ಕವಿತಾ ಟ್ರಸ್ಟಾ ಥಾವ್ನ್ ಹೊಯ್ಗೆ ಬಜಾರಾಂತ್ ‘ಪಾವ್ಳೆ ಪಾವ್ಸಾಚಿ ಕವಿಗೋಷ್ಟಿ’

ಪಯ್ಲ್ಯಾ ಪಾವ್ಸಾಚೆ ಥೆಂಬೆ ಭುಂಯ್ತ್ ಜಿರೊನ್ ಬಿಯಾಳೊ ಜಾವ್ನ್ ಆಂಕ್ರಿ ಫುಟೊನ್ ಧರ್ತಿ ಪಾಚ್ವೆಂ ಕಾಪಡ್ ನ್ಹೆಸೊನ್ ಸೊಭ್ತಾನಾ ,ಕವಿತಾ ಟ್ರಸ್ಟಾನ್ ಮಾಂಡುನ್ ಹಾಡ್ಚಿ, ಬೋವಶ್ಯಾ ಹ್ಯಾ ವರ್ಸಾಚ್ಯಾ ಪಾವ್ಸಾಚಿ ಪಯ್ಲಿ ಕವಿಗೋಶ್ಟಿ - ಪಾವ್ಳೆ . ಪೂಣ್ ಆಜ್, ಪಾವ್ಸ್ ಜೂನ್ ಜಾಲಾ ಮಾತ್ ನ್ಹಯ್ ಆಯ್ಚ್ಯಾ ಪಾವ್ಸಾನ್ ರಂಗ್ ಬದ್ಲಿಲಾ. ಪುನರಸು ಆದ್ಲೊ ಪುನರಸು ನ್ಹಯ್. ಪೂಣ್  ಪಯ್ಲ್ಯಾ ಮೊಗಾಪರಿಂ ಪಯ್ಲ್ಯಾ ಪಾವ್ಸಾಚ್ಯೊ ಯಾದಿ ಗೋಡ್ ಆನಿ  ಸಗ್ಳ್ಯಾಂ ಥಂಯ್ ಆಸ್ಚ್ಯೊ ಸಹಜ್.  ಹ್ಯಾ ಯಾದಿಂಕ್ ಕಾವ್ಯಾ ರೊಸಾಂತ್ ಮೆಳೊವ್ನ್ ಆನಿ ಥೊಡ್ಯೊ ಗೊಡ್ಶೆಂ ಕರುಂಕ್ ಕವಿತಾ ಖಂಡಿತ್ ಉಪ್ಕಾರ್ತಾತ್ ... ಅಶೆಂ ಮ್ಹಣಾಲೊ ಕೊಂಕಣ್ ಟಿ ವಿ ಹಾಚೊ ಪ್ರಧಾನ್ ಸಂಪಾದಕ್ ಆನಿ ಕವಿ ಮಾವ್ರಿಸ್ ಡೆಸಾ.  ತೊ  ಕವಿತಾ ಟ್ರಸ್ಟ್ ಮಂಗ್ಳುರ್ ಹಾಂಣಿ  ಆಯ್ತಾರಾ ಜುಲಾಯ್ 10 ತಾರಿಕೆರ್ ಹೊಯ್ಗೆಬಾಜಾರ್ ಅಲ್ ರಿಯಾನ್ ಹಾಂಗಾಸರ್ ಮಾಂಡುನ್ ಹಾಡಲ್ಲಿ ‘ಪಾವ್ಳೆ ಪಾವ್ಸಾಚಿ ಕವಿಗೋಶ್ಟಿ’ ಹಾಚೆಂ  ಯೆಜ್ಮಾನಪಣ್ ಘೆವ್ನ್ ಉಲಯ್ತಾಲೊ.

