ಕವಿತಾ ಫೆಸ್ತ್ 2011: ಗುಮ್ಟ್ಯಾಚ್ಯಾ ಗಾಂವಾಂತ್ ಗುಲೊಬಾಂಚ್ಯೊ ಪಾಕ್ಳ್ಯೊ
ಕವಿತಾ ಟ್ರಸ್ಟಾನ್, ಕರ್ನಾಟಕ ಕೊಂಕಣಿ ಸಾಹಿತ್ಯ್ ಅಕಾಡೆಮಿ ಆನಿ ಕೇಂದ್ರ್ ಸಾಹಿತ್ಯ್ ಅಕಾಡೆಮಿ ಹಾಂಚ್ಯಾ ಜೋಡ್ ಆಶ್ರಯಾಖಾಲ್ ಆಸಾ ಕೆಲ್ಲೆಂ ಪಾಂಚ್ವೆಂ `ಕವಿತಾ ಫೆಸ್ತ್ - 2011' ಹ್ಯಾಚ್ ಜನೆರ್ 9ವೆರ್ ಕಾರ್ಕಳ್, ನಕ್ರೆ ಜೋರ್ಜ್ ಕ್ಯಾಸ್ತೆಲಿನೊಚ್ಯಾ `ನಿಸರ್ಗ' ಘರ್ಚ್ಯಾ ಮಾಟ್ವಾಂತ್ ಚಲ್ಲೆಂ. ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿಚೊ ಅಧ್ಯಕ್ಷ್ ಕುಂದಾಪುರ ನಾರಯಣ ಖಾರ್ವಿ ಹಾಣೆ ಹ್ಯಾ ಕವಿತಾ ಫೆಸ್ತಾಚೆಂ ಉಗ್ತಾವಣ್ ಕೆಲೆಂ. ಮಾನಾಚೊ ಸಯ್ರೊ ಜಾವ್ನ್ ಸಾಂ.ಲುವಿಸ್ ಕೊಂಕ್ಣಿ ಸಂಸ್ಥ್ಯಾಚೊ ಕಾರ್ಯಕಾರಿ ನಿರ್ದೇಶಕ್ ಎಡ್ವಿನ್ ಜೆ.ಎಫ್ ಡಿಸೋಜಾ ಹಾಜರ್ ಆಸ್‌ಲ್ಲೊ.
ಕವಿತಾ ಟ್ರಸ್ಟಾಚೊ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸ್, ಕಾರ್ಯದರ್ಶಿ ಕಿಶೋರ್ ಗೊನ್ಸಾಲ್ವಿಸ್ ಹಾಣಿಂ ಕಾರ್ಯಾಚೊ ಅಧ್ಯಕ್ಷ್ ಆನಿ ಮಾನಾಚ್ಯಾ ಸಯ್ರ್ಯಾ ಸಂಗಿಂ ಗುಲೊಬಾಚ್ಯೊ ಪಾಕ್ಳ್ಯೊ ವಾರ್ಯಾರ್ ಉಬವ್ನ್ ಕವಿಗೋಷ್ಟಿಚೆಂ ಉಗ್ತಾವಣ್ ಕೆಲೆಂ. ದಾಯ್ಜಿ ವರ್ಲ್ಡ್.ಕೊಮ್ ಹಾಚೊ ಸಂಪಾದಕ್ ವಾಲ್ಟರ್ ನಂದಳಿಕೆ, ಬಹುಭಾಷಾ ಕವಿ ಗೋಷ್ಟಿಚೊ ಅಧ್ಯಕ್ಷ್ ಅರುಣ್ ಸಾಖರ್‌ದಾಂಡೆ, ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರಾಚೊ ಪ್ರಾಯೋಜಕ್ ಜೋಸೆಫ್ ಮಥಾಯಸ್, ಕಲಾಕಾರ್ ವಿಲ್ಸನ್ ಕಯ್ಯಾರ್, ಕವಿತಾ ಟ್ರಸ್ಟಾಚಿ ಖಜಾನ್ದಾರ್ ಅವ್ರೆಲ್ ರೊಡ್ರಿಗಸ್, ಟ್ರಸ್ಟಿ ವಿತೊರಿ ಕಾರ್ಕಳ್, ಟ್ರಸ್ಟಿ ವಿಲಿಯಮ್ ಪಾಯ್ಸ್, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ಸಾಂದೊ ಪುಂಡಲೀಕ್ ಮರಾಠೆ, ಕಾರ್ಯಾಚಿಂ ಯೆಜ್ಮಾನಿ ಆನಿ ಯೆಜ್ಮಾನ್ ಜೋರ್ಜ್ ಆನಿ ರೀನಾ ಕ್ಯಾಸ್ತೆಲಿನೊ, ಫೆಸ್ತಾಚೆ ಕಾರ್ಭಾರಿ ನವೀನ್ ಲೋಬೊ, ದೀಪಕ್ ಡಿಮೆಲ್ಲೊ, ಬೊನಿಫಾಸ್ ಸಿಕ್ವೇರಾ, ಜೋಕಿಮ್ ಪಿಂಟೊ ಉಗ್ತಾವಣ್ ಕಾರ್ಯಾಕ್ ಹಾಜರ್ ಆಸ್‌ಲ್ಲೆ.
