ಕಾವ್ಯೆಂ ಸಾಹಿತ್ಯಾಚೆ ದೊಳೆ ಆಸಲ್ಲೆಪರಿಂ - ಗುರ್ಪುರ್ ಕವಿಗೋಷ್ಟಿಂತ್ ಆಂಡ್ರ್ಯೂ ಡಿಕುನ್ಹಾ
"
ಕಾವ್ಯೆಂ ಸಾಹಿತ್ಯಾಚೆ ದೊಳೆ ಆಸ್‍ಲ್ಲ್ಯಾಪರಿಂ. ಜಶೆಂ ಪರ್ಜಳಿಕ್ ದೊಳೆ ಬರೆ ಭಲಾಯ್ಕೆಚೆಂ ಲಕ್ಶಣ್ ತಶೆಂ ಕಾವ್ಯ-ಪ್ರಕಾರ್ ಜಿವಾಳ್ ಆಸ್ಲ್ಯಾರ್ ತಿ ಭಾಸ್‍ಯಿ ಜಿವಾಳ್ ಆಸಾ ಮ್ಹಣ್ ಚಿಂತ್ಯೆತ್. ಕವಿತಾ ಟ್ರಸ್ಟ್ ಕೊಂಕ್ಣಿ ಕವಿತಾ ಜಿವಾಳ್ ದವರುಂಕ್ ಹರ್ ಪ್ರಯತ್ನ್ ಕರ್‍ನ್ ಆಸಾ. ಕ್ರಿಸ್ಮಸಾಚ್ಯಾ ವ್ಹೆಳಾರ್ ಜಾಂವ್ಚ್ಯಾ ಹೆ ಕವಿಗೋಶ್ಟಿಕ್ ಆಮ್ಚೆ ಕವಿ ಕಾವ್ಯಾಳ್ ಕುಸ್ವಾರ್ ಹಾಡ್ ಆಯ್ಲ್ಯಾತ್ " ಅಶೆಂ ಮ್ಹಣಾಲೊ ಕವಿ ಆಂಡ್ರ್ಯೂ ಡಿ ಕೂನ್ಹಾ. ತೊ ದಶೆಂಬರ್ 16 ತಾರಿಕೆರ್ ಆಯ್ತಾರಾ ಗುರ್ಪುರ್ ಕೈಕಂಬ ಪ್ರೊ ಸ್ಟೀವನ್ ಕ್ವಾಡ್ರಸಾಚ್ಯಾ ಘರ‍್ಚ್ಯಾ ಆಂಗ್ಣಾಂತ್ ಚಲಲ್ಲೆ ಕವಿಗೋಷ್ಟಿಚೊ ಅಧ್ಯಕ್ಷ್ ಜಾವ್ನ್ ಉಲಯ್ತಾಲೊ.
ಕೊಂಕ್ಣಿ ಕವಿತೆಚೆ ಉದರ್ಗತೆ ಖಾತಿರ್ ವಾವುರ್ಚ್ಯಾ ಕವಿತಾ ಟ್ರಸ್ಟಾನ್ ದಸೆಂಬರ್ 16 ತಾರ್ಕೆರ್ ಮಾಂಡುನ್ ಹಾಡ್‍‍ಲ್ಲಿ ಹ್ಯಾ ಗಾಂವಾಂತ್ಲಿ ಪಯ್ಲಿ ಕವಿಗೋಶ್ಟಿ ರಸಿಕಾಂಕ್ ನವೊಚ್ ಅನ್ಭೊಗ್ ದೀವ್ನ್ ಧಾದೊಶಿ ಕರುಂಕ್ ಪಾವ್ಲಿ.
ಗುರುದೇವ್ ರಬೀಂದ್ರನಾಥ್ ಠಾಕೂರಾಚ್ಯಾ ‘ತುಜ್ಯಾ ವಿಣ್ಯಾಕ್’ ಗಿತಾ ಗಾಯಾನಾದ್ವಾರಿಂ ಕಾರ್ಯೆಂ ಸುರ‍್ವಾತ್ಲೆಂ. ಗುರ್ಕಾರ್ ಬೆನೆಡಿಕ್ಟ್ ಸಿಕ್ವೇರಾನ್ ‘ಗೋಡ್ ಉದಕ್’ ದೀವ್ನ್ ಸರ್ವಾಂಕ್ ಯೆವ್ಕಾರ್ ದಿಲೊ. ಪ್ರೊ. ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆನ್ ಉತ್ರಾಂ ಸ್ವಾಗತ್ ಕೆಲೊ. ಪೊಂಪಯ್ ಸಾಯ್ಬಿಣಿಚೆ ಫಿರ್ಗಜೆಚೊ ಉಪಾಧ್ಯಕ್ಷ್ ಮಾನೆಸ್ತ್ ರೊಮಾನ್ಸ್ ಲೋಬೊನ್ ಸೈರ‍್ಯಾಂಕ್ ಆನಿ ಕವಿಂಕ್ ಫುಲಾಂ ದೀವ್ನ್ ಮಾನ್ ಕೆಲೊ.
