ಕೊಂಕಣಿ ಕಾವ್ಯಾಚ್ಯಾ ನಂದನಾವನಾಂತ್ಲೊ ಅಪ್ರೂಪ್ ಸುವಾಳೊ: ಮಂಗ್ಳುರಾಂತ್ ಕವಿವೇಳ್ ಆನಿ ಕವಿಮೇಳ್

ಕೊಂಕಣಿ ಕಾವ್ಯಾಚ್ಯಾ ನಂದನಾವನಾಂತ್ಲೊ ಅಪ್ರೂಪ್ ಸುವಾಳೊ: ಮಂಗ್ಳುರಾಂತ್ ಕವಿವೇಳ್ ಆನಿ ಕವಿಮೇಳ್

ಹ್ಯಾಚ್ ಎಪ್ರಿಲ್ 29 ತಾರಿಕೆರ್ ಆಯ್ತಾರಾ, ಸಾಂಜೆರ್ 5:00 ಥಾವ್ನ್ 6:30 ವೊರಾಂ ಪಾಸುನ್ ಮಂಗ್ಳುರ್‍ಚ್ಯಾ ಎಸ್. ಡಿ. ಎಮ್. ಕೊಲೆಜ್ ಒಫ್ ಬಿಸ್ನೆಸ್ ಮ್ಯಾನೇಜ್‌ಮೆಂಟ್ ಹಾಂಗಾಸರ್ ಕಿಟಾಳ್.ಕೊಮ್ ಜಾಳಿಸುವಾತ್ ತಶೆಂ ಕವಿತಾ ಟ್ರಸ್ಟಾ ತರ್ಫೆನ್ `ಕವಿವೇಳ್ ಆನಿ ಕವಿಮೇಳ್' ನಾಂವಾಖಾಲ್ ಕೊಂಕಣಿ ಕಾವ್ಯಾಚ್ಯಾ ನಂದನಾವನಾಂತ್ಲೊ ಏಕ್ ಅಪ್ರೂಪ್ ಸುವಾಳೊ ಚಲ್ಲೊ. ಹ್ಯಾ ಸಂದರ್ಭಾರ್, ಪಯ್ಲ್ಯಾ ಭಾಗಾಂತ್ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ ವಿಜೇತ್ ಕವಿ ಮೆಲ್ವಿನ್ ರೊಡ್ರಿಗಸಾನ್ ಕಾಂಯ್ ಪಾವ್ಣೆ ವೊರ್‍ ಪಾಸುನ್ ಆಪ್ಲ್ಯಾ `ಪ್ರಕೃತಿಚೊ ಪಾಸ್' ಪುಸ್ತಕಾಂತ್ಲ್ಯೊ ಕವಿತಾ ವಾಚ್ಲ್ಯೊ ಆನಿ ತ್ಯೊ ಕವಿತಾ ಲಿಖಲ್ಲೊ ಸಂದರ್ಭ್ ರಸಿಕಾಂಲಾಗಿಂ ವಾಂಟುನ್ ಘೆತ್ಲೊ ತರ್, ದುಸ್ರ್ಯಾ ಭಾಗಾಂತ್ ಎಚ್ಚೆಮ್ ಪೆರ್ನಾಳಾಚ್ಯಾ ಅಧ್ಯಕ್ಷಪಣಾಖಾಲ್ ಕವಿಗೋಷ್ಟಿ ಚಲ್ಲಿ ಆನಿ ಹಾಂತುಂ ಶಕುಂತಳಾ ಕಿಣಿ, ಜೊ.ಸಿ. ಸಿದ್ದಕಟ್ಟೆ, ವಿಲ್ಸನ್ ಕಟೀಲ್ ಆನಿ ಗುರು ಬಾಳಿಗಾ ಹಾಂಣಿ ತಾತಾಂಚ್ಯಾ ಕವಿತಾಂಚೊ ಸ್ವಾಧ್ ಚಾಕುಂಕ್ ದಿಲೊ.

