ಕವಿತೆಕ್ ಪುನರ್‌ಜೀವ್ ದಿಂವ್ಚಿ ಸಕತ್ ಆಸಾ -ಅನಂತ್ ಅಮ್ಮೆಂಬಳ್
‘ಕೊಂಕಣಿ ಭಾಸ್ ಕಸಲ್ಯಾಕಿ ಉಪ್ಕಾರಾಕ್ ಪಡನಾತಲ್ಲಿ ಚಿಲ್ಲರ್ ಭಾಸ್ ಮ್ಹಳ್ಳೆಂ ಚಿಂತಪ್ ಮ್ಹಜೆ ಥಂಯ್ ಎಕಾ ತೆಂಪಾರ್ ಆಸಲ್ಲೆಂ. ಪುಣ್ ಜ್ಯಾ ದಿಸಾ ಹಾಂವೆಂ ಕೊಂಕಣಿ ಕವಿತಾ ವಾಚ್ಲ್ಯೊ, ಮ್ಹಜೆ ಥಂಯ್ ಆಜ್ಯಾಪಿ ಪರಿವರ್ತನ್ ಘಡ್ಲೆಂ. ಅಸಲೆಂಚ್ ಪರಿವರ್ತನ್ ಹೆರಾಂ ಥಂಯ್ ಘಡ್ಚಿ ಸಾಧ್ಯತಾ ಆಸಾ. ದೆಕುನ್ ತರ್ನೆ ಪಿಳ್ಗೆನ್ ಚಡಾನ್ ಚಡ್ ಕೊಂಕಣಿ ಲೊಕಾಕ್ ಕವಿತಾ ಪಾವಂವ್ಚೆಂ ಕಾಮ್ ಹಾತಿಂ ಘೆಜೆ. ಕವಿತೆಂತ್ ಆಸ್ಚೆಂ ಮೌನ್ ಆನಿ ಮೆಳ್ಚೊ ಸುಶೆಗ್ ಮನ್ಶಾಂಕ್ ಪುನರ್‌ಜೀವ್ ದಿತಾತ್’ ಅಶೆಂ ಮ್ಹಣಾಲೊ ಅನಂತ್ ಅಮ್ಮೆಂಬಳ್, ಮರಾಠಿ ರಂಗಸಂಗೀತ್ ನಿರ್ದೇಶಕ್.
ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ, ಮಂಗ್ಳುರ್ ಹಾಂಣಿ ಸಾಂ ಜುಜೆ ಕೊಂಕಣಿ ವೆಲ್ಫೇರ್ ಎಸೋಸಿಯೇಶನ್, ಮೀರಾರೋಡ್, ಥಾಣೆ ಆನಿ ಕೊಂಕಣಿ ಖಾರ್ವಿ ವೆಲ್ಫೇರ್ ಎಸೋಸಿಯೇಶನ್ ಮುಂಬಯ್ ಹಾಂಚ್ಯಾ ಸಹಯೋಗಾನ್ ಕವಿತಾ ಟ್ರಸ್ಟಾಚ್ಯಾ ಫುಡ್ಕಾಯೆಖಾಲ್ ಹ್ಯಾಚ್ ಜೂನ್ ಮ್ಹಯ್ನ್ಯಾಚೆ 27 ತಾರಿಕೆರ್ ಆಯ್ತಾರಾ, ಸಾಂ ಜುಜೆ ಚರ್ಚ್ ಕಮ್ಯುನಿಟಿ ಹೊಲ್ ಮೀರಾರೋಡ್ ಥಾಣೆ ಹಾಂಗಾಸರ್ ಮಾಂಡುನ್ ಹಾಡಲ್ಲೆಂ ‘ಕೊಂಕಣಿ ಸಾಹಿತ್ಯ-ಸಂಸ್ಕೃತಿ ಸಹಮಿಲನ್’ ಉಗ್ತಾವಣ್ ಕರುನ್ ತೊ ಉಲಯ್ತಾಲೊ.
