆವ್ಕಾರ್ ಮಾಗ್ಲೊ ತರ್ ಕವಿತಾ ಟ್ರಸ್ಟಾಚೊ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಪ್ರಾಸ್ತಾವಿಕ್ ಭಾಷಣ್ ಕೆಲೆಂ.  ವಿದ್ಯಾರ್ಥಿಂ ಥಾವ್ನ್ ಮನೋರಂಜನ್ ಕಾರ್ಯೆಂ ಆಸಲ್ಲೆಂ.