ಕಿಟಾಳ್.ಕೊಮ್ ಸಂಪಾದಕ್ ಎಚ್ಚೆಮ್ ಪೆರ್ನಾಳಾನ್ ಸುರ್ವೆರ್ ಸ್ವಾಗತ್ ಕರುನ್ ಅಸಲ್ಯಾ ಎಕಾ ಸುವಾಳ್ಯಾಚಿ ಗರ್ಜ್ ಸಾಂಗ್ಲಿ. " ಪಾಟ್ಲ್ಯಾ ದಿಸಾಂನಿ ಕೊಂಕ್ಣೆಕ್ ಸಾಹಿತ್ಯ ಅಕಾಡೆಮಿ ಪುರಸ್ಕಾರ್ ಜೊಡುನ್ ದಿಲ್ಲ್ಯಾ ಮೆಲ್ವಿನಾಕ್ ಜಾಯ್ತೆ ಮಾನ್ - ಸನ್ಮಾನ್ ಚಲ್ಲ್ಯಾತ್, ಚಲ್ತೇ ಆಸಾತ್. ಖಂಯ್ಚಾಯ್ ಭಾಶೆಚ್ಯಾ ಸಾಹಿತ್ಯಾಕ್ ಎದೊ ವ್ಹಡ್ ಪುರಸ್ಕಾರ್ ಮೆಳ್ಟಾನಾ ಸಂಭ್ರಮ್ ಜಾಯ್ಜೆಚ್ ಆನಿ ಅಶೆಂ ಸಂಭ್ರಮ್ಲೆಲ್ಯಾನ್ ತೆ ಭಾಶೆಚ್ಯಾ ಸಾಹಿತ್ಯಾಚಿ ಒಳಕ್ ಹೆರ್ ಭಾಸಾಂನಿ ಜಾತಾ. ಪೂಣ್ ತಿತ್ಲೆಂಚ್ ಎದೊ ವ್ಹಡ್ ಮಾನ್ ಜೊಡುನ್ ದಿಲ್ಲ್ಯಾ ಬುಕಾಂತ್ಲ್ಯಾ ಸಾಹಿತ್ಯಾಚೀಯ್ ಒಳಕ್ ಆಮ್ಕಾಂ ಆಸೊಂಕ್ ಜಾಯ್ ಮ್ಹಳ್ಳ್ಯಾ ಇರಾದ್ಯಾನ್ ಅಸಲೊ ಏಕ್ ಕವಿ ಮೇಳ್ ಮಾಂಡುನ್ ಹಾಡ್ಲಾ" ಮ್ಹಣ್ ತೊ ಮ್ಹಣಾಲೊ.

ಕೊಂಕಣಿ ಕಥಾಕಾರ್ ಕಾದಂಬರಿಕಾರ್ ತಶೆಂ ಕಿಟಾಳ್. ಕೊಮ್ ಅಂಕಣ್‍ಕಾರ್ ಸ್ಟೇನ್ ಆಗೇರಾನ್ ಮೆಲ್ವಿನ್ ರೊಡ್ರಿಗಸಾಚಿ ವೊಳಕ್ ಕರುನ್ ದಿಲಿ. `ಹಾಂವೆಂ ಮೆಲ್ವಿನಾಕ್ ಸುರ್ವಾತಿಚ್ಯಾ ಕಾಳಾರ್ ಕೆನ್ನಾಂಯ್ ಗಂಭೀರ್ ಜಾವ್ನ್ ಲೆಕುಂಕ್ ನಾತಲ್ಲೆಂ. ಹೆರ್ ಬರೊವ್ಪ್ಯಾಂಬರೀಯ್ ತೊ ಎಕ್ಲೊ ಅಶೆಂ ಹಾಂವ್ ಚಿಂತಾಲೊಂ. ಆಜ್ ಅಸಲೆಂ ಮ್ಹಜೆಂ ಚಿಂತಪ್ ಹಾಂವೆಂ ಬದ್ಲಿಲಾಂ. ಮೆಲ್ವಿನಾ ಲಾಗಿಂ ಉಲಯ್ತಲ್ಯಾಂಕ್ ಆನಿ ತಾಚೆಲಾಗಿಂ ಸಳಾವಳ್ ಆಸಲ್ಲ್ಯಾಂಕ್ ತಾಚೆಲಾಗಿಂ ವ್ಹಡ್ಪಣಾಚಿಂ ಪಾಕಾಂ ಆಸ್ಚಿಂ ಝಳ್ಕನಾಂತ್. ತೊ ಎಕ್ದಮ್ ಸಾದೊ ಮನೀಸ್ ಮ್ಹಳ್ಳೆಂ ಕಳ್ತಾ. ಆಜ್ ಮೆಲ್ವಿನಾಕ್ ಎದೊ ವ್ಹಡ್ ಪುರಸ್ಕಾರ್ ಫಾವೊ ಜಾಲಾ ಮ್ಹಣ್ ತಾಚಿ ಜವಾಬ್ದಾರಿ ಚಡ್ಲ್ಯಾ ಅಶೆಂ ನ್ಹಂಯ್. ತಾಚೆರ್ ಹೊ ಭೊರ್ ಆಮಿ ಘಾಲಿನಾಯೆ ' ಅಶೆಂ ಸ್ಟೇನಾನ್ ಆಪ್ಲ್ಯಾ ಉಲೊವ್ಪಾಂತ್ ಸಾಂಗ್ಲೆಂ.

