ಕವಿತೆಂತ್ ಮೋಗ್ ಫುಟೊನ್ ಭಾಯ್ರ್ ಯೇಜೆ: ಆವಿನಾ ಮಿಯಾರ್
'ಕವಿತಾ ಮ್ಹಳ್ಯಾರ್ ತಾಂತುಂ ಮೋಗ್ ಪುಟೊನ್ ಭಾಯ್ರ್ ಯೇಂವ್ಕ್ ಜಾಯ್ . . .' ಅಶೆಂ ಮ್ಹಣಾಲಿ ಅವಿನಾ ಮಿಯಾರ್, ಕೊಂಕ್ಣೆಚಿ ಆಧುನಿಕ್ ಕವಯತ್ರಿ ಆನಿ ಮನ್ಶ್ಯಾಸಂಪನ್ಮೂಳಾ ಅಭಿವ್ರದ್ದಿ ಶಾಸ್ತ್ರಾಚಿ ಪ್ರಾದ್ಯಾಪಕಿ. ತಿ ಕಾರ್ಕೊಳ್ ಗುಮ್ಟ್ಯಾಗುಡ್ಯಾ ಲಾಗ್ಶಿಲ್ಯಾ 'ಸೋನಿಯಾ ಕೇಟರರ್ಸ್' ಮ್ಹಾಲಕ್ ಮಾನೇಸ್ತ್ ವಲ್ಲಿ ಸೋಜಾಗೆಲ್ಯಾಂ ಮಾಲ್ಗಡ್ಯಾ ಘರ್ಚ್ಯಾ ಆಂಗ್ಣಾಂತ್ ಕವಿತಾ ಟ್ರಸ್ಟಾನ್ ಮಾಂಡುನ್ ಹಾಡಲ್ಲೆ ಕವಿಗೋಶ್ಟಿಚೆಂ ಸುಂಕಾಣ್ ಘೆವ್ನ್ ಉಲಯ್ತಾಲಿ. 'ಮೋಗ್ ಮ್ಹಳ್ಯಾರ್ - ಮೋಗ್ ಮಾತ್ಯೆಚೊ , ಮೋಗ್ ಪ್ರಿತುಮೆಚೊ, ಮೋಗ್ ಮೋಗ್‌ಕರ್‍ಣಾರಾಂಚೊ , ಮೋಗ್ ಸಿದ್ದಾಂತಾಚೊ ಆನಿ ಮೋಗ್ ಜಿಣ್ಯೆಅನ್ಬೋಗಾಂಚೊ. ಆನಿ ಹೊ ಮೋಗ್ ಕವಿತೆಂತ್ ಆಯ್ಲ್ಯಾರ್ ಮಾತ್ ತೆಂ ಕಾವ್ಯೆಂ ಸತ್ವಾಭರಿತ್ ಜಾತಾ' ಮ್ಹಳ್ಳ್ಯಾ ಆವಿನಾನ್ ನೋಬೆಲ್ ಇನಾಮ್ ಜಿಕ್ಪಿ ಕವಿ ಗುರುದೇವ್ ರವೀಂದ್ರನಾಥ್ ಠಾಗೋರ್ ಹಾಂಚೆ ಕವಿತೆಚ್ಯೊ ಚಾರ್ ವೊಳಿ ವಾಚ್ಲ್ಯೊ ಆನಿ ಮ್ಹಣಾಲಿ ಕವಿ ಫಾಲ್ಯಾಂ ಹೆ ಧರ್‍ತೆರ್ ನಾ ಜಾಲ್ಯಾರಿ ರೂಕ್ ಆನಿ ತಾಚ್ಯಾ ಫುಲಾಂಫಳಾಂಪರಿಂ, ಕೋಣ್ ತಾಚ್ಯಾ ಕಾವ್ಯಾಕ್ ಆನಿ ತಾಕಾಯ್ ವಿಸ್ರನಾ.
ಕಾನಡಿ ಬರೊವ್ಪಿ ಜೋಗಿ ತಶೆಂ ಅಮೃತಾ ಪ್ರೀತಮ್ ಆನಿ ಖಲೀಲ್ ಗಿಬ್ರಾನಾಚೊ ಉಲ್ಲೇಕ್ ಕರ್ನ್ ತಿ ಮ್ಹಣಾಲಿ ಕವಿತೆಂತ್ ಏಕ್ ಸ್ಥಾಯಿ ಭೊಗಾಪ್ ಆಸ್ಚೆಂ ಬೋವ್‌ಚ್ ಗರ್ಜೆಚೆಂ ಆನಿ ಚಡ್‌ಕರುನ್ ಹ್ಯಾ ಕವಿಂಚ್ಯಾ ಕವಿತೆಂನಿ ತೆಂ ಆಸಾ ಮ್ಹಣಾಲಿ.
ಥಳೀಯ್ ಸಂಗಟಕ್ ಕವಿತಾ ಟ್ರಸ್ಟ್ ಟ್ರಸ್ಟಿ ವಿತೊರಿ ಕಾರ್ಕೊಳ್ ಹಾಣೆ ಸರ್ವಾಂಕ್ ಯೆವ್ಕಾರ್ ಮಾಗ್ಲೊ ಆನಿ ಯೆಜ್ಮಾನಿ ವಲ್ಲಿ ಸೊಜ್ ಆನಿ ತಾಚೆ ಆವಯ್ಕ್ ಕವಿತಾ ಟ್ರಸ್ಟ್ ಅದ್ಯಕ್ಶ್ ಮೆಲ್ವಿನ್ ರೊಡ್ರಿಗಸ್ ಹಾಣಿ ಗುಲೊಬ್ ದೀವ್ನ್ ಮಾನ್ ಕೆಲೊ. ಕವಿತಾ ಟ್ರಸ್ಟಾಚೆಂ ಮಿಸಾಂವ್, ಎದೊಳ್ ಕೆಲ್ಲೊ ವಾವ್ರ್, ತಾಂತುಂ ಮೆಳಲ್ಲಿ ದಾಧೊಸ್ಕಾಯ್, ಫುಡಾರಾಂತ್ಲ್ಯೊ ಯೆವ್ಜಣ್ಯೊ ಆನಿ 2000 ಜನೆರಾಚೆ 9 ತಾರಿಕೆರ್ ನಕ್ರೆಚಾ ಜೋರ್ಜ್ ಕಾಸ್ತೆಲಿನೊಚ್ಯಾ ಘರ್ಚ್ಯಾ ಆಂಗ್ಣಾಂತ್ ಯೆವ್ಜಿಲ್ಲ್ಯಾ ಪಾಂಚ್ವ್ಯಾ ಕವಿತಾ ಫೆಸ್ತಾವಿಶಿಂ ಸವಿಸ್ತಾರ್ ಮಾಯೆತ್ ದಿಲ್ಲ್ಯಾ ಕವಿತಾ ಟ್ರಸ್ಟಾಚೊ ಅದ್ಯಕ್ಶ್ ಮೆಲ್ವಿನ್ ರೊಡ್ರಿಗಸಾನ್ ಕಾರ್ಕೊಳ್ ಆನಿ ಆಸ್‌ಪಾಸ್ಚ್ಯಾ ಲೊಕಾಕ್ ಕವಿತಾ ಫೆಸ್ತ್ -2011 ಹಾಚಿ ವೊವ್ಳಿಗ್ ದಿಲಿ.
ಕವಿಗೋಶ್ಟಿಂತ್ ವಿಲ್ಲಿಯಮ್ ಕಾರ್ಕೊಳ್, ವಿನ್ಸೆಂಟ್ ಆಳ್ವಾ ಪಾಂಬೂರ್, ಜೋರ್ಜ್ ಕಾಸ್ತೆಲೊನೊ ನಕ್ರೆ, ವೆಂಕಟೇಶ್ ನಾಯಕ್ ಮಂಗ್ಳುರ್, ಎಚ್ಚೆಮ್ ಪೆರ್‍ನಾಳ್ , ಮೆಲ್ವಿನ್ ಪೆರ್‍ನಾಳ್, ಆಲ್ವಿ ಪೆರ್‍ನಾಳ್, ವಿತೊರಿ ಕಾರ್ಕೊಳ್, ಮೆಲ್ವಿನ್ ರೊಡ್ರಿಗಸ್ ಆನಿ ಅವಿನಾ ಮಿಯಾರ್ ಹಾಂಣಿ ಆಪ್ಲ್ಯೊ ಕವಿತಾ ವಾಚ್ಲ್ಯೊ.
ಹ್ಯೊ ಕವಿತಾ ಆಯ್ಕೊನ್ ಪ್ರೇರಣ್ ಜೋಡ್ನ್ ಕವಿಗೋಶ್ಟಿ ವಿಶ್ಯಾಂತ್ ಅಭಿಪ್ರಾಯೊ ದಿತಾನಾ ಪ್ರಕಾಶ್ ಹಾಣೆ ರುಕಾಆಡೆಂ ಆನಿ ವಾಲಿಚ್ಯಾ ಲಗಿನಾ ವಿಶ್ಯಾಂತ್ ಏಕ್ ಆಶುಕವಿತಾ ಪೇಶ್ ಕೆಲಿ. ವಾಡ್ಯಾಚೊ ಗುರ್ಕಾರ್ ದೀಪಕ್, ಸಿಸ್ಟರ್ ಹೆಝೆಲ್, ಹೆರಾಲ್ಡ್ ಪಾಯ್ಸ್, ಪ್ರೆಸಿಲ್ಲಾಬಾಯ್ ಹಾಂಣೀಇ ಆಪಾಪ್ಲ್ಯೊ ಅಭಿಪ್ರಾಯೊ ದಿಲ್ಯೊ.
ದಾಯ್ಜಿವರ್ಲ್ಡ್ ಡೊಟ್ ಕೊಮ್ ಹೆ ಅಂತರ್ಜಾಳಿಚೊ ಮುಕೆಲ್ ಸಂಪಾದಕ್ ವೊಲ್ಟರ್ ನಂದಳಿಕೆ ಆನಿ ಹೆರ್ ಜಾಯ್ತೆ ಕವಿಗೋಶ್ಟಿಕ್ ಹಾಜರ್ ಆಸ್ಲೆ. ಕವಿತಾ ಟ್ರಸ್ಟ್ ಟ್ರಸ್ಟಿ ವಿಲಿಯಮ್ ಪಾಯ್ಸ್ ಹಾಂಣಿ ದಿನ್ವಾಸ್ ದಿಲೆ.