ಜಾಕ್ರಿಬೆಟ್ಟು ನೇತ್ರಾವತಿ ನಂಯ್ಚೆ ರೆಂವೆಮಾಂದ್ರೆರ್ ಕವಿತಾ ಟ್ರಸ್ಟಾಚಿ ಕಾವ್ಯಾಳ್ ಸಾಂಜ್

ಕವಿತಾ ಟ್ರಸ್ಟಾನ್ ಬಂಟ್ವೊಳಾಂತ್ ಚಲೊವ್ನ್ ವೆಲ್ಲಿ ಚವ್ತಿ ಕವಿಗೋಷ್ಠಿ ಹ್ಯಾಚ್ 2011 ಮಾರ್ಚ್ ಮ್ಹಯ್ನ್ಯಾಚೆ 27 ತಾರಿಕೆರ್ ಆಯ್ತಾರಾ ಸಾಂಜೆರ್ ಬಂಟ್ವೊಳ್ ಜಾಕ್ರಿಬೆಟ್ಟು ನೇತ್ರಾವತಿ ನಂಯ್ ಮಧೆಗಾತ್ ಚಲ್ಲಿ. ಹೆ ಕವಿಗೋಷ್ಠಿಕ್ ಮಂಗ್ಳುರ್, ಗೊಂಯ್ ತಶೆಂ ಪೊಯ್ತಾಜೆ ಗಾಂವ್ಚೊ ಲೋಕ್ ಹಾಜರ್ ಆಸಲ್ಲೊ. 

ಜಾಕ್ರಿಬೆಟ್ಟುಲಾಗಿಂ ನಂಯ್ಕ್ ದೆಂವೊನ್, ಧೊಂಪ್ರಾಂಭರ್ ಉದ್ಕಾಂತ್ಲ್ಯಾನ್ ಆನಿ ಥೊಡ್ಯಾ ಜಾಗ್ಯಾಂನಿ ಕುಪಾಫಾತ್ರಾಂಚೆರ್ ಚಲೊನ್, ಎಕಾ ಜಾಗ್ಯಾರ್ ದೊಣಿಚೆರ್ ವಚೊನ್ ಪೊಯ್ತಾಜೆಲಾಗಿಂ ಸೊಡಯಿಲ್ಲೆ ರೆಂವೆ ಮಾಂದ್ರೆಚೆರ್ ಪಾಂಯ್ ಸೊಡ್ನ್ ಬಸ್ತಾನಾ ಪಶ್ಚಿಮಾಂತ್ ಸುರ್ಯೊ ತಾಂಬ್ಶೆವ್ನ್ ಆಸಲ್ಲೊ ದಿಸ್ತಾಲೊ. ವೊರಾಂ ಸಾಂಜೆಚಿಂ ಪಾಂಚ್ ಜಾವ್ನ್ ಯೆತಾಲಿಂ. ಥಳೀಯ್ ಸಂಯೋಜಕ್ ಕವಿತಾ ಟ್ರಸ್ಟಾಚೊ ಟ್ರಸ್ಟಿ ವಿಲಿಯಮ್ ಪಾಯ್ಸಾನ್ ಆನಿ ತಾಚ್ಯಾ ಕುಟ್ಮಾನ್ ಹಾಡಲ್ಲಿ ಹುನ್ವೊನಿ ಕಾಫಿ ಆನಿ ಫಳಾರ್ ಖಾತಚ್ ಕವಿಗೋಷ್ಠಿ ಸುರು.

ಸುರ್‍ವೆರ್ ವಿಲಿಯಮ್ ಪಾಯ್ಸಾನ್ ಯೆವ್ಕಾರ್ ದಿಲೊ.

ಕವಿ ತಶೆಂ ವಿಮರ್ಶಕ್ ಎಚ್ಚೆಮ್ ಪೆರ್‍ನಾಳಾನ್ ಕವಿಗೋಷ್ಟಿಚೆಂ ಸುಂಕಾಣ್ ಹಾತಿಂ ಧರಲ್ಲೆಂ. ಮೆಲ್ವಿನ್ ರೊಡ್ರಿಗಸಾನ್ ಕವಿಗೋಷ್ಟಿಚೆ ಮಧೆಂ ಕವಿತೆಚ್ಯಾ ಖರ್‍ಯಾ ಅರ್ಥಾವಿಶಿಂ, ಮ್ಹಾಕಾವ್ಯಾಂ ವಿಶಿಂ ಲೊಕಾಕ್ ಸಮ್ಜೊಣಿ ದಿಲಿ.