ಸುರ್ವೆರ್ ಕವಿತಾ ಟ್ರಸ್ಟ್ , ಟ್ರಸ್ಟಿ ವಿತೊರಿ ಕಾರ್ಕೊಳ್ ಹಾಣೆ , ಪುನರಸು ತಸಲ್ಯಾ ಹಟ್ಟಿ ಪಾವ್ಸಾಕೀ ಮಂಗ್ಳುರಿ ನಳ್ಯಾಂಚ್ಯಾ ಪಾಕ್ಯಾಚೆಂ ಹರ್ದೆಂ ದೀವ್ನ್ ರಾವಲ್ಲ್ಯಾ ಘರ್ಚ್ಯಾ ಬೊಲ್ಕಾವಾಂತ್  ಕವಿಂಕ್ ಆನಿ ರಸಿಕಾಂಕ್ ಯೆವ್ಕಾರ್ ಮಾಗ್ಲೊ ಆನಿ ಮಟ್ವ್ಯಾನ್ ಸಯ್ರ್ಯಾಂಚಿ ಒಳೊಕ್ ಕರುನ್ ದಿಲಿ.

ಆಪ್ಲ್ಯಾ ಪ್ರಸ್ತಾವನಾಂತ್ ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸ್ ಮ್ಹಣಾಲೊ,  ಕೊಂಕ್ಣಿ ಕವಿತಾ ವಾಚುಂಕ್, ಸಮ್ಜೊಂಕ್ ಆನಿ ಬರೊಂವ್ಕ್ ಗರ್ಜೆಚೊ ಭೊಂವಾರ್ ನಿರ್ಮಾಣ್ ಕರ್ಚೊ ಆನಿ  ಕೊಂಕಣಿ ಕವಿತೆಕ್ ರಾಶ್ಟ್ರೀಯ್ ಆನಿ ಅಂತರಾಶ್ಟ್ರೀಯ್ ಸ್ಥರಾರ್ ಮಾನ್ ಜೊಡುನ್ ದಿಂವ್ಚೊ ಕವಿತಾ ಟ್ರಸ್ಟಾಚೊ ಮುಕೆಲ್ ಶೆವೊಟ್. ಚಡುಣೆಂ 10 ವರ್ಸಾಂ ಆದಿಂ ಮ್ಹಣ್ಜೇ 2001 ಇಸ್ವೆಂತ್ ಪಡಲ್ಲೆಂ ಭಿಂ ಆಜ್ ಹ್ಯಾ ಪಾಂವ್ಡ್ಯಾಕ್  ವಾಡೊನ್ ರಾವ್ಲಾಂ ಆನಿ ಆಯ್ಚೆಂ ಕಾರ್ಯೆಂ ಕವಿತಾ ಟ್ರಸ್ಟಾಚೆಂ 55 ವೆಂ ಕಾರ್ಯೆಂ ತರ್ ಹ್ಯಾ ವರ್ಸಾಚೆಂ  4 ವೆಂ ಕಾರ್ಯೆಂ. ಕವಿತಾ ಟ್ರಸ್ಟಾನ್ ಎದೊಳ್ ಪರ್ಯಾಂತ್ 350 ಕವಿಂಚ್ಯೊ 650  ವಯ್ರ್ ಕವಿತಾ ಫಾಯ್ಸ್ ಕೆಲ್ಲ್ಯೊ ಆಸೊನ್ ಹರ್ ವರ್ಸಾಚ್ಯಾ ಜನೆರಾಂತ್ ದುಸ್ರ್ಯಾ ಆಯ್ತಾರಾ ಜಾಂವ್ಚೆಂ ಕವಿತಾ ಫೆಸ್ತ್ ಯೆಂವ್ಚ್ಯಾ ವರ್ಸಾ ಜನೆರ್ 8 , 2012 ವೆರ್ ಆಯ್ತಾರಾ ಬೊಳಿಯೆ ಮೊನ್ನಾ ಮಾಸ್ಟ್ರಾಚ್ಯಾ ಆಂಗ್ಣಾಂತ್ ಚಲ್ತೆಲೆಂ. ಕವಿತಾ ಟ್ರಸ್ಟ್ ಹರೇಕಾ ವರ್ಸಾ ಎಕಾ ಕೊಂಕ್ಣಿ ಕವಿಕ್ ವಿಂಚುನ್ ಮಥಾಯಸ್ ಕುಟಮ್ ಪುರಸ್ಕಾರ್ ದಿತಾ ಮಾತ್ ನ್ಹಯ್, ಹರ್ ವರ್ಸಾ ಸವೆ ಥಾವ್ನ್ ಧಾವೆ ಪರ್ಯಾಂತ್ಲ್ಯಾ ಇಸ್ಕೊಲಾಚ್ಯಾ ಭುರ್ಗ್ಯಾಂಕ್ ಚಾರ್ಲ್ಸ್ ಆನಿ ತೆರೆಜಾ ರೊಡ್ರಿಗಸ್ ಸ್ಮಾರಕ್ ಕವಿತಾ ಸ್ಫರ್ದೊಯೀ ಮಾಂಡುನ್ ಹಾಡ್ಟಾ.  ತಸೆಂಚ್ ಹ್ಯಾ ವರ್ಸಾ ಥಾವ್ನ್ ಸುರು ಕರ್ನ್ ಹರ್ ವರ್ಸಾ ಕವಿತೆ ವಿಶ್ಯಾಂತ್ ಏಕ್ ಎಂಡೋಮೆಂಟ್ ಲೆಕ್ಚರ್ ಕವಿತಾ ಟ್ರಸ್ಟ್ ಹರ್ ಭಾಶೆಂಚ್ಯಾ ಕವಿತಾ ಮೋಗಿಂಕ್ ಮ್ಹಣ್ ಕೊಡ್ಯಾಳಾಂತ್ ಮಾಂಡುನ್ ಹಾಡ್ತಲೆಂ ಆನಿ ಹ್ಯಾ ವರ್ಸಾ ನಾಮ್ಣೆಚೊ ಗೀತ್ ಕಾರ್ ಆನಿ ಹಿಂದೀ ಫಿಲ್ಮ್ ನಿರ್ದೇಶಕ್ ಗುಲ್ಜಾರ್ ಹ್ಯಾ ಕಾರ್ಯಾಕ್ ಯೇಂವ್ಕ್ ವೊಪ್ಲ್ಯಾತ್ ಆಸೊನ್ ಹೆಂ ಕಾರ್ಯೆಂ ಹ್ಯಾಚ್ ಸಪ್ಟೆಂಬರ್ ಮ್ಹಯ್ನ್ಯಾಂತ್ ಚಲ್ತಲೆಂ.

