ಸುಕೊನ್ ಗೆಲ್ಲ್ಯೊ ಝರಿ ಪರ್ತ್ಯಾನ್ ವ್ಹಾಳಯಿಲ್ಲೊ `ಫಾಲ್ಗುಣಿಚೊ ಝುಳ್ಝುಳೊ'
ಹ್ಯಾಚ್ ಮಾರ್ಚ್ 18 ತಾರಿಕೆರ್ ತಾಕೊಡೆ ವಾಲ್ಲಿ ಮೆಸ್ತ್ರಿಚ್ಯಾ (ವಾಲೇರಿಯನ್ ಮೊರಾಸ್) ಘರ್ಚ್ಯಾ ಆಂಗ್ಣಾಂತ್ ಮಾಂಡುನ್ ಹಾಡಲ್ಲಿ ‘ಫಾಲ್ಗುಣಿಚೊ ಝುಳ್ಝುಳೊ’ ಕವಿಗೋಷ್ಟಿ ಆಪ್ಲೆ ವಿಶಿಷ್ಟತಾಯೆಕ್ ಲಾಗೊನ್ ಹಾಜರ್ ಆಸಲ್ಲ್ಯಾಂಕ್ ಆಂವಡ್ಲಿ. ಕವಿತಾ ಟ್ರಸ್ಟ್ ಹಾಂಣಿ ಕೊಂಕಣಿ ಕುಟಮ್, ಬಾಹ್ರೇನ್ ತಶೆಂ ತಾಕೊಡೆಚ್ಯಾ ಕವಿಂ ಸಾಂಗಾತಾ ಮೆಳೊನ್ ಹೊ ಸುವಾಳೊ ಘಡೊವ್ನ್ ಹಾಡಲ್ಲೊ.
ಟೈಟಸ್ ನೊರೊನ್ಹಾ, ತಾಕೊಡೆನ್ ಸುರ್ವೆರ್ ಹಾಜರ್ ಆಸಲ್ಲ್ಯಾ ಸರ್ವಾಂಕ್ ಯೆವ್ಕಾರ್ ಮಾಗ್ತಾನಾ, ಫಾಲ್ಗುಣಿಂತ್ ಆತಾಂ ಉದಕ್ ವ್ಹಾಳನಾ. ಬದ್ಲಾ ಮಾತಿ, ಕಸ್ತಾಳ್ ತಶೆಂ ಮ್ಹೆಳೆಂ ಭರ‍್ಲಾಂ. ಎಕಾ ತೆಂಪಾರ್ ಫಾಲ್ಗುಣಿ ನಂಯ್ಚ್ಯಾ ಉದ್ಕಾನ್ ಆಖ್ಖ್ಯಾ ತಾಕೊಡೆಂತ್ ಕೃಷಿ ಜಾತಲಿ. ಆತಾಂ ಹಿ ಪರಿಗತ್ ಕಷ್ಟಾಂಚಿ ಜಾಲ್ಯಾ. ಹ್ಯಾಚ್ ಪರಿಂ ಎಕಾ ತೆಂಪಾರ್ ಕವಿತೆಚಿ ಕೃಷಿ ಕರ್ನ್ ಆಸಲ್ಲೆ ಆಪ್ಣಾ ತಸಲೆ ಕವಿ, ಲಕ್ಷ್ಮೀ ಪಾಟ್ಲ್ಯಾನ್ ವಚೊನ್ ಸರಸ್ವತಿಕ್ ವಿಸರ‍್ಲ್ಯಾತ್. ಅಸಲಿ ಗತ್ ಹಾತಾಭಾಯ್ರ್ ವೆಚೆ ಆದಿಂ, ಕಿತೆಂ ತರೀ ಹುಮೆದಿಚಿ ಝರ್ ವ್ಹಾಳಂವ್ಕ್ ಕೊಂಕಣಿ ಕುಟಮ್ ಬಾಹ್ರೇನ್ಚೊ ಸಂಚಾಲಕ್ ರಿಚರ್ಡ್ ಮೊರಾಸಾನ್ ಕವಿಗೋಷ್ಟಿ ಮಾಂಡುನ್ ಹಾಡ್ಚಿ ಯೆವ್ಜಣ್ ಘಾಲ್ಲಿ. ತಿ ಆಜ್ ಸುಫಳ್ ಜಾಲ್ಯಾ’ ಮ್ಹಣೊನ್ ಸಾಂಗ್ಲೆಂ. ಮುಕಾರಿಂ ಉಲೊವ್ನ್, ಫಾಲ್ಗುಣಿಂತ್ಲ್ಯಾ ತೀನ್ ಗುಂಡಿಯಾಂ ಪಯ್ಕಿ ಏಕ್, ದೇವೆರ್ ಗುಂಡಿಯೆವಿಶಿಂ ತಾಣೆಂ ಪುರಾಣ್ ಕಥಾ ಸಾಂಗ್ಲಿ. ಭೊಂವ್ತಣಿಚ್ಯಾ ಗುಡ್ಯಾಂನಿ ಭೊಂವೊನ್ ಆಸಲ್ಲ್ಯಾ ಬಿರ್ಮೆರಾಕ್ಕೊಸಾಂಚಿ ಸಾವ್ಳಿ ಪಡೊನ್ ಕಶಿಂ ಗುರ್ವಾರ್ ಬಾಯ್ಲಾಂ ಮರ್ತಾಲಿಂ, ಆನಿ ತ್ಯಾ ಉಪ್ರಾಂತ್ ತಾಕೊಡೆಂತ್ ಖುರೀಸ್ ಉಬಾರ‍್ಲ್ಯಾ ಉಪ್ರಾಂತ್ ಹಾಕಾ ಕಸೊ ಪರ್ಯಾರ್ ಲಾಭ್ಲೊ ಮ್ಹಣೊನ್ ತಾಣೆ ಬೋವ್ ಸೊಭಿತ್ ಕರುನ್, ಸುಂದರ್ ಉತ್ರಾಂನಿ ವಿವರ‍್ಸುನ್ ಸಾಂಗ್ಲೆಂ.
ಕವಿಗೋಷ್ಟಿಂತ್ ದೋನ್ ವಾಂಟೆ ಕೆಲ್ಲೆ ಆಸೊನ್ ಪಯ್ಲ್ಯಾ ವಾಂಟ್ಯಾಚೆ ಕವಿಗೋಷ್ಟಿಚೆಂ ಮುಕೆಲ್ಪಣ್ ಗೀತಕಾರ್ ತಶೆಂ ಕವಿ ಲೊಯ್ಡ್ ರೇಗೊ (ಎಲ್ಯೆರ್ ತಾಕೊಡೆ) ಹಾಣೆಂ ಘೆತಲ್ಲೆಂ. ‘ಫಾಲ್ಗುಣಿ ಆಜ್ ನಿರ್ಲಿಪ್ತ್ ಜಾಲ್ಯಾ, ತಶೆಂ ಕವೀಯ್ ಜಾಲ್ಯಾತ್’ ಮ್ಹಣೊನ್ ಟೈಟಸಾಚೆ ಸಾಂಗ್ಣೆಕ್ ಲೊಯ್ಡಾನ್ ಜೋರ್ ಘಾಲೊ. ಉಪ್ರಾಂತ್ ಚಲಲ್ಲೆ ಕವಿಗೋಷ್ಟಿಂತ್ ತಾಕೊಡೆಚ್ಯಾ ಕವಿಂನಿ ವಾಂಟೊ ಘೆತ್ಲೊ. ಪೆದ್ರಾಮ್ (ಪೀಟರ್ ಸೊಜ್) ಹಾಣೆಂ ‘ರಾಹುಲ್ ದ್ರಾವಿಡಾಕ್ ಸಲಾಮ್’, ‘ಭಾಂಗ್ರಾಳಿ ಬಾಯ್ಲ್’ ತಶೆಂ ‘ಚುಟುಕ್’ ಸಾದರ್ ಕೆಲ್ಯೊ. ಎಡಿ ಕಾಡ್ದೊಸ್ ನಾಂವಾನ್ ಫಾಮಾದ್ ವಿನ್ಸಿ ಕಾಡ್ದೊಸಾನ್ ‘ಗುರ್ಕಾರ್’ ಕವಿತಾ ವಾಚ್ಲಿ. ಜೈಸನ್ ಸುವಾರಿಸ್ ತಾಕೊಡೆನ್ ‘ಫ್ಲರ್ಟ್ ಕರ‍್ಚ್ಯಾ ಚೆಡ್ಯಾಚಿ ಕವಿತಾ’ ವಾಚ್ಲಿ ತರ್, ಗಿರ್ಬುಜಿ ತಾಕೊಡೆ ನಾಮಾಂಕಿತ್ ಗ್ರೆಗೊರಿ ಲೋಬೊನ್ ‘ಸರ್ಕಾರ್’ ಕವಿತಾ ವಾಚ್ಲಿ. ಮುನ್ನಾ ತಾಕೊಡೆ ನಾಂವಾನ್ ಬರೊಂವ್ಚ್ಯಾ ಕ್ಲೆಮೆಂಟ್ ಫೆರ್ನಾಂಡಿಸಾನ್ ‘ಹಾಂವ್ ಜಾಲೊಂ ಘೊವ್’ ಕವಿತಾ ಪೇಶ್ ಕೆಲಿ ತರ್, ಟೈಟಸ್ ನೊರೊನ್ಹಾನ್ ಕ್ರಿಸ್ತಾಂವಾಂಚಿಂ ಚೊವ್ದಾ ಸ್ತೆಸಾಂವಾಂ ಆಧುನಿಕ್ ಕಾಳಾಚೆ ಸಾಮಾಜಿಕ್ ದುರ್ಬಿಣೆಂತ್ಲ್ಯಾನ್ ಕವಿತಾಮಯ್ ರಿತಿನ್ ಸಾಂಗ್ಲಿಂ. ಎಲ್ಯೆರ್ ತಾಕೊಡೆನ್ ಕವಿಗೋಷ್ಟಿಚ್ಯಾ ಮಧೆಂ ಆಪ್ಲಿಂ ಚುಟುಕಾಂ ವಾಚುನ್ ದಾಧೊಸ್ ಕೆಲೆಂ ಮಾತ್ರ್ ನ್ಹಯ್, ನಿಮಾಣೆಂ ‘ಸಾದೊ ಮನೀಸ್’ ಕವಿತಾ ವಾಚ್ಲಿ.
ಹೆ ಕವಿಗೋಷ್ಟಿಚಿ ವಿಶೇಸತಾ ಕಿತೆಂಗಿ ಮ್ಹಳ್ಯಾರ್ ಮಾಂಡ್ ಸೊಭಾಣ್ ಗುರ್ಕಾರ್ ಎರಿಕ್ ಒಝೇರಿಯೊ ತಶೆಂ ‘ಕೊಂಕಣಿ ಆಬೊಲೆಂ’ ಜೊಯ್ಸ್ ಒಝೇರಿಯೊ ಹಾಂಚಿಂ ಪದಾಂ. ತಾಂಣಿ ಚಾ.ಫ್ರಾ. ದೆಕೊಸ್ತಾ, ಟೈಟಸ್ ನೊರೊನ್ಹಾ, ಮೆಲ್ವಿನ್ ರೊಡ್ರಿಗಸ್, ಎಲ್ಯೆರ್ ತಾಕೊಡೆ, ರಾಜಯ್ ಪವಾರ್ ಆನಿ ಶ್ರೀಧರ್ ಕಾಮತ್ ಹಾಂಚಿಂ ಪದಾಂ ಸಾದರ್ ಕೆಲಿಂ. ಡೀಲನ್ ಆನಿ ನೊರ್ಬರ್ಟ್ ಹಾಂಣಿ ಸಂಗೀತಾಂತ್ ತಾಂಕಾಂ ಸಾಂಗಾತ್ ದಿಲೊ.
