ಕವಿತಾ ಮೇಳಾಂತ್ ಚಾಫ್ರಾಚ್ಯಾ ಕವಿತಾಂಚೊ ಪರ್ಮಳ್ ಪ್ರಸಾರ್‍ಲೊ
ಕವಿತಾ ಟ್ರಸ್ಟಾನ್, ಮಾಂಡ್ ಸೊಭಾಣಾಚ್ಯಾ ಸಹಯೋಗಾನ್ ವಿಶ್ವ ಕೊಂಕ್ಣಿ ಸಾಂಸ್ಕೃತಿಕ್ ಮ್ಹಾಮೆಳಾಚ್ಯಾ ಸಂದರ್ಭಾರ್ ಮಾಂಡುನ್ ಹಾಡಲ್ಲೊ ಕವಿತಾ ಮೇಳ್ ಚಾಫ್ರಾಚ್ಯಾ ಕವಿತಾಂಚೆರ್ ಪರ್‍ತ್ಯಾನ್ ಏಕ್ ಪಾವ್ಟಿಂ ಸುಕ್ಷಿಮಾಯೆಚಿ ದೀಷ್ಟ್ ಚರೊಂವ್ಚ್ಯಾಂತ್ ಆನಿ ಚಾಫ್ರಾಚೆ ಕವಿತೆಚಿ ರೂಚ್ ಸಲೀಸ್ ರಿತಿನ್ ಲೊಕಾನ್ ಚಾಕಿಶೆಂ ಕರಂವ್ಚ್ಯಾಂತ್ ಯಶಸ್ವಿ ಜಾಲೊ.
ಹ್ಯಾಚ್ ದಶೆಂಬ್ರಾಚೆ 4 ತಾರಿಕೆರ್ ಚಲಲ್ಲ್ಯಾ ಹ್ಯಾ ಕವಿತಾ ಮೇಳಾಂತ್, ಸಕಾಳಿಂ ಧಾ ಥಾವ್ನ್ ಬಾರಾ ವೊರಾಂ ಪರ್ಯಾಂತ್, `ಚಾಫ್ರಾಚ್ಯಾ ಕವಿತಾಂನಿ ಜಾಗೃತಿಚೆಂ ಕಿಟಾಳ್ ಆನಿ ನಿರಾಸ್ವಾದ್' - ಹ್ಯಾ ವಿಷಯಾಚೆರ್ ವಿಚಾರ್ ಸಾತೆಂ ಚಲ್ಲೆಂ. ಗೊಂಯ್ ವಿಶ್ವವಿದ್ಯಾನಿಲಯಾಚ್ಯಾ ಕೊಂಕ್ಣಿ ವಿಭಾಗಾಚಿ ಮುಕೆಲಿ ಡೊ. ಚಂದ್ರಲೇಖಾ ಡಿಸೋಜಾ ಹಿಣೆಂ ಹ್ಯಾ ವಿಚಾರ್ ಸಾತ್ಯಾಚೆಂ ಅಧ್ಯಕ್ಷ ಪಣ್ ಘೆತಲ್ಲೆಂ.
