ವಿಲ್ಸನ್ ಕಟೀಲಾಚೆಂ ಕವಿತಾ ಪುಸ್ತಕ್ ‘ಪಾವ್ಳೆ’ ಪುಂಡಲೀಕ್ ನಾಯ್ಕಾಥಾವ್ನ್ ಲೋಕಾರ್ಪಣ್

ನಾಮ್ಣೆಚೊ ಕೊಂಕಣಿ ನಾಟಕ್‌ಕಾರ್, ಕಥಾಕಾರ್ ತಶೆಂ ಕವಿ, ಸಾಹಿತ್ಯ್ ಅಕಾಡೆಮಿ, ನವಿ ಡೆಲ್ಲಿ ಹಾಂಚ್ಯಾ ಕೊಂಕಣಿ ಸಲ್ಹಾಗಾರ್ ಸಮಿತಿಚೊ ನಿಮಂತ್ರಕ್ ಪುಂಡಲೀಕ್ ನಾರಾಯಣ್ ನಾಯ್ಕ್ ಹಾಂಚೆ ಹಸ್ತುಕಿಂ ಹೆಂ ಪುಸ್ತಕ್ ಲೋಕಾರ್ಪಣ್ ಜಾಲೆಂ.

ತ್ಯಾ ನಂತರ್ ಪುಂಡಲೀಕ್ ನಾಯ್ಕಾನ್ ಪುಸ್ತಕ್ ಮೊಕ್ಳೀಕ್ ಕೆಲೆಂ. ಆಪ್ಲ್ಯಾ ಭಾಷಣಾಂತ್ ಕವಿತೆಕ್ ಲಗ್ತಿ ಕಾಂಯ್ ಗಜಾಲಿ ತಾಂಣಿ ಸಾಂಗ್ಲ್ಯೊ.

’ಕರೆಂಟ್ ನಾ. ಕರೆಂಟ್ ಘಡ್ಯೆ ಕವಿತಾ ವಾಚ್ಪಾಕ್ ಗರ್ಜ್ ಆಸುಂಯೆತಾ. ಪುಣ್ ಕವಿತಾ ಬರೊವ್ಪಾಕ್ ಕರೆಂಟಾಚಿ ಗರಜ್ ನಾ. ಕವಿ ಮಧೇಂಯ್ ಏಕ್ ಕರಂಟ್ ಆಸಾ ಆನಿ ತ್ಯಾ ಕರಂಟಾಂತ್ ತಿ ಕವಿತಾ ಯೆತಾ. ಬಾಕಿಬಾಬ್ ಬೋರ್ಕರ್ ಏಕ್ ಪಾವ್ಟಿಂ ನಿದೊನ್ ಆಸ್ತಾನಾ ಎಕ್ದಮ್ ಜಾಗ್ ಜಾಲಿ. ತಾಚ್ಯಾ ದೊಳ್ಯಾಂ ಸಾಮ್ಕಾರ್ ಏಕ್ ಕವಿತಾ ಸುವರ್ಣಾಕ್ಷರಾಂನಿ ಬರಯಿಲ್ಲಿ ತಾಂಕಾಂ ದಿಸೊಂಕ್ ಲಾಗ್ಲಿ. ಖಿಣಾನ್ ತೆ ಪೆನ್ನ್ ತಶೆಂ ಕಾದೆನ್ (ನೋಟ್ ಬುಕ್) ಸಾಸ್ಲ್ಪೊಂಕ್ ಲಾಗ್ಲೆ ಆನಿ ತಿ ಕವಿತಾ ಬರೊವ್ನ್ ಕಾಡ್ಲಿ. ಸಕಾಳಿಂ ಉಟೊನ್ ತಿ ಕವಿತಾ ತಾಂಣಿ ವಾಚ್ಲಿ. ತಿ ಏಕ್ ಕೊಗ್ಳೆಚಿ ಕವಿತಾ ಆಸಲ್ಲಿ. ಕರಂಟ್ ನಾಸ್ತಾನಾ ಕವಿತಾ ಬರುಂಯೆತಾ. ಪುಣ್ ಕವಿತಾ ಬರಯ್ತಲ್ಯಾಂ ಭಿತರ್ ವೆಗ್ಳೆಂಚ್ ಕರಂಟ್ ಆಸಜಾಯ್’ ಅಶೆಂ ಪುಸ್ತಕ್ ಮೊಕ್ಳೀಕ್ ಸಂದರ್ಭಾರ್ ಕರೆಂಟ್ ನಾತಲ್ಲೆಂ ಹಾಚೊ ಉಲ್ಲೇಕ್ ಕರುನ್ ತಾಂಣಿ ಮ್ಹಳೆಂ.

