ಕಾರ್ಕೊಳ್‌ಗಾರಾಂಕ್ ಕವಿತೆಚ್ಯಾ ಪಾವ್ಸಾಂತ್ ಭಿಜ್ಚೆಂ ಅಪ್ರೂಪ್ ಭಾಗ್
'ಆದಿಂ ಮಾಗಾ ಸಬ್ದ್ ಆಸಲ್ಲೊ ಮ್ಹಣ್ ಆಮಿ ಪಾತಿಯೆತಾಂವ್. ತೊ ಸಬ್ದ್ ಕಾವ್ಯಾಚೊ ಸಬ್ದ್. ಸಂಸಾರಾಂತ್ಲಿ ಪಯ್ಲಿ ಅಭಿವೆಕ್ತಿ ಮಾಟ್ಯಾಂತ್ ಸೊಡಯಿಲ್ಲಿಂ ಪಿಂತುರಾಂ ತರ್ ಉಪ್ರಾಂತ್ ಆಯಿಲ್ಲೆ ಅಭಿವೆಕ್ತೆಚೆಂ ಬಳ್ವಂತ್ ಮಾಧ್ಯಮ್ ಕಾವ್ಯೆಂ. ದೆಕುನ್ ಮ್ಹಣ್ಯೆತ್ ಸಂಸಾರಾಂತ್ ಚಡ್ ಕರುನ್ ಧರ್ಮಿಕ್ ಗ್ರಂಥಾಂ ಕಾವ್ಯಾ ರುಪಾರ್ ಆಸಾತ್' ಮ್ಹಣಾಲೊ ಪ್ರಾದ್ಯಾಪಕ್ ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆ. ತೊ ಕಾರ್ಕೊಳ್ 'ಆಶೀರ್ವಾದ್' ಮೊತಿಂಗೆಲ್ಯಾ ಘರ್ಚ್ಯಾ ಆಂಗ್ಣಾಂತ್ ಬಿರಿ ಬಿರಿ ಪಾವ್ಸಾಕ್ ಘಾಲ್ಲ್ಯಾ ಪತ್ರ್ಯಾಂಚ್ಯಾ ಮಾಟ್ವಾಂತ್ ಆಯ್ತಾರಾ, ಆಗಸ್ಟ್ 7 ತಾರಿಕೆರ್, ಮಂಗ್ಳುರ್ಚ್ಯಾ ಕವಿತಾ ಟ್ರಸ್ಟಾನ್ ಮಾಂಡುನ್ ಹಾಡಲ್ಲೆ ಕವಿಗೋಶ್ಟಿಚೆಂ ಸುಂಕಾಣ್ ಹಾತಿಂ ಧರುನ್ ಉಲಯ್ತಾಲೊ.
ಮಥಾಯಸ್ ಕುಟ್ಮಾಚೊ ಯೆಜ್ಮಾನಿ ಆನಿ ಕವಿತಾ ಟ್ರಸ್ಟ್ (ರಿ) ಮಂಗ್ಳುರ್ ಹಾಚೊ ಟ್ರಸ್ಟಿ ವಿಕ್ಟರ್ ಮಥಾಯಸ್ (ವಿತೊರಿ ಕಾರ್ಕೊಳ್) ಹಾಣೆ ಸುರ್ವೆರ್ ಕವಿಂಕ್ ಆನಿ ಕಾವ್ಯರಸಿಕಾಂಕ್ ಯೆವ್ಕಾರ್ ಮಾಗ್ಲೊ. ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸ್ ಹಾಣೆ ಕವಿತಾ ಟ್ರಸ್ಟಾಚೆಂ ಮಿಸಾಂವ್, ಪಾಟ್ಲ್ಯಾ ವರ್ಸಾಂನಿ ಟ್ರಸ್ಟಾನ್ ಕೆಲ್ಲೆಂ ಕಾಮ್, ಕವಿತಾ ಫೆಸ್ತಾಚೊ ವಯ್ಭವ್, ಕವಿತಾ ಪ್ರಕಾಶನಾನ್ ಪರ್ಗಟ್ಲೆಲ್ಯಾ ಬುಕಾಂಕ್ ಮೆಳಲ್ಲಿ ಮರ್ಯಾದ್, ಕೊಂಕ್ಣಿ ಕವಿಂಕ್ ಪಾಟ್ಲ್ಯಾ ತೀನ್ ವರ್ಸಾಂ ಥಾವ್ನ್ ಮಥಾಯಸ್ ಕುಟಮ್ ಪುರಸ್ಕಾರ್ ದೀವ್ನ್ ಕೆಲ್ಲೊ ಮಾನ್, ಇಸ್ಕೊಲಾಚ್ಯಾ ಭುರ್ಗ್ಯಾಂಕ್ ಕೊಂಕ್ಣಿ ಕವಿತಾ ಸ್ಪರ್ಧೆ ಮಾಂಡುನ್ ಹಾಡುನ್ ದೀವ್ನ್ ಆಸ್ಚೆಂ ಉತ್ತೇಜನ್ ಸಭೆ ಮುಕಾರ್ ದವರ್ಲೆಂ ಮಾತ್ ನ್ಹಯ್ ಕಾರ್ಕೊಳಾಂತ್ ಪಯ್ಲೆಂ ಗುಮ್ಟ್ಯಾ ಗುಡ್ಯಾ ಪಂದಾ ಜಾಲ್ಲಿ ಕವಿಗೋಶ್ಟಿ ಆನಿ ಉಪ್ರಾಂತ್ ಹ್ಯಾಚ್ ವರ್ಸಾ ಜನೆರಾಂತ್ ಪ್ರಶಸ್ತಿ ವಿಜೇತ್ ಶಿಕ್ಶಕ್ ನಕ್ರೆಚ್ಯಾ ಜೋರ್ಜ್ ಮಾಸ್ಟರಾಚ್ಯಾ ಘರ್ಚ್ಯಾ ಆಂಗ್ಣಾಂತ್ ಜಾಲ್ಲೆಂ ದಬಾಜಿಕ್ ತಶೆಂ ಯಾದಗಾರ್ ಕವಿತಾ ಫೆಸ್ತ್ ಹಾಚ್ಯೊ ಗೊಡ್ಶ್ಯೊ ಯಾದಿ ವಾಂಟುನ್ ಘೆತ್ಲ್ಯೊ.
ಆಪ್ಲ್ಯಾ ಒಳ್ಕೆ ಉಲೊವ್ಪಾಂತ್ ಕವಿತಾ ಟ್ರಸ್ಟ್ ಅಧ್ಯಕ್ಷ್ ಕವಿ ಮೆಲ್ವಿನ್ ರೊಡ್ರಿಗಸಾನ್ ಯೆಂವ್ಚ್ಯಾ ವರ್ಸಾ 2012 ಇಸ್ವೆಂತ್ ಬೊಳಿಯೆ ಮೊನ್ನಾ ಮಾಸ್ಟ್ರಾಚ್ಯಾ ಘರಾ ಜಾಂವ್ಚ್ಯಾ ಕವಿತಾ ಫೆಸ್ತ್ - 2012 ಹಾಚಿ ವೊವ್ಳಿಗ್ ದಿಲಿ ಆನಿ ಹ್ಯಾಚ್ ವರ್ಸಾ ಸಪ್ಟೆಂಬರಾಂತ್ ಮಂಗ್ಳುರಾಂತ್ ಚಲೊಂಕ್ ಆಸ್ಚ್ಯಾ ಕವಿತಾ ಟ್ರಸ್ಟ್ ವಾರ್ಷಿಕ್ ಎಂಡೋಮೆಂಟ್ ಲೆಕ್ಚರ್ ಹಾಕಾ ಹಿಂದೀ ಫಿಲ್ಮ್ ಸಂಸಾರಾಂತ್ ಗೀತ್ ಕಾರ್ ಜಾವ್ನ್ ವ್ಹಡ್ ನಾಂವ್ ಕೆಲ್ಲೊ ಗುಲ್ಜಾರ್ ಸಾಬ್ ಯೇಂವ್ಕ್ ಒಪ್ಲಾ ಆನಿ ಸಪ್ಟೆಂಬರ್ ದುಸ್ರ್ಯಾ ಯಾ ತಿಸ್ರ್ಯಾ ಹಫ್ತ್ಯಾಂತ್ ಹೆಂ ಕಾರ್ಯೆಂ ಚಲ್ತೆಲೆಂ ಮ್ಹಳೆಂ.