ಮುಖೆಲ್ ಸೈರೊ ಜಾವ್ನ್ ಆಯಿಲ್ಲ್ಲೊ ಸಾಹಿತ್ಯ ಅಕಾದೆಮಿ ಥಾವ್ನ್ ಪುರಸ್ಕಾರ್ ವಿಜೇತ್ ಕವಿ ಜೆ ಬಿ ಮೊರಾಯಸ್ ಮ್ಹಣಾಲೊ ‘ವಾಚ್ಪಿ ಭಾಷೆಚಿಂ ಪಾಳಾಂ ವ್ಹಯ್ ತರೀ ಲೇಖಕ್, ಸಾಹಿತಿ ಆನಿ ಕವಿ ಭಾಸ್ ಜಿವಾಳ್ ದವರ್‍ತಾತ್’.
ಉಗ್ತಾವಣೆಚ್ಯಾ ಕಾರ್ಯಾಂತ್ ಮೀರಾರೋಡ್ ಸಾಂ ಜುಜೆ ಇಗರ್ಜೆಚೊ ವಿಗಾರ್ ಫಾ ಡೊಮಿನಿಕ್ ವಾಜ್, ರಾಜಪುರ್ ಸಾರಸ್ವತ್ ಸಂಘ್ ಮುಂಬಯ್ ಅಧ್ಯಕ್ಷ್ ಪ್ರಭಾಕರ್ ಡಿ ಬೋರ್ಕರ್ ಮುಖೆಲ್ ಸೈರೆ ಜಾವ್ನ್ ಹಾಜರ್ ಆಸಲ್ಲೆ ತರ್ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಸಾಂದೊ ವಾಸುದೇವ ಶಾನಭಾಗ್ ಅಧ್ಯಕ್ಷ್ ಬಸಲ್ಲೊ.
ತ್ಯಾ ಉಪ್ರಾಂತ್ ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಕವಿತಾ ಕಾರ್ಯಾಗಾರ್ ಚಲೊವ್ನ್ ವೆಲೆಂ. ‘ಕವಿತಾ ಆನಿ ಠರಾವಣ್’, ‘ಕವಿತೆಚಿಂ ವೆವೆಗ್ಳಿಂ ರುಪಾಂ’ ಆನಿ ‘ಕವಿತೆಂತ್ ಪ್ರತಿಮಾಂಚಿ ಕಲಾ’ ಹ್ಯಾ ವಿಶಿಂ ಸವಿಸ್ತಾರ್ ಮ್ಹಾಯೆತ್ ದಿಲ್ಲ್ಯಾ ತಾಣೆಂ ಪವರ್ ಪೊಂಯ್ಟ್ ದಾಕವ್ಣೆ ಮುಕಾಂತ್ರ್ ಅಂತರ್‌ರಾಷ್ಟ್ರೀಯ್ ಕವಿತೆಚ್ಯಾ ಪಾಟ್‌ಥಳಾರ್ ಕೊಂಕಣಿ ಕವಿತಾ ಪ್ರಾಸಾ ಥಾವ್ನ್ ನವ್ಯಾ ಚಿಂತ್ಪಾಕ್ ವಾಡೊನ್ ಆಯಿಲ್ಲಿ ವಾಟ್ ವಿವರಾಯ್ಲಿ ಆನಿ ಕವಿ ಜಾಯ್ಜಾಯ್ ತರ್ ಕಾಮಾಸಾಳಾಂ ಕವಿತಾ ಬರೊಂವ್ಚ್ಯಾಕ್ ಗರ್ಜ್ ಆಸ್ಚಿ ಕುಶೆಲತಾ ಆಪ್ಣಾಂವ್ಕ್ ಉಪ್ಕಾರ್‍ತಿತ್ ಶಿವಾಯ್, ಕವಿ ಜಾಂವ್ಕ್ ಮಜತ್ ಕರಿನಾಂತ್ ಮ್ಹಣೊನ್ ಪ್ರತ್ಯೇಕ್ ಥರಾನ್ ಸಾಂಗ್ಲೆಂ.