ಆಮ್ಕಾಂ ಕವಿತಾ ಕಿತ್ಯಾಕ್ ಜಾಯ್? ಮ್ಹಳ್ಳ್ಯಾ ವಿಶಯಾಂತ್ ಉಲಯ್ತ್ ಕವಿ ಮೆಲ್ವಿನ್ ಮ್ಹಣಾಲೊ : ಆಮಿ ಸಗ್ಳ್ಯಾಂನಿ ಪ್ರೆಶ್ಶರ್ ಕುಕ್ಕರ್ ಪಳಯ್ಲಾಂ. ತೆಂ ರಾಂದ್ಣಿರ್ ದವರ್ಲ್ಯಾ ಉಪ್ರಾಂತ್  ನಿಯಮಿತ್ ಸಂಕ್ಯಾಚ್ಯಾ ಬಿಗಿಲಾಂ ಖಾತಿರ್ ಆಮಿ ರಾಕ್ತಾಂವ್. ಕುಕ್ಕರಾ ಭಿತರ್ ಪ್ರೆಶರ್ ನಿರ್ಮಾಣ್ ಜಾತಾ ಆನಿ  ಬಿಗಿಲಾಂಚಿ ಮೀತ್ ಚುಕ್ಲ್ಯಾರ್ ಪೇಜ್ , ಮಡ್ಡಿ, ಖಿರ್ ಜಾಂವ್ಚಿ ಮಾತ್ ನ್ಹಯ್ , ಸ್ಪೋಟ್ ಸಯ್ತ್ ಜಾಂವ್ಚಿ ಸಾದ್ಯತಾ ಆಸಾ. ಮ್ಹನ್ಶ್ಯಾಚೆಂ ಮನ್ ಯೀ ಪ್ರೆಶ್ಶರ್ ಕುಕ್ಕರಾಪರಿಂ. ಮನಾಂತ್ಲೊ ಪ್ರೆಶ್ಶರ್ ಕಾಡುಂಕ್ ಬರೊವ್ಪ್ ಏಕ್ ವಾಟ್ ಆನಿ ತಾಂತ್ಲಿ ಕವಿತಾ ಏಕ್.  ಮತ್ ಸಮಾಜೆಚ್ಯಾ ಸುಳಿಗೊಂದೊಳಾಂತ್ ಸಾಂಪಡ್ಲ್ಯಾರ್ ವಾ ಸವಾಲಾಂಚ್ಯಾ ಝಾಂಟಾಂನಿ ರೆಂವೊಡ್ಲ್ಯಾರ್ ಕವಿತಾ ಮತಿಂತ್ಲೊ  ಪ್ರೆಶ್ಶರ್ ಭಾಯ್ರ್ ಕಾಡುಂಕ್ ಕುಮ್ಕೆಕ್ ಯೆತಾ.