ಹ್ಯಾ ಸಂದರ್ಭಾರ್ ರಸಿಕಾಂ ಮಧೆಂ ಥೊಡ್ಯಾ ಮ್ಹಾನ್ ಮನ್ಶಾಂಕ್ ಮೆಲ್ವಿನ್ ರೊಡ್ರಿಗಸಾನ್ ಗುಲೊಬ್ ದೀವ್ನ್ ಮಾನ್ ಕೆಲೊ. ವಕೀಲ್ ಎಮ್. ಪಿ. ನೊರೊನ್ಹಾ, ವಕೀಲ್ ಸ್ಟೇನ್ಲಿ ಆರ್ ಡಿಕೊಸ್ತಾ, ಲೇಕಕ್ ಫೆಲಿಕ್ಸ್ ಮೋನಿಸ್, ಹುಬ್ಳಿ, ಗೀತಾ ಸಿ ಕಿಣಿ ಆನಿ ಹೆರ್ ಮಾನೆಸ್ತಾಂನಿ ಅಶೆಂಚ್ ಕೊಂಕ್ಣಿ ಕಾರ್ಯಾಂಕ್ ಹಾಜರ್ ಜಾವ್ನ್ ಉಮೆದ್ ಭರಿಜೆ ಮ್ಹಣ್ ಕಿಟಾಳ್ ಸಂಪಾದಕಾನ್ ಮ್ಹಣಾಲೊ.

ಉಪ್ರಾಂತ್ ಮೆಲ್ವಿನಾನ್ `ಆಪ್ಣೆಂ ಆಪ್ಲ್ಯಾ ಜಿವಿತಾಂತ್ ಘರಾಂತ್ ಏಕ್ ಸೊಡ್ನ್ ಕೆದಳಾಯ್ ಎಕಾ ವೊರಾಚೆಂ ಕವಿತಾ ವಾಚನ್ ಕೆಲ್ಲೆಂ ನಾ. ಆಜ್ ಪಯ್ಲೆ ಪಾವ್ಟಿಂ ತಸಲೊ ಏಕ್ ಸಂದರ್ಭ್ ಆಪ್ಣಾಕ್ ಲಾಭ್ಲಾ. ಹೊ ಆವ್ಕಾಸ್ ದಿಲ್ಲ್ಯಾ ಕಿಟಾಳ್.ಕೊಮಾಚ್ಯಾ ಸಂಪಾದಕಾಕ್ ಹಾಂವ್ ಋಣಿ ಆಸಾಂ' ಮ್ಹಳೆಂ.

