ನೇತ್ರಾವತಿ ಕವಿಗೋಷ್ಟಿನ್ ರಸಿಕಾಂಕ್ ದಾಧೊಸ್ಕಾಯೆಚೆ ಝರಿಂತ್ ನ್ಹಾಣಯ್ಲೆಂ
ಕವಿತಾ ಟ್ರಸ್ಟ್ ಹಾಂಣಿ ಹ್ಯಾಚ್ ಮಾರ್ಚ್ 30 ತಾರಿಕೆರ್ ಬಂಟ್ವಾಳ್ ಬಿ.ಸಿ.ರೋಡ್ ಲಾಗ್ಸಾರ್‍ಚ್ಯಾ ಸಂಚಯಗಿರಿ ಹಾಂಗಾಸರ್ ಮಾಂಡುನ್ ಹಾಡಲ್ಲಿ ನೇತ್ರಾವತಿ ಕವಿಗೋಷ್ಟಿ ಮಂಗ್ಳುರ್ ತಶೆಂ ಬಂಟ್ವಾಳ್ ಆಸ್‌ಪಾಸ್ ಥಾವ್ನ್ ಹಾಜರ್ ಆಸಲ್ಲ್ಯಾ ಕಾವ್ಯರಸಿಕಾಂಕ್ ದಾಧೊಶಿ ಕರ್‍ಚ್ಯಾಂತ್ ಯಶಸ್ವಿ ಜಾಲಿ. ತುಳು ಸಂಸ್ಕೃತಿ ಖಾತೀರ್ ಆಪ್ಣಾಕಚ್ ಸಮರ್ಪಿತ್ ಕೆಲ್ಲ್ಯಾ ತುಕಾರಾಮ್ ಪೂಜಾರಿ ಹಾಂಚ್ಯಾ ರಾಣಿ ಅಬ್ಬಕ್ಕ ತುಳು ಅಧ್ಯಯನ ಕೇಂದ್ರ ತಶೆಂ ತುಳು ಬದುಕು ವಸ್ತು ಸಂಗ್ರಹಾಲಯಾಚ್ಯಾ ಆಂಗ್ಣಾಂತ್ ಹಿ ಕವಿಗೋಷ್ಟಿ ಮಾಂಡುನ್ ಹಾಡಲ್ಲಿ.
ಸುರ್‍ವೆರ್ ಸಂಗ್ರಹಾಲಯಾಚಿ ಭೊಂವ್ಡಿ ಜಾಲ್ಯಾ ಉಪ್ರಾಂತ್ ಕವಿತಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸ್ ಹಾಂಣಿ ಸರ್ವಾಂಕ್ ಯೆವ್ಕಾರ್ ದಿಲೊ. ಟ್ರಸ್ಟಾಚೊ ಶೆವೊಟ್ ಆನಿ ವಾವ್ರ್ ಸಾಂಗಲ್ಲ್ಯಾ ತಾಂಣಿ, ಕೊಂಕಣಿ ಕವಿತೆಚೊ ಸಾಹಿತೀಕ್ ಪಾಂವ್ಡೊ ಬಳ್ವಂತ್ ಜಾಂವ್ಚೆದಿಶಿಂ ಕವಿಂನಿ ಚಡಿತ್ ಧ್ಯಾನ್ ದಿಂವ್ಚೆಂ ಗರ್ಜೆಚೆಂ ಆಸಾ. ಕರ್ನಾಟಕಾಚ್ಯಾ ಕೊಂಕಣಿ ಕವಿತೆಂತ್ ನವೆ ವಿಷಯ್ ಆಯ್ಲ್ಯಾತ್ ತರೀ, ಹೆ ವಿಷಯ್ ಉತ್ರಾಂನಿ ಬಾಂಧುನ್ ಧರ್‍ಚಿ ಕಲಾ ಸರ್ವಯ್ ಕವಿಂನಿ ಶಿಕಲ್ಲೆಬರಿ ದಿಸನಾ ಮ್ಹಣೊನ್ ಸಾಂಗ್ಲೆಂ. ಕರ್ನಾಟಕಾಂತ್ಲ್ಯಾ ಕೊಂಕಣಿ ಸಾಹಿತ್ಯಾಂತ್ ಚಡಿತ್ ಪುಸ್ತಕಾಂ ಛಾಪುನ್ ಯೆತಾತ್ ಮ್ಹಣ್ಚೆಂ ಸಾರ್ಕೆಂ ನ್ಹಯ್ ಮ್ಹಣೊನ್ ಸಾಂಗಲ್ಲ್ಯಾ ತಾಂಣಿ ಪಾಟ್ಲ್ಯಾ ತೀನ್ ವರ್ಸಾಂನಿ ಕೊಂಕಣಿ ಭಾಷೆಂತ್ ವೆವೆಗ್ಳ್ಯಾ ಲಿಪಿಂನಿ ಛಾಪುನ್ ಆಯಿಲ್ಲ್ಯಾ ಕವಿತಾ ಪುಸ್ತಕಾಂಚೊ ವಿವರ್ ದಿಲೊ ಆನಿ ಗಜಾಲ್ ನಿಜಾಯ್ಕಿ ಕಳ್ವಳ್ಯಾಂಚಿ ಆಸಾ ಮ್ಹಣೊನ್ ಜಾಗ್ವಣಿ ದಿಲಿ.