ತ್ಯಾ ಉಪ್ರಾಂತ್ ಕಾರ್ಯಾಗಾರಾಂತ್ ಭಾಗ್ ಘೆತಲ್ಲ್ಯಾ ಕವಿಂಚಿ, ನಜ್ರೆತ್ ನೆರಿ ತಾಕೊಡೆ ಹಾಚ್ಯಾ ಮುಕೆಲ್ಪಣಾಖಾಲ್ ಕವಿಗೋಷ್ಥಿ ಚಲ್ಲಿ. ಕವಿಗೋಷ್ಠಿಂತ್ ಫಿಲಿಪ್ ಕಾಂಜೂರ್‌ಮಾರ್ಗ್ ಹಾಣೆಂ 2005 ಜುಲಾಯ್ 26 ತಾರಿಕೆಚ್ಯಾ ಶಿರಾಂಧಾರಿಂಚ್ಯಾ ಮುಂಬಯ್ ಪಾವ್ಸಾಚೊ ಉಡಾಸ್ ಕಾಡುನ್ ‘ದೀ ದೆವಾ ಪಾವ್ಸ್ ಮಿತಿಚೊ’ ಕವಿತಾ ಪೇಶ್ ಕೆಲಿ ತರ್ ರೀಟಾ ಆಲ್ಬುಕೆರ್ಕ್ ಹಿಣೆಂ 1984 ಭೋಪಾಲ್ ದುರಂತಾಚೊ ಉಡಾಸ್ ಕಾಡ್ನ್ ‘ಕುಡ್ಡೆಂ ಕಾನೂನ್’ ಕವಿತಾ ಪೇಶ್ ಕೆಲಿ. ಮೀರಾರೊಡಾಂತ್ ಕೊಂಕಣಿ ಶಿಕ್ಪಾಚಿ ಬುನ್ಯಾದ್ ಘಾಲ್ಲ್ಯಾ ಲೊರೆನ್ಸ್ ಕಾಸ್ತೆಲಿನೊನ್ ‘ಕುಂಬಾರ್’ ಕವಿತೆಂತ್ ಎವೆಥಾವ್ನ್ ಆವೆಮಾತ್ಯೆ ಪರ್‍ಯಾಂತ್ಲ್ಯಾ ಜಿವ್ಯಾ ಉಸ್ವಾಸಾಚಿ ಯಾದ್ ಕಾಡ್ಲಿ ತರ್, ಜೆರಾಲ್ಡ್ ಡಿಸೋಜಾ ಹಾಣೆಂ ಆಪ್ಲೆ ‘ವಿದಾಯ್’ ಕವಿತೆಂತ್ ಕೊಲೆಜ್ ಜಿವಿತಾಂತ್ಲೆ ಇಷ್ಟಾಗತೆಚಿ ಆನಿ ವೆಗ್ಳಾಚಾರಾಚಿ ಯಾದ್ ಹಾಡ್ಲಿ. ಮೇರಿ ಪಿಂಟೊ ಹಿಣೆಂ ‘ಆಧುನಿಕ್ ಯುವಜಣ್’ ಕವಿತೆಂತ್ ಆಧುನಿಕತಾ ಆನಿ ಕ್ರಾಂತಿಕಾರಿ ಚಿಂತ್ಪಾಕ್ ಸಾಣ್ಯಾಕ್ ಧರ್‍ಲೆಂ ತರ್, ಜೊಯ್ ಪಾಲಡ್ಕಾ ಹಾಣೆಂ ಆಪ್ಲೆ ‘ಫರಕ್’ ಕವಿತೆಂತ್ ಭಂವರ್, ಫುಲ್ ಆನಿ ಆಬ್ಲೆಶಿ ಮನ್ಶಾಚೊ ದುರುದ್ದೇಶ್ ಉಗ್ಡಾಪೊ ಕೆಲೊ. ಕವಿಗೋಷ್ಟಿಚೊ ಅಧ್ಯಕ್ಷ್ ನಜ್ರೆತ್ ನೆರಿ ತಾಕೊಡೆ ಹಾಣೆಂ, ‘ಕಿತ್ಲೆ ವೇಸ್’ ಮ್ಹಳ್ಳಿ ಮನ್ಶಾಂಚ್ಯಾ ವೆವೆಗ್ಳ್ಯಾ ಮುಕ್ಡ್ಯಾಂಚಿ ಕವಿತಾ ಸಾದರ್ ಕೆಲಿ.