ಕವಿತಾ ಟ್ರಸ್ಟಾಚೊ ಕಾರ್ಯದರ್ಶಿ ಕಿಶೋರ್ ಗೊನ್ಸಾಲ್ವಿಸ್ ಹಾಣೆ ಸರ್ವಾಂಕ್ ಸ್ವಾಗತ್ ಕೆಲೊ. ಮಾನಾಚೊ ಸಯ್ರೊ ಎಡ್ವಿನ್ ಜೆ.ಎಫ್ ಡಿಸೋಜಾನ್ ಆಪ್ಲ್ಯಾ ಉಲವ್ಪಾಂತ್ `ಕವಿತೆಕ್ ಸ್ಫೂರ್ತಿ ಖಂಯ್ ಥಾವ್ನ್‌ಯೀ ಯೆವ್ಯೆತ್' ಮ್ಹಣಾಲೊ. ಮುಖೆಲ್ ಸಯ್ರೊ ನಾರಾಯಣ ಖಾರ್ವಿ ಹಾಣೆ ಅಕಾಡೆಮಿ ಥಾವ್ನ್ ಸಂಪೂರ್ಣ್ ಪಾಟಿಂಬೊ ಭಾಸಾಯ್ಲೊ.
ಉಗ್ತಾವಣ್ ಕಾರ್ಯಾ ಉಪ್ರಾಂತ್ `ಕವಿತಾ ಕಿತ್ಯಾಕ್ ವಾಚಿಜಾಯ್' ಮ್ಹಳ್ಳ್ಯಾ ವಿಶಯಾಚೆರ್ ವಿಚಾರ್‌ಸಾತೆಂ ಚಲ್ಲೆಂ. ಶಕುಂತಲಾ ಆರ್ ಕಿಣಿ ಆನಿ ಮ್ಯಾಕ್ಸಿಮ್ ಲೋಬೊ ಹಾಂಣಿ `ಕವಿತಾ ಕಿತ್ಯಾಕ್ ವಾಚಿಜಾಯ್' ಮ್ಹಳ್ಳ್ಯಾ ವಿಶಯಾಚೆರ್ ಉಲವ್ಪ್ ದಿಲೆಂ. ಎಚ್ಚೆಮ್ ಪೆರ್ನಾಲ್ ಹಾಣೆ ಪರಿಸಂವಾದ್ ಚಲವ್ನ್ ವ್ಹೆಲೊ.
ಉಪ್ರಾಂತ್ ಯುವ ಕವಿಗೋಷ್ಟಿ ಸಾದರ್ ಜಾಲಿ. ವಿಲ್ಸನ್ ಕಟೀಲ್ ಹಾಣೆ ಕವಿಗೋಷ್ಟಿಚೆಂ ಸುಂಕಾಣ್ ಘೆತ್‌ಲ್ಲೆಂ. ವೆಂಕಟೇಶ್ ನಾಯಕ್, ವಿಲ್ಸನ್ ಕಿನ್ನಿಗೋಳಿ, ಜೊಸ್ಸಿ ಬಜ್ಜೋಡಿ, ಕ್ಲೆಮೆಂಟ್ ಫೆರ್ನಾಂಡಿಸ್, ವಸೀಮ್ ಖನ್‌ಗಾವಿ, ಸಿದ್ಧಿ ಗಾವಸ್, ಸುಪ್ರಿಯಾ ಭಗತ್, ಕವಿತಾ ರೇವಾಡ್ಕರ್, ಪುರುಷೋತ್ತಮ್ ವರ್ಲೆಕಾರ್, ನಜ್‌ಮೀನ್ ಬೇಗ್, ಆಕಾಶ್ ತೆಲ್ಗು, ವಿಲ್ಸನ್ ಕಟೀಲ್ ಹಾಣಿ ಆಪಾಪ್ಲ್ಯೊ ಕವಿತಾ ಸಾದರ್ ಕೆಲ್ಯೊ.
ದೊನ್ಪಾರಾಂ ಉಪ್ರಾಂತ್ ಬಹುಭಾಷಾ ಕವಿಗೋಷ್ಟಿ ಚಲ್ಲಿ. ಅರುಣ್ ಸಾಖರ್‌ದಾಂಡೆ ಹಾಣೆ ಕವಿಗೋಷ್ಟಿಚೆಂ ಸುಂಕಾಣ್ ಘೆತ್‌ಲ್ಲೆಂ. ಎಡ್ಡಿ ಸಿಕೇರ್, ಶಿವಾನಂದ ಶೆಣೈ, ಅರ್ಥರ್ ಪಿರೇರಾ, ವಾಸುದೇವ ಭಟ್, ಪರೇಶ್ ಕಾಮತ್, ಮಾಯಾ ಖರಂಗಟೆ, ಯು.ಎ. ಕಾಸಿಮ್, ಅನೀಸಾ ಫಾತಿಮಾ, ರಘು ಇಡ್ಕಿದು, ಪ್ರಜ್ಞಾ ಕಾಮತ್ ಹಾಣಿಂ ಆಪಾಪ್ಲ್ಯೊ ಕವಿತಾ ಪೇಶ್ ಕೆಲ್ಯೊ.
