ದುಬಾಯಾಂತ್ ಕವಿತಾ ಟ್ರಸ್ಟಾಚಿ ಕವಿಗೋಷ್ಠಿ
ಹ್ಯಾಚ್ ಮಾಯ್ ಮ್ಹಯ್ನ್ಯಾಚೆ 21 ತಾರಿಕೆರ್ ಸುಕ್ರಾರಾ ಸಾಂಜೆರ್ ಸಾಡೆಚಾರ್ ವೊರಾಂಚೆರ್ ದುಬಾಯ್ ಕರಾಮಾಂತ್ಲ್ಯಾ ಶೆಜಾನ್ ರೆಸ್ಟೊರೆಂಟಾಂತ್ ‘ಕವಿತಾ ಟ್ರಸ್ಟ್’ ಆನಿ ದಾಯ್ಜಿ ದುಬಾಯ್ ಹಾಂಣಿ ಸಾಂಗಾತಾ ಮೆಳೊನ್ ಕವಿಗೋಷ್ಠಿ ಮಾಂಡುನ್ ಹಾಡಲ್ಲಿ.
ಮೆಲ್ವಿನ್ ರೊಡ್ರಿಗಸಾನ್ ಸುಂಕಾಣ್ ಧರಲ್ಲೆ ಹೆ ಕವಿಗೋಷ್ಟಿಂತ್ ರೊಬರ್ಟ್ ಫೆರ್ನಾಂಡಿಸ್, ಸ್ಟೇನ್ ಆಗೇರಾ, ಪಿಯುಸ್ ಜೇಮ್ಸ್, ವಿನ್ಸಿ ಪಿಂಟೊ ಆಂಜೆಲೊರ್, ಆಂತೊನ್ ಮೆಂಡೊನ್ಸಾ, ಓಲ್ವಿನ್ ಪಿಂಟೊ, ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾ, ಸ್ಟೇನಿ ಬೆಳಾ ಆನಿ ಆರ್ಥರ್ ಪಿರೇರಿನ್ ಭಾಗ್ ಘೆತಲ್ಲೊ. ಪಿಯುಸ್ ಜೇಮ್ಸಾನ್ ‘ಜೆಡ್ಡಾಂ’ವಿಶಿಂ ಕವಿತಾ ವಾಚ್ಲಿ. ಹಿಂ ಜೆಡ್ಡಾಂ ಹರ್ಶೆಂ ಗುಡ್ಡಾಯ್ತಾನಾ ಸಂತೊಸ್ ಭೊಗ್ತಾಲಿಂ, ಆತಾಂ ಪಾಯ್ ದವರ್‍ತಾನಾ ವೊಳ್ವಳ್ತಾತ್ ಕಿತ್ಯಾಕ್? ಕಾಂಯ್ ಜಿವಿತಾಂತ್ ಆಪ್ಣೆಂ ಜೊಡಲ್ಲಿ ಜಡಾಯ್ ಹಾಕಾ ಕಾರಣ್? - ಅಶೆಂ ತಾಚೆ ಕವಿತೆಂತ್ ವಿಚಾರ್ ಆಸಲ್ಲೊ. ತಾಚಿ ‘ಸಾಂಗಾತಿಣ್’ ಕವಿತೆಂತ್ ರೂಪಕಾಂ ಭರೊನ್ ವೊಮ್ತತಾಲಿಂ. ವಿನ್ಸಿ ಪಿಂಟೊ ಆಂಜೆಲೊರಾನ್ ‘ಝುಜಾ ಥಳಾರ್ ಫುಲ್ಲ್ಯಾತ್ ಗುಲೊಬ್’ ಮ್ಹಣೊನ್ ಸಾಂಗೊನ್ ‘ದುಲೊಬ್ ಆತ್ಮ್ಯಾಂ’ವಿಶಿಂ ಕವಿತಾ ವಾಚ್ಲಿ ಆನಿ ಹಾಸ್ಯ್ ಚುಟ್ಕುಲಾಂ ಸಾದರ್ ಕೆಲಿಂ. ಸ್ಟೇನಿ ಬೆಳಾಚಿ ಕವಿತಾ ಠರಾವಣೆಕ್ ಲಾಗೊನ್ ಮೆಚ್ವಲಿ. ದಾನ್ ಜಮೊಂವ್ಕ್ ಎಕಾ ದುಬ್ಳ್ಯಾಚ್ಯಾ ಘರಾ ವೆತಾನಾ, ದಾನ್ ದಿಲ್ಲಿ ಸ್ತ್ರೀ ‘ಘರ್‍ಚ್ಯಾ ಪಾಕ್ಯಾಕ್ ಬುರಾಕ್ ಪಡಲ್ಲ್ಯಾಕ್ ಪೊವ್ಲಿ ಧರುಂಕ್ ವೆಚೆಂ ಕರುಣಾಜನಕ್ ಘಡಿತ್ ತಾಂತುಂ ಆಸಲ್ಲೆಂ.