ಆಂಡ್ರ್ಯೂ ಎಲ್ ಡಿಕುನ್ಹಾ, ನೆಲ್ಸನ್ ಸಿಕ್ವೇರಾ ಕಟೀಲ್, ಫಾ ಆಲ್ವಿ ಕಾರ್ಮೆಲಿತ್, ಜೆಸ್ ಫೆರ್ನಾಂಡಿಸ್, ಗೊಂಯ್, ಮೆಲ್ವಿನ್ ರೊಡ್ರಿಗಸ್, ಗ್ಲೇಡಿಸ್ ರೇಗೊ, ಪ್ರವೀಣ್ ತಾವ್ರೊ, ಡೆನಿಸ್ ಮೊಂತೇರೊ, ಗುರು ಬಾಳಿಗಾ, ಎಚ್ಚೆಮ್ ಪೆರ್ನಾಲ್, ಹಿಲರಿ ವಾಸ್ ಆನಿ ಸ್ಟೀವನ್ ಕ್ವಾಡ್ರಸಾನ್ ಆಪಾಪ್ಲ್ಯೊ ಕವಿತಾ ಹ್ಯಾ ಸಂದರ್ಭಾರ್ ವಾಚ್ಲ್ಯೊ.

ಆಂಡ್ರ್ಯೂ ಎಲ್ ಡಿಕುನ್ಹಾ ಆನಿ ಗ್ಲೇಡಿಸ್ ರೇಗೊನ್ ಸ್ತ್ರೀಯೆಕ್ ಲಗ್ತಿ ಕವಿತಾ ವಾಚ್ಲ್ಯೊ ತರ್, ಹಿಲರಿ ವಾಸಾನ್ ಸೂಪರ್ ಮೂನ್, ಪ್ರವೀಣ್ ತಾವ್ರೊನ್ ಎಕ್ಸುರ್‍ಪಣ್ ಆನಿ ಮೆಲ್ವಿನ್ ರೊಡ್ರಿಗಸಾನ್ ಏಕ್ ಗಝಲ್ ಗಾಯ್ಲೆಂ.  ಫಾ ಆಲ್ವಿ ಕಾರ್ಮೆಲಿತಾಕ್ ಆಪ್ಲೆ ಕವಿತೆಕ್ ಬೈಬಲಾಂತ್ಲೆಂ ಘಡಿತ್ ಹುಮೆದಿಚೆಂ ಜಾಲೆಂ ತರ್, ಡೆನಿಸ್ ಮೊಂತೇರೊಕ್ ಆಪ್ಲ್ಯಾ ಆಜ್ಯಾಚೆಂ ಘರ್ ಆನಿ ಎಚ್ಚೆಮ್ ಪೆರ್ನಾಳಾಕ್ `ಬೊಂಬಯ್ಚೆಂ ಕೂಡ್' ಪ್ರೇರಣ್ ಜಾಲೆಂ.  ಗುರು ಬಾಳಿಗಾನ್ ಭಯ್ಣಿಚೆ ಶಿಕಾಯತೆವಿಶಿಂ ಕವಿತಾ ವಾಚ್ಲಿ ತರ್ ಜೆಸ್ ಫೆರ್ನಾಂಡಿಸಾನ್ ದೋನ್ ಧರ್ಮಾಂಚ್ಯಾ ಎಕ್ವಟಾವಿಶಿಂ ಕವಿತಾ ವಾಚ್ಲಿ ಆನಿ ಶ್ರೀಕೃಷ್ಣಾಕ್ ಖುರ್ಸಾಕ್ ಖಾಂದ್ ಮಾರುಂಕ್ ಆಪಯ್ಲೆಂ. ಸ್ಟೀವನ್ ಕ್ವಾಡ್ರಸಾನ್ ಯಶೋಧರ ಚರಿತ ಪುಸ್ತಕಾಂತ್ಲ್ಯೊ ಕಾಂಯ್ ಥೊಡ್ಯೊ ವೊಳಿ ವಾಚ್ಲ್ಯೊ ತರ್, ನೆಲ್ಸನ್ ಸಿಕ್ವೇರಾನ್ ಥೊಡಿಂ ಚುಟ್ಕುಲಾಂ ಪೇಶ್ ಕೆಲಿಂ.

• `ಕವಿತಾ ಟ್ರಸ್ಟ್' ನೇತ್ರಾವತಿ ನಂಯ್ತ್ ಕೊಂಕಣಿ ಕವಿತೆಚಿಂ ಲ್ಹಾರಾಂ ವ್ಹಾಳಯ್ತಾ