ಅಖಿಲ್ ಭಾರತ್ ಕವಿತಾ ವಾಚನ್ ಸರ್ತ್: ಕರ್ನಾಟಕಾಚ್ಯಾ ಧಾ ಜಣಾಂಚಿ ವಿಂಚವ್ಣ್
ಕವಿತಾ ಟ್ರಸ್ಟಾನ್ ಮಾಂಡುನ್ ಹಾಡಲ್ಲ್ಯಾ ರೋಹನ್ ಆನಿ ಲವೀಟಾ ಮೊಂತೇರೊ, ಅಖಿಲ್ ಭಾರತ್ ಕೊಂಕಣಿ ಕವಿತಾ ವಾಚನ್ ಸರ್ತೆಚೊ ಮಂಗ್ಳುರ‍್ಚೊ ಹಂತ್ ಹ್ಯಾಚ್ ನವೆಂಬರ್ 26 ತಾರಿಕೆರ್ ಮಂಗ್ಳುರ‍್ಚ್ಯಾ ಸಾಂ ಲುವಿಸ್ ಕೊಲೆಜಿಂತ್ ಚಲೊನ್, ಜನೆರ್ 8 ತಾರಿಕೆರ್ ಮೂಡುಬೆಳ್ಳೆಂತ್ ‘ಕವಿತಾ ಫೆಸ್ತ್ - 2012’ಸಂದರ್ಭಾರ್ ಚಲ್ಚ್ಯಾಫೈನಲ್ಸಾಕ್ ಧಾ ಜಣಾಂಚಿ ವಿಂಚವ್ಣಿ ಜಾಲಿ.
ಹ್ಯಾ ಆದಿಂಚ್ ಗೊಂಯಾಂ ಥಾವ್ನ್ ಧಾ ಜಣಾಂಚಿ ವಿಂಚವ್ಣಿ ಜಾಲ್ಲಿ ಆಸೊನ್ ಫೈನಲ್ಸಾಂತ್ ವೀಸ್ ಜಣಾಂ ಭಾಗ್ ಘೆತಲಿಂ. ಥಂಯ್ಸರ್ ಜಿಕೊನ್ ಆಯ್ಲಲ್ಯಾಂಕ್ ನಗ್ದೆನ್ ಇನಾಮಾಂ ಆಸ್ತಲಿಂ ಮಾತ್ರ್ ನ್ಹಯ್ ಭಾಗ್ ಘೆಂವ್ಚ್ಯಾ ವೀಸಯ್ ಜಣಾಂಕ್ ರಾವ್ಪಾಚಿ, ಪಯ್ಣಾಚಿ, ಜೆವ್ಣಾಚಿ ವ್ಯವಸ್ಥಾ ಕವಿತಾ ಟ್ರಸ್ಟ್ ಕರ್ತಲೆಂ.
ಮಂಗ್ಳುರ‍್ಚೊ ಹಂತ್ ಸಾಂ ಲುವಿಸ್ ಕೊಲೆಜಿಚ್ಯಾ ಸಭಾಸಾಲಾಂತ್ ದೊನ್ಪಾರಾಂ 1.30 ವೊರಾಂಚೆರ್ ಸುರು ಜಾವ್ನ್ ಸಾಡೆ-ತೀನ್ ಪಾಸುನ್ ಚಲ್ಲೊ. ಜುಮ್ಲಾ 27 ಜಣಾಂನಿ ಕವಿತಾ ವಾಚನ್ ಕೆಲೆಂ. ಥೊಡ್ಯಾಂನಿ ಸ್ವತಾಚ್ಯೊ ಕವಿತಾ ವಾಚ್ಲ್ಯೊ ತರ್ ಹೆರ್ ಥೊಡ್ಯಾಂನಿ ಕವಿ ಚಾ.ಫ್ರಾ. ದೆಕೊಸ್ತಾ, ಎಮ್. ಪಿ. ರೊಡ್ರಿಗಸ್, ಮೆಲ್ವಿನ್ ರೊಡ್ರಿಗಸ್, ಮಾವ್ರಿಸ್ ಡೆಸಾ, ಜೊರ್ಜಿ ಪೀಂತ್ ಆಯ್ಕೊಳ್ ಆನಿ ಹೆರಾಂಚ್ಯೊ ಕವಿತಾ ವಾಚ್ಲ್ಯೊ.