'ಋಗ್ ವೇದ ಭಾರತಾಂತ್ಲೆಂ ಪಯ್ಲೆಂ ಸಂಪೂರ್ಣ್ ಕಾವ್ಯೆಂ' ಮ್ಹಳ್ಳ್ಯಾ ಪ್ರಾದ್ಯಾಪಕ್ ಸ್ಟೀವನಾನ್ 'ವೇದ - ವಿದ್ ಮ್ಹಳ್ಯಾರ್ wisdom' ಮ್ಹಳೆಂ. 'ವೇದ ಉಪ್ರಾಂತ್ ಅರಣ್ಯಕ, ಅರಣ್ಯಕ ಥಾವ್ನ್ ಬ್ರಾಹ್ಮಣಕ, ಬ್ರಾಹ್ಮಣಕ ಥಾವ್ನ್ ಉಪನಿಶತ್ - ಅಶೆಂ ಭಾರತೀಯ್ ಕಾವ್ಯೆಂ ವಾಡೊನ್ ಆಯ್ಲಾಂ ಆನಿ ಹಿಂ ಕಾವ್ಯಾಂ ಎಕೆ ಕ್ರಿಯೆಕ್ ಪ್ರತಿಕ್ರಿಯಾ ಜಶೆಂ ವಾಡೊನ್ ಆಯ್ಲಿಂ ಆನಿ ಹಾಂಗಾಸರ್ ವಿಮರ್ಶೆಚೊ ಜಲ್ಮ್ ಜಾಲೊ ಆನಿ ವಿಮರ್ಶೆಚೆಂ ವಿಗ್ಯಾನ್ ಕಾವ್ಯೆಂ ಮುಕಾರ್ ವಾಡೊಂಕ್ ಥಳ್ ಜಾಲೆಂ' ಮ್ಹಣಾಲೊ ಸ್ಟೀವನ್. 'ಸೊಭಾಯ್ ಆನಿ ಸುಖ್, ಫಕತ್ ಗುಲೊಬಾಂತ್ ಆನಿ ತಾಚ್ಯಾ ಪಾಕ್ಳೆಂನಿ ಮಾತ್ ಆಸ್ಚೆಂ ನ್ಹಯ್ ತೆಂ ಕಾಂಟ್ಯಾಂನೀಯ್ ಆಸಾ. ಏಕ್ ಥೆಂಬೊ ದೂಕ್‍ಯ್ ಸುಖ್ ದಿತಾ' ಮ್ಹಳ್ಳ್ಯಾ ಸ್ಟೀವನಾನ್ ಹೆಂ ಸಿದ್ಧ್ ಕರುಂಕ್ ಶಾಕುಂತಲಾ - ದುಶ್ಯಂತ ಕಾವ್ಯಾಚೊ ದಾಕ್ಲೊ ದಿಲೊ.
ಕವಿಗೋಶ್ಟಿಂತ್ ವಿಲ್ಲಿ ಕಾರ್ಕೊಳ್ ಹಾಣೆ ಆಪ್ಲಿಂ ಥೊಡಿಂ ಚುಟುಕಾಂ ಆನಿ ಬೊಂಬಯ್ ಚರ್ಚ್ ಗೇಟ್ ಸ್ಟೇಶನಾ ಭಾಯ್ರ್ ಆಂಕ್ರೆಲ್ಲ್ಯಾ ಮೊಗಾ ಥಾವ್ನ್ ಆತಾಂ ಜಲ್ಮಲ್ಲ್ಯಾ ನಾತ್ರಾಂ ಪರ್ಯಾಂತ್ ಕುಟ್ಮಾಚೆಂ ಖಂಡ್ ಕಾವ್ಯೆಂ ಪೇಶ್ ಕೆಲೆಂ ತರ್ ವಿಡಂಬನ್‌ಕಾರ್ ರಿಚ್ಚಿ ಜೋನ್ ಪಾಯ್ಸ್ ಹಾಣೆ `ತುಜೆ ಸಂಗಿ ಹಾಂವ್' ಆನಿ `ದಾಂಬ್ಲ್ಯಾರ್ ಮೆಳ್ಟಾ' ಕವಿತಾ ಪೇಶ್ ಕೆಲ್ಯೊ. ನಕ್ರೆಚ್ಯಾ ಜೊರ್ಜಿ ಮಾಸ್ಟ್ರಾನ್ `ಮ್ಹಾಕಾ ಸಮ್ಜಾನಾ' ಮ್ಹಳ್ಳಿ ಕವಿತಾ ವಾಚ್ಲಿ ಆನಿ ಆಯ್ಲೆವಾರ್ ಪರ್ತ್ಯಾನ್ ನವೆ ತಾಕ್ತೆನ್ ಬರೊಂವ್ಚ್ಯಾ ಸುರತ್ಕಲ್ಚ್ಯಾ ಸಿಕೇರಾಮಾನ್ (ರೊನಿ ಸಿಕ್ವೇರಾ,ಸುರತ್ಕಲ್) ದೋನ್ ಕವಿತಾ ಪೇಶ್ ಕೆಲ್ಯೊ. ಪಯ್ಲಿ `ಸುರ್ಯಾ ವಿಶ್ಯಾಂತ್' ದುಸ್ರಿ `ಸರ್ಗಾ ದಾರಾರ್' ಸಾಂ ಪೆದ್ರು ಸಾಂಗಾತಾ ಚವ್ಕಶೆಕ್ ಲಾಗಲ್ಲ್ಯಾ ಪಾದ್ರಿ ಆನಿ ತಾಚ್ಯಾ ಡ್ರಾಯ್ವರಾ ವಿಶ್ಯಾಂತ್. ಕಿಟಾಳ್ ಸಂಪಾದಕ್ ಎಚ್ಚೆಮಾನ್ ಹಾಂವ್ ಕವಿ ಜಾಲೊಂ ಕವಿತಾ ವಾಚ್ಲಿ ಆನಿ ಭರ್ವಶ್ಯಾಚೊ ತರ್ನೊ ಕವಿ ವಿಲ್ಸನ್ ಕಿನ್ನಿಗೋಳಿ ಹಾಣೆ ಆಯ್ಚೆ ಸಕಾಳಿಂ ಕವಿತಾ ಪೇಶ್ ಕೆಲಿ. ಹಾಸ್ಯ್ ಕವಿ ಸಿಜ್ಯೆಸ್ ತಾಕೊಡೆನ್ `ಪೊಟಾಂ' ವಿಶ್ಯಾಂತ್ ಗಂಭೀರ್ ಕವಿತಾ ವಾಚ್ಲಿ ಆನಿ ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ `ಉಂಬೊಳ್ಚ್ಯಾ ಫಾತ್ರಾಲಾಗಿಂ' ಮ್ಹಳ್ಳಿ ಮಾರ್ಮಿಕ್ ಕವಿತಾ ಪೇಶ್ ಕೆಲಿ. ಕಶೆಂ ಏಕ್ ವಸ್ತುರಾಂ ಉಂಬಳ್ಚೊ ಮಾಮೂಲಿ ನಶಿಬ್ ಫುಟಲ್ಲೊ ಫಾತೊರ್ ಆಡ್ಬೊಸರ್ ಚೆಡ್ಯಾಂಚ್ಯಾ ವೀರ್ಯಾಚಾಂ ಖತಾಂ ಥಾವ್ನ್ ಧರುನ್, ತರ್ನ್ಯಾ ಚೆಡ್ವಾಂಚ್ಯಾ ಮ್ಹಯ್ನ್ಯಾಚೆಂ ಮಾತ್ರ್ ನ್ಹಯ್ ಬಾಳ್ಶಾಚೆ ಆಂಗಟೆಂತ್ಲೊ ತಶೆಂ ಅಬಾಚೆ ಕಾಷ್ಟೆಂತ್ಲೊ ಸುಕಲ್ಲೊ ಗೂ-ಮೂತ್ ಸೊಸುನ್ ರಸ್ತ್ಯಾರ್ ಪಡ್ಟಾ ಆನಿ ಥಂಯ್ ರಸ್ತ್ಯಾಬಗ್ಲೆನ್ ಜಿಯೆಂವ್ಚೆ ಬಾಯ್ಲೆಕ್ ಆಳೆನ್ ವಾಟ್ಚೆಂ ವಾನ್ ಜಾತಾ ಆನಿ ಥಂಯ್ ಥಾವ್ನ್ ನಿಮ್ಣೆಂ ಡಿ ಸಿ ಧಪ್ತರಾಕ್ ಪಾವೊನ್ ಡಿ ಸಿ ಸಾಯ್ಭಾಚ್ಯಾ ಪುತಾಚ್ಯಾ ಥೀಸಿಸಾಂತ್ ಮೊಲಾಧಿಕ್ ಶಾಸನ್ ಜಾತಾ ಮ್ಹಳ್ಳೆಂ ಬೋವ್ ಮಾರ್ಮಿಕ್ ಥರಾನ್ ಸಾಂಗ್ಲೆಂ. ಗಾಡುಂಯೀ ಘೊಡೊ ಜಾಂವ್ಚ್ಯಾ ಆಯ್ಚ್ಯಾ ಅಸಮತೋಲಿತ್ ಸಾಮಾಜಿಕ್ ಆನಿ ರಾಜಕೀಯ್ ಪರಿಗತೆಚ್ಯಾ ಪಾಟಿಥಳಾರ್ ಸೂಕ್ಶಿಮಾಯೆನ್ ಪಾರ್ಕಿಲ್ಯಾರ್ ಹಿ ಏಕ್ ಆಪುರ್ಬಾಯೆಚಿ ಕವಿತಾ ಮ್ಹಣ್ಚ್ಯಾಕ್ ದೋನ್ ಉತ್ರಾಂ ನಾಂತ್.