ಹೊಯ್ಗೆಬಜಾರಾ ವಿಶ್ಯಾಂತ್ ಉಲವ್ನ್ ಮೆಲ್ವಿನ್ ಮ್ಹಣಾಲೊ: ಹಾಂಗಾಥಾವ್ನ್ ಮೇಬಲ್ ಕೆಂಟ್, ಬೆನ್ನಾ ರುಜಾಯ್, ಟೋನಿ ರುಜಾಯ್ ತಸಲೆ ಕಲಾಕಾರ್ ಕೊಂಕ್ಣೆಂತ್ ಉಟೊನ್ ದಿಸ್ತಾತ್ ವ್ಹಯ್ ತರೀ, ಬರೊವ್ಪಿ/ ಕವಿ ಝಳ್ಕನಾಂತ್.  ಹಾಂಗಾಚ್ಯಾ ನಳ್ಯಾಂಕ್ ಸಂಸಾರ್ ಭರ್ ನಾಂವ್ ಆಸಾ. ಜಶೆಂ ಹಾಂವ್ ಪಾಕಿಸ್ತಾನಾಕ್ ಗೆಲ್ಲ್ಯಾ ತವಳ್ ಥಂಯ್ ಮ್ಹಾಕಾ ಆಲ್ಬುಕರ್ಕ್ ಆನಿ ಕಂಪೆನಿಚೆ ಮಂಗ್ಳುರೀ ನಳೆ ಪಳೆಂವ್ಕ್ ಮೆಳ್ಳೆ. ಆನಿ ಹ್ಯಾ ನಳ್ಯಾಂನಿಮ್ತಿಂ ಪರ್ಗಾಂವ್ಚೆ ಮಾತಿಯೆರ್ ಮ್ಹಾಕಾ ವ್ಹಡ್‍ಪಣ್ ಭೊಗುಂಕ್ ಮೆಳ್ಳೆಂ.