ಉಪ್ರಾಂತ್ ಚಡುಣೆಂ ಚಾಳೀಸ್ ಮಿನುಟಾಂ ತಾಣೆಂ ಆಪ್ಲ್ಯಾ ಪ್ರಶಸ್ತಿ ಲಾಭಲ್ಲ್ಯಾ `ಪ್ರಕೃತಿಚೊ ಪಾಸ್' ಪುಸ್ತಕಾಂತ್ಲ್ಯೊ ವಿಂಚ್ಲಲ್ಯೊ ಕವಿತಾ ವಾಚ್ಲ್ಯೊ. ರೊಹ್ಟಾಂಗ್ ಪಾಸಾವಯ್ಲ್ಯಾ ಅನ್ಭೋಗಾಂತ್ ಗುಂತಲ್ಲಿ `ಪ್ರಕೃತಿಚೊ ಪಾಸ್', ಆಮೇರಿಕಾಚಿಂ ಕಾರಸ್ತಾನಾಂ ವ್ಯಕ್ತ್ ಕರ್ಚಿ `ಬೂಸಾ ಬೂಸಾ', ಗಲ್ಫಾಂತ್ಲ್ಯಾ ಕಾಮ್ಗಾರಾಂಚೆ ಹಾಲ್-ಹವಾಲ್ ಸಾಂಗ್ಚಿ `ಕಾಮೆಲ್ಯಾಂಚ್ಯೊ ವೊವಿಯೊ', ಪತಿಣೆಥಾವ್ನ್ ಖಿಣಾಚ್ಯಾ ವೆಗ್ಳಾಚಾರಾಂತ್ ದಣ್ಸಲ್ಲ್ಯಾ ಮನಾಚಿ`ಮಸಣಾಚೊ ಗಾಂವ್', ಘರಾಂತ್ಲ್ಯಾ ಸಂಬಂಧಾಂಚ್ಯಾ ಆನಿ ಜವಾಬ್ದಾರೆಂಚ್ಯಾ ಯೆದೊಳ್ಚ್ಯಾ ಅರ್ಥಾಂಚೆರ್ ಬೊಟ್ ಜೊಕ್ಚಿ `ಭಾಣ್ಶಿರ್‍ಯಾಲಾಗಿಂ', ಗಲ್ಫಾಚ್ಯಾ ಆವ್ರಾಂತ್ ವ್ಹಾಳೊನ್ ವಚನಾಸ್ತಾಂ ಗಾಂವಾಕ್ ಪಾಟಿಂ ಪರ್ತಲ್ಲ್ಯಾ ವೆಳಾಚಿ `ಗಾಂವ್ಚ್ಯಾ ಪಾಂಯಾಂ ಮುಳಾ', ಬೊಂಗ್ಯಾಚೆರ್ ಕಿಮ್ಚುನ್ ವೆಚ್ಯಾ ಪ್ರತಿಭಾವಂತಾಂಚಿ `ಮಾರ್‌ಶ್ಯಾಸಾಚೆಂ ಮಾಗ್ಣೆಂ' ಆನಿ ಹೆರ್ ಕವಿತಾ ವಾಚುನ್ ಸಾಂಗ್ಲ್ಯೊ. ತ್ಯಾ ಭಾಯ್ರ್ ಚಡುಣೆಂ ಪಂಚ್ವೀಸ್ ವರ್ಸಾಂ ಆದಿಂ ಬರಯಿಲ್ಲಿ ಮೊಗಾಚಿ ಕವಿತಾ `ಸುರ್ಯಾಚಿಂ ಸೊಧ್ನಾಂ', ಪಬ್ ಎಟ್ಯಾಕಾಚೆರ್ ಹೊಂದೊನ್ ಬರಯಿಲ್ಲಿ `ದೇವಿ ನಿನ್ಕಾಸಿಲಾಗಿಂ ಮಂಗ್ಳುರ್‍ಚ್ಯಾ ಚಲಿಯಾಂಚೆಂ ಮಾಗ್ಣೆಂ' ಆನಿ ಆಯ್ಲೆವಾರ್ ಬರಯಿಲ್ಲಿ `ನೊಯೆಚೆಂ ಆರ್ಕ್' ಕವಿತಾಯ್ ತಾಣೆಂ ವಾಚ್ಲ್ಯೊ.

ತ್ಯಾ ಉಪ್ರಾಂತ್ ಹಾಜರ್ ಆಸಲ್ಲ್ಯಾ ರಸಿಕಾಂನಿ - ಸ್ಟೇನ್ ಆಗೇರಾ, ಸ್ಟೇನಿ ಡಿಕೊಸ್ತಾ, ಜೊನ್ ಮೊನಿಸ್, ಡೇವಿಡ್ ವಾಮಂಜೂರ್, ಲಿಲ್ಲಿ ಮಿರಾಂದಾ, ಎಚ್ಚೆಮ್ ಪೆರ್ನಾಳ್ ಆನಿ ಹೆರಾಂನಿ ವಿಚಾರಲ್ಲ್ಯಾ ಸವಾಲಾಂಕ್ ಮೆಲ್ವಿನಾನ್ ಜಾಪಿ ದಿಲ್ಯೊ.