ಕವಿಗೋಶ್ಟಿಚ್ಯಾ ಶಿಖರಾರ್ ಕೊಂಕ್ಣೆಚೊ ಅನ್ಯೇಕ್ ತಾಕ್ತೆಚೊ ಕವಿ ವಿಲ್ಸನ್ ಕಟೀಲಾನ್ `ಕಂಕ್ನಾಡಿಚ್ಯಾ ರಸ್ತ್ಯಾಂನಿ' ಆನಿ `ಫೇಸ್ ಬುಕ್ ಕವಿಂಕ್' ಮ್ಹಳ್ಳ್ಯೊ ದೋನ್ ಕವಿತಾ ಪೇಶ್ ಕೆಲ್ಯೊ. ರಸ್ತ್ಯಾರ್ ಭಂವನಾಕಾತ್ ಮ್ಹಣ್ ಆರ್ಸೊ ಬಂಧ್ ಕರುನ್ ಕಾರಾಂನಿ ಭೊಂವ್ತೆಲ್ಯಾಂಕ್ ವಿಲ್ಸನಾನ್ ಪೇಪರಾಚಿ ಆಂಗಡ್ ಆನಿ ಹೊಟೆಲ್ ಆಪ್ಲ್ಯಾ ಫ್ಲ್ಯಾಟಾ ಭಿತರ್ ವ್ಹರ್ನ್ ದವರಾ ಮ್ಹಳೆಂ ತರ್ ಫೇಸ್ ಬುಕಾರ್ ಉತ್ರಾಂ ವೊಂಕ್ಚ್ಯಾ ಕವಿಚ್ಯಾ ದೊಳ್ಯಾಂಕ್ ಫಿಂತ್ ಬಾಂದುನ್ ಜಿಣ್ಯೆ ಅನ್ಭೊಗಾಚೊ ರಸ್ತೊ, ಚಾರ್ ರಸ್ತೊ ಆನಿ ಬಜಾರ್ ಭೊಂವ್ಡಾಯ್ಲೊ ಆನಿ ಮ್ಹಳೆಂ - ಕವಿತಾ ಆತಾಂ ಬರಯ್.
ಕವಿಗೋಶ್ಟಿಚೆಂ ಸುಂಕಾಣ್ ಧರಲ್ಲ್ಯಾ ಪ್ರಾದ್ಯಾಪಕ್ ಸ್ಟೀವನಾನ್ `ಪಾಳ್ಣೆಂ' ಕವಿತಾ ವಾಚ್ಲಿ.
ಕವಿ ಗೋಶ್ಟಿಚೊ ಕಾರ್ಭಾರಿ ವಿತೊರಿ ಕಾರ್ಕೊಳಾನ್ ಧನ್ಯವಾದ್ ಪಾಟಯ್ಲೆ.
ಹೆ ಕವಿಗೋಶ್ಟಿಕ್ ಕಾರ್ಕೊಳ್ ಆಸ್‌ಪಾಸ್ಚೊ ಲೋಕ್ ಮಾತ್ರ್ ನ್ಹಯ್ ಕೊಂಕಣಿ ಪ್ರಚಾರ್ ಸಂಚಾಲನಾಚೊ ಅಧ್ಯಕ್ಷ್ ರೊಯ್ ಕಾಸ್ತೆಲಿನೊ ಆನಿ ತಾಚೆಂ ಕುಟಮ್, ಕೊಂಕ್ಣಿ ವಾವ್ರಾಡಿ ಅಲೆಕ್ಸಾಂಡರ್, ಬರೊವ್ಪಿ ರೊನ್ ರೊಚ್ ಕಾಸ್ಸಿಯಾ, ಮೆಲ್ಕಾ ಮಿಯಾರ್, ದಿರ್ವೆಂ ಸಂಪಾದಕ್ ಜೊನಾಬ್, ನಕ್ರೆ ರೀನಾ ಕಾಸ್ತೆಲಿನೊ ಆನಿ ಹೆರ್ ಜಾಯ್ತೆ ಮಾನೆಸ್ತ್ ಮಾನೆಸ್ತಿಣ್ಯೊ ಹಾಜರ್ ಆಸಲ್ಲಿಂ.
-ಭಾತ್ಮಿ: ಎಚ್ಚೆಮ್ ಪೆರ್ನಾಲ್, ಚಿತ್ರಾಂ: ಸ್ನೇಹ ಸ್ಟುಡಿಯೊ, ಕಾರ್ಕಳ್