ಸಾಂಜೆರ್ ಚಲ್‌ಲ್ಲ್ಯಾ ಸಮಾರೋಪ್ ಕಾರ್ಯಾಕ್ ಮುಕೆಲ್ ಸಯ್ರೊ ಜಾವ್ನ್ ಸಾಹಿತ್ಯ್ ಅಕಾಡೆಮಿಚ್ಯಾ ಕೊಂಕ್ಣಿ ಸಲಹಾದಾರ್ ಮಂಡಳಿಚೊ ನಿಮಂತ್ರಕ್ ಪುಂಡಲೀಕ್ ನಾರಾಯಣ್ ನಾಯ್ಕ್, ಮಾನಾಚೊ ಸಯ್ರೊ ಜಾವ್ನ್ ಕೊಂಕ್ಣಿ ಪ್ರಚಾರ್ ಸಂಚಾಲನಾಚೊ ಅಧ್ಯಕ್ಷ್ ರೊಯ್ ಕ್ಯಾಸ್ತೆಲಿನೊ ವೆದಿರ್ ಹಾಜರ್ ಆಸ್‌ಲ್ಲೆ. ಮೆಲ್ವಿನ್ ರೊಡ್ರಿಗಸ್ ಹಾಣೆ ಸರ್ವಾಂಕ್ ಸ್ವಾಗತ್ ಕೆಲೊ. ಜೋರ್ಜ್ ಕ್ಯಾಸ್ತೆಲಿನೊ ಆನಿ ರೀನಾ ಕ್ಯಾಸ್ತೆಲಿನೊ ಹಾಣಿಂ ದೆ.ಚಾರ್ಲ್ಸ್ ಆನಿ ತೆರೆಜಾ ರೊಡ್ರಿಗಸ್ ಸ್ಮಾರಕ್ ಅಖಿಲ್ ಭಾರತ್ ಕೊಂಕ್ಣಿ ಕವಿತಾ ಸ್ಪರ್ಧ್ಯಾಂತ್ ವಿಜೇತ್ ಜಾಲ್ಲ್ಯಾ ಕವಿತಾ ಫೊಂಡೆಕಾರ್, ದಿವ್ಯ ವಿವೇಕ್ ನಾಯಕ್ ಆನಿ ರುಫೀನಾ ಫೆರ್ನಾಂಡಿಸ್ ಹಾಂಕಾಂ ಇನಾಮಾಂ ವಾಂಟ್ಲಿಂ.
ಪುಂಡಲೀಕ್ ನಾಯ್ಕ್ ಹಾಣೆ 2010 ವ್ಯಾ ವರ್ಸಾಚೊ ಮತಾಯಸ್ ಕುಟಮ್ ಕವಿತಾ ಪುರಸ್ಕಾರ್ ಪ್ರಧಾನ್ ಕೆಲೊ. ಪ್ರಶಸ್ತಿ ವಿಜೇತ್ ಕವಿ ಕಾಶಿನಾಥ್ ಶಾಂಬಾ ಲೊಲಿಯೆಂಕಾರ್ ಹಾಚ್ಯಾ ತರ್ಫೆನ್ ನೂತನ್ ಸಾಖರ್‌ದಾಂಡೆ ಹಾಣೆ ಪುರಸ್ಕಾರ್ ಸ್ವೀಕಾರ್ ಕೆಲೊ. ಪುರಸ್ಕಾರ್ ನಗ್ದೆನ್ ರುಪಯ್ ಧಾ ಹಜಾರ್ ಆನಿ ಮಾನ್ ಪತ್ರ್, ಯಾದಿಸ್ತಿಕಾ ಆಟಾಪ್ತಾ. ಟ್ರಸ್ಟಿ ಅವ್ರೆಲ್ ರೊಡ್ರಿಗಸ್ ಹಾಣೆ ಕವಿ ಆನಿ ಪುರಸ್ಕಾರಾ ವಿಶಿಂ ವಿವರ್ ದಿಲೊ. ಟ್ರಸ್ಟಿ ವಿಲಿಯಂ ಪಾಯ್ಸ್ ಹಾಣೆ ಮಾನ್ ಪತ್ರ್ ವಾಚ್ಲೆಂ. ನೂತನ್ ಸಾಖರದಾಂಡೆ ಹಾಣೆ ಕಾಶಿನಾಥ್ ಹಾಚೊ ಸಂದೇಶ್ ವಾಚ್ಲೊ.