ಸುಮಾರ್ ಪನ್ನಾಸ್ ಜಣ್ ಹಾಜರ್ ಆಸಲ್ಲ್ಯಾ ಹೆ ಕವಿಗೋಶ್ಟಿಂತ್ ವೀಸ್ ನಾಮ್ಣೆಚ್ಯಾ ಆನಿ ನವ್ಯಾ ಕವಿಂನಿ ಆಪ್ಲ್ಯೊ ಕವಿತಾ ಪೇಶ್ ಕೆಲ್ಯೊ. ಥೊಡ್ಯಾ ಕವಿತೆಂನಿ ಪಾವ್ಸಾಚೆ ಪಾವ್ಳೆ ಪಳೆಂವ್ಕ್ ಮೆಳ್ಳೆ ತರ್ ಆನಿ ಥೊಡ್ಯಾ ಕವಿತೆಂನಿ ಸಾಮಾಜಿಕ್ ವ್ಯಂಗ್ಯಾಚೆಂ ಆನಿ ಜಿಣ್ಯೆ ಸಂಘರ್ಶಾಚೆಂ  ಪಾವ್ಳೆ ಪಳೆಂವ್ಕ್ ಮೆಳ್ಳೆ. ಏಕ್ ದೋನ್ ಕವಿತೆಂನಿ ನಿಷ್ಕಲ್ಮಶ್ ಹಾಸ್ಯಾಚೆಂ  ಪಾವ್ಳೆಯೀ ಆಸ್ಲೆ.

ಬೋವ್ ತೇಂಪಾ ಉಪ್ರಾಂತ್ ಕವಿತಾ ಬರಯಿಲ್ಲ್ಯಾ ರೊನಿ ಸಿಕ್ವೇರಾ ಹಾಂಣಿ ಮೊಬಾಯ್ಲ್-ಬಾಯ್ಲ್-ಈಶ್ಟ್ ಆನಿ ಕವಿತಾ ಹಾಚೆಭೊಂವ್ತಿಂ ಕವಿತಾ ಪೇಶ್ ಕೆಲಿ. ಸ್ಟೀವನ್ ಕ್ವಾಡ್ರಸಾನ್ ’ಖಾಟಿಯೆಪಂದ್ಲಿ ರಾಸ್ ” ಕವಿತಾ ಆನಿ ’ಯಶೋಧರ ಚರಿತ” ಹಾಂತ್ಲ್ಯೊ ಥೊಡೆ ವೊಳಿ ವಾಚುನ್ ಸಾಂಗ್ಲ್ಯೊ ತರ್  ವಿಲ್ಸನ್ ಕಟೀಲ್ ಹಾಣೆ ಧರ್ಮ್-ದಂದೊ-ದಾಕವ್ಣೆಚೊ ಉಪಾಸ್ ಹಾಚೆಭೊಂವ್ತಿಂ ಬರಯಿಲ್ಲಿ ’ಸೀನಪ್ಪಣ್ಣಾಚಿ  ಆಮ್ಲೆಟ್ ಗಾಡಿ” ಕವಿತಾ ವಾಚ್ಲಿ . ಮಾಲ್ಘಡೊ ಕವಿ  ಎಮ್.ಪಿ.ರೊಡ್ರಿಗಸ್ ಹಾಣಿ ’ಕವಿತಾ ಮ್ಹಣ್ಜೆ ಕಿತೆಂ” ಮ್ಹಳ್ಳೆ ಕವಿತೆಂತ್ ಕವಿತಾ ಬರಯ್ತೆಲ್ಯಾಚೆ ಕಶ್ಟ್ ಆನಿ ಕವಿತಾ ಕಶಿ ಆಸುಂಕ್ ಜಾಯ್ ? ಮ್ಹಳ್ಳೆ ವಿಶಿಂ ಸಮ್ಜಣಿ ದಿಲಿ.

