ಕವಿತೆಚ್ಯಾ ಪಾವ್ಸಾನ್ ನ್ಹಾಣಯಿಲ್ಲಿ ಕವಿತಾ ಟ್ರಸ್ಟಾಚಿ ಕವಿಗೋಷ್ಟಿ
ಕವಿತಾ ಟ್ರಸ್ಟ್ ಹಾಂಣಿ ಆಪ್ಲೊ ಟ್ರಸ್ಟಿ ವಿಲಿಯಮ್ ಪಾಯ್ಸ್ ಹಾಂಚ್ಯಾ ಮಂಗ್ಳುರ್ ನಾಗೋರಿಂತ್ಲ್ಯಾ ಘರಾ ಹ್ಯಾಚ್ ಜುಲಾಯ್ 1 ತಾರಿಕೆರ್ ಆಯ್ತಾರಾ ಸಾಂಜೆರ್ ಮಾಂಡುನ್ ಹಾಡಲ್ಲಿ ಹ್ಯಾ ವರ್ಸಾಚಿ ಚೊವ್ತಿ ಕವಿಗೋಷ್ಟಿ ಜಬರದಸ್ತ್ ಜಾಂವ್ಕ್ ಪಾವ್ಲಿ. ಭಾಯ್ರ್ ಆಂಬ್ರಾವಯ್ಲಿಂ ಕುಪಾಂ ಜಡೊನ್, ಬಿರ್ಬಿರೊ ಪಾವ್ಸ್ ಯೆತಾನಾ, ಪಾಕ್ಯಾಭಿತರ್ ಕವಿತೆಚೊ ಶಿರಾಂಧಾರಿಂನಿ ಪಾವ್ಸ್ ವೊತ್ಲೊ. ಹ್ಯಾ ಮಧೆಂ ಅಧ್ಯಕ್ಷಪಣಾರ್ ಬಸಲ್ಲ್ಯಾ ಸ್ಟೀವನ್ ಕ್ವಾಡ್ರಸಾನ್ ಆಪ್ಲ್ಯಾ ಕುರ್ಕುರಿತ್ ತಶೆಂ ಸುರ್ಸುರಿತ್ ಉಲೊವ್ಪಾ ವರ್ವಿಂ ಸರ್ವಾಂಕ್ ಮಂತ್ರ್‌ಮುಗ್ದ್ ಕರ್ನ್ ಸೊಡ್ಲೆಂ.
`ಆದಿಂ ಮಾಗಾ ಸಬ್ದ್ ಆಸಲ್ಲೊ. ತೊ ಕವಿತಾ ಆಸಲ್ಲೊ. ಖಂಯ್ಗಿ ಉಬಿಂ ಜಾಲ್ಲಿಂ ಚಿಂತ್ನಾಂ, ಪ್ರತಿಮಾ - ಭಾಶೆದ್ವಾರಿಂ ಎಕಾ ಕಾಳ್ಜಾಥಾವ್ನ್ ಆನ್ಯೇಕಾ ಕಾಳ್ಜಾಕ್ ಪಾವಂವ್ಚಿಂ ಸಂವಹನಾಂ ಕವಿತೆಕ್ ಆಸಾ. ಸಾದ್ಯೊ ಗಜಾಲಿ ಭಾಶೆಚೆ ಬಾಂಧಾವಳಿಂತ್ ಭರ್ನ್ ಸುಂದರ್ ರಿತಿನ್ ಕವಿತಾ ಭಾಯ್ರ್ ಯೆತಾ. ಭಾರತಾಂತ್ ಭಾಸೊ ವೆವೆಗ್ಳ್ಯೊ ಆಸೊಂಕ್ ಪುರೊ, ಪುಣ್ ಸಾಹಿತ್ಯ್ ಏಕಚ್. ಆಮ್ಚ್ಯಾ ಕೊಂಕಣಿ ಕವಿಂಚೊ, ವಾಚ್ಪ್ಯಾಂಚೊ ದಿಷ್ಟಾವೊ ವಿಸ್ತಾರ್ ಜಾಯ್ಜಾಯ್ ಜಾಲ್ಯಾರ್ ಚಡಶ್ಯಾ ಭಾರತೀಯ್ ಭಾಸಾಂಚೆಂ ಸಾಹಿತ್ಯ್ ಆಮಿ ವಾಚಿಜಾಯ್, ಕೊಂಕಣಿ ಸಾಹಿತ್ಯ್ ಸೊಡಿನಾಸ್ತಾಂ' ಅಶೆಂ ಸ್ಟೀವನ್ ಕ್ವಾಡ್ರಸಾನ್ ಆಪ್ಲ್ಯಾ ಉಲೊವ್ಪಾಂತ್ ಸಾಂಗ್ಲೆಂ. ಮಾಗೀರ್ ತೊ ಕವಿಗೋಷ್ಟಿ ಚಲಯ್ತಾನಾ ಕನ್ನಡ ಭಾಶೆಚೆ ಪರಂಪರೆವಿಶಿಂ ಸವಿಸ್ತಾರ್ ರಿತಿನ್ ಉಲಯ್ಲೊ.