ಫಾ ಮೆಲ್ವಿನ್ ಪಿಂಟೊ ನೀರುಡೆ, ಬೆಂಗ್ಳುರ್ ಹಾಂಣಿ ಇಂಗ್ಲಿಷ್ ಕವಿ ವಿಲಿಯಮ್ ವರ್ಡ್ಸ್ ವರ್ತಾನ್ `ಬಳ್ವಂತ್ ಭೊಗ್ಣಾಂಚೊ ಸರಾಗ್ ವ್ಹಾಳೊ'ಚ್ ಕವಿತಾ ಮ್ಹಣೊನ್ ಸಾಂಗ್ಲಾಂ ಆನಿ ಚಾಫ್ರಾಚ್ಯಾ ಕವಿತಾಂನಿ ಕೊಂಕ್ಣಿ ಲೊಕಾ ಮಧೆಂ ಕ್ರಾಂತೆಚೆಂ ಕಿಟಾಳ್ ಪೆಟಯ್ಲಾಂ ಅಶೆಂ ಸಾಂಗ್ಲೆಂ. `ಕ್ರಾಂತಿ ಹಾಡ್ಚೆಖಾತೀರ್ ಕವಿತಾ ಕೊಣಯ್ ಬರಯ್ತಾ ಮ್ಹಣೊನ್ ಸಾಂಗೊಂಕ್ ಜಾಯ್ನಾ. ಪುಣ್ ಕವಿತಾ ಕ್ರಾಂತೆಕ್ ಸ್ಫೂರ್ತ್ ದಿತಾತ್ ತೆಂ ಖರೆಂ. ಪಿ ಬಿ ಶೆಲ್ಲಿಚ್ಯೊ ಕವಿತಾ ಫ್ರೆಂಚ್ ಕ್ರಾಂತೆಕ್ ಕಾರಣ್ ಜಾಲ್ಲ್ಯೊ' ಅಶೆಂ ತಾಣೆಂ ಆಪ್ಲ್ಯಾ ಉಲೊವ್ಪಾಂತ್ ಸಾಂಗ್ಲೆಂ.
ಚಾಫ್ರಾಚ್ಯೊ ಕವಿತಾ, ಧರ್ಮ್, ಸಂಸ್ಕೃತಿ ತಶೆಂ ಸಂಪ್ರದಾಯ್ ಆನಿ ಕೊಂಕಣೀ ಭಾಸ್ -ಅಶೆಂ ತೀನ್ ಭಾಗಾಂನಿ ವಾಂಟೆ ಕೆಲ್ಲ್ಯಾ ಮೆಲ್ವಿನ್ ಪಿಂಟೊನ್ `ಆಯ್ಚ್ಯಾ ದಿಸಾ ಕೊಂಕಣಿ ಉರೊಂವ್ಕ್ ಆಮಿ ಸರ್ವಾಂನಿ ಆಮ್ಚಿ ಸಕತ್ ಆಟಯ್ಜೆ ಪಡ್ತಾ. ಪುಣ್ ಚಾಫ್ರಾನ್ ಧಾಕ್ಡ್ಯಾಂ ಆದಿಂ ಅಸಲಿ ಏಕ್ ಮ್ಹಿನತ್ ಘಾಲ್ಲಿ. ಆಪ್ಲ್ಯಾ ಕವಿತಾಂ ದ್ವಾರಿಂ ಪ್ರಸ್ತುತ್ ಸಮಾಜಾಂತ್ಲಿ ಕುಸಡಾಯ್ ಮಾರ್ನ್ ಉಡಯ್ತಾನಾ ಚಾಫ್ರಾನ್ ಕಾಂಯ್ ಅಪ್ರೂಪಾಚ್ಯೊ ಬಳ್ವಂತ್ ಕವಿತಾ ಕೊಂಕ್ಣಿಕ್ ದಿಲ್ಯಾತ್. ಆಪ್ಲ್ಯಾ ಕವಿತಾ ದ್ವಾರಿಂ ಸಮಾಜೆಂತ್ ಜಾಗೃತಿಚೆಂ ಕಿಟಾಳ್ ಪೆಟೊವ್ನ್, ಕ್ರಾಂತೆಚೆಂ ಜೆಂ ಆಗ್ಟೆಂ ತಾಣೆಂ ಪೆಟಯ್ಲಾಂ ತೆಂ ಮಾಪುಂಕ್ ಅಸಾಧ್ಯ್' ಅಶೆಂ ಸಾಂಗ್ಲೆಂ.