‘ಕವಿತಾ ಟ್ರಸ್ಟ್ ಕೊಂಕಣಿ ಕವಿತೆ ಖಾತೀರ್ ಜಾಯ್ತೆಂ ವಾವುರ್ತಾ. ಆಜ್ ಆಮಿ ಜಾಯ್ತಿಂ ಫೆಸ್ತಾಂ ಪಳೆತಾಂವ್. ಕವಿತಾ ಟ್ರಸ್ಟ್ ಕವಿತಾ ಫೆಸ್ತ್ ಚಲಯ್ತಾ. ಗೊಂಯಾಂತ್ ಇಂಟರ್‌ನ್ಯಾಶನಲ್ ಫಿಲ್ಮ್ ಫೆಸ್ಟಿವಲ್ ವರ್ಸಾಂವಾರ್ ಚಲ್ತಾ. ಏಕ್ ಪಾವ್ಟಿಂ ‘ಬಿಯರ್ ಫೀಸ್ಟ್’ ಸಿನೆಮಾ ಹಾಂವೆಂ ಪಳೆಲ್ಲೆಂ. ತಾಂತುಂ ಬಿಯರ್ ಪಿಯೆತಾತ್, ಬಿಯರ್ ಖಾತಾತ್, ಬಿಯರ್ ಜೆವ್ತಾತ್, ಬಿಯರ್ ನ್ಹಾತಾತ್, ಬಿಯರ್ ಮುತ್ತಾತ್ ಆನಿ ನಿಮಾಣೆಂ ಕಾಂಯ್ ಜಣ್ ಬಿಯರಿಚ್ಯಾ ವ್ಹಡ್ಲ್ಯಾ ಭಾಣಾಂತ್ ಬುಡೊನ್ ಮರ್ತಾತ್. ಕವಿತಾ ಫೆಸ್ತ್ ಅಶೆಂಚ್ ಜಾತಾ. ನಿಮಾಣೆಂ ಕವಿತೆಂತ್ ಮರ್ಚೆಂ ಏಕ್ ಸೊಡುನ್ ಸಗ್ಳೆಂ ತಶೆಂಚ್ ಜಾತಾ. ಕವಿತೆಂತ್ ಬುಡ್ಚೆಂ, ಕವಿತೆಂತ್ ನಾಚ್ಚೆಂ, ಕವಿತೆಂತ್ ಉಲೊಂವ್ಚೆಂ, ಹೊ ಏಕ್ ವಿಶೇಸ್ ಆನಂದ್ ಹಾಂವೆಂ ಘೆತ್ಲಾ.’ ಅಶೆಂ ಆದ್ಲ್ಯಾ ಕವಿತಾ ಫೆಸ್ತಾಕ್ ಮುಕೆಲ್ ಸೈರೊ ಜಾವ್ನ್ ಆಯಿಲ್ಲ್ಯಾ ತಾಂಣಿ ಸಾಂಗ್ಲೆಂ.