ಕವಿಗೋಷ್ಟಿಚೊ ಪಯ್ಲೊ ಪಾಂವ್ಡೊ ಜಾವ್ನ್ ಕವಿ ಗುರು ಬಾಳಿಗಾಲಾಗಿಂ ಸಂವಾದ್ ಚಲ್ಲೊ. ಗುರು ಬಾಳಿಗಾನ್ ಸುರ್‍ವೆರ್ 'ಹಾಂವ್ ಬಾಮಣ್' ಕವಿತಾ ವಾಚ್ಲಿ. ಮೆಲ್ವಿನ್ ರೊಡ್ರಿಗಸಾನ್ ಚಲೊವ್ನ್ ವೆಲ್ಲ್ಯಾ ಹ್ಯಾ ಸಂವಾದ್ ಕಾರ್ಯಾವಳಿಂತ್ ಅಸಲ್ಯಾ ಚಿಂತ್ಪಾಕ್ ಕಾರಣ್ ಜಾಲ್ಲ್ಯಾ ಘಡಿತಾಂಚೊ ಗುರುನ್ ವಿವರ್ ದಿಲೊ. ಕೊಂಕಣಿ ಗೌಡ ಸಾರಸ್ವತ್ ಸಮಾಜಾಂತ್ಲ್ಯಾ ಕೊಣಾಯ್ಕಿ ಮಂಗ್ಳುರ್‍ಚೊ ಲೋಕ್ ಬಾಮ್ಣಾಂಚೊ ಮ್ಹಣ್ ವೊಳ್ಕನಾ, ಬದ್ಲಾ ಕೊಂಕ್ಣ್ಯಾಂಚೊ ಮ್ಹಣ್ ವೊಳ್ಕತಾ ಮ್ಹಣ್ ಸಾಂಗಲ್ಲ್ಯಾ ತಾಣೆ ಬಾಮಣ್‌ಪಣಾಕ್ ಲಾಗೊನ್ ಆಪ್ನಾಚೆ ಮತಿಂತ್ ಜಾಂವ್ಚ್ಯಾ ಝುಜಾಂಕ್ ಜಾಪ್ ದಿಲಿ. ಕವಿತೆಂತ್ಲೊ ಮನೀಸ್ ಜಾನ್ವೆಂ ನಾಸ್ತಾನಾ, ದೆವ್ಳಾಂತ್ ದಾಳಿತೋಯ್ ಜೆವ್ತಾ, ಜಾನ್ವೆಂ ನಾ ದೆಕುನ್ ತಾಕಾ ದೆವ್ಳಾಂತ್ಲೊ ಭಾಯ್ರ್ ಘಾಲ್ತಲೆ ಮ್ಹಳ್ಳಿ ಭಿರಾಂತ್ ನಾ ಜಾತಾ, ಭುಕೆ ಮುಕಾರ್ ಬಾಮಣ್‌ಪಣಾಕ್ ಕಸಲೀಯ್ ಮರ್ಯಾದ್ ನಾ ಜಾತಾ ಮ್ಹಣೊನ್ ತೊ ಸಾಂಗಲಾಗ್ಲೊ. ಮುಕಾರಿಂ 'ಭಿತರ್‍ಲೊ ಸುಧಿರ್' ಕವಿತಾ ತಾಣೆ ವಾಚ್ಲಿ. ಹಾಂಗಾಸರ್ ಆಪುನ್ ಜಾತಿನ್ ಬಾಮುಣ್ ತರೀ, ಭಿತರ್‍ಲ್ಯಾನ್ ಶೂದ್ರ ಮ್ಹಣೊನ್ ವೊಳ್ಕುನ್ ಘೆಂವ್ಚೆಂ ಖಾಲ್ತೆಂ ಕಾಳೀಜ್ ತಾಕಾ ಆಸಾ. ತೊ ಮಾಸ್ ಖಾತಾ, ಜೊಳ್ಕೆಂ ಖಾತಾ, ಅಪ್ರೂಪ್ ಸೊರೊಯ್ ಪಿಯೆತಾ ಮ್ಹಣೊನ್ ಉಗ್ತ್ಯಾನ್ ಸಾಂಗ್ಚ್ಯಾಂತ್ ತಾಕಾ ಭ್ಯೆಂ ನಾ. ಆಪ್ಲ್ಯಾ ಕವಿತಾದ್ವಾರಿಂ ತಶೆಂ ಮೆಲ್ವಿನ್ ರೊಡ್ರಿಗಸಾನ್ ವಿಚಾರಲ್ಲ್ಯಾ ಸವಾಲಾಂಕ್ ಭೋವ್ ಸುಂದರ್ ರಿತಿನ್ ಗುರು ಬಾಳಿಗಾನ್ ಜಾಪಿ ದಿಲ್ಯೊ ಆನಿ ತಾಚೆ ವಿಚಾರ್ ಹಾಜರ್ ಆಸಲ್ಲ್ಯಾಂಕ್ ಕಳಿತ್ ಕೆಲೆ.
ಉಪ್ರಾಂತ್ ಚಲಲ್ಲೆ ಕವಿಗೋಷ್ಟಿಂತ್ ವೀಸ್ ಕವಿ-ಕವಯಿತ್ರಿಂನಿ ಭಾಗ್ ಘೆತ್ಲೊ. ದೆರೆಬೈಲ್ಚ್ಯಾ ಫೆಲ್ಸಿ ಸೊಜಾನ್ 'ಮೆಸ್ತ್ರಿ' ಕವಿತಾ ವಾಚ್ಲಿ. ವೆಂಕಟೇಶ ನಾಯಕಾನ್ 'ಕೋರ್ಟ್ ರೊಡಾಂತ್ಲ್ಯೊ ಮಾಣ್ಕ್ಯೊ' ಕವಿತಾ ಸಾದರ್ ಕೆಲಿ. ನವ್ಯಾ ನ್ ಆಯಿಲ್ಲ್ಯಾ ಓಲ್ವಿನ್ ಸೊಜ್ ಆಗ್ರಾರ್ ಹಾಣೆಂ 'ನಾಕಾಗೋ ಭಾಯ್ಲೆ ಜಾತಿಚೊ' ಕವಿತಾ ವಾಚ್ಲಿ ತರ್, ವಿನ್ಸಿ ಪಿಂಟೊ ಆಂಜೆಲೊರಾನ್ ಥೊಡಿಂ ಚುಟುಕಾಂ ತಶೆಂ ಗಝಲ್ ಪೇಶ್ ಕೆಲಿ. ಮನು ಬಾಹ್ರೇನಾನ್ 'ನಂಯ್ಚಿ ಬದ್ಲಾವಣ್' ಕವಿತಾ ವಾಚ್ಲಿ ತರ್, ಗೀತಾ ಕಿಣಿನ್ 'ಚಂಚಲ್ ಮನ್' ಆನಿ 'ಚಿಂತ್ತೆಚೆಂ ಮ್ಹಾಂತಾರ್‌ಪಣ್' ಕವಿತಾ ವಾಚುನ್ ಸಾಂಗ್ಲ್ಯೊ. ಸಿಕೆರಾಮ್ ಸುರತ್ಕಲ್ ಹಾಣೆ 'ಏಕ್ ನಾರಿ' ಕವಿತಾ ವಾಚ್ಲಿ ತರ್, ವಿದ್ಯಾರ್ಥಿ ತಶೆಂ ಕವಿತಾ ಟ್ರಸ್ಟಾಚ್ಯಾ ಕವಿತಾ ಬರೊಂವ್ಚೆ ಸರ್ತೆಂತ್ ವಿಜೇತ್ ಓಸ್ಟಿನ್ ಡಿಕುನ್ಹಾನ್ 'ಆಮ್ ಆದ್ಮಿ' 'ರಾಕೊನ್ ಆಸಾಂ' ಆನಿ 'ತಾಳೊ' ಕವಿತಾ ವಾಚ್ಲ್ಯೊ. ವಿಲ್ಮಾ ಬಂಟ್ವಾಳಾಚಿ 'ಮುಕ್ಡಿಂ'ಕವಿತಾ ಸುಂದರ್ ಆಸಲ್ಲಿ ತರ್ ಡೊ ವಾರಿಜಾ ದೇವಿನ್ ಭಾಲಾವ್ಲಿಕಾರ್ ಬೋಲಿಂತ್ 'ಪೊರ್‍ಲಾಚೆ ಚಂದಮಾಮ' ಕವಿತಾ ವಾಚ್ಲಿ. ಮೆಲ್ವಿನ್ ರೊಡ್ರಿಗಸಾನ್ 'ನವೆಂ ನಾಂವ್' ಆನಿ 'ಉಸ್ಮಡ್' ಕವಿತಾ ಪೇಶ್ ಕೆಲ್ಯೊ ತರ್ ಅನಸೂಯಾ ಕಾಮತಾನ್ 'ಶುದ್ಧ ಚೋರ್' ಕವಿತಾ ವಾಚ್ಲಿ. ನವೀನ್ ಕುಲ್ಶೇಕರಾನ್ ಕವಿತಾ ವಾಚ್ಲ್ಯಾ ನಂತರ್ ಆಂಡ್ರ್ಯೂ ಡಿಕುನ್ಹಾನ್ 'ಆಯೆರಾಚೊ ಬೂಕ್' ಕವಿತಾ ಆನಿ ಸುಖನ್ಯಾ ನಾಯಕಾನ್ 'ಪಾಡ್ವೊ' ಕವಿತಾ ವಾಚ್ಲಿ. ಗ್ಲೇಡಿಸ್ ರೇಗೊಚ್ಯೊ ಕವಿತಾ ನವೀನ್ ಕುಲ್ಶೇಕರಾನ್ ವಾಚುನ್ ಸಾಂಗ್ಲ್ಯೊ ತರ್, ಸುರೇಶ್ ಬಾಳಿಗಾನ್ ಆಪ್ಣೆಂ ಕವಿತಾ ಹೊಗ್ಡಾಯಿಲ್ಲೆವಿಶಿಂ ಸುಂದರ್ ಪ್ರತಿಮಾ ಅಸ್ಚಿ ಕವಿತಾ ಸಾದರ್ ಕೆಲಿ. ಸ್ಮಿತಾ ಶೆಣೈನ್ 'ಪೊಳೆ ಆನಿ ದೊಳೆ' ಕವಿತಾ ವಾಚ್ಲಿ ತರ್, ಪುತ್ತೂರ್‍ಚ್ಯಾ ಫ್ಲೇವಿಯಾ ಆಲ್ಬುಕೆರ್ಕ್ ಹಿಣೆ 'ಫುಟಲ್ಲೊ ಆರ್ಸೊ' ಕವಿತಾ ವಾಚ್ಲಿ. ನಿಮ್ಣೆಂ ಎಚ್ಚೆಮ್ ಪೆರ್ನಾಳಾನ್ 'ಮ್ಹಜೆಂ ಘರ್' ಆನಿ 'ಎನ್‌ಕೌಂಟರ್' ಅಶ್ಯೋ ದೋನ್ ಕವಿತಾ ವಾಚ್ಲ್ಯೊ.