ಗ್ಲೇಡಿಸ್ ರೇಗೊನ್ ಆಪ್ಲ್ಯಾ ’ಬಾಳಾಂ ಫಳಾ” ಕವಿತೆಂತ್ ಕುಟ್ಮಾಚೊ ಸಮಸ್ಸೊ ಮುಕಾರ್ ಹಾಡ್ಲೊ ತರ್,  ಮಹೇಶ್ ನಾಯಕ್ ಹಾಂಣಿ ’ಏಕ್ ಜೆವ್ಣಾಚಿ ಕವಿತಾ” ಆನಿ ’ನಾಂವ್ ತುಮಿ ದವರ” ಮ್ಹಳ್ಳ್ಯೊ ದೋನ್ ಕವಿತಾ ಪೇಶ್ ಕೆಲ್ಯೊ. ವಿಲ್ಮಾ ಬಂಟ್ವಾಳ್ ಹಿಣೆ ’ಪಾವ್ಸಾಚಿ ಆಶಾ”; ವೆಂಕಟೇಶ್ ನಾಯಕ್ ಹಾಣೆ ’ಪಾವ್ಸಾಂತ್ ಭರ್ಲಲೆ ಕಳೆ’,”ಧನ್ಯ ಆನಿ ಮಾನ್ಯ’; ಜೊ.ಸಿ.ಸಿದ್ದಕಟ್ಟೆ ಹಾಣೆ ’ಮೊರಾನ್ ಸಾಂಡ್ಲೆಲಿಂ ಪಾಕಾಂ”; ಗುರು ಬಾಳಿಗಾನ್ ’ಮೊಬಾಯ್ಲ್ ಮಯ್ಮಾಂ”; ಮಾನ್ ವಾಮಂಜೂರಾನ್ ’ನ್ಹಾಲ್ಲೊಂಚ್ ನಾ”, "ಪಾವ್ಸ್ ಮಾತ್ ಆಯ್ಲೊ”; ಆಂಡ್ರು ಎಲ್. ಡಿಕುನ್ಹಾನ್, ಪಾವ್ಶಿಲ್ಯಾ ಕಾಳಾಚಿ ಕವಿತಾ ’ವೊಳಿ”; ವಲ್ಲಿ ಬೋಳಾನ್ ’ಕಾಳ್ಜಾಚೆ ಅತ್ರೆಗ್”; ಮೆಲ್ವಿನ್ ರೊಡ್ರಿಗಸಾನ್ ಮಾಸಾಚಿ ಚರಬ್ ವಿಕ್ತೆಲ್ಯಾಂ ಆನಿ ಚರ್ಬೆಚೆಂ ಮಾಸ್ ಜಿರಯ್ತೆಲ್ಯಾಂ ಕಾಸಾಯ್‍ಗಾರ್, ದಾಕ್ತೆರ್ ಹಾಂಚ್ಯಾ ಜೋಡ್ ದಂದ್ಯಾವಿಶ್ಯಾಂತ್ ’ದೊರಿ ವೊಡ್ಚೊ ಖೆಳ್”; ರಿಚ್ಚಿ ಜೋನ್ ಪಾಯ್ಸಾನ್ ’ಝಳಕ್ ಆನಿ ಬಾವ್ಟೆ’; ವಿಲ್ಸನ್ ಕಿನ್ನಿಗೋಳಿನ್ ಗಝಲ್ ಆನಿ ಎಚ್ಚೆಮ್ ಪೆರ್ನಾಳಾನ್ ’ನಾಂವ್ ನಾತ್ಲಿ ಕವಿತಾ” ಪೇಶ್ ಕೆಲಿ.
ಕವಿಗೋಶ್ಟಿಚೊ ಅಧ್ಯಕ್ಶ್ ಮಾವ್ರಿಸಾನ್ ಆಪ್ಲ್ಯಾ ’ಭಿಂಗಾರಿ” ಬುಕಾಂತ್ಲಿ ’ಹಾಂವ್ ಉಬತ್ ವೆತಾಂ’ ಕವಿತಾ ವಾಚ್ಲಿ.