‘ಕರ್ನಾಟಕಾಂತ್ ಕೊಂಕಣಿ ಕವಿತೆಚೊ ಜಲ್ಮ್ ಲುವೀಸ್ ಮಸ್ಕರೇಞಾ ಮಾರಿಫಾತ್ ಜಾಲೊ. ತಾಣೆಂ ‘ಕೊಂಕಣಿ ದಿರ್ವೆಂ’ ಕ್ ಜಲ್ಮ್ ದಿಲೊ. ತಾಕಾ ಕೊಂಕಣಿ ಕವಿತೆಚೊ ಶೆಪಾಯ್ ಮ್ಹಣುಂಯೆತಾ. ಆಧುನಿಕ್ ಕವಿತೆಚಿ ರಚ್ಣುಕ್ ತಾಂಣಿ ಕೆಲಿ. ‘ಆಬ್ರಾಂವ್ಚೆಂ ಯಜ್ಞದಾನ್’ ಗೀತ್ ನಾಟಕಾಂತ್ ಕವಿಚಿ ಉಂಚೆಲಿ ಪ್ರತಿಭಾ ಆಮ್ಕಾಂ ವಾಚುಂಕ್ ಮೆಳ್ತಾ. ಫಕತ್ ವಯ್ಲೆ ಆನಿ ಸಕಯ್ಲೆ ಪ್ರಾಸ್ ಜೊಡ್ಲೆ ತರ್ ಕವಿತಾ ಜಾಯ್ನಾ ಮ್ಹಣೊನ್ ಲುವೀಸ್ ಮಸ್ಕರೇಞ್ ಸಾಂಗ್ತಾಲೊ. ತೆ ಕವಿತೆಂತ್ ಅರ್ಥ್ ಆಸೊಂಕ್ ಜಾಯ್ ಅಶೆಂ ತೊ ಮ್ಹಣ್ತಾಲೊ. ಹಿ ಗಜಾಲ್ ತಾಣೆಂ ಮಂಗ್ಳುರಿ ಲೇಖಕಾಂಕ್, ಕವಿಂಕ್ ಶಿಕಯ್ಲಿ - ‘ದಿರ್ವೆಂ’ ಚ್ಯಾ ವತಿಂತ್ಲ್ಯಾನ್, ಕವಿತೆಚ್ಯಾ ಮಾಧ್ಯಮಾ ಮಾರಿಫಾತ್. ತ್ಯಾ ನಂತರ್ ಜೊ ಮ್ಹಾಲ್ಘಡೊ ಕವಿ ಆಮ್ಕಾಂ ಲಾಭ್ಲೊ ತೊ ಮ್ಹಳ್ಯಾರ್ ಚಾಫ್ರಾ ದೆಕೊಸ್ತಾ. ತೊ ವಿಚಾರ್‌ವಂತ್ ಕವಿ ಆಸಲ್ಲೊ. ತಾಚೆ ಉಪ್ರಾಂತ್ ಚಾಫ್ರಾಚಿ ಪ್ರೇರಣಾ ಘೆವ್ನ್ ಹಾಂಗಾ ಜೆ ಕವಿ ನಿರ್ಮಾಣ್ ಜಾಲೆ ತಾಂತುಂತ್ಲೊ ಏಕ್ ಮೆಲ್ವಿನ್ ರೊಡ್ರಿಗಸ್. ಮೆಲ್ವಿನಾನ್ ಫಕತ್ ಕವಿತಾ ಬರುಂಯೆತಾಲೆಂ. ಆಪ್ಲಿಂಚ್ ಕವಿತಾ ಪುಸ್ತಕಾಂ ಪರ್ಗಟ್ ಕರುಂಯೆತಾಲೆಂ. ಆಪ್ಣಾಚೆಂ ಪುಸ್ತಕಾಂ ತಾಣೆಂ ಪರ್ಗಟ್ ಕೆಲಿಂಚ್. ಬರಾಬರ್ ಮ್ಹಾಲ್ಗಡ್ಯಾಂಚೊ ತಶೆಂ ತರ್ನಾಟ್ಯಾಂಚೊ ಏಕ್ ಪಂಗಡ್ ತಾಣೆ ಬಾಂದ್ಲೊ. ತಾಂತುಂ ವಿಲ್ಸನ್ ಕಟೀಲ್ ಆಸಾ. ತಾಂಕಾಂ ಘಡಯ್ತಾನಾ ತಾಂಚಿಂ ಪುಸ್ತಕಾಂ ಪರ್ಗಟ್ ಕರ್ಚೊ ಮಹತ್ವಾಚೊ ವಾವ್ರ್ ಮೆಲ್ವಿನಾನ್ ಕೆಲೊ. ಆನಿ ಲುವೀಸ್ ಮಸ್ಕರೇಞಾನ್ ಜೆಂ ಉತ್ತೀಮ್ ಕವಿತೆಚೆಂ ಸಪಣ್ ದೆಖಲ್ಲೆಂ, ತೆಂ ಚಾಫ್ರಾನ್ ಮುಕಾರ್ ವೆಲೆಂ, ಮೆಲ್ವಿನಾನ್ ಮುಕಾರ್ ವೆಲೆಂ, ಆನಿ ತಾಚೆಂಚ್ ಫಳ್ ಮ್ಹಣೊನ್ ವಿಲ್ಸನ್ ಕಟೀಲಾಚೆಂ ಹೆಂ ಪುಸ್ತಕ್ ‘ಪಾವ್ಳೆ’ ತುಮ್ಚ್ಯಾ ಹಾತಾಂತ್ ಆಸಾ.