ವಿಲ್ಸನ್ ಕಟೀಲಾನ್ ಚಾಫ್ರಾಚ್ಯಾ ಕವಿತಾಂನಿ ನಿರಾಸ್ವಾದ್ ವಿಷಯಾಚೆರ್ ಆಪ್ಲೊ ಪ್ರಬಂಧ್ ವಾಚ್ಲೊ. `ಚಾಫ್ರಾಚ್ಯಾ ಕವಿತಾಂನಿ ನಿರಾಸ್ವಾದ್ ನಾ, ಬದ್ಲಾ ನಿರಾಸ್‍ಪಣ್ ಆಸಾ' ಮ್ಹಣೊನ್ ಸಾಂಗಲ್ಲ್ಯಾ ವಿಲ್ಸನಾನ್ ಹೊ ನಿರಾಸ್ ತಾಣೆಂ ಸಾರಲ್ಲ್ಯಾ ಜಿವಿತಾಕ್ ಆರ್ಸೊ ಧರ್‍ತಾ ಮ್ಹಣ್ ಸಾಂಗ್ಲೆಂ. ಚಾಫ್ರಾನ್ ಆಪ್ಲೆಂ ನಿರಾಸ್‍ಪಣ್ ಸಾಂಗೊಂಕ್ ಇತ್ಲಿ ಸೊಭಿತ್ ಭಾಸ್ ವಾಪರ್‍ಲ್ಯಾ , ವಾಚ್ತಲ್ಯಾ ಮನ್ಶಾಕ್ ನಿರಾಸ್ಪಣಾಚಿ ವಿಸರ್ ಪಡ್ತಾ ಆನಿ ತೊ ಯಾ ತಿ ತಾಚೆ ಭಾಶೆಚ್ಯಾ ಮೊಗಾರ್ ಪಡ್ತಾ' ಅಶೆಂ ವಿವರ್ ದಿಲೊ. `ಚಾಫ್ರಾಚ್ಯಾ ಕವಿತಾಂನಿ ನಿರಾಸ್ಲಲಿ ಚಲಿ ಏಕ್ ಸಿಲ್ಕಾಚಿ ಸಾಡಿ ನ್ಹೆಸೊನ್ ಅಸಲ್ಲ್ಯಾಬರಿ, ಭಾಸ್ ವ್ಹಾಳ್ತಾ' ಮ್ಹಣ್ ಸಾಂಗಲ್ಲ್ಯಾ ವಿಲ್ಸನಾನ್ ತಾಚಿ `ಸೊಂಶ್ಯಾಚೆ ಕಾನ್' `ಖರಸ್' ಆನಿ ಚಾರ್ ಚೊವ್ಗಾಂಕ್ ಮಾನ್ ನಾ' ಕವಿತಾಚೆರ್ ವಿಶ್ಲೇಶಣ್ ಕೆಲೆಂ.
ಅಧ್ಯಕ್ಷಪಣ್ ಘೆತಲ್ಲ್ಯಾ ಡೊ ಚಂದ್ರಲೇಖಾ ಡಿಸೋಜಾನ್ ಚಾಫ್ರಾಚ್ಯಾ ಕವಿತಾಂನಿ ರಮ್ಯವಾದ್ ನಾ. ತೊ ನಿಜಾಯೆ ಥಾವ್ನ್ ಬಿಲ್ಕುಲ್ ಪಯ್ಸ್ ನಾಂತ್ ಮ್ಹಣೊನ್ ಸಾಂಗ್ಲೆಂ. ಚಾಫ್ರಾಚ್ಯೊ ಕವಿತಾ ಖಿಣ್ಯಾಳ್ಯೊ ಜಾಂವ್ಕ್ ಪುರೊ, ಪುಣ್ ತ್ಯೊ ಲಿಖ್ಚ್ಯಾ ಪಯ್ಲೆಂ ಕವಿ ಜಾಗೊ ಆಸೊನ್ ತಾಕಾ ಭೊಂವ್ತಣಿಚಿ ಪ್ರಜ್ಞಾ ಆಸಲ್ಲಿ ಮ್ಹಳ್ಳೆಂ ಸಾಂಗ್ತಾತ್. ಎಕ್ಲೊ ಕವಿ ಆಪ್ಲ್ಯಾ ಭೊಂವಾರಾ ಥಂಯ್ ಆಪ್ಲೆ ಕಾನ್ ಆನಿ ದೊಳೆ ಉಗ್ತೆ ದವರ್‍ತಾ, ನಾಂತರ್ ತೊ ಕವಿ ಜಾಂವ್ಕ್ ಸಾಧ್ಯ್ ನಾ -ಅಶೆಂ ತಿಣೆಂ ಸಾಂಗ್ಲೆಂ.