ಹ್ಯಾಚ್ ಸಂದರ್ಭಾರ್ ಕೊಂಕಣಿ ಕುಟಮ್ ಬಾಹ್ರೇನ್ ತಶೆಂ ತಾಕೊಡೆಗಾರಾಂನಿ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ವಿಜೇತ್ ಕವಿ ಮೆಲ್ವಿನ್ ರೊಡ್ರಿಗಸಾಕ್ ಶೊಲ್ ಪಾಂಗ್ರುನ್ ಮಾನ್ ಕೆಲೊ. ಘರ‍್ಚೊ ಯೆಜ್ಮಾನಿ ವಾಲೇರಿಯನ್ ಮೊರಾಸ್ ಆನಿ ತಾಚಿ ಪತಿಣ್, ತಶೆಂ ಸಿದ್ದಕಟ್ಟೆಚೊ ಯಾಜಕ್ ಆನಿ ಆದ್ಲೊ ‘ರಾಕ್ಣೊ’ ಸಂಪಾದಕ್, ಫಾ. ಮಾರ್ಕ್ ವಾಲ್ಡರ್ ವೇದಿರ್ ಹಾಜರ್ ಆಸಲ್ಲೆ. ಹ್ಯಾ ಸಂದರ್ಭಾರ್ ಉಲಯಿಲ್ಲ್ಯಾ ಮೆಲ್ವಿನಾನ್ ಪಂಚ್ವೀಸ್ ವರ್ಸಾಂ ಆಪ್ಣೆಂ ತಾಕೊಡೆ ಖಾತೀರ್ ಬರಯಿಲ್ಲ್ಯಾ ಪದಾಚೊ ಆನಿ ಮಾಂಡ್ ಸೊಭಾಣಾನ್ ತೆಂ ಪದ್ ಗಾಯಿಲ್ಲ್ಯಾಚೊ ಉಡಾಸ್ ಕಾಡ್ಲೊ. ತಾಕೊಡೆಚ್ಯಾ ಕವಿಂನಿ ಆಪ್ಲ್ಯಾ ಉತ್ರಾಂ ಉತ್ರಾಂನಿ ಸಾಕ್ರಿಖಡೆ ಚಿಂವೊಂಕ್ ದಿಲ್ಯಾತ್ ಮ್ಹಳ್ಳ್ಯಾ ತಾಣೆಂ ಆಪ್ಲೊ ಮಾನ್ ಕೆಲ್ಲ್ಯಾ ಖಾತೀರ್ ಸರ್ವಾಂಚೊ ಉಪ್ಕಾರ್ ಭಾವುಡ್ಲೆ. ಸಾಹಿತ್ಯ ಅಕಾಡೆಮಿಚಿ ಪ್ರಶಸ್ತಿ ಜೊಡಲ್ಲ್ಲ್ಯಾಂ ಪಯ್ಕಿ ಆಪುಣ್ ಲ್ಹಾನ್ ಪ್ರಾಯೆಚೊ ನ್ಹಯ್ ಮ್ಹಳ್ಳ್ಯಾ ತಾಣೆಂ, ಪ್ರಶಸ್ತಿ ಮೆಳ್ತಾನಾ ಎಕಾ ಬರೊವ್ಪ್ಯಾಕ್ ಸಾಹಿತೀಕ್ ಶೆತಾಂತ್ ಎಕಾ ನಮುನ್ಯಾಚೊ ಅಧಿಕಾರ್ ಲಾಭ್ತಾ ಮ್ಹಣ್ ಕೊಣಯ್ ಚಿಂತುಂಕ್ ಪುರೊ. ಪುಣ್ ಹ್ಯಾ ಅಧಿಕಾರಾ ಸಾಂಗಾತಾ ಎಕಾ ನಮುನ್ಯಾಚಿ ಜವಾಬ್ದಾರೀಯ್ ತಾಕಾ ಬಾಂದ್ತಾ ಆನಿ ಖಿಣಾ ಖಿಣಾಕ್ ಆಪ್ಲ್ಯಾ ಬರ್ಪಾಂನಿ ಜಾಗ್ರುತ್ಕಾಯ್ ಘೆಂವ್ಚಿ ಪರಿಗತ್ ತಾಕಾ ಉದೆತಾ ಮ್ಹಣೊನ್ ಸಾಂಗ್ಲೆಂ. ಸಾಹಿತ್ಯ ಅಕಾಡೆಮಿಚೆ ಪ್ರಶಸ್ತೆಂತ್ -ಎಕಾ ಬರೊವ್ಪ್ಯಾಚೆಂ ಸಾಹಿತ್ಯ್ ಭಾರತೀಯ್ ಭಾಸಾಂಕ್ ತರ್ಜಣ್ ಜಾಂವ್ಚೆಂ ಆನಿ ತೊ ಬರೊವ್ಪಿ ಆಪ್ಲೆ ಭಾಶೆಚಿಂ ಪಾಕಾಂ ಪಾಪ್ಡುನ್ ಭಾರತೀಯ್ ಲೇಖಕ್ ಜಾಂವ್ಚೆಂ - ಪ್ರಮುಖ್ ಗಜಾಲ್ ಆಸಾ ಮ್ಹಣ್ ಮೆಲ್ವಿನಾನ್ ಸಾಂಗ್ಲೆಂ. ಹ್ಯಾಚ್ ಸಂದರ್ಭಾರ್ ತಾಣೆಂ ‘ಪಾವ್ಸಾಶೆಣ್ ಆನಿ ಬೆಬ್ದೊ’ ತಶೆಂ ‘ಯೆದೊಳ್ ಮೆಳನಾತಲ್ಲ್ಯಾಲಾಗಿಂ’ ಕವಿತಾ ವಾಚುನ್ ಸಾಂಗ್ಲ್ಯೊ.