‘ವಿಲ್ಸನಾಚ್ಯಾ ‘ಪಾವ್ಳೆ’ ಪುಸ್ತಕಾಂತ್ಲ್ಯೊ ಕವಿತಾ ಆಸಾತ್, ತಿಂ ಲ್ಹಾನ್ ಲ್ಹಾನ್ ಚುಟ್ಕುಲಾಂ. ಹ್ಯಾ ಚುಟ್ಕುಲಾಂಚೆ ಭಾರತೀಯ್ ಪರಂಪರೆಂತ್ ಪಯ್ಲೆಂ ಸಂಸ್ಕೃತ್ ಭಾಸೆಂತ್ಲಿಂ ಸುಭಾಷಿತಾಂ ಯೆತಾತ್. ಚ್ಯಾರ್ ವೊಳಿಂಚ್ಯಾ ಸುಭಾಷಿತಾಂನಿ ಏಕ್ ಮಂತ್ರ್ ಕಸೊ ದಿಂವ್ಚೊ ಆಸ್ತಾ. ತೆಚ್ ಪರಂಪರೆಂತ್ ಭಾರತಾಚ್ಯಾ ಹೆರ್ ಭಾಸಾಂನೀಂಯ್ ಅಶೆಂ ಥರೆಚಿಂ ಸುಭಾಷಿತಾಂ ಆಯ್ಲ್ಯಾಂತ್. ತ್ಯೊ ಕೆನ್ನಾಂ ಕೆನ್ನಾಂ ವಿನೋದಿ ಡಂಗಾನ್ ಯೆತಾತ್. ಪುಣ್ ಚಡ್ ಕರುನ್ ತ್ಯೊ ವಿಚಾರ್ ಘೆವ್ನ್ ಯೆತಾತ್. ಆಮ್ಚೆ ಮದ್ಲೆ ಕೊಂಕಣಿ ಮನೀಸ್, ಪುಣ್ ಕನ್ನಡ ಕವಿ ದಿನಕರ ದೇಸಾಯಿನ್ ಚುಟುಕು ಬರಯ್ಲೆ. ಕನ್ನಡಾಂತ್ ತೆ ನಾಮ್ಣೆಕ್ ಪಾವ್ಲೆ. ತಾಂಕಾಂ ‘ಚುಟುಕು ಕವಿ’ ಮ್ಹಣೊನಚ್ ಮಾನ್ಯತಾಯ್ ಮೆಳ್ಳಿ. ಲ್ಹಾನ್ ಲ್ಹಾನ್ ಕವಿತಾ ಬರೊವ್ಪಾಚಿ ಕೊಂಕಣಿಂತ್ ಜಿ ಪರಂಪರಾ ರುತಾ ಜಾಲ್ಯಾ, ತಾಕಾ ಕಾರಣ್ ಮನೋಹರರಾಯಿ ಸರ್ದೇಸಾಯಿ. ತಾಗೆಲ್ಯಾ ‘ಜಾಯೊ ಜುಯೊ’ ಹ್ಯಾ ಕವಿತಾ ಸಂಗ್ರಹಾಕ್ ಸಾಹಿತ್ಯ ಅಕಾಡೆಮಿಚೊ ಬಹುಮಾನ್ ಲಾಬ್ಲಾ. ಅಸಲೆಚ್ ನಾಮ್ಣೆಚೆ ಕವಿ ಆಸಲ್ಲೆ ರ.ವಿ. ಪಂಡಿತ್. ತಾಣೇಂಯ್ ಚುಟುಕ್ ಕವಿತಾ ಬರಯ್ಲಿ. ಮಾಧವಿ ಸರ್ದೇಸಾಯಿನ್ ಸಯ್ತ್ ಆಪ್ಲ್ಯಾ ಲ್ಹಾನಪಣಾರ್ ಏಕ್ ‘ಮಿಟಾಕಣಿ’ಚಿ ಚುಟುಕ್ ಕವಿತಾ ಬರಯ್ಲಿ. ತಾಕಾ ಚಾಫ್ರಾನ್ ತಸಲೆಚ್ ರಿತಿಚಿ ಜಾಪ್ ದಿಲ್ಲಿ.