ಕಾರ್ಯಾವೆಳಿಂ ಸ್ಟೀಫನ್ ಕ್ವಾಡ್ರಸ್ ಹಾಣೆ ತರ್ಜುಮೊ ಕೆಲ್ಲೊ `ಜನ್ನ ಮಹಾಕವಿಚೊ ಯಶೋಧರ ಚರಿತ' ಪುಸ್ತಕ್ ರೋಯ್ ಕ್ಯಾಸ್ತೆಲಿನೊ ಹಾಣೆ ಮೊಕ್ಳಿಕ್ ಕೆಲೊ. ವಿತೊರಿ ಕಾರ್ಕಳ್ ಹಾಣೆ ಉಪ್ಕಾರ್ ಬಾವುಡ್ಲೊ. ಎರಿಕ್ ಸೋನ್ಸ್ ಹಾಣೆ ಕಾರ್ಯೆಂ ಚಲಯ್ಲೆಂ. ಸಭಾ ಕಾರ್ಯಾ ಉಪ್ರಾಂತ್ ಮನೋರಂಜನ್ ಜಾವ್ನ್ ಶ್ರೀಗುರು ಕಲಾ ಸಂಗಮ ಪೊಂಡಾ, ಗೊಂಯ್ ಹಾಂಚೆಥಾವ್ನ್ ಜಾಗೊರ್ ನಾಟಕ್, ನಾಚ್ ಸಾದರ್ ಜಾಲೊ.
ಕವಿತಾ ಫೆಸ್ತ್ ಹೆರ್ ಫೆಸ್ತಾಂ ಪರಸ್ ವೆಗ್ಳೆಂ: ಕವಿತಾ ಫೆಸ್ತಾಂತ್ಲೆಂ ಮೆಲ್ವಿನ್ ರೊಡ್ರಿಗಸಾಚೆಂ ಯೆವ್ಕಾರ್ ಉಲೊವ್ಪ್
ಕವಿತಾ ಟ್ರಸ್ಟ್ ಪಾಟೋಪಾಟ್ ಪಾಂಚ್ವ್ಯಾ ವರ್ಸಾ ಕವಿತೆಚೊ ಸಂಬ್ರಮ್ ಚಲವ್ನ್ ಆಸಾ. ಹಿ ಕವಿಂಚಿ ತಶೆಂ ಕವಿತೆಚಿ ಪರಬ್. ಆಮಿ ಜಾಯ್ತ್ಯಾ ಥರಾಂಚಿಂ ಫೆಸ್ತಾಂ ಯಾ ಉತ್ಸವ್ ಪಳೆಯ್ತಾಂವ್. ಸಮಡ್ತಿಚ್ಯಾ ನಾಂವಾನ್, ಸಮಾಜಾಚ್ಯಾ ನಾಂವಾನ್ ಆನಿ ಸಂಸ್ಕೃತೆಚ್ಯಾ ನಾಂವಾನ್ ಜಾಯ್ತಿಂ ಫೆಸ್ತಾಂ ಚಲ್ತೇ ಆಸ್ತಾತ್. ಫೆಸ್ತಾಂನಿ ಮನ್ಶ್ಯಾಂಕ್ ಎಕ್ವಟಾಯ್ಜೆ, ಫೆಸ್ತಾಂನಿ ದಣ್ಸಲ್ಲ್ಯಾ ಮನಾಂಕ್ ಸುಶೆಗ್ ಲಾಬಯ್ಜೆ ಆನಿ ಫೆಸ್ತಾಂನಿ ಶಿಂದ್‌ಲ್ಲ್ಯಾ ಕಾಳ್ಜಾಂಚಿ ದೂಕ್ ಶಮನ್ ಕರಿಜೆ.
ಪೂಣ್ ತಶೆಂ ಜಾಯ್ನಾ. ಆಮ್ಚಿಂ ಜಾಯ್ತಿಂ ಫೆಸ್ತಾಂ ದೆವಾಚ್ಯಾ ನಾಂವಾನ್ ರಗ್ತಾಂಚಿ ಹೋಳಿ ಖೆಳ್ತಾತ್. ಆಮ್ಚಿಂ ಜಾಯ್ತಿಂ ಫೆಸ್ತಾಂ ಸಮಾಜ್ ಎಕ್ವಟ್ವಾಂಚೊ ಶೆವೊಟ್ ಘೆವ್ನ್, ಸಮುದಾಯಾ ಮದೆಂ ವೆಗ್ಳಾಚಾರಾಚೆ ವೀಕ್ ಒಂಪ್ತಾತ್ ಆನಿ ಆಮ್ಚಿಂ ಜಾಯ್ತಿಂ ಫೆಸ್ತಾಂ ಸಂಸ್ಕ್ರತಿ ಸಾಂಬಾಳ್ಚಿ ನಿಬಾಂ ದೀವ್ನ್ ಎಕೆ ಬಾಶೆಚ್ಯಾ ಲೊಕಾಚೆ‌ಚ್ ಎಕೇಕ್ ಜುಂವೆ ರಚ್ತಾತ್ ಮ್ಹಣ್ತಾನಾ ಜಾಯ್ತೆ ಪಾವ್ಟಿ ಫೆಸ್ತಾಂ ಬಾಯ್ಲ್ಯಾನ್ ರಂಗಾಳ್ ದಿಸ್ತಾತ್ ತರ್‌ಯಿ ಬಿತರ್ಲ್ಯಾನ್ ತ್ಯಾ ಫೆಸ್ತಾಂಚ್ಯಾ ಮುಂಡಾಸ್‌ಗಾರಾಂಚೊ ಶೆವೊಟ್ ವೆಗ್ಳೊಚ್ ಆಸ್ತಾ. ಸಮಾಜಾಚಿ, ಸಂಸ್ಕ್ರತೆಚಿ, ತಶೆಂ ಸಮುಡ್ತಚಿ ವಿಶಿಂ ಕುಸ್ಕುಟ್ ಕಾಳ್ಜಿ ನಾತ್‌ಲ್ಲ್ಯಾ ದುಡ್ವಾಗಾರಾಂನಿ ಆಪ್ಲ್ಯಾ ಸ್ವ ಫಾಯ್ದ್ಯಾಕ್ ಫೆಸ್ತಾಂಚಿ ವೆದಿ ಚಾರ್ ಕಾಸಾಂಕ್ ಲಿಲಾಂವ್ ಘಾಲ್ಚೆಂ ಆಯ್ಚ್ಯಾ ದಿಸಾಂನಿ ಸದಾಂಚೆಂ ಜಾಲಾಂ...
ಕವಿಂನಿ ಮನ್ಶಾಂಕ್ ವಾಚಿಜಾಯ್: ಪುಂಡಲೀಕ್ ನಾ. ನಾಯ್ಕ್, ಕೊಂಕ್ಣಿ ಸಲಹಾ ಮಂಡಳಿ, ಸಾಹಿತ್ಯ್ ಅಕಾಡೆಮಿ ನ್ಯೂ ಡೆಲ್ಲಿ.
ಗೊಂಯಾಂತ್ ಅಸಲ್ಯಾ ಫೆಸ್ತಾಂಕ್ ಸಮಾರಂಬ್ ಮ್ಹಣ್ತಾಂವ್. ತುಮಿ ಹಾಂಗಾ ಕಾರ್ಯೆಂ ಮ್ಹಣ್ತಾತ್. ಕಾರ್ಯೆಂ ಮ್ಹಳ್ಯಾರ್ ಮಂಗಲ್. ತುಮಿ ಕೊಂಕ್ಣಿ ಕಾವ್ಯಾಕ್ ಕಾರ್ಯಾಚೊ ದರ್ಜೊ ದೀವ್ನ್ ತೆಂ ಪವಿತ್ರ್ ಕೆಲಾಂ.
ಖಂಚೆಂಯ್ ಸಾಹಿತ್ ಉದರ್ಗತೆಕ್ ಪಾವಾಜೆ ತರ್ ತೆಂ ಹೆರ್ ಭಾಸಾಂನಿ ಯೇಜೆ ಪಡ್ತಾ. ಗೊಂಯ್ಚಿ ಅಕಾಡೆಮಿ ಆನಿ ಹೆರ್ ಸಂಸ್ಥೆ ಕೊಂಕ್ಣೆಚ್ಯಾ ಪಾಟಿಂಬ್ಯಾಕ್ ಸದಾಂ ಕಮರ್ ಬಾಂದುನ್ ಆಸಾತ್. ದುಡ್ವಾಚೊ ತತ್ವಾರ್ ನಾ. ಕೊಂಕ್ಣಿ ಮನಿಸ್ ಆಜ್ ದುಸ್ರ್ಯಾ ವರ್ಗಾಚೊ ನಾಗರಿಕ್ ನ್ಹಯ್. ಶೆಂಭೊರಾಚೊ ನೋಟ್ ಕಾಡ್ನ್ ಪಳೆಲ್ಯಾರ್ ತಾಂತುನ್‌ಯಿ ಕೊಂಕ್ಣಿ ಆಸಾ.
ಆದ್ಲ್ಯಾ ವರ್ಸಾ ಗೊಂಯಾಂತ್ ಸರ್ಕಾರಿ ಗುಸ್ತಾರ್ ಚಲ್‌ಲ್ಲಿ ಬಾಕಿಬಾಬ್ ಬೋರ್ಕರ್ ಹಾಂಚಿ ಜಲ್ಮಾ ಶತಾಬ್ದಿ ಆನಿ ಅರುಣ್ ಸಾಕರ್‌ದಾಂಡ ಹಾಂಚ್ಯಾ `ಕಾವ್ಳ್ಯಾಚೊ ಶ್ರಾದ್ದ್' ಬುಕಾಕ್ ಮೆಳ್‌ಲ್ಲಿ ಸಾಹಿತ್ ಅಕಾಡೆಮಿಚಿ ಪ್ರಶಸ್ತಿ ಕೊಂಕ್ಣೆಕ್ ಮೆಳ್‌ಲ್ಲೊ ವ್ಹಡ್ ಮ್ಹಾನ್.
ಮಂಗ್ಳುರಾಂತ್ ಲುವಿಸ್ ಮಸ್ಕರೇನ್ಹಸಾಕ್ ಕೊಂಕ್ಣಿ ಕವಿತೆಚೊ ಪಾಯ್ ಮ್ಹಣ್ಯೆತ್. ತಾಣೆಂ ಕೊಂಕ್ಣಿ ಕವಿತೆಂತ್ ಶಿಸ್ತ್ ಹಾಡ್ಲಿ. ಪೂಣ್ ಚಾ.ಫ್ರಾ.ಚ್ಯಾ ವೆಳಾರ್‌ಯಿ ಮಂಗ್ಳುರಾಂತ್ ಕವಿತೆಕ್ ಪ್ರತಿಷ್ಟಾ ನಾತ್ಲಿ. ದೆಕುನ್ ಗೊಂಯಾಂತ್ ಚಾ.ಫ್ರಾ.ಕ್ ಮಾತ್ಯಾರ್ ಘೆತ್ಲೊ. ಆಜ್ ಎಕಾ ಕವಿತೆಚ್ಯಾ ಫೆಸ್ತಾಕ್ ಗೊಂಯಾಂಥಾವ್ನ್ ಸಗ್ಳೆಂ ಕುಟಮ್ ಕಾರಾರ್ ಪಯ್ಣ್ ಕರ್ನ್ ಯೆತಾ ತರ್ ಕವಿತೆಚಿ ಪ್ರತಿಷ್ಟಾ ಅಂದಾಜ್ ಕರ್ಯೆತ್.