ಉಪ್ರಾಂತ್ಲಿ ಕವಿಗೋಷ್ಟಿ ಕವಿ ತಶೆಂ ಪತ್ರಕರ್ತ್ ಮಾವ್ರಿಸ್ ಡೆಸಾ ಶಾಂತಿಪುರ ಹಾಣೆ ಚಲೊನ್ ವೆಲಿ. ಟೈಟಸ್ ನೊರೊನ್ಹಾನ್ ಮಾವ್ರಿಸಾಚಿ ವೊಳಕ್ ಕರುನ್ ದಿಲಿ. ಕವಿಗೋಷ್ಟಿಂತ್ ಎಚ್ಚೆಮ್ ಪೆರ್ನಾಳ್, ವೆಂಕಟೇಶ ನಾಯಕ್, ರೊನಾಲ್ಡ್ ಸಿಕ್ವೇರಾ, ಗ್ಲೇಡಿಸ್ ರೇಗೊ, ಮನು ಬಾಹ್ರೇನ್, ಗುರು ಬಾಳಿಗಾ, ವಿಲ್ಸನ್ ಕಟೀಲ್ ಹಾಂಣಿ ತಾತಾಂಚ್ಯೊ ಕವಿತಾ ವಾಚ್ಲ್ಯೊ. ಚಡಾವತ್ ಕವಿಂಚ್ಯಾ ಕವಿತಾಂನಿ ದೇವ್ ಆಯ್ಲೊ ತರ್ ಗ್ಲೇಡಿಸ್ ರೇಗೊನ್ ಕಾಳ್ಜಾಂ ವಿಕ್ರ್ಯಾಕ್ ಆಸಾತ್ ಮ್ಹಣೊನ್ ಕವಿತಾ ವಾಚ್ಲಿ. ವಿಲ್ಸನ್ ಕಟೀಲಾನ್ ಆಧುನಿಕ್ ರಾಜಕೀಯ್ ಚಿಂತ್ಪಾಚ್ಯೊ ಕವಿತಾ-ಚುಟ್ಕುಲಾಂ ವಾಚ್ಲಿಂ.
ಕೊಂಕಣಿ ಕುಟಮ್ ಸಂಚಾಲಕ್ ರಿಚರ್ಡ್ ಮೊರಾಸಾನ್ ಧನ್ಯವಾದ್ ಭೆಟಯ್ಲೆ. ಜೆವ್ಣಾವೆಳಾರ್ ಕ್ಲೆಮೆಂಟ್ ಫೆರ್ನಾಂಡಿಸಾನ್ ಪದಾಂ ಗಾಯ್ಲಿಂ.
ಕೊಂಕಣಿ ಲೇಖಕ್ ಹೇಮಾಚಾರ್ಯ, ಡೊಲ್ಫಿ ಕಾಸ್ಸಿಯಾ, ರೊನ್ ರೊಚ್ ಕಾಸ್ಸಿಯಾ, ಜೆ. ಎಫ್. ಡಿಸೋಜಾ ಅತ್ತಾವರ್, ವಿತೊರಿ ಕಾರ್ಕಳ್, ಉರ್ವಾಚೊ ಲುವಿ, ನಾಟಕ್ ನಿರ್ದೇಶಕ್ ಕ್ರಿಸ್ಟೊಫರ್, ಸಂಗೀತ್‌ಗಾರ್ ಕೆವಿನ್ ಮಿಸ್ಕಿತ್, ಕವಿತಾ ಟ್ರಸ್ಟಿ ವಿಲಿಯಮ್ ಪಾಯ್ಸ್, ಪ್ರವೀಣ್ ತಾವ್ರೊ, ದಯಾ ವಿಕ್ಟರ್ ಲೋಬೊ ಹ್ಯಾವೆಳಾ ಹಾಜರ್ ಆಸಲ್ಲೆ.