‘ಅಶೆ ಥರೆನ್ ಹಿ ಚುಟುಕಾಂಚಿ ದೀಗ್ ಪರಂಪರಾ ಆಮ್ಚೆ ಮಧೆಂ ಆಸಾ. ರಮೇಶ್ ವೆಳುಸ್ಕಾರ್, ಸುದೇಶ್ ಲೊಟ್ಲೀಕಾರ್ ಅಸಲೆಚ್ ಥರೆಚ್ಯೊ ಕವಿತಾ ಬರಯ್ತಾತ್. ಆಮ್ಚ್ಯಾ ಶೆಜಾರ್ಚ್ಯಾ ಮರಾಠಿ ಭಾಶೆಂತಯ್ ಸುಭಾಷಿತಾಂ ಆಸಾತ್. ಪಾಟ್ಲ್ಯಾ ಧಾ ವರ್ಸಾಂನಿ ಚಂದ್ರಕಾಂತ್ ಕೊಖ್ಲೆ ಅಸಲ್ಯೊ ‘ಚ್ಯಾರ್ ವೊಳಿ’ ಮರಾಠಿಂತ್ ಬರಯ್ತಾ.

‘ಜರ್ ಆಮಿ ಸಾಹಿತ್ಯಾಚ್ಯಾ ಎಕಾ ಪ್ರಕಾರಾ ಖಾತೀರ್ ಪ್ರಾಮಾಣಿಕಪಣಿಂ ವಾವುರ್ತಾಂವ್, ತೆನ್ನಾಂ ತೊ ಸಾಹಿತ್ಯಾಚೊ ಪ್ರಕಾರ್ ಮೊಟ್ಯಾ ನೆಟಾನ್ ವಯ್ರ್ ಸರ್ತಾ. ಕವಿಲೋಕ್, ಕವಿತೆ ಖಾತೀರ್ ವಾವುರಲ್ಲ್ಯಾನ್ ಹೊ ಪ್ರಕಾರ್ ವ್ಹಡ್ಲೊ ಜಾತಾ. ಮೆಲ್ವಿನಾನ್ ಹಿ ಗಜಾಲ್ ಪ್ರಾಮಾಣಿಕಪಣಿಂ, ಮೊನ್ಯಾಂನಿ ಕೆಲ್ಯಾ. ಪರ್ಗಾವಾಂತ್ ಆಸ್ತಾನಾ ಲೆಗುನ್ ತೊ ಕವಿತಾಚ್ ಕರ್ತಾಲೊ, ಕವಿತೆಂತ್ ಜಗ್ತಾಲೊ. ಕವಿತೆಚ್ಯೊ ಥರಾಂಥರಾಂಚ್ಯೊ ಉಪಕ್ರಮಾಂ ಕರ್ತಾಲೊ. ಹಾಚೊ ಅರ್ಥ್ ಅಸೊ, ತಾಣೆ ಸ್ವತಾ ಆಪ್ಣಾಕ್ ಕವಿ ಮ್ಹಣೊನ್ ‘ಕಮಿಟ್’ ಕೆಲಾ.