ಪಯ್ಲ್ಯಾ ವಾಂಟ್ಯಾ ಉಪ್ರಾಂತ್ ಕವಿತಾ ಟ್ರಸ್ಟಾ ತರ್ಫೆನ್ ಚಲಲ್ಲೆ ಕವಿಗೋಷ್ಟಿಚೆಂ ಅಧ್ಯಕ್ಷಪಣ್ ಕವಿ ತಶೆಂ ವಿಮರ್ಶಕ್ ಎಚ್ಚೆಮ್ ಪೆರ್ನಾಳಾನ್ ಘೆತಲ್ಲೆಂ.

ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸ್ ಹಾಚ್ಯಾ ಪ್ರಾಸ್ತಾವಿಕ್ ಉಲವ್ಪಾಂತ್ ಕವಿತಾ ಟ್ರ‍ಸ್ಟ್ ಆನಿ ತಾಚ್ಯಾ ವಾವ್ರಾ ವಿಶ್ಯಾಂತ್ ಮ್ಹಟ್ವ್ಯಾನ್ ಒಳಕ್ ಕರುನ್ ದಿಲಿ.

ಶಕುಂತಳಾ ಆರ್ ಕಿಣಿ ಹಿಣೆ ನವೋದಯ ಶಯ್ಲೆಚಿ ’ಯೋ ವಸಂತ ಯೋ’ - ಏಕ್ ಸಾಂಪ್ರದಾಯಿಕ್ ಕವಿತಾ, ಸುಟ್ಕಾ ಮ್ಹಳ್ಳೆ ಬಂದಡೆಂತ್ ಶಿರ್ಕೊನ್ ವಳ್ವಳ್ಚ್ಯಾ ಅಹಲ್ಯಾ ಮ್ಹಳ್ಳೆ ಸ್ತ್ರೀಯೆಕ್ ಆಧುನಿಕ್ ರುಪಾರ್ "ಸ್ವಾತಂತ್ರ್ಯ ಪುರುಷಾಕ್ ಏಕ್ ನಿವೇದನಾ" ಮ್ಹಳ್ಳಿ ಕವಿತಾ ಆನಿ "ಆಜ್ ಕಾಲ್ಚೊ ವರ್ಡಿಕ್ ಮೂಂಜಿ" ಮ್ಹಳ್ಳಿ ಕವಿತಾ ಪೇಶ್ ಕೆಲಿ.

ಜೊ ಸಿ ಸಿದ್ಧಕಟ್ಟೆ ಹಾಣೆ ಮಾರ್ಕೆಟಿಂತ್ ಮಾಸಾಚ್ಯಾ ಆಂಗ್ಡಿಬಾಗ್ಲಾಕ್ ವಾಳೊನ್ ಯೆಂವ್ಚ್ಯಾ ಫುಲಾಂಚ್ಯಾ ಫರ್ಮಾಳಾಕ್ ಭುಲೊನ್ ಫುಲಾಂದುಕಾನಾಕ್ ವೆಚ್ಯಾ ಗಿರಾಯ್ಕಾಂಕ್ ಆಡಾಂವ್ಕ್ ಎಲರ್ಜಿಚೆಂ ನೀಬ್ ದೀವ್ನ್ ಆಂಗಡ್ ಬದ್ಲಿಲ್ಲ್ಯಾ ಮಾಪ್ಳ್ಯಾಚಿ ಸಂಕೀರ್ಣ್ ಗಜಾಲ್ ಆಟಾಪ್ಚಿ ’ಎಲರ್ಜಿ’ ಕವಿತಾ ಆನಿ ’ಬಿದ್ರ್ಯಾಂ ಪೆಂಟೆಂತ್ಲೊ ಪಾವ್ಸ್’ ಕವಿತಾ ಪೇಶ್ ಕೆಲ್ಯೊ.

