ಮಂಗ್ಳುರಾಂತ್ ’ತ್ರಿವೇಣಿ’ ಕವಿತಾ ಕಾರ್ಯಕ್ರಮ್. ಕೊಂಕಣಿ ಕಾವ್ಯಾಚೊ ಅಪ್ರೂಪ್ ಸುವಾಳೊ
ಆಪುರ್ಬಾಯೆಚ್ಯಾ, ವೆಗ್ಳ್ಯಾಚ್ ಪಾಂವ್ಡ್ಯಾಚ್ಯಾ ಚಿಂತ್ನಾ ಸಾಗೊರಾಕ್ ಉಪ್ಯೆಂವ್ಕ್ ಆಪೊವ್ನ್ ವ್ಹರ‍್ಚೆ ಎಕೆ ಸುಮಧುರ್ ಸಾಂಜೆಚೊ ಕಾವ್ಯಾಳ್ ದೆಖಾವೊ ಗೊಂಯ್ಚ್ಯೊ ಕವಯಿತ್ರಿ ನೂತನ್ ಸಾಖರ್‌ದಾಂಡೆ, ನಯನಾ ಆಡಾರ್ಕಾರ್ ತಶೆಂ ಮಾಯಾ ಖರಂಗಟೆ ಹಾಂಣಿ ಹ್ಯಾಚ್ ಫೆಬ್ರೆರ್ ಮ್ಹಯ್ನ್ಯಾಚೆ 22 ತಾರಿಕೆರ್ ಸನ್ವಾರಾ ಸಾಂಜೆರ್ ಮಂಗ್ಳುರ‍್ಚ್ಯಾ ಓರ್ಕಿಡ್ ಆರ್ಟ್ ಗ್ಯಾಲರಿಂತ್ ಹಾಜರ್ ಆಸಲ್ಲ್ಯಾ ಪ್ರೇಕ್ಷಕಾಂಕ್ ದಾಕಯ್ಲೊ.
ಹೆಂ ಕಾವ್ಯಾಳ್ ಕಾರ್ಯಕ್ರಮ್, ಕವಿತಾ ಟ್ರಸ್ಟ್ ಹಾಂಣಿ ಗೊಂಯ್ ಕೊಂಕಣಿ ಅಕಾಡೆಮಿಚ್ಯಾ ಜೋಡ್ ಪಾಲ್ವಾಖಾಲ್ ಮಾಂಡುನ್ ಹಾಡಲ್ಲೆಂ.
’ತ್ರಿವೇಣಿ’ನಾಂವಾಖಾಲ್ ಹ್ಯಾ ತೆಗಿ ಕವಯಿತ್ರಿಂನಿ ಸಾದರ್ ಕರ‍್ಚೆಂ 46 ವೆಂ ಕಾರ್ಯಕ್ರಮ್ ಹೆಂ ಜಾವ್ನಾಸಲ್ಲೆಂ. ತೆಗಾಂಯ್ ಕವಯಿತ್ರಿಂನಿ ಪಾವ್ಸ್, ಮೋಗ್, ಆವಯ್ಪಣ್, ಬಾಯ್ಲಾಂ, ಪ್ರಕೃತಿ ಅಶೆಂ ವೆವೆಗ್ಳ್ಯಾ ವಿಶಯಾಂಚೆರ್ ಕವಿತಾ ಸಾದರ್ ಕರ್ನ್ ಪ್ರೇಕ್ಷಕಾಂಕ್ ದಾಧೊಸ್ ಕೆಲೆಂ. ನಯನಾ ಆಡಾರ್ಕಾರಾಚಿ ’ಇತಿಹಾಸ್ ಜಮಾ’ ಕವಿತೆಂತ್ ಏಕ್ ಸ್ತ್ರೀ ಆಪ್ಲ್ಯಾ ಪರ್ನ್ಯಾ ಘರಾಕ್ ಆಶೆತಾನಾ, ಆತಾಂಚ್ಯಾ ಫ್ಲೆಟಾಂಚ್ಯಾ ಜಿವಿತಾಚೆರ್ ಆರ್ಸೊ ಧರ‍್ತಾ. ಶೆಜಾರ್ ಮ್ಹಳ್ಳೆಂ ನಪಯಿಂಚ್ ಜಾಂವ್ಚೆಂ, ಏಕ್ ಚರಿತ್ರಾ ಮಾತ್ರ್ ಜಾವ್ನ್ ಉರ‍್ಚೆಂಚ್ ಹೆ ಕವಿತೆಚೊ ಆಶಯ್. ನೂತನ್ ಸಾಖರ್‌ದಾಂಡೆಚಿ ’ಪಾಸ್‌ವರ್ಡ್’ ಕವಿತೆಂತ್ ಏಕ್ ಆವಯ್ ಆಪ್ಲ್ಯಾ ಪುತಾಲಾಗಿಂ ತಾಚ್ಯಾ ಕಾಳ್ಜಾಚೊ ಪಾಸ್‌ವರ್ಡ್ ವಿಚಾರ‍್ಚೆಂ ಕಾಕುಳ್ತಿಚೆಂ ಕಾಳೀಜ್ ಆಸಾ. ಹೆಂ ವಿಚಾರುನ್ ಆಯ್ಚ್ಯಾ ಕಂಪ್ಯೂಟರ್ ಯುಗಾಂತ್ ಆವಯ್‌ಲಾಗಿಂ ಉಲಂವ್ಕಯ್ ಫುರ್ಸತ್ ನಾಸ್ಚ್ಯಾ ಪುತಾಚ್ಯಾ ಕಾಳ್ಜಾಂತ್ ಜಾಯ್ ಜಾತಾನಾ ತಿಳುಂಕ್ ಸಾಧ್ಯ ಜಾತಲೆಂ ಮ್ಹಣೊನ್ ತಿಕಾ ಭೊಗ್ತಾ. ಮಾಯಾ ಖರಂಗಟೆಚ್ಯಾ ’ಧೆಣ್ ಧೆಣ್ಲೊ’ ಕವಿತೆಂತ್ ಭೃಷ್ಟಾಚಾರ್ ಆನಿ ಮ್ಹಾರ್ಗಾಯೆಚೆರ್ ತೀಕ್ ನದರ್ ಆಸಾ. ಸಾದ್ಯಾ ಲೊಕಾಕ್ ಹುನ್ ಲಾಗೊಂವ್ಚ್ಯಾ ವಿಶಯಾಚೆರ್ ವಿಣಲ್ಲಿ ಹಿ ಕವಿತಾ, ಜಾನಪದ್ ಶೈಲೆರ್ ಕವಯಿತ್ರಿನ್ ವಿಣ್ಲ್ಯಾ.
ಪಾವ್ಸ್ ಆನಿ ಮೊಗಾಚೆರ್ ನ್ಹಾಣಯಿಲ್ಲ್ಯಾ ಕವಯಿತ್ರಿಂನಿ ಸ್ತ್ರೀಯಾಂಚ್ಯಾ ಸಮಸ್ಯಾಂಚೆರಯ್ ಕವಿತಾ ಸಾದರ್ ಕರುನ್ ರಸಿಕಾಂಚಿಂ ಮನಾಂ ಜಿಕ್ಲಿಂ. ನೂತನಾಚಿ ’ಆಡೊಳಿ’ ಆನಿ ’ದಫ್ತರ್ ಆನಿ ಪಾಟಿ’, ನಯನಾ ಆಡಾರ್ಕಾರಾಚಿ ’ಶಾಳಾ’ ಆನಿ ಮಾಯಾಚಿ ’ದರ್ಯಾ ಅಸೋಚ್ ಗಾಜ್ತಲೊ’ ಕವಿತಾಂನಿ ಎಕೆ ಆವಯ್ಚ್ಯಾ ಕಾಳ್ಜಾಚಿ ಸಾಮಾನ್ಯ್ ಮನ್ಶಾನ್ ದೆಖನಾತಲ್ಲಿ ಕೂಸ್ ದಾಕಯ್ಲಿ.
ಸಾಟಾಂಕ್ ಮಿಕ್ವೊನ್ ಕಾವ್ಯರಸಿಕ್ ಹ್ಯಾ ಕಾರ್ಯಾಕ್ ಹಾಜರ್ ಆಸಲ್ಲೆ. ಸಗ್ಳೆಂ ಕಾರ್ಯೆಂ ಗೊಂಯ್ ಕೊಂಕಣಿ ಭಾಷಾ ಮಂಡಳಾಚಿ ಕಾರ್ಯದರ್ಶಿ ತಶೆಂ ಯುವ ಕವಯಿತ್ರಿ ಅನ್ವೇಷಾ ಸಿಂಗ್‌ಬಾಳ್ ಹಿಣೆಂ ಚಲೊವ್ನ್ ವೆಲಿ.