‘ಕವಿಂಚಿಂ ಫೊಕಣಾಂ ಕರುಂಕ್ ಫಾವೊ ನ್ಹಯ್. ಕವಿತಾ ಏಕ್ ಗಂಭೀರ್ ವಿಷಯ್. ಕವಿತಾ ಜ್ಯೋತ್ ಪೆಟೊಂವ್ಕ್ ಸಕ್ತಾ. ತರೀ ತೊ ಫೊಕಣಾಂಚೊ ವಿಷಯ್ ನ್ಹಯ್’ ಅಶೆಂ ರ. ವಿ. ಪಂಡಿತ್ ಆನಿ ಆಪ್ಣಾ ಮಧೆಂ ಘಡಲ್ಲ್ಯಾ ಎಕಾ ಘಡಿತಾಚೊ ಉಡಾಸ್ ಕಾಡುನ್ ತಾಂಣಿ ಸಾಂಗ್ಲೆಂ.

‘ವಿಲ್ಸನ್ ಕಟೀಲಾನ್ ಅತಿಶಯ್ ಸುಂದರ್ ಕವಿತಾ ಬರಯ್ಲ್ಯಾತ್. ಸಾಹಿತ್ಯ ಅಕಾಡಮಿಚೊ ಏಕ್ ಸ್ಕೀಮ್ ಆಸಾ - ‘ನವೋದಯ’ ಮ್ಹಣೊನ್. ನವೋದಿತ್ ಕವಿಂಚೆಂ ಪಯ್ಲೆಂ ಪುಸ್ತಕ್ ಹೆ ಯೆವ್ಜಣೆಖಾಲ್ ಸಾಹಿತ್ಯ ಅಕಾಡಮಿ ಪರ್ಗಟ್ತಾ. ಕೊಂಕಣಿಂತ್ ಹೆ ಯೆವ್ಜಣೆಖಾಲ್ ಕೊಣಾಯ್ಚೆಂ ಪುಸ್ತಕ್ ಯೆದೊಳ್ ಪರ್ಗಟ್ ಜಾಲ್ಲೆಂನಾ. ವಿಲ್ಸನ್ ಕಟೀಲಾಚೆಂ ‘ಮೊಲಾಚಿಂ ಸೊಧ್ನಾಂ’ ಪುಸ್ತಕ್ ಹೆ ಸ್ಕೀಮೆಖಾಲ್ ಪಯ್ಲ್ಯಾನ್ ಪಯ್ಲೆಂ ಪರ್ಗಟ್ ಜಾತೇ ಆಸಾ. ಮಾಧವ್ ಬೋರ್ಕರಾನ್ ತಾಕಾ ಪ್ರಸ್ತಾವನ್ ಬರಯ್ಲಾಂ. ತಾಚ್ಯೊ ಕವಿತಾ ಮೊಲಾಧಿಕ್ ಆಸ್ತಲ್ಯೊ ತೆಂ ಖಂಡಿತ್.