ಆಪ್ಲ್ಯಾ ಪ್ರಸ್ತಾವನಾಂತ್ ಕವಿತಾ ಟ್ರಸ್ಟ್ ಅಧ್ಯಕ್ಶ್ ಕವಿ ಮೆಲ್ವಿನ್ ರೊಡ್ರಿಗಸ್ ಹಾಂಣಿ ಕವಿತಾ ಟ್ರಸ್ಟಾಚೊ ಶೆವೊಟ್, ಮಿಸಾಂವ್ ಆನಿ ಪಾಟ್ಲ್ಯಾ ಧಾ ವರ್ಸಾಂ ಥಾವ್ನ್ ಕೊಂಕ್ಣಿ ಕವಿತೆಚ್ಯಾ ಮಳಾರ್ ಆಜ್ ಮೆರೆನ್ ಕೆಲ್ಲಿಂ ಕಾಮಾಂ ಆನಿ ಫುಡಾರಾಚಿ ಯೆವ್ಜಣ್ ಹ್ಯಾ ವಿಶ್ಯಾಂತ್ ಏಕ್ ಲ್ಹಾನ್ ಝಳಕ್ ದಿಲಿ. ಹರ್ ವರ್ಸಾ ಜನೆರಾಚ್ಯಾ ದುಸ್ರ್ಯಾ ಆಯ್ತಾರಾ ಜಾಂವ್ಚೆ ಪರಿಂ , 2013 ಜನೆರ್ 13 ತಾರಿಕೆರ್, ದುಸ್ರ್ಯಾ ಆಯ್ತಾರಾ, ತುಂಬೆ ಬಸ್ತಿ ವಾಮನ್ ಶೆಣಯ್ ಹಾಂಚ್ಯಾ ಘರ‍್ಚ್ಯಾ ಮಾಟ್ವಾಂತ್ ‘ಕವಿತಾ ಫೆಸ್ತ್’ ಜಾಂವ್ಚೆಂ ಆಸೊನ್, ಜಮ್ಲೆಲ್ಯಾ ಲೊಕಾಕ್ ತ್ಯಾ ಫೆಸ್ತಾಕ್ ವೊವ್ಳಿಗ್ ದಿಲಿ. ಉಪ್ರಾಂತ್ ತಾಣೆಂ ಕವಿತಾ ಗೋಶ್ಟಿಚೆಂ ಸುಂಕಾಣ್ ಧರುಂಕ್ ತ್ಯಾಚ್ ಗಾವಾಂತ್ ಜಲ್ಮೊನ್ ವ್ಹಡ್ ಜಾವ್ನ್ ಆತಾಂ ಇಜಂಯ್ತ್ ವಸ್ತಿ ಕರ್‍ನ್ ಆಸ್ಚ್ಯಾ ಕವಿ ಆಂಡ್ರ್ಯೂ ಎಲ್ ಡಿ ಕೂನ್ಹಾಕ್ ಉಲೊ ದಿಲೊ.