ಹ್ಯಾ ಕಾರ್ಯಾಕ್ ಕೊಂಕಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಟಾನ್ ಹಾಚೊ ಅಧ್ಯಕ್ಷ್ ಬಸ್ತಿ ವಾಮನ್ ಶೆಣೈ, ಕಾದಂಬರಿಕಾರ್ ರೊನ್ ರೊಚ್ ಕಾಸ್ಸಿಯಾ, ಬರಯ್ಣಾರ್ ಪಾವ್ಲು ಮೊರಾಸ್, ಕವಿ ವಿಲ್ಫ್ರೆಡ್ ಲೋಬೊ ಪಡೀಲ್, ಲೇಖಕಿ ಫ್ಲೋರಿನ್ ರೊಚ್, ಟ್ರಸ್ಟಿ ಎವ್ರೆಲ್ ರೊಡ್ರಿಗಸ್ ಆನಿ ವಿಲಿಯಮ್ ಪಾಯ್ಸ್ ತಶೆಂ ಹೆರ್ ಜಾಯ್ತೆ ಪ್ರೇಕ್ಷಕ್ ಹಾಜರ್ ಆಸಲ್ಲೆ.
नेत्रावती कविगोष्टीन रसिकांक दाधोस्कायेचे झरींत न्हाणयलें
कविता ट्रसट हांणी ह्याच मार्च ३० तारिकेर बंटवाळ बी.सी.रोड लागसारच्या संचयगिरी हांगासर मांडून हाडल्ली नेत्रावती कविगोषटी मंगळूर तशें बंटवाळ आसपास थावन हाजर आसल्ल्या काव्यरसिकांक दाधोशी करच्यांत यशस्वी जाली. तुळू संसकृती खातीर आपणाकच समर्पीत केल्ल्या तुकाराम पूजारी हांच्या राणी अब्बक्क तुळू अध्ययन केंद्र तशें तुळू बदुकू वसतू संग्रहालयाच्या आंगणांत ही कविगोषटी मांडून हाडल्ली.
सूरवेर संग्रहालयाची भोंवडी जाल्या उपरांत कविता ट्रसट अध्यक्ष मेलवीन रोड्रिगस हांणी सर्वांक येवकार दिलो. ट्रसटाचो शेवोट आनी वावर सांगल्ल्या तांणी, कोंकणी कवितेचो साहितीक पांवडो बळवंत जांवचेदिशीं कविंनी चडीत ध्यान दिंवचें गर्जेचें आसा. कर्नाटकाच्या कोंकणी कवितेंत नवे विषय आयल्यात तरी, हे विषय उत्रांनी बांधून धरची कला सर्वय कविंनी शिकल्लेबरी दिसना म्हणोन सांगलें. कर्नाटकांतल्या कोंकणी साहित्यांत चडीत पुसतकां छापून येतात म्हणचें सार्कें न्हय म्हणोन सांगल्ल्या तांणी पाटल्या तीन वर्सांनी कोंकणी भाषेंत वेवेगळ्या लिपिंनी छापून आयिल्ल्या कविता पुसतकांचो विवर दिलो आनी गजाल निजायकी कळवळ्यांची आसा म्हणोन जाग्वणी दिली.
