ಬೊಳಿಯೆಂತ್ ಸನ್ನು ಮೊನಿಸಾಚ್ಯಾ ಅಧ್ಯಕ್ಷಪಣಾಖಾಲ್ ಉದೆತ್ಯಾ ಆನಿ ಅನ್ಬೋಗಿ ಕವಿಂಚೊ ಸಂಗಮ್

ಬೊಳಿಯೆಂತ್ ಉದೆತ್ಯಾ ಆನಿ ಅನ್ಬೋಗಿ ಕವಿಂಚೊ ಸಂಗಮ್

ಕೊಂಕ್ಣಿ ಕವಿತೆಚೆ ಉದರ್ಗತೆ ಖಾತಿರ್ ಪ್ರಾಮಾಣಿಕ್ಪಣಿ ವಾವುರ್ಚ್ಯಾ ಮಂಗ್ಳುರ್ಚ್ಯಾ ಕವಿತಾ ಟ್ರಸ್ಟಾನ್ ಉಡುಪಿ ಜಿಲ್ಲ್ಯಾಚ್ಯಾ ಬೊಳಿಯೆಂತ್ ಮೊನ್ನು ಮಾಸ್ಟರಾಚ್ಯಾ ಘರ್ಚ್ಯಾ ಆಂಗ್ಣಾಂತ್ ಮಾಂಡುನ್ ಹಾಡ್‍‍ಲ್ಲಿ ಕವಿಗೋಶ್ಟಿ ಎಕಾ ಕಾರಣಾ ಖಾತಿರ್ ಉಡಾಸಾಂತ್ ಉರ್ಚೆ ತಸಲಿ ಥಾರ್ಲಿ.

ಏಕ್, ಹೆ ಕವಿಗೋಷ್ಟಿಂತ್ ಉದೆತ್ಯಾ ಆನಿ ಅನ್ಬೋಗಿ ಕವಿಂನಿ ಸಾಂಗಾತಾ ಕವಿತಾ ಪೇಶ್ ಕೆಲ್ಯೊ ತರ್ ಬೊಳಿಯೆ ಸಾಂ. ಲೊರೆಸ್ ಕೊಲೆಜಿಚೊ ಪ್ರಾಚಾರ್ಯ್ ಫಾ | ಪಾವ್ಲ್ ಹಾಂಚ್ಯಾ ಮುಕೆಲ್ಪಣಾರ್ ಗಾಯ್ಲೆಲ್ಯಾ ಕೀರ್ತನಾ ಸವೆಂ ಕವಿ ಗೋಶ್ಟಿ ಸುರ್ವಾತ್ಲಿ ಆನಿ ಕವಿ ಗೋಶ್ಟಿಚೆಂ ಸುಂಕಾಣ್ ಧರ್ಲೆಲ್ಯಾ ಸನ್ನು ಮೋನಿಸ್ ಬೊಳಿಯೆ ಹಾಣೆ ಸಯ್ರ್ಯಾಂಕ್ ಆನಿ ರಸಿಕಾಂಕ್ ಮಾಯೆಮೊಗಾಚೊ ಯೆವ್ಕಾರ್ ಮಾಗ್ಲೊ.