ಹೆ ಕವಿಗೋಷ್ಟಿಂತ್ ಉದೆತ್ಯಾ ಆನಿ ಅನ್ಬೋಗಿ ಕವಿಂನಿ ಸಾಂಗಾತಾ ಕವಿತಾ ಪೇಶ್ ಕೆಲ್ಯೊ. ಕವಿಗೋಶ್ಟಿಂತ್ ವಿನ್ಸಿ ಪಿಂಟೊ ಆಂಜೆಲೊರ್, ಪ್ರವೀಣ್ ತಾವ್ರೊ, ಎಮ್. ಪಿ. ರೊಡ್ರಿಗಸ್, ಎಚ್ಚೆಮ್ ಪೆರ್ನಾಳ್, ಜೇಸನ್ ಸಿಕ್ವೇರಾ, ಯಶವಂತ್ ಡಿ.ಎಸ್., ಗ್ಲೇಡಿಸ್ ರೇಗೊ, ಮೆಲ್ವಿನ್ ರೊಡ್ರಿಗ್ಸ್, ಕ್ಲೆಮೆಂಟ್ ಫೆರ್ನಾಂಡಿಸ್, ಡೇವಿಡ್ ಡಿ ಸೋಜಾ, ರೊನಾಲ್ಡ್ ಸಿಕ್ವೇರಾ, ಸ್ಟೀವನ್ ಕ್ವಾಡ್ರಸ್, ರೋಮನ್ಸ್ ಲೋಬೊ, ಮನು ಬಾಹ್ರೆನ್ ಆನಿ ವಿಲ್ಸನ್ ಕಟೀಲ್ ಹಾಂಣಿ ಆಪಾಪ್ಲ್ಯೊ ಕವಿತಾ ವಾಚ್ಲ್ಯೊ. ಮಧೆಂ ಮಧೆಂ ಕವಿಗೋಶ್ಟಿಚೆಂ ಸುಂಕಾಣ್ ಧರ್ಲೆಲ್ಯಾ ಆಂಡ್ರ್ಯೂನ್ ಆಪ್ಲಿಂ ಚುಟುಕಾಂ ಪೇಶ್ ಕೆಲಿಂ ಆನಿ ಅಪುಣ್ ಜಲ್ಮೊನ್ ವಾಡಲ್ಲ್ಯಾ ಗಾಂವ್ಚ್ಯಾ ಮನ್ಶಾಂನಿ ಕಶೆಂ ಆಪ್ಣಾಚೆರ್ ಪ್ರಬಾವ್ ಘಾಲೊ ಮ್ಹಣೊನ್ ಸಾಂಗ್ಲೆಂ ಆನಿ ಹ್ಯಾಚ್ ಗಾಂವಾಂತ್ ನಿಮಾಣೆ ದೀಸ್ ಸಾರ್‍ಚಿ ಆಶಾ ಉಚಾರ್ಲಿ.
ಅನ್ಭೋಗಿ ಕವಿಂನಿ ನವೆ ವಿಚಾರ್ ಕವಿತೆಂನಿ ಸಾದರ್ ಕೆಲೆ ತರ್ ಉದೆತೆ ಕವಿ ಜೇಸನ್ ಆನಿ ಕ್ಲೆಮೆಂಟ್ ಹಾಂಣಿ ತಾಂಚ್ಯಾ ಚಿಂತ್ಪಾ-ಧಾರಿಚೊ ಅನ್ಬೊಗ್ ಆಯ್ಕೊಪ್ಯಾಂಕ್ ದೀವ್ನ್ ಮೆಚ್ವಣಿ ಜೊಡ್ಲಿ.
ಸಗ್ಳೆ ಕವಿಗೋಶ್ಟಿಕ್ ಹಾಜರ್ ಆಸಲ್ಲ್ಯಾ ಕೌಡೂರು ಕೈಕಂಬ ಪೊಂಪಯ್ ಸಾಯ್ಬಿಣಿಚೆ ಫಿರ್ಗಜೆಚೆ ವಿಗಾರ್ ಬಾಪ್ ಪಾವ್ಲ್ ರೇಗೊನ್ ಹ್ಯಾ ನವ್ಯಾಚ್ ಅನ್ಭೊಗಾ ಥಂಯ್ ಆಪ್ಲೊ ಸಂತೊಸ್ ಉಚಾರ್ಲೊ ಆನಿ ಕವಿತೆ ಖಾತಿರ್ ಪ್ರಾಮಾಣಿಕ್ಪಣಿ ವಾವುರ್ಚ್ಯಾ ಕವಿತಾ ಟ್ರಸ್ಟಾಚ್ಯಾ ಕಾರ್‍ಬಾರ್‍ಯಾಂಕ್ ಶಾಭಾಸ್ಕಿ ಉಚಾರ್ಲಿ. ತರ್ನಾಟ್ಯಾಂನಿ ಆನಿ ಭುರ್ಗ್ಯಾಂನಿ ಅಸಲ್ಯಾ ಸಾಹಿತಿಕ್ ಕಾರ್‍ಯಾಂ ಥಾವ್ನ್ ಪಾಯ್ದೊ ಜೊಡಿಜಾಯ್ ಮ್ಹಣ್ ಉಲೊ ದಿಲೊ.
‘ಮ್ಹಾಕಾ ತರ್ನೆಪಣಿಂ ಕವಿತಾ ವಾಚ್ಚಿ ಆನಿ ಅಪ್ರೂಪ್ ಕವಿತಾ ಲಿಖ್ಚಿ ವೋಡ್ ಆಸಲ್ಲಿ. ಆಜ್ ಹಾಂವ್ ಮ್ಹಾಕಾಚ್ ಸೊಮ್ಯಾಚೊ ಕವಿ ಮ್ಹಣೊನ್ ಆಪೊವ್ನ್ ಘೆಂವ್ಕ್ ವ್ಹಡ್ ಅಭಿಮಾನ್ ಭೊಗ್ತಾ’ ಅಶೆಂ ಮ್ಹಣಾಲೆ ಮಾ. ಬಾ. ಪಾವ್ಲ್ ರೇಗೊ ಆಪ್ಲ್ಯಾ ಉಲೊವ್ಪಾಂತ್.
ನಿಮಾಣೆಂ ಸ್ಟೀವನ್ ಕ್ವಾಡ್ರಸಾನ್ ಧೀನ್ವಾಸ್ ಪಾಟವ್ನ್ ಕಾರ್ಯಾಕ್ ಕುಮಕ್ ಕೆಲ್ಲ್ಯಾಂಕ್ ಗುಲೊಬ್ ದೀವ್ನ್ ಉಪ್ಕಾರ್ ಬಾವುಡ್ಲೊ.
ಹ್ಯಾ ಕಾರ್ಯಾಕ್ ಕೊಂಕ್ಣಿ ಬರವ್ಪಿ ಹೆನ್ರಿ ವಾಲ್ಡರ್, ಫಿರ್ಗಜೆಚ್ಯೊ ಧರ್ಮ್ ಭಯ್ಣಿ ಆನಿ ಗಾಂವ್ಚಿಂ ಜಾಯ್ತಿಂ ಹಾಜರ್ ಆಸಲ್ಲಿಂ. ಆಯಿಲ್ಲ್ಯಾ ಸರ್ವಾಂಕ್ ಸ್ಟೀವನ್ ಕ್ವಾಡ್ರಸಾಚ್ಯಾ ಕುಟ್ಮಾನ್ ಕುಬ್ಯಾ-ಮುಟ್ಲಿಂ ಆನಿ ವೊರ್ನಾ ಮುಖಾಂತ್ರ್ ಧಾದೊಶಿ ಕೆಲೆಂ
ಕವಿತಾ ಟ್ರಸ್ಟಾಚ್ಯಾ ಮಾಂತಾಖಾಲ್ ಚಲಲ್ಲ್ಯಾ ಹೆ ಕವಿಗೋಷ್ಟಿಕ್ ಲೋಕ್ ವ್ಹಡ್ ಹುಮೆದಿನ್ ಜಮಲ್ಲೊ. ಉದೆತೊ ಕವಿ ಜೇಸನ್ ಸಿಕ್ವೇರಾನ್ ಥಳೀಯ್ ಸಂಘಟಕ್ ಜಾವ್ನ್ ಕಾರ್ಯೆಂ ಚಲೊವ್ನ್ ವೆಲೆಂ.
ತಸ್ವೀರ್ ಕುರ್ಪಾ: ಪ್ರವೀಣ್ ತಾವ್ರೊ
काव्यें साहित्याचे दोळे आसल्लेपरीं - गुर्पूर कविगोषटिंत आंड्र्यू डिकुन्हा
“काव्यें साहित्याचे दोळे आसल्ल्यापरीं. जशें पर्जळीक दोळे बरे भलायकेचें लक्षण तशें काव्य-प्रकार जिवाळ्ळ आसल्यार ती भासयी जिवाळ आसा म्हण चिंत्येत. कविता ट्रसट कोंकणी कविता जिवाळ दवरुंक हर प्रयत्न करन आसा. क्रिस्मसाच्या व्हेळार जावंचा हे कविगोश्टीक आमची कवी काव्याळ कुस्वार हाड आयल्यात ” अशें म्हणालो कवी आंड्र्यू डी कून्हा. तो दशेंबर १६ तारिकेर आयतारा गुर्पूर कैकंब प्रो स्टीवन क्वाड्रसाच्या घर्च्या आंगणांत चलल्ले कविगोषटिचो अध्यक्ष जावन उलयतालो.
कोंकणी कवितेचे उदर्गते खातीर वावुर्च्या कविता ट्रसटान दसेंबर १६ तार्केर मांडून हाडल्ली ह्या गांवांतली पयली कविगोश्टी रसिकांक नवोच अनभोग दीवन धादोशी करुंक पावली.