ಕವಿತಾ ಟ್ರಸ್ಟ್ ಟ್ರಸ್ಟಿ ಆನಿ ಕವಿ ಆಂಡ್ರು ಎಲ್. ಡಿಕುನ್ಹಾಚೊ ಪೂತ್ ಆಸ್ಟಿನ್ ಡಿಕುನ್ಹಾನ್ ಆಪ್ಲಿ ನೆಂಟಿ ಕವಿತಾ ವಾಚುನ್ ಕವಿಗೋಶ್ಟಿಕ್ ವಿಶೇಸ್ ಆಕರ್ಶಣ್ ಹಾಡ್ಲೆಂ. ವಿತೊರಿ ಕಾರ್ಕೊಳಾನ್ ಅಬಾರ್ ಮಾಂದ್ಲೊ.

ಹ್ಯಾ ಕವಿಗೋಶ್ಟಿಕ್ ’ಆಂಗಣ್ ಕೊಂಕ್ಣೆಚೆಂ’ ಹಾಚೊ ಸಂಚಾಲಕ್ ಅರುಣ್ ಪಲಿಮಾರ್,  ಮಾಲ್ಘಡೊ ಲೇಕಕ್ ರೋನ್ ರೋಚ್ ಕಾಸ್ಸಿಯಾ , ರಾಹುಲ್ ಸಂಸ್ಥ್ಯಾಚೊ ಮ್ಹಾಲಕ್ ಟಾಯ್ಟಸ್ ನೊರೊನ್ಹಾ , ಚೇತನಾ ಸಂಸ್ಥ್ಯಾಚೊ ವಿಲ್ಫ್ರೆಡ್ ಲೋಬೊ ಪಡೀಲ್, ಕೊಂಕ್ಣಿ ಲೇಖಕಾಂಚ್ಯಾ ಎಕ್ವಟಾಚೊ ಆದ್ಲೊ ಅಧ್ಯಕ್ಶ್ ಮಾಚ್ಚಾ ಮಿಲಾರ್ , ನಾಟಕ್ ಸಂಗಟಕ್ ಹೆರಿ ಬೋಯ್ ರುಜಾಯ್ ಆನಿ ಜಾಯ್ತೆ  ಕಾವ್ಯಾ  ರಸಿಕ್ ಹಾಜರ್ ಆಸ್ಲೆ. ಕವಿತಾ ಟ್ರಸ್ಟಾಚ್ಯಾ ಕವಿಗೋಶ್ಟಿಂತ್ ಪಯ್ಲೆಪಾವ್ಟಿಂ ಭಾಗ್ ಘೆತಲ್ಲ್ಯಾ ರೊನಿ ಸಿಕ್ವೇರಾ, ವಲ್ಲಿ ಬೋಳಾ, ಜೊ.ಸಿ.ಸಿದ್ದಕಟ್ಟೆ, ರಿಚ್ಚಿ ಜೋನ್ ಪಾಯ್ಸ್ ಹಾಂಕಾಂ ಸ್ಮರಣಿಕಾ ದೀವ್ನ್ ಕವಿತಾ ಟ್ರಸ್ಟ್ ಅಧ್ಯಕ್ಶ್ ಮೆಲ್ವಿನ್ ರೊಡ್ರಿಗಸ್ ಹಾಣಿ ಮಾನ್ ಕೆಲೊ.

ಹೆ ಕವಿಗೋಷ್ಟಿಕ್ ‘ಯಮ್ಮಿ ಫೂಡ್ಸ್’ ಮ್ಹಾಲಕ್ ರಿಚ್ಚಿ ಜೋನ್ ಪಾಯ್ಸ್ ಹಾಣೆ ಸಹಕಾರ್ ದಿಲ್ಲೊ.

-ಭಾತ್ಮಿ: ಎಚ್ಚೆಮ್ ಪೆರ್ನಾಳ್; ತಸ್ವಿರ್‍ಯೊ: ಸ್ಟೇನ್ಲಿ ಬಂಟ್ವಾಳ್ ಆನಿ ಗ್ಯಾವಿನ್ ರೊಡ್ರಿಗಸ್

ಫೊಟೊ ಆಲ್ಬಮಾಕ್ ಹಾಂಗಾಸರ್ ಚಿಚಾಯಾ