ಆಪ್ಲ್ಯಾ ಪ್ರಸ್ತಾವನಾಂತ್ ಕವಿತಾ ಟ್ರಸ್ಟ್ ಅಧ್ಯಕ್ಶ್ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಣಿ ಕವಿತಾ ಟ್ರಸ್ಟಾಚೊ ಶೆವೊಟ್, ಮಿಸಾಂವ್ ಆನಿ ಪಾಟ್ಲ್ಯಾ ಧಾ ವರ್ಸಾಂ ಥಾವ್ನ್ ಕೊಂಕ್ಣಿ ಕವಿತೆಚ್ಯಾ ಮಳ್ಯಾರ್ ಆಜ್ ಮೆರೆನ್ ಕೆಲ್ಲಿಂ ಕಾಮಾಂ ಆನಿ ಫುಡಾರಾಚಿ ಯೆವ್ಜಣ್ ಹ್ಯಾ ವಿಶ್ಯಾಂತ್ ಏಕ್ ಲ್ಹಾನ್ ಝಳಕ್ ದಿಲಿ. ಹರ್ ವರ್ಸಾ ಜನೆರಾಚ್ಯಾ ದುಸ್ರ್ಯಾ ಆಯ್ತಾರಾ ಜಾಂವ್ಚೆ ಪರಿಂ , 2012 ಜನೆರ್ 8 ತಾರಿಕೆರ್, ದುಸ್ರ್ಯಾ ಆಯ್ತಾರಾ, ಹ್ಯಾಚ್ ಆಂಗ್ಣಾಂತ್ ಕವಿತಾ ಫೆಸ್ತ್ ಜಾಂವ್ಚೆಂ ಆಸೊನ್, ತ್ಯಾ ಫೆಸ್ತಾಕ್ ಜಮ್ಲೆಲ್ಯಾ ಲೊಕಾಕ್ ವೊವ್ಳಿಗ್ ದಿಲಿ ಮಾತ್ ನ್ಹಯ್ ಹೆ ಪಾವ್ಟಿಂ, ಪಯ್ಲೆ ಪಾವ್ಟಿಂ ಕವಿತಾ ಟ್ರಸ್ಟಾನ್ ಸುರು ಕೆಲ್ಲ್ಯಾ ಕವಿತಾ ವಾಚನ್ ಸತ್ರಾಂತ್ ತಶೆಂ ಪಾಟ್ಲ್ಯಾ ಪಾಂಚ್ ವರ್ಸಾಂ ಥಾವ್ನ್ ಚಲೊನ್ ಆಸ್ಚ್ಯಾ ಕವಿತಾ ಬರಂವ್ಚ್ಯಾ ಸ್ಪರ್ದ್ಯಾಕ್ ಕವಿತಾ ಧಾಡುಂಕ್ ಅನಿಕೀ ವೇಳ್ ಆಸಾ ( ನಿಮಾಣಿ ತಾರಿಕ್ : ನವೆಂಬರ್ 15) ದೆಕುನ್ ಹ್ಯಾ ವಾಂಟ್ಯಾಚ್ಯಾ ಭುರ್ಗ್ಯಾಂನಿ ವಾಂಟೊ ಘೆಂವ್ಕ್ ಉಲೊ ದಿಲೊ.

ಕವಿತಾ ಟ್ರಸ್ಟ್ ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ಕೊಡ್ಯಾಳ್ ಶೆರಾ ಭಾಯ್ರ್ ಕವಿತಾ ಫೆಸ್ತ್ ಆಯೋಜನ್ ಕರೀತ್ ಆಸಾ ಆನಿ ಪಾಟ್ಲ್ಯಾ ದೋನ್ ವರ್ಸಾಂ ಥಾವ್ನ್ ಬೊಳಿಯೆಂತ್ ಏಕ್ ಕವಿತಾ ಫೆಸ್ತ್ ಕರ್ಚಿ ರೊನಾಲ್ಡ್ ಸ್ಯಾಬಿ ತಶೆಂ ಬೆಳ್ಳೆ ವಿಶನಾಚಿ ಆಶಾ ಹೆ ಪಾವ್ಟಿಂ ಕಾರ್ಯಾಗತ್ ಜಾತೆಲಿ ಆನಿ ಬೊಳಿಯೆಗಾರಾಂಚೆ ಕುಮ್ಕೆನ್ ಹೆಂ ಫೆಸ್ತ್ ಗಡ್ಡ್ ಜಾತೆಲೆಂ ಮ್ಹಣ್ ಭರ್ವಸ್ತಾಂವ್ ಮ್ಹಣಾಲೊ ಕವಿ ಮೆಲ್ವಿನ್. ದೆವಾಚೆಂ ಕೀರ್ತನ್ ಆನಿ ಕವಿತೆಚ್ಯಾ ನಾತ್ಯಾವಿಶಿಂ ಉಲವ್ನ್ ಮೆಲ್ವಿನ್ ಮ್ಹಣಾಲೊ: "ದೆವಾನ್ ಎಕಾ ಉತ್ರಾನ್ ಸಂಸಾರ್ ರಚ್ಲೊ. ದೆವಾಚಿ ಸಕತ್ ಕವೀಕ್ ನಾ ತರೀ ತಾಚ್ಯಾ ಉತ್ರಾಂಕ್ ಥೊಡಿ ತರಿ ವಿಶೇಸ್ ಸಕತ್ ಆಸಾ. ದೆಕುನ್ ಆಮಿ ಆಮ್ಚ್ಯಾ ತೆಂಪ್ಲಾಂತ್ ಗುರುದೇವ್ ಠಾಗೋರಾಚೆಂ ತುಜ್ಯಾ ವಿಣ್ಯಾಕ್ ಸಬಾರ್ ಸರಿಯೊ ಆಸಾತ್ ತಾಂತ್ಲಿ ಏಕ್ ಜಾಂವ್ಕ್ ಹಾಂವ್ ಆಶೆತಾಂ ಮ್ಹಣ್ ಗಾಯ್ತಾಂವ್ "