ಕವಿತಾ ಟ್ರಸ್ಟಾಚೊ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಸುರ್ವೆರ್ ಸ್ವಾಗತ್ ಕೆಲೊ ಆನಿ ಉಲೊವ್ಪ್ಯಾಂಚಿ ವೊಳಕ್ ಕರುನ್ ದಿಲಿ. ಮಾಂಡ್ ಸೊಭಾಣ್ ಅಧ್ಯಕ್ಷ್ ಲುವಿ ಜೆ ಪಿಂಟೊ, ಗುರ್ಕಾರ್ ಎರಿಕ್ ಒಝೇರಿಯೊ ಆನಿ ವಿಚಾರ್ ಸಾತ್ಯಾಂಚಿ ಸಂಚಾಲಕಿ ಐರಿನ್ ರೆಬೆಲ್ಲೊ ಹಿಣೆಂ ಸೈರ್‍ಯಾಂಕ್ ಫುಲಾಂ ದೀವ್ನ್ ಮಾನ್ ಕೆಲೊ. ವಿತೊರಿ ಕಾರ್ಕೊಳಾನ್ ಉಪ್ಕಾರ್ ಭಾವುಡ್ಲೆ.
ದೊನ್ಪಾರಾಂಚ್ಯಾ ಆದೆಸಾಂತ್ ಚಲಲ್ಲೆ ಕವಿಗೋಷ್ಟಿಚೆಂ ಸುಂಕಾಣ್ ಎಚ್ಚೆಮ್ ಪೆರ್ನಾಳಾನ್ ಘೆತಲ್ಲೆಂ. `ಭೊಗ್ಣಾಂಚೊ ಅವೇಶ್ ಜಾಂವ್ ಮೋಗ್, ಜಾಂವ್ ರಾಗ್ ಕವಿತಾ ಜಾಯ್ನಾ. ಜಿಣ್ಯೆ ಅನ್ಭೋಗಾನ್ ಪಿಕ್ಲೆಲಿ ಕವಿತಾ ಮಾತ್ರ್ ಥಿರ್‍ತಾ. ಸಂಸಾರ್ ಖೊಟೊ ಜಾಲಾ ವ್ಹಯ್ ತರ್ ತಾಕಾ ಏಕ್ ಕಾರಣ್ ಉಲಯ್ಜೆ ಜಾಲ್ಲ್ಯಾಂನಿ ಸಾಂಬಾಳ್ಚೆಂ ಮೌನ್ ಆನಿ ಹಾಕಾ ಮೀಡಿಯಾ ಅಪ್ವಾದ್ ನ್ಹಯ್. ಕವಿಂನಿ ಕವಿತಾ ವಾಚ್ತಾನಾ ಕಿಂಕ್ರಾಟೊನ್ ಆಯ್ಕೊವ್ಪ್ಯಾಂಕ್ ಆತಾಂ ಮ್ಹಜೆ ಕಾನ್ ಸೊಡ್ ಮ್ಹಣೊಂಕ್ ಕರಿನಾಯೆ’ ಅಶೆಂ ತಾಣೆಂ ಮ್ಹಳೆಂ. ಕವಿಗೋಷ್ಟಿಂತ್ ಗ್ವಾದಲೂಪ್ ಡಾಯಸ್, ಸುವರ್ಣ ಗಾಡ್ ಕಾರ್ವಾರ್, ಗೌರೀಶ್ ವೆರ್ಣೆಕಾರ್ ಗೊಂಯ್, ಶೀಲಾ ಕಂಭದಕೋಣೆ, ಎನ್ಸಿ ಪಾಲಡ್ಕಾ, ಶಿವಾನಂದ ಶೆಣೈ, ಆಲ್ವಿ ಕಾರ್ಮೆಲಿತ್, ಜನಾಬ್ ಸಯ್ಯದ್ ಸಮೀಉಲ್ಲಾ - ಹಾಂಣಿ ಭಾಗ್ ಘೆತ್ಲೊ.