गुरुदेव रबींद्रनाथ ठाकूराच्या ‘तुज्या विण्याक’ गिता गायानाद्वारीं कार्यें सूर्वातलें. गुर्कार बेनेडिकट सिकवेरान ‘गोड उदक’ दीवन सर्वांक येवकार दिलो. प्रो. स्टीवन क्वाड्रस पेर्मुदेन उत्रां स्वागत केलो. पोंपय सायबिणिचे फिर्गजेचो उपाध्यक्ष मानेसत रोमान्स लोबोन सैर्यांक आनी कविंक फुलां दीवन मान केलो.
आपल्या प्रसतावनांत कविता ट्रसट अध्यक्ष कवी मेलवीन रोड्रिगस हांणी कविता ट्रसटाचो शेवोट, मिसावं आनी पाटल्या धा वर्सां थावन कोंकणी कवितेच्या मळार आज मेरेन केल्लीं कामां आनी फुडाराची येवजण ह्या विश्यांत एक ल्हान झळक दिली. हर वर्सा जनेराच्या दुस्र्या आयतारा जावंचे परीं , २०१३ जनेर १३ तारिकेर, दुस्र्या आयतारा, तुंबे बसती वामन शेणय हांच्या घर्च्या माटवांत ‘कविता फेसत’ जावंचें आसोन, जम्लेल्या लोकाक त्या फेसताक वोवळीग दिली. उपरांत ताणें कविता गोश्टिचें सुंकाण धरुंक त्याच गावांत जल्मोन व्हड जावन आतां इजंयत वसती करन आसच्या कवी आंड्र्यू एल डी कून्हाक उलो दिलो.
हे कविगोषटिंत उदेत्या आनी अनबोगी कविंनी सांगाता कविता पेश केल्यो. कविगोश्टिंत विन्सी पिंटो आंजेलोर, प्रवीण तावरो, एम. पी. रोड्रिगस, एच्चेम पेर्नाळ, जेसन सिकवेरा, यशवंत डी.एस., ग्लेडीस रेगो, मेलवीन रोड्रिगस, क्लेमेंट फेर्नांडीस, डेवीड डी सोजा, रोनालड सिकवेरा, स्टीवन क्वाड्रस, रोमन्स लोबो, मनू बाह्रेन आनी विल्सन कटील हांणी आपापल्यो कविता वाचल्यो. मधें मधें कविगोश्टिचें सुंकाण धरलेल्या आंड्र्यून आपलीं चुटुकां पेश केलीं आनी अपूण जल्मोन वाडल्ल्या गावंच्या मनशांनी कशें आपणाचेर प्रबाव घालो म्हणोन सांगलें आनी ह्याच गांवांत निमाणे दीस सारची आशा उचारली.
अनभोगी कविंनी नवे विचार कवितेंनी सादर केले तर उदेते कवी जेसन आनी क्लेमेंट हांणी तांच्या चिंत्पा-धारिचो अनबोग आयकोप्यांक दीवन मेचवणी जोडली.
सगळे कविगोश्टीक हाजर आसल्ल्या कौडूरू कैकंब पोंपय सायबिणिचे फिर्गजेचे विगार बाप पावल रेगोन ह्या नव्याच अनभोगा थंय आपलो संतोस उचारलो आनी कविते खातीर प्रामाणिकपणी वावूर्च्या कविता ट्रसटाच्या कारबारयांक शाभासकी उचारली. तर्नाट्यांनी आनी भुर्ग्यांनी असल्या साहितीक कारयां थावन पायदो जोडिजाय म्हण उलो दिलो. ‘म्हाका तर्नेपणीं कविता वाच्ची आनी अपरूप कविता लिखची वोड आसल्ली. आज हावं म्हाकाच सोम्याचो कवी म्हणोन आपोवन घेवंक व्हड अभिमान भोग्ता’ अशें म्हणाले मा. बा. पावल रेगो आपल्या उलोवपांत.
निमाणें स्टीवन क्वाड्रसान धीन्वास पाटवन कारयाक कुमक केल्ल्यांक गुलोब दीवन उपकार बावुडलो.
ह्या कार्याक कोंकणी बरवपी हेनरी वालडर, फिर्गजेच्यो धर्म भयणी आनी गावंचीं जायतीं हाजर आसल्लीं. आयिल्ल्या सर्वांक स्टीवन क्वाड्रसाच्या कुटमान कुब्या-मुटलीं आनी वोर्ना मुखांत्र धादोशी केलें
कविता ट्रसटाच्या मांताखाल चलल्ल्या हे कविगोषटीक लोक व्हड हुमेदीन जमल्लो. उदेतो कवी जेसन सिकवेरान थळीय संघटक जावन कार्यें चलोवन वेलें.