कविगोषटिचो पयलो पांवडो जावन कवी गुरू बाळिगालागीं संवाद चल्लो. गुरू बाळिगान सूरवेर 'हांव बामण' कविता वाचली. मेलवीन रोड्रिगसान चलोवन वेल्ल्या ह्या संवाद काऱ्यावळिंत असल्या चिंत्पाक कारण जाल्ल्या घडितांचो गुरून विवर दिलो. कोंकणी गौड सारस्वत समाजांतल्या कोणायकी मंगळूरचो लोक बामणांचो म्हण वोळकना, बदला कोंकण्यांचो म्हण वोळकता म्हण सांगल्ल्या ताणे बामणपणाक लागोन आपनाचे मतिंत जांवच्या झुजांक जाप दिली. कवितेंतलो मनीस जान्वें नासताना, देवळांत दाळितोय जेवता, जान्वें ना देकून ताका देवळांतलो भायर घाल्तले म्हळ्ळी भिरांत ना जाता, भुके मुकार बामणपणाक कसलीय मरयाद ना जाता म्हणोन तो सांगलागलो. मुकारीं 'भितरलो सुधीर' कविता ताणे वाचली. हांगासर आपून जातीन बामूण तरी, भितरल्यान शूद्र म्हणोन वोळकून घेंवचें खाल्तें काळीज ताका आसा. तो मास खाता, जोळकें खाता, अपरूप सोरोय पियेता म्हणोन उग्त्यान सांगच्यांत ताका भ्यें ना. आपल्या कविताद्वारीं तशें मेलवीन रोड्रिगसान विचारल्ल्या सवालांक भोव सुंदर रितीन गुरू बाळिगान जापी दिल्यो आनी ताचे विचार हाजर आसल्ल्यांक कळीत केले.
उपरांत चलल्ले कविगोषटिंत वीस कवी-कवयित्रिंनी भाग घेतलो. देरेबैल्च्या फेल्सी सोजान 'मेसत्री' कविता वाचली. वेंकटेश नायकान 'कोर्ट रोडांतल्यो माणक्यो' कविता सादर केली. नव्या न आयिल्ल्या ओलवीन सोज आग्रार हाणें 'नाकागो भायले जातिचो' कविता वाचली तर, विन्सी पिंटो आंजेलोरान थोडीं चुटुकां तशें गझल पेश केली. मनू बाह्रेनान 'नंयची बदलावण' कविता वाचली तर, गीता किणीन 'चंचल मन' आनी 'चिंत्तेचें म्हांतारपण' कविता वाचून सांगल्यो. सिकेराम सुरत्कल हाणे 'एक नारी' कविता वाचली तर, विद्यार्थी तशें कविता ट्रसटाच्या कविता बरोंवचे सर्तेंत विजेत ओसटीन डिकुन्हान 'आम आद्मी' 'राकोन आसां' आनी 'ताळो' कविता वाचल्यो. विल्मा बंटवाळाची 'मुकडीं'कविता सुंदर आसल्ली तर डो वारिजा देवीन भालावलिकार बोलिंत 'पोरलाचे चंदमाम' कविता वाचली. मेलवीन रोड्रिगसान 'नवें नांव' आनी 'उस्मड' कविता पेश केल्यो तर अनसूया कामतान 'शुद्ध चोर' कविता वाचली. नवीन कुलशेकरान कविता वाचल्या नंतर आंडऱ्यू डिकुन्हान 'आयेराचो बूक' कविता आनी सुखन्या नायकान 'पाडवो' कविता वाचली. ग्लेडीस रेगोच्यो कविता नवीन कुलशेकरान वाचून सांगल्यो तर, सुरेश बाळिगान आपणें कविता होगडायिल्लेविशीं सुंदर प्रतिमा असची कविता सादर केली. स्मिता शेणैन 'पोळे आनी दोळे' कविता वाचली तर, पुत्तूरच्या फ्लेविया आलबुकेर्क हिणे 'फुटल्लो आर्सो' कविता वाचली. निमणें एच्चेम पेर्नाळान 'म्हजें घर' आनी 'एनकौंटर' अश्यो दोन कविता वाचल्यो.
थळीय संयोजक सुरेश बाळिगान धन्यवाद दिले. मेलवीन रोड्रिगसान येज्मानी तुकाराम पूजारी तशें येज्मान आशालता हांकां भेटवसत दीवन मऱ्याद दिली.
ह्या काऱ्याक कोंकणी भास आनी संसकृती प्रतिषटान हाचो अध्यक्ष बसती वामन शेणै, कादंबरिकार रोन रोच कास्सिया, बरयणार पावलू मोरास, कवी विलफ्रेड लोबो पडील, लेखकी फ्लोरीन रोच, ट्रसटी एवरेल रोड्रिगस आनी विलियम पायस तशें हेर जायते प्रेक्षक हाजर आसल्ले.