ತಸ್ವೀರ್ ಕುರ್ಪಾ: ಸ್ಟೇನ್ಲಿ ಬಂಟ್ವಾಳ್
सुकोन गेलल्यो झरी परत्यान वहाळयिल्लो `फालगुणिचो झुळझुळो'
(Font conversion is done using `Kannada to Devanagari script converter for Konkani' which is at the test stage)
ह्याच मारच 18 तारिकेर ताकोडे वाल्ली मेसत्रिच्या (वालेरियन मोरास) घरच्या आंग्णांत मांडुन हाडल्ली ‘फाल्गुणिचो झुळझुळो’ कविगोश्टी आपले विशिश्टतायेक लागोन हाजर आसलल्यांक आंवडली. कविता ट्रस्ट हांणी कोंकणी कुटम, बाह्रेन तशें ताकोडेच्या कवीं सांगाता मेळोन हो सुवाळो घडोवन हाडल्लो.
टैटस नोरोन्हा, ताकोडेन सुरवेर हाजर आसलल्या सरवांक येवकार माग्ताना, फाल्गुणिंत आतां उदक वहाळना. बद्ला माती, कस्ताळ तशें म्हेळें भर्लां. एका तेंपार फाल्गुणी नंयच्या उद्कान आखख्या ताकोडेंत कृशी जातली. आतां ही परिगत कश्टांची जाल्या. ह्याच परीं एका तेंपार कवितेची कृशी करन आसल्ले आपणा तसले कवी, लकश्मी पाटल्यान वचोन सरस्वतिक विसरल्यात. असली गत हाताभायर वेचे आदीं, कितें तरी हुमेदिची झर वहाळंव्क कोंकणी कुटम बाह्रेन्चो संचालक रिचरड मोरासान कविगोश्टी मांडुन हाडची येवजण घाल्ली. ती आज सुफळ जाल्या’ म्हणोन सांग्लें. मुकारीं उलोवन, फाल्गुणिंतल्या तीन गुंडियां पयकी ऎक, देवेर गुंडियेविशीं ताणें पुराण कथा सांग्ली. भोंवतणिच्या गुड्यांनी भोंवोन आसलल्या बिरमेराक्कोसांची सावळी पडोन कशीं गुरवार बायलां मरतालीं, आनी त्या उप्रांत ताकोडेंत खुरीस उबारल्या उप्रांत हाका कसो पर्यार लाभ्लो म्हणोन ताणे बोव सोभित करुन, सुंदर उत्रांनी विवर्सुन सांग्लें.
कविगोश्टिंत दोन वांटे केल्ले आसोन पयल्या वांट्याचे कविगोश्टिचें मुकेल्पण गीतकार तशें कवी लोयड रेगो (एल्येर ताकोडे) हाणें घेतल्लें. ‘फाल्गुणी आज निरलिप्त जाल्या, तशें कवीय जाल्यात्’ म्हणोन टैटसाचे सांग्णेक लोयडान जोर घालो. उप्रांत चलल्ले कविगोश्टिंत ताकोडेच्या कविंनी वांटो घेत्लो. पेद्राम (पीटर सोज) हाणें ‘राहुल द्राविडाक सलाम्’, ‘भांग्राळी बायल्’ तशें ‘चुटुक्’ सादर केल्यो. एडी काडदोस नांवान फामाद विन्सी काडदोसान ‘गुरकार्’ कविता वाच्ली. जैसन सुवारिस ताकोडेन ‘फ्लर्ट करच्या चेड्याची कविता’ वाच्ली तर, गिरबुजी ताकोडे नामांकित ग्रेगोरी लोबोन ‘सरकार्’ कविता वाच्ली. मुन्ना ताकोडे नांवान बरोंवच्या क्लेमेंट फेरनांडिसान ‘हांव जालों घोव’ कविता पेश केली तर, टैटस नोरोन्हान क्रिस्तांवांचीं चोवदा स्तेसांवां आधुनिक काळाचे सामाजिक दुरबिणेंतल्यान कवितामय रितिन सांग्लीं. एल्येर ताकोडेन कविगोश्टिच्या मधें आपलीं चुटुकां वाचुन दाधोस केलें मात्र न्हय, निमाणें ‘सादो मनीस्’ कविता वाच्लि.