ಕವಿಂನಿ ಆಪುಣ್ ಕಿತ್ಯಾ ಖಾತಿರ್ ಕವಿತಾ ಬರಯ್ತಾಂವ್? ಕವಿತೆಖಾತಿರ್ ಆಮಿ ಕಿತ್ಲೆ ಸಮರ್ಪಿತ್ ಆಸಾಂವ್? ಕವಿತೆಚ್ಯಾ ಶೆತಾಂತ್ಲ್ಯಾ ಮಾಲ್ಗಡ್ಯಾಂಚ್ಯಾ ಕವಿತೆ ವಿಶ್ಯಾಂತ್ ಆಮ್ಕಾಂ ಕಿತ್ಲಿ ಖಬರ್ ಆಸಾ? ಬೂಕ್ ಮಾತ್ರ್ ನ್ಹಯ್ ಆಮಿ ಕಿತ್ಲ್ಯಾ ಮನ್ಶ್ಯಾಂಕ್ ವಾಚ್ತಾಂವ್? ಜರ್ ಏಕ್ ಬೆಬ್ದೊ ದೆಶಾಚ್ಯಾ ರಾಷ್ಟ್ರಪತಿಕ್ ಗಾಳಿ ಯೆಟ್ತಾ, ಏಕ್ ಪಿಶಿ ಬಾಯ್ಲ್ ರಸ್ತ್ಯಾರ್ ಬೊಬಾಟ್ತಾ, ಹಾಂಕಾಂ ಆಮಿ ಎಕಾ ಪುಸ್ತಕಾ ಸಾರ್ಕೆಂ ವಾಚ್ತಾಂವ್‌ಗಿ?
ಜರ್ ಆಮಿ ಬರಯ್ನಾಂವ್ ಜಾಲ್ಯಾರ್ ಕಿತೆಂ ಜಾತೆಲೆಂ? ಕಿತೆಂ ಜಾತೆಲೆಂ? ಮ್ಹಜೆ ಬಾಬ್ತಿನ್ ಸಾಂಗ್ಚೆಂ ತರ್ ಮ್ಹಜೊ ಮ್ಹಜ್ಯಾ ತಕ್ಲೆಚೊ ಫಾರ್ ಜಾತಲೊ ದೆಕುನ್ ಹಾಂವ್ ಜೆಂ ಬರಯ್ತಾಂ ತೆಂ ಮ್ಹಜೆಂ ಮಾತ್ರ್ ನ್ಹಯ್ ಮ್ಹಜ್ಯಾ ಬಾಪಾಯ್ಚೆಂ, ತಾಚ್ಯಾ ಬಾಪಾಯ್ಚೆಂ, ಆನಿ ತಾಚ್ಯಾ ಬಾಪಾಯ್ಚೆಂಯಿ...
ಅನ್ಭೋಗಾಚ್ಯಾ ಶಿಕ್ಪಾಚೊ ಸಂವಾದ್ ಚಾಲು ದವ್ರುಂಕ್ ಕವಿತಾ ವಾಚಿಜಾಯ್: ವಿಚಾರ್ ಸಾತ್ಯಾಂತ್ ಎಚ್ಚೆಮ್ ಪೆರ್ನಾಲ್
ಸಕಾಳಿಂಚ್ಯಾ ಆದೇಸಾರ್ ಕವಿ/ವಿಮರ್ಶಕ್ ಎಚ್ಚೆಮ್ ಪೆರ್ನಾಲಾಚ್ಯಾ ಅಧ್ಯಕ್ಷ್‌ಪಣಾಖಾಲ್ ಕವಿತಾ ಕಿತ್ಯಾಕ್ ವಾಚಿಜೆ? ಮ್ಹಳ್ಳೆ ವಿಶಯಾಚೆರ್ ವಿಚಾರ್‌ಸಾತೆಂ ಚಲ್ಲೆಂ. ಆಪ್ಲೆ ವಿಚಾರ್ ಮಾಂಡ್ತಾನಾ ಶಕುಂತಲಾ ಆರ್. ಕಿಣಿ ಮ್ಹಣಾಲಿ ಆದುನಿಕ್ ಕವಿಂನಿ ವಾಚ್ಪಿ ಆನಿ ಕೃತಿಯೆ ಮದೆಂ ವೊಣದ್‌ಶಿ ಬಾಂದ್ಲ್ಯಾ, ಆದುನಿಕ್ ಕವಿತೆನ್ ಪಿಂತ್ರಾಂವ್ಚೆ ತಿತ್ಲಿ ಜೀಣ್ ಗಡೀಸ್ ನಾ ದೆಕುನ್ ಕಾವ್ಯಾಂತ್ ಪ್ರಫುಲ್ಲತಾ ಆಯ್ಲ್ಯಾರ್ ವಾಚ್ಪಿ ಚಡ್ ಆನಿ ಚಡ್ ಕವಿತಾ ಖಾಯ್ಸ್ ಕರ್ತಿತ್.