ಸಾಂಜೆರ್ ಚಲಲ್ಲ್ಯಾ `ಕಾವ್ಯ ಸಂಗೀತ್ ಸಂಗಮ್' ಕಾರ್ಯಾವಳಿಂತ್ ಚಾಫ್ರಾಚ್ಯಾ ಪಂದ್ರಾ ಕವಿತಾಂಚೆಂ ಸಾದರ್‌ಪಣ್ ಜಾಲೆಂ. ಕವಿತಾ ವಾಚನ್, ನಟನ್, ಸಂಗೀತ್, ನಾಚ್ ಆನಿ ಗಾಯಾನ್ ಹಾಂಚಿ ಸೈರಿಕ್ ಘಡೊವ್ನ್ ಕವಿತಾ ಸಮ್ಜೊಂಕ್ ಆನಿ ಪೊಟ್ಲುನ್ ಧರುಂಕ್ ಸಲೀಸ್ ಜಾಯ್ಶೆಂ ಏಕ್ ವೆಗ್ಳೊಚ್ ಪ್ರಕಾರ್ ಹ್ಯಾವೆಳಿಂ ಸಾದರ್ ಜಾಲೊ. ಪುರಾಯ್ ಕವಿತಾ ಅಶ್ಯೊ ಮಾಂಡುನ್ ದವರಲ್ಲ್ಯೊ ತಾಂತ್ಲ್ಯಾನ್ ಏಕ್ ಕಾಣಿ ಆಸಲ್ಲಿ ಆನಿ ಮೊಗಾಚಿಂ ವೆವೆಗ್ಳಿಂ ರುಪಾಂ ಆನಿ ರಂಗ್ ಝಳ್ಕೆಕ್ ಪಡ್ಲೆ. ಸಗ್ಳಿ ಆಲೋಚೆನ್ ತಶೆಂ ಕವಿತಾಂಚಿ ವಿಂಚವ್ಣ್ ಮೆಲ್ವಿನ್ ರೊಡ್ರಿಗಸಾನ್ ಕೆಲ್ಲಿ ತರ್, ದಿಗ್ದರ್ಶನ್ ಆನಿ ವೀಜ್ ದಿವ್ಯಾಂಚಿ ಮಾಂಡಾವಳ್ ಜೋಯೆಲ್ ಪಿರೇರಿನ್ ಕೆಲ್ಲಿ. ಕವಿತಾಂಚೆಂ ಸಾದರ್‌ಪಣ್ ಡೆನಿಸ್ ಮೊಂತೇರ್, ಪ್ರೀಮಾ ಡಿಸಿಲ್ವಾ ಆನಿ ಆಮೋರಾ ಮೊಂತೇರ್ ಹಾಂಣಿ ಕೆಲೆಂ ತರ್, ನಾಚ್ ಆಶ್ವಿನ್ ಡಿಕೊಸ್ತಾ ಆನಿ ಮ್ಯೂರಿಯೆಲ್ ಕ್ರಾಸ್ತಾ ಹಾಂಣಿ ಕೆಲೊ. ಸಂಗೀತ್ ರೋಶನ್ ಡಿಸೋಜಾ ಆನಿ ಸಾಂಗಾತ್ಯಾಂನಿ ದಿಲ್ಲೆಂ ತರ್, ಪ್ರಕಾಶ್ ಡಿಸೋಜಾ ಆನಿ ಲವೀಟಾ ಲೋಬೊನ್ ಗಾಯಾನ್ ಕೆಲೆಂ. ನ್ಹೆಸಣ್ ವಿನ್ಯಾಸ್ ಡೆನಿಸ್ ಮೊಂತೇರೊಚೆಂ ಆಸಲ್ಲೆಂ ತರ್ ವೇದಿ ಸಜವ್ಣಿ ಬನ್ನುನ್ ಕೆಲ್ಲಿ.
ಕಾರ್ಯಾಕ್ ಮಾನಾಚೊ ಸೈರೊ ಜಾವ್ನ್ ಕನ್ನಡ ಲೇಖಕ್, ಗೀತ್‌ಕಾರ್ ಆನಿ ಕವಿ ಜಯಂತ ಕಾಯ್ಕಿಣಿ ಆಯಿಲ್ಲೆ.