ಗುರು ಬಾಳಿಗಾ ಹಾಣೆ ಆಪುಣ್ ಬಾಮುಣ್ ಮ್ಹಣ್ ವ್ಹಡ್ ಅಭಿಮಾನ್ ನಾ ಜಾಲ್ಯಾರೀ , ಜಾನವೆಂ ನ್ಹೆಸ್ಚ್ಯಾ ವಿಶ್ಯಾಂತ್ ಆಸ್ತಾ ನಾ ಜಾಲ್ಯಾರೀ ತಶೆಂ ಉಗ್ತ್ಯಾನ್ ಸಾಂಗೊಂಕ್ ಮನ್ ನಾತ್‍ಲ್ಲ್ಯಾಚಿ ತಳ್ಮಳ್ಯಾಂಚಿ ಕವಿತಾ ‘ಹಾಂವ್ ಬಾಮಣ್’ ಆನಿ ವೇಳಾಚಿ ಪರಿಕಲ್ಪನಾಂಚ್ ಸಮ್ಜನಾತ್ಲೆಲ್ಯಾ ವ್ಹಡಿಲಾಂನಿ, ದೋನ್ ಘರಾಂ ಮಧೆಂ ವೆಳಾರ್ ಧಾಂವೊನ್ ವೇಳ್ ಸಾಂಗ್ಚ್ಯಾ ಭುರ್ಗ್ಯಾಕ್‍ಚ್ ವೇಳ್ ಪಾಡ್ ಕರ್ತಾ ಮ್ಹಣ್ ಲೆಕ್ಚ್ಯಾ ಭುರ್ಗ್ಯಾಚಿ ಗಜಾಲ್ ಆಟಾಪ್ಚಿ ಕವಿತಾ ‘ವೇಳ್’ ಪೇಶ್ ಕೆಲಿ.

ವಿಲ್ಸನ್ ಕಟೀಲ್ ಹಾಣೆ ವ್ಯಸನಾಂಕ್ ಬಲಿ ಜಾಲ್ಯಾರೀ ಬಾಪಯ್‍ಪಣ್ ವಿಸರ್ನಾತ್ಲ್ಯಾ ಸರ್ಲೆಲ್ಯಾ ಬಾಪಾಯ್‍ಲಾಗಿಂ ಸಂವಾದ್ ಕರ್ಚಿ "ಪಪ್ಪಾಲಾಗಿಂ" ತಾಂಬ್ಡೆ ಗುಳೆ ಆನಿ ತಾಂಬ್ಡಿ ಗಲ್ಲಿ ಹ್ಯಾ ದಂದ್ಯಾಂನಿ ಚಲ್ಚ್ಯಾ ರಿಯಾಯ್ತೆಚ್ಯಾ ಸ್ಪರ್ಧ್ಯಾಚಿ ಕವಿತಾ " ಫೆಸ್ತಾ ಸಾಂತ್ ಆನಿ ಚೋರ್ ಬಜಾರ್ " ಪೇಶ್ ಕೆಲಿ.

ಆಪ್ಲ್ಯಾ ಅಧ್ಯಕ್ಶೀಯ್ ಭಾಶಣಾಂತ್ ಎಚ್ಚೆಮಾನ್ ಆಜ್ ಕಾಲ್ ಗತಿಕಟ್ಟಾಕ್ ಜಾಂವ್ಚ್ಯಾ ಕವಿಗೋಶ್ಟಿ ವಿಶ್ಯಾಂತ್ ಜಬ್ಬೊರ್ ಆಕ್ಶೇಪ್ ಉಚಾರ್ಲೊ ಮಾತ್ ನ್ಹಯ್ ಬರವ್ಪ್ಯಾಂನಿ ಅಸಲ್ಯಾ ಗತಿಕಟ್ಟಾಚ್ಯಾ ಕವಿಗೋಶ್ಟಿಕ್ ಬಲಿ ಜಾಯ್ನಾಯೆ ಮ್ಹಳೆಂ. "ಕಾಂಯ್ ತರೀ ಕಾಮ್ ಕೆಲಾಂ ಮ್ಹಣ್ ದಾಕವ್ನ್ ಅನುದಾನ್ ದಿಂವ್ಚ್ಯಾ ಸರ್ಕಾರಾಚ್ಯಾ ದೊಳ್ಯಾಂಕ್ ಮಾತಿ ಘಾಲುಂಕ್ ಸುಲಭಾಯೇನ್ ಮೆಳ್ಚಿ ವಾಟ್ ಕವಿಗೋಶ್ಟಿ ಆನಿ ಹಾಕಾ ಕರ್ನಾಟಕಾಂತ್ಲಿ ಕೊಂಕಣಿ ಸಾಹಿತ್ಯ ಅಕಾಡೆಮಿ ಏಕ್ ಜೊಕ್ತೆಂ ಉದಾಹರಣ್. " ಮ್ಹಣ್ ತೊ ಮ್ಹಣಾಲೊ. " ಆಜ್ ಕಾಲ್ ಕವಿಗೋಶ್ಟಿಕ್ ಅಧ್ಯಕ್ಷ್ ಬಸ್ತೆಲ್ಯಾಕ್ ಕಾಂಯ್ ತರೀ ತಯಾರಿ ಕರ್ನ್ ಯೇಜೆ, ಕಾವ್ಯಾ ವಿಶ್ಯಾಂತ್ ದೋನ್ ಸಬ್ದ್ ಉಲಯ್ಜೆ , ಗೋಶ್ಟಿಂತ್ ಪೇಶ್ ಜಾಲ್ಯಾ ಕವಿತೆಂಚೊ ಸಂದೇಶ್ ಲೊಕಾಕ್ ಸಾಂಗಾಜೇ ಮ್ಹಣ್ ಭೊಗನಾ. ಅಸಲಿ ಬೆಜವಾಬ್ದಾರಿ ಆಸ್ಲೆಲ್ಯಾನ್ ಕವಿಗೋಶ್ಟಿಚೆಂ ಸುಂಕಾಣ್ ಘೆಂವ್ಚೆಂ ನ್ಹಂಯ್" ಮ್ಹಣ್ ಖಡಾಖಡ್ ಮ್ಹಣಾಲೊ ತೊ.

" ಕವಿ ಯಾ ಬರವ್ಪಿ ಜಾಲ್ಲ್ಯಾನ್ ಆಪ್ಲೆ ಕಾನ್ ಆನಿ ದೊಳೆ ಸದಾಂ ಉಗ್ತೆ ದವ್ರಿಜೆ ಪಡ್ಟಾತ್ ಆನಿ ಆಪ್ಲೊ ಭೊಂವಾರ್ ಪಾರ್ಕುನ್ ಕಾವ್ಯೆಂ ರಚ್ಲ್ಯಾರ್ ಮಾತ್ ತಾಕಾ ಮೋಲ್ ಆಸಾ ಶಿವಾಯ್ ಪಾತಳ್ ಅನ್ಬೋಗ್ ಪಾತ್ಳಾಯ್ಲ್ಯಾರ್ ಕಾವ್ಯೆಂ ಜಾಯ್ನಾ. ಆಯ್ಚ್ಯಾ ಕವಿಗೋಶ್ಟಿಂತ್ ಕವಿ ಮೆಲ್ವಿನಾನ್ ಪೇಶ್ ಕೆಲ್ಲೊ ಬಿಜ್ನೆಸಾಂತ್ ಸಲ್ವಾಲ್ಲೊ ಆನಿ ತಾಚ್ಯಾ ಭುರ್ಗ್ಯಾಂನಿಂಚ್ ಖೆಳ್ಕುಳಾಂ ಕರ್ಚೊ ನೊಯೆ ಜಾಂವ್, ಸುಟ್ಕಾ ಮ್ಹಣ್ಚೆ ಬಂದಡೆಂತ್ ಪಡೊನ್ ನವೆ ಸುಟ್ಕೆಕ್ ಅತ್ರೆಗ್ಚಿ ಅಹಲ್ಯಾ ಜಾಂವ್ - ಪಾತ್ರಾಂ ಪುರಾಣಾಂತ್ಲಿಂ ತರೀ ರುಪಾಂ ನವಿಂ. ದೆಕುನ್ ಜೆಂ ಕಾವ್ಯೆಂ ಸಮಕಾಳೀನ್ ಸಮಾಜಿಕ್ ಸಮಸ್ಸ್ಯಾಂಕಡೆ ಉಲಯ್ತಾ ತೆಂ ಮಾತ್ ಲೊಕಾಕ್ ಆಪಡ್ಟಾ" ಮ್ಹಳೆಂ.