ಜಟ್ಪಟ್ ವಾಚುನ್ ಕಾಡುಂಕ್ ಜಾತಾತ್ ಮ್ಹಣ್ ಕವಿತಾ ವಾಚ್ತೆಲೆ ಆಸ್ಲ್ಯಾರ್‌ಯಿ ಕವಿತಾ ಆಪ್ಲ್ಯಾ ಕಾಳ್ಜಾಚ್ಯಾ ದಾದೊಸ್ಕಾಯೆ ಖಾತಿರ್ ವಾಚಿಜೆ ಮ್ಹಣ್ ಮೆಕ್ಸಿಮ್ ಲೋಬೊ ಮ್ಹಣಾಲೊ.
ವಾಚ್ಚೆಂ ಮ್ಹಳ್ಯಾರ್ ಏಕ್ ಅನ್ಭೋಗ್ , ಅನ್ಬೋಗಾಥಾವ್ನ್ ಶಿಕಪ್ ಆನಿ ಶಿಕಪ್ ಏಕ್ ನಿರಂತರ್ ಚಲೊನ್ ಆಸ್ಚಿ ಪ್ರಕ್ರಿಯಾ ಮ್ಹಳ್ಳ್ಯಾ ಎಚ್ಚೆಮಾನ್ ದೆಕುನ್ ಕವಿತಾ ರಚ್ಪ್ಲ್ಯಾ ಆನಿ ವಾಚ್ಪ್ಯಾಮಧೆಂ ಚಲ್ಚೊ ಏಕ್ ಸಂವಾದ್ ಮ್ಹಳೆಂ. ಆನಿ ಅನ್ಭೋಗಾಚಾ ಶಿಕ್ಪಾಚೊ ಅಸಲೊ ಏಕ್ ಸಂವಾದ್ ಜಿಣ್ಯೆಂತ್ ಚಾಲು ದವರುಂಕ್ ಆಮಿ ಕವಿತಾ ವಾಚಿಜೆ ಮ್ಹಳೆಂ.
ನಿಸರ್ಗಾಚೆ ವೊಂಟಿಯೆಂತ್ ಕವಿ ನ್ಹಯ್ ಅಸಲ್ಲ್ಯಾನಯ್ ಕವಿ ಜಾವ್ಯೆತ್: ಎಡ್ವಿನ್ ಜೆ. ಎಫ್. ಡಿಸೋಜಾ, ಕಾರ್ಯಕಾರಿ ನಿರ್ದೇಶಕ್, ಕೊಂಕ್ಣಿ ಸಂಸ್ಥೊ, ಸಾಂ. ಲುವಿಸ್ ಕೊಲೆಜ್, ಮಂಗ್ಳುರ್
ಜೆಂ ಕವಿ ಎಕೆಕಾ ಪಂಗ್ತೆರ್ ಸಾಂಗೊಂಕ್ ಸಕ್ತಾ ತೆಂ ಸಾಂಗೊಂಕ್ ಎಕಾ ಕಾದಂಬರಿಕಾರಾಕ್ ಅಖ್ಖಿ ಕಾದಂಬರಿ ಬರಯ್ಜೆ ಪಡ್ತಾ ವಾ ಏಕ್ ಅವಸ್ವರ್ ತರ್‌ಯಿ ಬರಯ್ಜೆ ಪಡ್ತಾ. ದೆಕುನ್ ಮ್ಹಜೊ ಮೊಸೊರ್ ಸ್ವಾಬಾವಿಕ್. ಹಾಂವ್ ಕವಿ ನ್ಹಯ್ ಕವಿತಾ ಬರಂವ್ಕ್ ಮ್ಹಾಕಾ ಭಿರಾಂತ್ ದಿಸ್ತಾ. ತರ್‌ಯಿ ಸ್ಪೂರ್ತಿ ಕವಿತೆಕ್ ಖಂಯ್ ಥಾವ್ನ್‌ಯಿ ಯೆಂವ್ಕ್ ಸಾದ್ಯ್ ಆಸಾ. ಹ್ಯಾ ನಿಸರ್ಗಾಚ್ಯಾ ವೊಂಟಿಯೆಂತ್ ಸಯ್ತ್ ಕವಿ ನ್ಹಯ್ ಆಸ್‌ಲ್ಲ್ಯಾನ್ ಕವಿ ಜಾವ್ಯೆತ್. ..