ಕವಿಗೋಶ್ಟಿಂತ್ , ವಿನ್ಸಿ ಪಾಂಬೂರ್, ವಿಲ್ಸನ್ ಕಟೀಲ್, ಅನಿತಾ ಆಳ್ವ, ಮನು ಬಾಹ್ರೇಯ್ನ್. ಮೆಲ್ವಿನ್ ಪೆರ್ನಾಲ್, ಗ್ಲ್ಯಾಡಿಸ್ ರೆಬೆಲ್ಲೊ, ಗ್ರೇಸಿ ರೆಬೆಲ್ಲೊ, ಮೆಲ್ವಿನ್ ರೊಡ್ರಿಗಸ್, ಜೊಸ್ವಿಟಾ ಮೆಂಡೋನ್ಸಾ, ಆಲ್ವಿನ್ ದಾಂತಿ ಪೆರ್ನಾಲ್, ರಿನೊಲ್ ರೊಡ್ರಿಗಸ್, ವೆಂಕಟೇಶ ನಾಯಕ್ , ಮೆಲಿಶಾ ರೆಬೆಲ್ಲೊ, ಸಿಕೆರಾಮ್ ಸುರತ್ಕಲ್, ಸನ್ನು ಮೊನೀಸ್, ರೊಯ್ಲಿನ್ ರೊಡ್ರಿಗಸ್, ಜೊವಿಟಾ ಡಿಸೋಜಾ ಆನಿ ಎಚ್ಚೆಮ್ ಪೆರ್ನಾಲ್ ಹಾಂಣಿ ಆಪಾಪ್ಲ್ಯೊ ಕವಿತಾ ವಾಚ್ಲ್ಯೊ. ಮಧೆಂ ಮಧೆಂ ಕವಿಗೋಶ್ಟಿಚೆಂ ಸುಂಕಾಣ್ ಧರ್ಲೆಲ್ಯಾ ಸನ್ನು ಮೋನಿಸ್ ಹಾಣೆ ‘ಚುರೊ’, ‘ರಚನ್’, ‘ಪಾಶಾಂವ್’ ಚುಟುಕಾಂ ಪೇಶ್ ಕೆಲಿಂ.

ಅನ್ಬೋಗಿ ಕವಿಂಚ್ಯಾ ಕವಿತೆಂನಿ ದುಬಾಯ್ ಶೆರಾಂತ್ ಪಿಕ್ಚೆಂ ಭಾಂಗಾರ್ ಆನಿ ತೆಂ ಭಾಂಗಾರ್ ಪಿಕಂವ್ಕ್ ಗೆಲ್ಲ್ಯಾಂಚೆ ಹಾಲ್, ಧೊವಾ ಥೆಂಬೊ ಆನಿ ಪಾಕ್ಳೆಚಿ ವಾರ್ಜೀಕ್ ಆನಿ ಕಿರ್ಣಾಚಿ ಜಾಪ್, ಅಡ್ವಾರ್ಲೆಲೆಂ ಫಳ್, ಮೊಗಾಚೆಂ ಬಾರ್ ಆನಿ ಅಮಾಲ್, ಮೊಬಾಯ್ಲ್ ನೆಟ್ ವರ್ಕ್ ಆನಿ ಗರ್ಜೆಕ್ ಬಂಧ್ ಪಡ್ಚೆಂ 108, ಜೆಜು ಜಲ್ಮಾಲ್ಯಾ ಗೊಟ್ಯಾಂತ್ಲ್ಯಾ ಗೊರ್ವಾಂಚೆಂ ಕೆದಿಂಚ್ ಮುಗ್ಧಾನಾತ್ಲೆ ಆಟೆವಿಟೆ, ಮೊಗಾ ವೆಂಗೆಂತ್ ಜಳ್ಳೆಲೊ ನಾದಿಸ್ತೊ ಸುರ್ಯೊ, ದಿಯೆಸಿಜಿನ್ ಕರುಂಕ್ ಸಾಂಗ್ಚೆಂ ತಿಸ್ರೆಂ ಭುರ್ಗೆಂ ಆನಿ ವಾಟೆರ್ ಪಡ್ಚಿಂ ಪಯ್ಲಿಂ ಭುರ್ಗಿಂ, ಸಾಗೊರ್ ಆನಿ ನ್ಹಂಯ್, ಆಧುನಿಕ್ ಮನ್ಶಾ ವೆಗಾಕ್ ಬ್ರೇಕ್ ಘಾಲ್ಚೊ ಫಾತೊರ್ ಆನಿ ವಿಕಾಸಾಚೆ ಸಂಪೂರ್ಣತೆಕ್ ಪಾವಲ್ಲ್ಯಾ ಮನ್ಶಾನ್ ಪರ್ತ್ಯಾನ್ ಏಕ್ ಪಾವ್ಟಿಂ ಮಾಂಕೊಡ್ ಜಾಂವ್ಚೆಂ - ಹೆಂ ಸಗ್ಳೆಂ ಯೇವ್ನ್ ಗೆಲೆಂ.