हे कविगोश्टिची विशेसता कितेंगी म्हळ्यार मांड सोभाण गुरकार एरिक ओझेरियो तशें ‘कोंकणी आबोलें’ जोयस ओझेरियो हांचीं पदां. तांणी चा.फ्रा. देकोस्ता, टैटस नोरोन्हा, मेल्विन रोड्रिगस, एल्येर ताकोडे, राजय पवार आनी श्रीधर कामत हांचीं पदां सादर केलीं. डीलन आनी नोरबर्ट हांणी संगीतांत तांकां सांगात दिलो.
ह्याच संदरभार कोंकणी कुटम बाह्रेन तशें ताकोडेगारांनी साहित्य अकाडेमी प्रशस्ती विजेत कवी मेल्विन रोड्रिगसाक शोल पांग्रुन मान केलो. घर्चो येज्मानी वालेरियन मोरास आनी ताची पतिण, तशें सिद्दकट्टेचो याजक आनी आद्लो ‘राक्णो’ संपादक, फा. मारक वाल्डर वेदिर हाजर आसल्ले. ह्या संदरभार उलयिलल्या मेल्विनान पंच्वीस वरसां आपणें ताकोडे खातीर बरयिलल्या पदाचो आनी मांड सोभाणान तें पद गायिलल्याचो उडास काडलो. ताकोडेच्या कविंनी आपल्या उत्रां उत्रांनी साक्रिखडे चिंवोंक दिल्यात म्हळळ्या ताणें आपलो मान केलल्या खातीर सरवांचो उपकार भावुडले. साहित्य अकाडेमिची प्रशस्ती जोडलल्ल्यां पयकी आपुण ल्हान प्रायेचो न्हय म्हळळ्या ताणें, प्रशस्ती मेळताना एका बरोवप्याक साहितीक शेतांत एका नमुन्याचो अधिकार लाभ्ता म्हण कोणय चिंतुंक पुरो. पुण ह्या अधिकारा सांगाता एका नमुन्याची जवाब्दारीय ताका बांद्ता आनी खिणा खिणाक आपल्या बरपांनी जाग्रुत्काय घेंवची परिगत ताका उदेता म्हणोन सांग्लें. साहित्य अकाडेमिचे प्रशस्तेंत -एका बरोवप्याचें साहित्य भारतीय भासांक तरजण जांवचें आनी तो बरोवपी आपले भाशेचीं पाकां पापडुन भारतीय लेखक जांवचें - प्रमुख गजाल आसा म्हण मेल्विनान सांग्लें. ह्याच संदरभार ताणें ‘पावसाशेण आनी बेब्दो’ तशें ‘येदोळ मेळनातलल्यालागिं’ कविता वाचुन सांगल्यो.
उप्रांत्ली कविगोश्टी कवी तशें पत्रकर्त माव्रिस डेसा शांतिपुर हाणे चलोन वेली. टैटस नोरोन्हान माव्रिसाची वोळक करुन दिली. कविगोश्टिंत एच्चेम पेरनाळ, वेंकटेश नायक, रोनाल्ड सिक्वेरा, ग्लेडिस रेगो, मनू बाह्रेन, गुरू बाळिगा, विल्सन कटील हांणी तातांच्यो कविता वाचल्यो. चडावत कविंच्या कवितांनी देव आयलो तर ग्लेडिस रेगोन काळजां विकर्याक आसात म्हणोन कविता वाच्ली. विल्सन कटीलान आधुनिक राजकीय चिंत्पाच्यो कविता-चुटकुलां वाच्लीं.
कोंकणी कुटम संचालक रिचरड मोरासान धन्यवाद भेटयले. जेवणावेळार क्लेमेंट फेरनांडिसान पदां गायलिं.
कोंकणी लेखक हेमाचार्य, डोल्फी कास्सिया, रोन रोच कास्सिया, जे. एफ. डिसोजा अत्तावर, वितोरी कारकळ, उरवाचो लुवी, नाटक निरदेशक क्रिस्टोफर, संगीत्गार केविन मिस्कित, कविता ट्रस्टी विलियम पायस, प्रवीण ताव्रो, दया विक्टर लोबो ह्यावेळा हाजर आसल्ले.
तस्वीर कुरपा: स्टेन्ली बंटवाळ्