ಕವಿಚೆಂ ವ್ಯಕ್ತಿತ್ವ್ ಫುಲಜೆ ತರ್ ಫೆಸ್ತಾಂ ಗರ್ಜೆಚಿಂ: ಕುಂದಾಪುರ್ ನಾರಾಯಣ್ ಖಾರ್ವಿ, ಅಧ್ಯಕ್ಷ್ ಕರ್ನಾಟಕ್ ಕೊಂಕ್ಣಿ ಸಾಹಿತ್ಯ್ ಅಕಾಡೆಮಿ
ಕವಿಂಕ್ ಪಾಟಿಂಬೊ ಮೆಳಾಜೆ, ಕವಿಚೆಂ ಚಿಂತಪ್, ಕವಿಚೆಂ ವ್ಯಕ್ತಿತ್ವ್ ಭಾಯ್ರ್ ಯೇಜೆ ತರ್ ಅಸಲಿಂ ಫೆಸ್ತಾಂ ಬೋವ್‌ಚ್ ಗರ್ಜೆಚಿಂ. ಮೆಲ್ವಿನ್ ಆನಿ ತಾಚೆ ಸಾಂಗಾತಿ ಜಾಯ್ತ್ಯಾ ತೆಂಪಾಥಾವ್ನ್ ಮಂಗ್ಳುರಾಂತ್ ಹೊ ವಾವ್ರ್ ಆಪುರ್ಬಾಯೆನ್ ಕರಿತ್ ಆಸಾತ್. ಕವಿಂನಿ ಸಾಂಗಾತಾ ಮೆಳ್ಚೆಂ, ಸಾಂಗಾತಾ ಬಸ್ಚೆಂ ಆನಿ ಎಕಾಮೆಕಾಚಿಂ ಬೊಗ್ಣಾಂ ಆದ್ಲಿಬದ್ಲಿ ಕರ್ಚೆಂ ಹಾಚೆ ವರ್ವಿಂ ಕವಿಂಚೊ ವಿಕಾಸ್ ಜಾತಾ. ಅಸಲಿಂ ಕಾರ್ಯಕ್ರಮಾಂ ಕವಿಂಕ್, ಯುವಕವಿಂಕ್, ಮಾಲ್ಗಡ್ಯಾ ಕವಿಂಖಾತಿರ್ ಚಡ್ ಆನಿ ಚಡ್ ಜಾಯ್ಜೆ. ಅಕಾಡೆಮಿಚೊ ಪ್ರೋತ್ಸಾವ್ ಹೆ ಬಾಬ್ತಿನ್ ಸದಾಂಚ್ ಆಸಾ....
ಕವಿಂಕ್ ಸಂಸಾರಾಚೊ ಹುಸ್ಕೊ ಆಸ್ತಾ: ರೊಯ್ ಕ್ಯಾಸ್ತೆಲಿನೊ, ಅಧ್ಯಕ್ಷ್, ಕೊಂಕ್ಣಿ ಪ್ರಚಾರ್ ಸಂಚಾಲನ್
ಪಾಟ್ಲ್ಯಾ ದಿಸಾಂನಿ ಮಂಗ್ಳುರಾಂತ್ ಪಂಚ್ವೀಸ್ ದಿಸಾಂಚೆಂ ಫೆಸ್ತ್ ಚಲ್ಲೆಂ. ತ್ಯಾ ಫೆಸ್ತಾಚ್ಯಾ ಆಮಾಲಾಂತ್ಲೆಂ ಆತಾಂ ಭಾಯ್ರ್ ಯೇಂವ್ಕ್ ಹೆಂ ಫೆಸ್ತ್ ಪಿರಿ ಕಾಡ್ಚೆಪರಿಂ. ಹಾಂವ್ ಸಾಹಿತಿಕ್ ಕವಿ ಚಿಂತ್ಪಿ ನ್ಹಯ್. ಕವಿಪರಿಂ ಕಾಳ್ಜಾಚೆ ಗುಂಡಾಯೆಥಾವ್ನ್ ಬರಂವ್ಕ್ ಮ್ಹಾಕಾ ಕಳನಾ.
ಕವಿಂಕ್ ಸಂಸಾರಾಚೊ ಖಂತ್ ಹುಸ್ಕೊ ಆಸಾ. ತಾಂಚ್ಯಾ ಉತ್ರಾವರ್ವಿಂಚ್ ಕ್ರಾಂತಿ ಜಾತಾ. ಆಮ್ಕಾಂ ಜಾಗಂವ್ಕ್, ಚಿಮ್ಟೊ ಕಾಡುಂಕ್ ಕವಿ ಜಾಯ್ಜೆ.
ಖಂಚಿಯ್ ಭಾಸ್ ಆಪ್ಲೆಸ್ತಕಿಂ ಸಂಪೂರ್ಣ್ ನ್ಹಯ್. ಕೊಂಕ್ಣೆಕ್ ಭಾಶಾಂತರಾಚಿ ಜಾಯ್ತಿ ಗರ್ಜ್ ಆಸಾ. ಪೂಣ್ ಭಾಶಾಂತರ್ ಕರ್ತೆಲ್ಯಾಂಕ್ ಭಾಸ್ ಆನಿ ಸಂಸ್ಕೃತೆಚಿ ಒಳಕ್ ಆಸಾಜೆ.
-ಹೆನ್ರಿ ಎಮ್ ಪೆರ್ನಾಲ್, ದಿರ್ವೆಂ ಪತ್ರಾಚೆ ಕುರ್ಪೆನ್