ಸುರ‍್ವೆರ್ ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಸರ‍್ವಾಂಕ್ ಯೆವ್ಕಾರ್ ಮಾಗ್ಲೊ. ಗಂಗಾ, ಜಮುನಾ ಆನಿ ಸರಸ್ವತಿಚ್ಯಾ ಸಂಗಮಾಚೆ ತಡಿರ್ ಆಮಿ ಬಸೊನ್ ಆಸಾಂವ್ ಮ್ಹಳ್ಳ್ಯಾ ತಾಣೆ ತೆಗಾಂ ಕವಯಿತ್ರಿಂಕ್ ಹ್ಯಾ ಪವಿತ್ರ್ ನಂಯಾಂಕ್ ಸರ್ ಕೆಲೆಂ.
ಟ್ರಸ್ಟಿ ವಿಲಿಯಮ್ ಪಾಯ್ಸಾನ್ ಧನ್ಯವಾದ್ ಭೆಟಯ್ಲೆ.
मंगळुरांत ’त्रिवेणी’ कविता कार्यक्रम. कोंकणी काव्याचो अपरूप सुवाळो
आपुरबायेच्या, वेगळ्याच पांवड्याच्या चिंतनां सागोराक उप्येवंक आपोवन व्हरचे एके सुमधूर सांजेचो काव्याळ देखावो गोंयच्यो कवयित्री नूतन साखरदांडे, नयना आडार्कार तशें माया खरंगटे हांणी ह्याच फेब्रेर म्हयन्याचे २२ तारकेर सन्वारा सांजेर मंगळूरच्या ऑर्कीड आर्ट गॅलरींत हाजर आसल्ल्या प्रेक्षकांक दाकयलो.
हें काव्याळ कार्यक्रम, कविता ट्रस्ट हांणी गोंय कोंकणी अकाडेमिच्या जोड पालवाखाल मांडून हाडल्ली.
’त्रिवेणी’ नांवाखाल ह्या तेगी कवयित्रिंनी सादर करचें ४६ वें कार्यक्रम हें जावनासल्लें. तेगांय कवयित्रिंनी पावस, मोग, आवयपण, बायलां, प्रकृती अशें वेवेगळ्या विशयांचेर कविता सादर करन प्रेक्षकांक दाधोस केलें. नयना आडार्काराची ’इतिहास जमा’ कवितेंत एक स्त्री आपल्या परन्या घराक आशेताना, आतांच्या फ्लॅटांच्या जिविताचेर हारसो धरता. शेजार म्हळ्ळें नपयिंच जांवचें, एक चरित्रा मात्र जावन उरचेंच हे कवितेचो आशय. नूतन साखरदांडेची ’पासवर्ड’ कवितेंत एक आवय आपल्या पुतालागीं ताच्या काळजाचो पासवर्ड विचारचें काकुळतिचें काळीज आसा. हें विचारून आयच्या कंप्यूटर युगांत आवयलागीं उलंवकय फुरसत नासच्या पुताच्या काळजांत जाय जाताना तिळुंक साध्य जातलें म्हणोन तिका भोगता. माया खरंगटेच्या ’धेण धेणलो’ कवितेंत भृष्टाचार आनी म्हार्गायेचेर तीक नदर आसा. साद्या लोकाक हून लागोंवच्या विशयाचेर विणल्ली ही कविता, जानपद शैलेर कवयित्रीन विणल्या.
पावस आनी मोगाचेर न्हाणयिल्ल्या कवयित्रिंनी स्त्रीयांच्या समस्यांचेरय कविता सादर करून रसिकांचीं मनां जिकलीं. नूतनाची ’आडोळी’ आनी ’दफ्तर आनी पाटी’, नयना आडार्काराची ’शाळा’ आनी मायाची ’दर्या असोच गाजतलो’ कवितांनी एके आवयच्या काळजाची सामान्य मनशान देखनातल्ली कूस दाकयली.
साटांक मिकवोन काव्यरसीक ह्या कार्याक हाजर आसल्ले. सगळें कारयें गोंय कोंकणी भाषा मंडळाची कार्यदर्शी तशें युव कवयित्री अन्वेषा सिंगबाळ हिणें चलोवन वेली.
सुरवेर कविता ट्रस्ट अध्यक्ष मेल्विन रोड्रीगसान सरवांक येवकार मागलो. गंगा, जमुना आनी सरस्वतिच्या संगमाचे तडीर आमी बसोन आसांव म्हळ्ळ्या ताणे तेगां कवयित्रींक ह्या पवित्र नंयांक सर केलें.
ट्रस्टी विलियम पायसान धन्यवाद भेटयले.