‘ಮನೋಹರ್ ಸರ್ದೇಸಾಯಿನ್ ಕೊಂಕಣಿಂತ್ ಸುರ್ವಾತ್ ಕೆಲ್ಲ್ಯಾ ಚುಟುಕು ಕವಿತೆಂಚೆಂ ಯೋಗದಾನ್ ಆಜ್ ವಿಲ್ಸನ್ ಕಟೀಲಾ ಪರ್ಯಾಂತ್ ಪಾವ್ಲಾಂ. ಹೆಂ ಯೋಗದಾನ್ ಫುಡಾರಾಂತಯ್ ಕೊಂಕಣಿಕ್ ಫಾವೊ ಜಾಂವ್.’ ಅಶೆಂ ಪುಂಡಲೀಕ್ ನಾಯ್ಕಾನ್ ವಿಲ್ಸನಾಕ್ ಬರೆಂ ಮಾಗ್ಲೆಂ.

ಕವಿತಾ ಟ್ರಸ್ಟಾಚೊ ಟ್ರಸ್ಟಿ ವಿತೊರಿ ಕಾರ್ಕಳಾನ್ ಸಗ್ಳೆಂ ಕಾರ್ಯೆಂ ಚಲ್ವೊನ್ ವೆಲೆಂ ಆನಿ ನಿಮಾಣೆಂ ಸರ್ವಾಂಚೊ ಉಪ್ಕಾರ್ ಆಟಯ್ಲೆ.

ಹ್ಯಾ ಕಾರ್ಯಾಕ್ ಗೊಂಯಾಂ ಥಾವ್ನ್ ದಾಮೋದರ್ ಘಾಣೇಕಾರ್, ಕೇರಳ ಸಾಹಿತ್ಯ ಅಕಾಡೆಮಿಚೆ ಅಧ್ಯಕ್ಷ್ ಪಯ್ಯನೂರು ರಮೇಶ್ ಪೈ, ಕೊಂಕಣಿ ಸಾಹಿತ್ಯ ಪರಿಷದೆಚೆ ಕಾರ್ಭಾರಿ ಗೋಕುಲ್ ದಾಸ್ ಪ್ರಭು, ವಿಶ್ವ ಕೊಂಕಣಿ ಕೇಂದ್ರಾಚೆ ಅಧ್ಯಕ್ಷ್ ಬಸ್ತಿ ವಾಮನ್ ಶೆಣೈ, ಕಾದಂಬರಿಕಾರ್ ಮನು ಬಾಹ್ರೇನ್, ರೊನ್ ರೊಚ್ ಕಾಸ್ಸಿಯಾ, ದಿರ್ವೆಂ ಸಂಪಾದಕ್ ಜೊನ್ ಮೊನಿಸ್, ಬಾಳೊಕ್ ಜೆಜು ಸಂಪಾದಕ್ ಫಾ ಸ್ಟೀವನ್, ಕವಿ ಎಚ್ಚೆಮ್ ಪೆರ್ನಾಲ್, ಮಾವ್ರಿಸ್ ಡೆಸಾ, ಗುರು ಬಾಳಿಗಾ, ಲೇಖಕ್ ಜೆ ಎಫ್ ಡಿಸೋಜಾ ಅತ್ತಾವರ್, ಕವಿತಾ ಟ್ರಸ್ಟಿ ಆವ್ರೆಲ್ ರೊಡ್ರಿಗಸ್ ಆನಿ ಜಾಯ್ತೆ ಕೊಂಕಣಿ ಮೋಗಿ ಹಾಜರ್ ಆಸಲ್ಲೆ.

- ತಸ್ವೀರ್ ಕುರ್ಪಾ: ದಾಯ್ಜಿ ವರ್ಲ್ಡ್