ಸುರ್ವೆರ್ ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಸರ್ವಾಂಕ್ ಯೆವ್ಕಾರ್ ಮಾಗ್ಲೊ ಆನಿ ಕವಿತಾ ಟ್ರಸ್ಟಾಚ್ಯಾ ವಾವ್ರಾಚಿ ವೊಳಕ್ ಕರುನ್ ದಿಲಿ. ಸರ್ತೆಚ್ಯಾ ನೆಮಾಂಚೊ ಹ್ಯಾವೆಳಾ ತಾಣೆ ವಿವರ್ ದಿಲೊ.
ವೊರಯ್ಣಾರ್ ಜಾವ್ನ್ ಕವಿ ತಶೆಂ ಟ್ರಸ್ಟಿ ಕಿಶೂ ಬಾರ್ಕೂರ್, ಒರ್ಕಿಡ್ ಆರ್ಟ್ ಗ್ಯಾಲರಿಚೊ ಮ್ಹಾಲಕ್ ತಶೆಂ ಟ್ರಸ್ಟಿ ವಿಲಿಯಮ್ ಪಾಯ್ಸ್ ಆನಿ ಕವಿ, ವಿಮರ್ಶಕ್ ತಶೆಂ ಕಿಟಾಳ್.ಕೊಮ್ ಜಾಳಿಸುವಾತೆಚೊ ಸಂಪಾದಕ್ ಎಚ್ಚೆಮ್ ಪೆರ್ನಾಳ್ ಆಸಲ್ಲೆ. ಟ್ರಸ್ಟಿ ವಿತೊರಿ ಕಾರ್ಕೊಳ್, ಎವ್ರೆಲ್ ರೊಡ್ರಿಗಸ್ ಆನಿ ಮರೀನಾ ಗೊನ್ಸಾಲ್ವಿಸ್ ಹಾಂಣಿ ಸಹಕಾರ್ ದಿಲ್ಲೊ. ಕವಿ ಎಚ್ಚೆಮ್ಮಾನ್ ಕವಿತಾ ವಾಚನಾ ವೆಳಾರ್ ವಾಚ್ಪ್ಯಾಂನಿ ಮತಿಂತ್ ದವ್ರಿಜಾಯ್ ಜಾಲ್ಲ್ಯಾ ಥೊಡೆ ಗಜಾಲಿಂವಿಶಿಂ ಜಾಣ್ವಿಕಾಯ್ ವಾಂಟ್ಲಿ.
ಹೆಂ ಸಗ್ಳೆಂ ಕಾರ್ಯೆಂ ಸಾಂ ಲುವಿಸ್ ಕೊಲೆಜ್ ತಶೆಂ ಥಂಯ್ಚ್ಯಾ ಕೊಂಕಣಿ ಸಂಘಾಚ್ಯಾ ಸಹಕಾರಾನ್ ಮಾಂಡುನ್ ಹಾಡಲ್ಲೆಂ ಆಸೊನ್ ಸಂಘಾಚಿ ಆದ್ಲಿ ದಿರೆಕ್ತೊರ್ ಸೆವ್ರಿನ್ ಹಾಜರ್ ಆಸಲ್ಲಿ.
ವಿಂಚುನ್ ಆಯಿಲ್ಲ್ಯಾಂಚಿ ನಾಂವಾಂ ಹೆಪರಿಂ ಆಸಾತ್:
1. ಕ್ಲೆಮೆಂಟ್ ಫೆರ್ನಾಂಡಿಸ್
2. ಜೊವಿಟಾ ಡಿ’ಸೋಜಾ
3. ನೆಲ್ಸನ್ ವಾಸ್
4. ನಿಕಿತಾ ಸಿಬಿಲ್ ರೆಬೆಲ್ಲೊ
5. ಕೆನೆತ್ ಆರ್. ವಾಸ್
6. ಜೈಸನ್ ಜೀವನ್ ಸಿಕ್ವೇರಾ
7. ಡೆರೆಕ್ ಮನೋಜ್ ಮಚಾದೊ
8. ಜೆನಿಫರ್ ಕ್ಯಾರಲ್ ಮಿನೇಜಸ್
9. ವೆಂಕಟೇಶ ನಾಯಕ್
10. ಮೆಲಿಶಾ ಫಿಯೋನಾ ರೆಬೆಲ್ಲೊ
ಕವಿತಾ ಫೆಸ್ತ್ 2012 ವಿವರ್ ಪಳೆಂವ್ಚ್ಯಾಕ್ ಆನಿ ಸ್ಪರ್ಧಿಕಾಂಚ್ಯೊ ತಸ್ವಿರ್ಯೊ ದೆಖ್ಚ್ಯಾಕ್ ಹಾಂಗಾಸರ್ ಚಿಚಾಯ್