ತ್ಯಾ ಉಪ್ರಾಂತ್ ಲೊರೆನ್ಸ್ ಡಿಸೋಜಾ ಕಮಾನಿ ಹಾಚ್ಯಾ ಅಧ್ಯಕ್ಷಪಣಾಖಾಲ್ ‘ಆಟ್ವೆ ವಳೆರಿಂತ್ ಕೊಂಕಣಿ ಭಾಸ್ ಮೆಳ್ಳ್ಯಾ ಉಪ್ರಾಂತ್ ಕೊಂಕಣಿ ಸಾಹಿತ್ಯ್ ಆನಿ ಸಮಾಜೆಚೆರ್ ಜಾಲ್ಲಿ ಬದ್ಲಾವಣ್’ ಹ್ಯಾ ವಿಶಯಾಚೆರ್ ಪರಿಸಂವಾದ್ ಚಲ್ಲೊ. ಕೊಂಕಣಿ ವಾವ್ರಾಡಿ ಆನಿ ಪತ್ರಕರ್ತ್ ವಿತೊರಿ ಕಾರ್ಕಳ್ ಹಾಣೆಂ - ಕೊಂಕಣಿ ಭಾಸ್ ಆಯಾಬೊಯಾಂಚೆ ದುರ್ಗತೆ ಥಾವ್ನ್, ಹಾಂವ್ ಕೊಂಕಣಿ ಉಲಯ್ತಾಂ ಮ್ಹಳ್ಳ್ಯಾ ಘನಾಚ್ಯಾ ಸ್ಥಾನಾಕ್ ಯೇವ್ನ್ ರಾವಲ್ಲ್ಯಾ ಪಯ್ಣಾಚೊ ವಿವರ್ ದಿಲೊ. ಸಾಂಗಾತಾ ಏಕ್ ಭಾಸ್ ಆಟ್ವೆ ವಳೆರಿಂತ್ ರಿಗ್ಲ್ಯಾರ್ ಸಮುದಾಯಾಕ್ ಆನಿ ವ್ಯಕ್ತಿಂಕ್ ಜಾಂವ್ಚ್ಯಾ ಫಾಯ್ದ್ಯಾವಿಶಿಂ ಮ್ಹಾಯೆತ್ ದಿಲಿ. ಆಟ್ವಿ ವಳೆರಿ ಆನಿ ಸಾಹಿತ್ಯಾಂತ್ಲಿ ಬದ್ಲಾವಣ್ ಹ್ಯಾವಿಶಿಂ ಉಲಯಿಲ್ಲೊ ‘ದಿರ್ವೆಂ’ ಪತ್ರಾಚೊ ಸಹ-ಸಂಪಾದಕ್, ಕೊಂಕಣಿ ಕವಿ ವಿಲ್ಸನ್ ಕಟೀಲಾನ್ -ಭಾಸ್, ಉತ್ರಾಂ, ಅಭಿವ್ಯಕ್ತಿ ಆನಿ ಪಿಂತುರ್ ಹೆ ಸಾಂಕ್ಳೆಚೆಂ ಮಹತ್ವ್ ಸಾಂಗ್ತಾನಾ ಉತ್ರಾಂಚಿ ಮೀತ್ ಆನಿ ಅಭಿವ್ಯಕ್ತಿಚಿ ತೀವೃತಾ ಹಾಂಚೆ ಮಧ್ಲೊ ಫರಕ್ ಉಜಾರ್ ಕೆಲೊ ಆನಿ ಅನ್ಭೋಗಚ್ ಸಾಹಿತ್ಯಾಚೊ ಬಂಡ್ವಾಳ್ ಮ್ಹಣ್ ಪಾಚಾರ್‍ಲೆಂ.