ಉದೆತ್ಯಾ ಕವಿಂನಿ ಚಡ್ ಕರುನ್ ಭಕ್ತಿಕ್, ಭಾವನಾತ್ಮಕ್ ಗಜಾಲಿ ಆಪ್ಲ್ಯಾ ಕವಿತೆಂನಿ ಹಾತಾಳ್ಳ್ಯೊ ತರೀ ಕವಿತಾ ಪೇಶ್ ಕೆಲ್ಲಿ ರೀತ್ ಮಾತ್ ನ್ಹಯ್ ಅನ್ಬೋಗಿ ಕವಿಂಚೆಂ ಕವಿತಾ ಆಯ್ಕೊನ್ ಜಿರಯಿಲ್ಲಿ ರೀತ್ ಮೆಚ್ವಣೆಚಿ.

ಗೋಶ್ಟಿಚ್ಯಾ ಅಕೇರಿಕ್ ಕಿಟಾಳ್ ಸಂಪಾದಕ್ ಎಚ್ಚೆಮ್ ಪೆರ್ನಾಲ್ ಹಾಣೆ ಪುಣ್ಯಕೋಟಿಚಿ ಕವಿತೆಚಿ ದೇಕ್ ದೀವ್ನ್ ಕವಿತಾ ವಾಚ್ಚಿ ದೀಶ್ಟ್ ಆನಿ ಕವಿತಾ ಸಮ್ಜುನ್ ಘೆಂವ್ಚೊ ದಿಶ್ಟಿಕೊನ್ಸೊ ಕಸೊ ಕಾಳಾತೆಕಿದ್ ಬದಲ್ತಾ ಆನಿ ಬದಲ್ಚ್ಯಾ ಕಾಳಾಕ್ ಆನಿ ಭೊಂವಾರಾಕ್ ಪಾರ್ಕುಂಚಿ ಸೂಕ್ಶಿಮಾಯ್ ಆಪ್ಣಾಯ್ಲ್ಯಾರ್ ಕಶಿ ಏಕ್ ಬರಿ ಕವಿತಾ ಬರವ್ಯೆತ್ ಮ್ಹಣ್ ಡೊ.ಮನೋಹರರಾಯ್ ಸರ್ದೇಸಾಯ್ ಹಾಣಿ ಸಾಂಗ್‍ಲ್ಲ್ಯಾ ಮಾಡ್ ಆನಿ ಕವಿತೆಚೆ ದೇಕಿ ದೀವ್ನ್ ಸಾಂಗ್ಲೆಂ ಮಾತ್ ನ್ಹಯ್ ಉದೆತ್ಯಾ ಕವಿಂಕ್ ಕೊಂಕ್ಣಿ ಮಾತ್ ನ್ಹಯ್ ಖಂಯ್ಚೆ ಭಾಶೆಂತ್ ಸಾಧ್ಯ್ ಆಸಾ ತೆ ಭಾಶೆಂತ್ ವಾಚುಂಕ್ ಸಲಹಾ ದಿಲಿ ಆನಿ ಮ್ಹಳೆಂ: ವಾಚಪ್ ಸಂಸ್ಕಾರ್ ದಿತಾ ಸಾಂಗಾತಾ ಬರ್ಪಾಕ್ ನಾಜೂಕಾಯ್ ಹಾಡ್ನ್ ದಿತಾ.