"ಆಯ್ಚೆ ಕವಿಗೋಶ್ಟಿಂತ್ ಕವಿ ಮೆಲ್ವಿನಾನ್ ಪೇಶ್ ಕೆಲ್ಲಿ ನೊಯೆಚಿ ಕವಿತಾ, ಶಕುಂತಳಾ ಬಾಯೆಚಿ ಆಜ್ ಕಾಲ್ಚ್ಯೊ ವರ್ಡಿಕ್ ಮೂಂಜಿ , ಜೊ ಸಿ ಚಿ ಎಲರ್ಜಿ, ಗುರು ಬಾಳಿಗಾ ಹಾಚಿ ವೇಳ್ , ಹಾಂವ್ ಬಾಮಣ್ ಆನಿ ವಿಲ್ಸನಾಚಿ ಫೆಸ್ತಾ ಸಾಂತ್ ಆನಿ ಚೋರ್ ಬಜಾರ್ ಸಗ್ಳೆ - ಜಿಣ್ಯೆಂತ್ ಬಿಜ್ನೆಸ್ ರಿಗೊನ್ ಆನಿ ಸಮಾಜೆಂತ್ ಜಾತಿವಾದ್ ವಾಡೊನ್ ಪಿಡ್ಡ್ಯಾರ್ ಜಾವ್ನ್ ವೆಚ್ಯಾ ಮನ್ಶ್ಯಾಪಣಾವಿಶ್ಯಾಂತ್ಲೊ ಕವಿತಾ ಆನಿ ಹೆಂ ಇತ್ಲ್ಯಾಕ್ ರಾವಯಾ ಮನ್ಶ್ಯಾಪಣ್ ಉರೊಂ ಮ್ಹಣ್ ವಿನತಿ ಕರ್ಚ್ಯಾ ಆಶಯಾಚೊ ಕವಿತಾ" ಮ್ಹಣಾಲೊ ಎಚ್ಚೆಮ್. ಮುಂದರುನ್ ತೋ ಮ್ಹಣಾಲೊ : " ಹ್ಯಾ ಕವಿಂಕ್ ಹಾಂವೆ ವಿಂಚುಂಕ್ ನಾ. ಕವಿತಾ ಟ್ರಸ್ಟಾಚ್ಯಾ ಅಧ್ಯಕ್ಷಾನ್ ವಿಂಚ್‌ಲ್ಲೆಂ. ತರೀ ಆಯ್ಚ್ಯಾ ಕೊಂಕ್ಣೆಚೆ ಪ್ರಾತಿನಿಧಿಕ್ , ಭರ್ವಶ್ಯಾಚೆ ಜಿಣಿ ವೆವೆಗ್ಳ್ಯಾ ಕುಶಿಂ ಥಾವ್ನ್ ಪಳೆವ್ನ್ ಪಾರ್ಕುನ್ ಕಾವ್ಯೆಂ ರಚ್ಚಿ ತಾಂಕ್ ಆಸ್ಚೆ ಬಳ್ವಂತ್ ಕವಿ ಹೆ"

ಹ್ಯಾ ಕಾರ್ಯಾಕ್ ಎಸ್ ಡಿ ಎಮ್ ಕೊಲೆಜ್ ಒಫ್ ಬಿಜ್ನೆಸ್ ಮ್ಯಾನೆಜ್‍ಮೆಂಟ್ ಹಾಂಚೊ ಸಹಕಾರ್ ಆಸ್ಲೊ.

ಕಾರ್ಯಾಕ್ ನಾಟಕ್‍ಕಾರ್ ಎಮ್ ಜೋನ್ ಪೆರ್ಮಾನ್ನೂರ್, ಲೇಕಕ್ ರೋನ್ ರೋಚ್ ಕಾಸ್ಸಿಯಾ. ಕಿಶೂ ಬಾರ್ಕುರ್, ಡೆವಿಡ್ ದಿಸೊಜಾ ವಾಮಂಜೂರ್ ಆನಿ ಜಾಯ್ತೆ ಹೆರ್ ಹಾಜರ್ ಆಸ್ಲೆ.