ಸ್ಟೇನ್ ಆಗೇರಾನ್ ‘ಸರ್ಗಾ ದಾರಾರ್’ ಅನುವಾದಿತ್ ಕವಿತಾ ವಾಚ್ಲಿ ತರ್ ಆರ್ಥರ್ ಪಿರೇರಿನ್ ಪಾಗಿ ಜಾವ್ನಾಸ್ಚ್ಯಾ ಬಾಪಾಯ್ ಆನಿ ಪುತಾಚಿ ಕವಿತಾ ಆಪ್ಲೆ ವೆಗ್ಳೆಚ್ ಶೈಲೆನ್ ಸಾದರ್ ಕೆಲಿ. ಆಲ್ವಿನ್ ಪಿಂಟೊನ್ ಹಾಸ್ಯ್ ಚುಟ್ಕುಲಾಂ ಪೇಶ್ ಕೆಲಿಂ ಜಾಲ್ಯಾರ್ ಫ್ರಾನ್ಸಿಸ್ ಫೆರ್ನಾಂಡಿಸ್ ಕಾಸ್ಸಿಯಾನ್ ಜಬರದಸ್ತ್ ಶಾಯರಿ ಸಾದರ್ ಕೆಲ್ಯೊ. ಆಂತೊನ್ ಮೆಂಡೊನ್ಸಾನ್ ದುಬಾಯ್ಚ್ಯಾ ಜಾಬೀಲ್ ಪಾರ್ಕಾ ಭೊಂವ್ತಿಂ ಗುಂತಲ್ಲಿ ಕವಿತಾ ವಾಚ್ಲಿ ತರ್ ರೊಬರ್ಟ್ ಫೆರ್ನಾಂಡಿಸಾನ್ ಥೊಡಿಂ ಹೈಕೂ ಆಪುರ್ಬಾಯೆನ್ ಪೇಶ್ ಕೆಲ್ಯೊ. ಮೆಲ್ವಿನ್ ರೊಡ್ರಿಗಸಾನ್ ‘ಶೆಣ್’ ಆನಿ ‘ಝುಜ್’ ಕವಿತಾ ಸಾದರ್ ಕೆಲ್ಯೊ.
ದಾಯ್ಜಿ ದುಬಾಯ್ ಸಂಚಾಲಕ್ ಸ್ಟೇನ್ ಆಗೇರಾನ್ ಸುರ್ವೆರ್ ಸರ್ವಾಂಕ್ ಯೆವ್ಕಾರ್ ಮಾಗ್ಲೊ. ಮೆಲ್ವಿನ್ ರೊಡ್ರಿಗಸಾನ್ ಕವಿಗೋಷ್ಟಿಚೆ ಸುರ್ವೆರ್ ಕವಿತಾ ಟ್ರಸ್ಟಾಚ್ಯಾ ವಾವ್ರಾಚಿ ವೊಳಕ್ ಕರುನ್ ದಿಲಿ. ಪಿಯುಸ್ ಜೇಮ್ಸಾನ್ ಉಪ್ಕಾರ್ ಆಟಯ್ಲೆ. ಹರ್ಮನ್ ಲುವಿಸ್, ಸ್ಟೇನ್ ಆಗೇರಾ, ನಾನು ಮರೋಳ್ ಆನಿ ಡಯಾನ್ ಡಿಸೋಜಾ - ಹಾಂಣಿ ಆಪ್ಲೆ ವಿಚಾರ್ ಮಾಂಡ್ಲೆ.