ಸಗ್ಳೆ ಕವಿಗೋಶ್ಟಿ ವಿಶ್ಯಾಂತ್ ಜೋನ್ಸನ್ ಹಾಣೆ ಆಪ್ಲಿ ಅಭಿಪ್ರಾಯ್ ದಿಲಿ. ಫಾ | ಪಾವ್ಲ್ ಹಾಣಿ ಹೆ ಕವಿಗೋಶ್ಟಿ ಥಾವ್ಮ್ ಆಪ್ಣಾಕೀ ಶಿಕ್ಚೆಂ ಜಾಯ್ತೆಂ ಮೆಳ್ಳಾಂ. ಹ್ಯಾ ಶಿಕ್ಪಾನ್ ಉದೆತ್ಯಾಂನಿ ಮುಕಾರ್ ಚಮ್ಕಾಜೆ ಮ್ಹಣ್ ಸಾಂಗ್ಲೆಂ.

ವೆದಿರ್ ಕವಿತಾ ಟ್ರಸ್ಟ್ ಅಧ್ಯಕ್ಶ್ ಮೆಲ್ವಿನ್ ರೊಡ್ರಿಗಸ್, ಮಾಟ್ವಾಚೊ ಯೆಜ್ಮಾನ್ ರೊನಾಲ್ಡ್ ಸ್ಯಾಬಿ, ಬೊಳಿಯೆ ಫಿರ್ಗಜ್ ಪತ್ರ್ ಸುವಾದ್ ಹಾಚಿ ಸಂಪಾದಕಿ ಬಾಯ್ ಮೀರಾ ಲೋಬೊ, ಕಿಟಾಳ್ ಸಂಪಾದಕ್ ಎಚ್ಚೆಮ್ ಆನಿ ಸನ್ನು ಮೊನಿಸ್ ಬೊಳಿಯೆ ಹಾಜರ್ ಆಸ್ಲೆ.

ಸನ್ನು ಮೋನಿಸ್ ಹಾಣೆ ದಿನ್ವಾಸ್ ಪಾಟವ್ನ್ ಮ್ಹಳೆಂ: ಫುಡಾರಾಂತ್ ಅಸಲಿಂ ಸಾಹಿತಿಕ್ ಕಾರ್ಯಿಂ ಹ್ಯಾ ವಠಾರಾಂತ್ ಚಡ್ ಆನಿ ಚಡ್ ಜಾಯ್ಜೆ ಆನಿ ಹೆ ದಿಶೆನ್ ಕೋಣ್ ಕಾರ್ಯಕ್ರಮಾಂ ಮಾಂಡುನ್ ಹಾಡ್ಟಾ ತರ್ ದುಡ್ವಾಚಿ ಧರುನ್ ಸರ್ವ್ ಕುಮೊಕ್ ಬೆಳ್ಳೆ ವಿಶನ್ ದಿತಲೆಂ ಮ್ಹಳೆಂ.

ಕವಿಗೋಷ್ಟಿ ಪಯ್ಲೆಂ ಸನ್ನು ಮೊನಿಸ್ ತಶೆಂ ರಾಫಾಯೆಲ್ ಮಾಸ್ಟರ್ - ಫಿರ್ಗಜೆಚೆಂ ಪತ್ರ್ ‘ಸುವಾಧ್’ ಹಾಕಾ ಬರೊಂವ್ಚ್ಯಾ ತರ್ನಾಟ್ಯಾಂಕ್ ಮಾರ್ಗದರ್ಶನ್ ದಿಂವ್ಚಿಂ ಉತ್ರಾಂ ಉಲಯ್ಲೆ.

ಹ್ಯಾ ಕಾರ್ಯಾಕ್ ‘ದಿರ್ವೆಂ’ ಸಂಪಾದಕ್ ಜೊನ್ ಮೊನಿಸ್ ತಶೆಂ ‘ಕವಿತಾ ಫೆಸ್ತ್ ಕಾರ್ಯಕಾರಿಣಿ ಸಾಂದೊ’ ಪೀಟರ್ ಪಾವ್ಲ್ ಲೋಬೊ ಆನಿ ಗಾಂವ್ಚಿಂ ಜಾಯ್ತಿಂ ಹಾಜರ್ ಆಸಲ್ಲಿಂ. 

-ಕವಿತಾ ಭಾತ್ಮಿ I  ತಸ್ವಿರ್ಯೊ: ಬೆಳ್ಳೆವಿಶನ್