ಕಾರ್ಯಕ್ರಮಾಚೊ ಪ್ರಮುಖ್ ವಾಂಟೊ ಜಾವ್ನ್ ಕವಿ ತಶೆಂ ವಿಮರ್ಶಕ್ ಎಚ್ಚೆಮ್ ಪೆರ್ನಾಲಾಚ್ಯಾ ಅಧ್ಯಕ್ಷಪಣಾಖಾಲ್ ಪ್ರಮುಖ್ ಕವಿಗೋಷ್ಠಿ ಚಲ್ಲಿ. ಪ್ರಸನ್ನ್ ನಿಡ್ಡೋಡಿ ಹಾಣೆಂ ‘ಕವಿತಾ’ ಆನಿ ‘ನೊತಿಂ’ ನಾಂವಾಚ್ಯೊ ಕವಿತಾ ಪೇಶ್ ಕೆಲ್ಯೊ ತರ್ ಮೆಲ್ವಿನ್ ರೊಡ್ರಿಗಸ್ ಹಾಣೆಂ ‘ಝುಜ್’ ಕವಿತಾ ಸಾದರ್ ಕೆಲಿ. ಶೀಲಾ ಕಂಭದಕೋಣ್ ಹಿಣೆಂ ‘ಸ್ವಾರ್ಥ್’ ಆನಿ ‘ಪಯ್ರಿ ಧೊರ್ನು ಫಾಯಿ ಥಾಯಿ’; ವಿಲ್ಸನ್ ಕಟೀಲಾನ್ ‘ಮ್ಹಜಿ ಕೃಶಿ’; ದಿಲೀಪ್ ಧರ್ಗಾಳ್ಕಾರಾನ್ ‘ಝಿರಿಮಿರಿ ಪಾವ್ಸ್’; ವಿ.ಡಿಸಿಲ್ವಾ ಕಾಂಜೂರ್‌ಮಾರ್ಗ್ ಹಾಣೆಂ ‘ರಚ್ನೆಚೆಂ ರುದಾನ್’; ಫಿಲೊಮಿನಾ ಸಾಂಫ್ರಾನ್ಸಿಸ್ಕೊನ್ ‘ದುಖಾಂ’ ಆನಿ ‘ಕರ್‍ಚೆಂ ಕಿತೆಂ?’ ಆನಿ ರೊನ್ ಮೈಕಲ್ ಆಂಜೆಲೊರ್ ಹಾಣೆಂ ‘ಫುಲಾಂ’ ಕವಿತಾ ಆನಿ ಕವಿಗೋಷ್ಟಿಚೊ ಅಧ್ಯಕ್ಷ್ ಎಚ್ಚೆಮ್ ಪೆರ್ನಾಲಾನ್ ‘ಜನೆಲ್’ ಕವಿತಾ ಪೇಶ್ ಕೆಲ್ಯೊ.
ಕವಿಗೋಷ್ಟಿಂತ್ ಪೇಶ್ ಜಾಲ್ಲ್ಯೊ ಚಡಾವತ್ ಕವಿತಾ ಗಡಿಂ ಗಡಿಂ ಮಧ್ಲ್ಯಾ, ಸಂಸ್ಕೃತೆ ಸಂಸ್ಕೃತೆ ಮಧ್ಲ್ಯಾ, ಮನ್ಶಾ ಮನ್ಶಾ ಮಧ್ಲ್ಯಾ, ಪ್ರಕೃತಿ ಆನಿ ಅಭಿವೃದ್ಧಿ ಮಧ್ಲ್ಯಾ ಝುಜಾವಿಶಿಂ ಆಸ್ಲ್ಯೊ. ಪ್ರಸನ್ನ್ ನಿಡ್ಡೋಡಿಚಿ ‘ನೊತಿಂ’ ಕವಿತಾ ಎಕೆ ಚಲಿಯೆಚೆ ಸೈಂಭಿಕ್ ಅತ್ರೆಗ್ ಆನಿ ನಿಸ್ಕಳ್‌ಪಣ್ ಸಾಂಬಾಳ್ನ್ ವ್ಹರ್‍ಚ್ಯಾ ಝುಜಾವಿಶಿಂ ಆಸ್ಲಿ ತರ್, ಮೆಲ್ವಿನ್ ರೊಡ್ರಿಗಸಾಚಿ ಕವಿತಾ ಗಡಿಂ ಭಾಯ್ರ್ ಪಾವಲ್ಲ್ಯಾ ಮನ್ಶಾಚೆಂ ಅಸ್ತಿತ್ವ್ ಉರೊವ್ನ್ ಘೆಂವ್ಚ್ಯಾ ಝುಜಾವಿಶಿಂ ಆಸ್ಲಿ. ವಿಲ್ಸನ್ ಕಟೀಲಾಚಿ ಕವಿತಾ ಸರ್ಕಾರಿ ಪ್ರಾಯೋಜಿತ್ ಅಭಿವೃದ್ದೆಕ್ ಹರ್ದೆಂ ದೀವ್ನ್ ರಾಂವ್ಚೆ ಪ್ರಕೃತೆಚ್ಯಾ ಝುಜಾವಿಶಿಂ ಆಸ್ಲಿ. ಶೀಲಾ ಕಂಭದಕೋಣೆಚಿ ಕವಿತಾ ಮ್ಹಾನಗರಾಂತ್ಲೆ ಸಂಕೀರ್ಣ್ ಜಿಣ್ಯೆಂತ್ ಮುಖಾಮುಖಿ ಜಾಂವ್ಚ್ಯಾ ಮನ್ಶಾಪಣಾವಿಶಿಂ ಆಸಲ್ಲಿ. ಫಿಲೊಮಿನಾ ಸಾಂಫ್ರಾನ್ಸಿಸ್ಕೊಚಿ ಕವಿತಾ ಮನ್ಶಾಪಾತ್ಯೆಣಿ ಆನಿ ಘಾತ್ ಫುಡ್ ಕರ್‍ಚ್ಯಾ ಝುಜಾವಿಶಿಂ ಆಸ್ಲಿ. ವಿ. ಡಿಸಿಲ್ವಾ ಕಾಂಜೂರ್‌ಮಾರ್ಗಾಚಿ ಕವಿತಾ ಸೃಷ್ಠಿ ಆನಿ ಮನ್ಶಾಚ್ಯಾ ಆಬ್ಲೆಸ್‌ಪಣಾಚ್ಯಾ ಝುಜಾವಿಶ್ಯಾಂತ್ ಆಸ್ಲಿ. ಗೊಂಯ್ಚೊ ಕವಿ ದಿಲೀಪ್ ಧರ್ಗಾಳ್ಕಾರ್ ಹಾಣೆಂ ಪಾವ್ಸಾಚಿ ಕವಿತಾ ಗಾವ್ನ್ ದಾಕಯ್ಲಿ ತರ್ ರೊನ್ ಮೈಕಲ್ ಆಂಜೆಲೊರ್ ಹಾಣೆಂ ಫುಲಾಂಚ್ಯಾ ವೊಡ್ತಾಂತ್ ಪಾಸಾಯೊ ಮಾರಿಶೆಂ ಕೆಲೆಂ. ಎಚ್ಚೆಮ್ ಪೆರ್ನಾಳ್ ಹಾಣೆಂ ಆಪ್ಲೆ ‘ಜನೆಲ್’ ಕವಿತೆಂತ್ ದೇಶಾಂತ್ ವಿಸ್ತಾರೊನ್ ಯೆಂವ್ಚೊ ಕೊಮುವಾದ್ ಆನಿ ಅಸ್ಕತ್ ಜಾವ್ನ್ ಯೆಂವ್ಚಿ ಸೆಕ್ಯುಲರ್ ಸುವಾತ್ ಹಾಂಚೆ ಮಧ್ಲೆಂ ಝುಜ್ ಉಗ್ಡಾಪೆಂ ಕೆಲೆಂ.
ಅಧ್ಯಕ್ಷ್ ಪದ್ವೆಥಾವ್ನ್ ಉಲಯಿಲ್ಯಾ ಕವಿ ಎಚ್ಚೆಮ್ ಪೆರ್ನಾಳಾನ್ ಅನಾಉತಾಂಚೆಂ ಶಹರ್ ಮುಂಬಯ್ ಆಜ್ ಝುಜಾಂಚೆಂ ಶೆರ್ ಜಾವ್ನ್ ಬದಲ್ಲಲ್ಯಾ ಪಾಟ್‌ಥಳಾರ್ ಮುಂಬಯ್ಚ್ಯಾ ಕವಿಂನಿ ಆಪ್ಲ್ಯಾ ಕಾವ್ಯಾಂತ್ ಫುಲ್-ಭಂವರ್ ಸೊಡ್ನ್, ಶೆರಾಚ್ಯಾ ಸಂಕೀರ್ಣ್ ಜಿಣ್ಯೆಚಿಂ ‘ಝುಜಾಂ’ ಹಾಡುಂಕ್ ಉಲೊ ದಿಲೊ.
ಸಾಂಜೆರ್ ಕೊಂಕಣಿ ವಾಚನಾಲಯಾಚೆಂ ಉಗ್ತಾವಣ್ ಆನಿ ಸಾಂಸ್ಕೃತಿಕ್ ಕಾರ್ಯೆಂ ಚಲ್ಲೆಂ.
- ಕವಿತಾ ಭಾತ್ಮಿ