ಎಂಡ್ರ್ಯೂ ಎಲ್ ಡಿಕುನ್ಹಾನ್ `ಏಕ್ ಜಾವ್ಯಾಂ' ಕವಿತಾ ವಾಚ್ಲಿ ಜಾಲ್ಯಾರ್, ದುಬಾಯ್ ಥಾವ್ನ್ ರಜೆರ್ ಆಯಿಲ್ಲ್ಯಾ ರೊಬರ್ಟ್ ಫೆರ್ನಾಂಡಿಸ್ ಉದ್ಯಾವರ್ ಹಾಣೆಂ ಚುಟ್ಕುಲಾಂ, ಹೈಕೂ, ವಾಚುನ್ ಜಾತಚ್ `ನಾಂವ್ ನಾತಲ್ಲಿ ಕವಿತಾ' ವಾಚ್ಲಿ. ವೆಂಕಟೇಶ ನಾಯಕಾನ್ ಗುಜ್ರಿವಿಶಿಂ ಆನಿ ತಾಚ್ಯಾ ಮೊಲಾವಿಶಿಂ ಕವಿತಾ ವಾಚನ್ ಕೆಲೆಂ ತರ್, ಗ್ಲೇಡಿಸ್ ರೇಗೊನ್ `ಪಾವ್ಸ್' ತಶೆಂ `ವಿಕ್ರ್ಯಾಕ್ ಆಸಾತ್ ದುಕಾಂ' ಕವಿತಾ ವಾಚ್ಲ್ಯೊ. ಹ್ಯಾ ಮಧೆಂ ಮನು ಬಾಹ್ರೇನ್ ತಶೆಂ ಸ್ಟೀವನ್ ಕ್ವಾಡ್ರಸಾನ್ ಕವಿತಾ ವಾಚುನ್ ಜಾತಚ್ ಗುರು ಬಾಳಿಗಾನ್ `ಹಾಂವ್ ಬಾಮಣ್' ತಶೆಂ `ಫುಲಾಂ ಪಾವ್ಸ್' ಕವಿತಾ ವಾಚ್ಲ್ಯೊ. ಮೆಲ್ವಿನ್ ರೊಡ್ರಿಗಸಾನ್ `ನವೆ ಉಪದೆಸ್' ಆನಿ `ಬೊಲ್ಕಾಂವ್' ಕವಿತಾ ವಾಚ್ಲ್ಯೊ ತರ್, ಎಚ್ಚೆಮ್ ಪೆರ್ನಾಳಾನ್ `ಮೆಜ್ ಆನಿ ಕದೆಲ್' ಆನಿ `ದಂಧೊ' ಕವಿತಾ ವಾಚ್ಲ್ಯೊ. ಹ್ಯಾ ನಂತರ್ ವಿನ್ಸಿ ಪಿಂಟೊ ಆಂಜೆಲೊರಾನ್ ಥೊಡಿಂ ಚುಟುಕಾಂ ವಾಚುನ್ ಸರ್ವಾಂಕ್ ದಾಧೊಸ್ ಕೆಲೆಂ.
ಸುರ್ವೆರ್ ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡಿಗಸಾನ್ ಸರ್ವಾಂಕ್ ಯೆವ್ಕಾರ್ ದಿಲ್ಲೊ ತರ್, ನಿಮಾಣೆಂ ಟ್ರಸ್ಟಿ ವಿಲಿಯಮ್ ಪಾಯ್ಸಾನ್ ಉಪ್ಕಾರ್ ಆಟಯ್ಲೆ. ಹ್ಯಾ ಕಾರ್ಯಾಕ್ ಕೊಂಕಣಿ ಲೇಖಕ್ ಹೇಮಾಚಾರ್ಯ, ಕಿಶೂ ಬಾರ್ಕೂರ್, ರೊನ್ ರೊಚ್ ಕಾಸ್ಸಿಯಾ ಹಾಜರ್ ಆಸೊನ್ ಜಾಯ್ತಿಂ ಶೆಜಾರ್ಚಿಂ ತಶೆಂ ಸೈರಿಂ ಆಯಿಲ್ಲಿಂ.
-ತಸ್ವೀರ್ ಕುರ್ಪಾ: ಪ್ರವೀಣ್ ತಾವ್ರೊ