ಬ್ರಹ್ಮಾವರಾಂತ್ ಕವಿತಾ ಟ್ರಸ್ಟಾಚಿ ಕವಿತಾಗೋಷ್ಟಿ ಆನಿ ಎಂಟನಿ ಬಾರ್ಕೂರಾಲಾಗಿಂ ಸಂವಾದ್
ಕೊಂಕಣಿ ಕವಿತೆಚೆ ಸಮಗ್ರ್ ಅಭಿವೃದ್ಧಿಖಾತೀರ್ ವಾವುರ್‍ಚ್ಯಾ ಕವಿತಾ ಟ್ರಸ್ಟಾ ತರ್ಫೆನ್ ಹ್ಯಾಚ್ ಜೂನ್ 8ತಾರಿಕೆರ್ ಬ್ರಹ್ಮಾವರ್ ರವಿಪ್ರಕಾಶ್ ಆನಿ ಜ್ಯೋತಿ ಗೊನ್ಸಾಲ್ವಿಸ್ ಹಾಂಚ್ಯಾ ಘರ್‍ಚ್ಯಾ ಆಂಗ್ಣಾಂತ್ ಚಲ್ಲಿ. ಸರಿಸುಮಾರ್ ಸತ್ತರ್ ಲೋಕ್ ಹಾಜರ್ ಆಸಲ್ಲೆ ಹೆ ಕವಿಗೋಷ್ಟಿಕ್ ಮಂಗ್ಳುರ್, ಬ್ರಹ್ಮಾವರ್ ಆನಿ ಬಾರ್ಕೂರ್ ಆಸ್‌ಪಾಸ್ಚ್ಯಾ ಕವಿಂನಿ ಕವಿತಾ ವಾಚ್ಲ್ಯೊ.
ಸುರ್‍ವೆರ್ ಕವಿತಾ ಟ್ರಸ್ಟ್ ಕಾರ್ಯದರ್ಶಿ ಕಿಶೂ ಬಾರ್ಕೂರಾನ್ ಸರ್ವಾಂಕ್ ಯೆವ್ಕಾರ್ ಮಾಗ್ಲೊ. ತ್ಯಾ ಉಪ್ರಾಂತ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಟ್ರಸ್ಟಾಚ್ಯಾ ಕಾರ್ಯಾಂಚಿ ವೊಳಕ್ ಕರುನ್ ದಿಲಿ. ಕವಿತಾ ಕಿತ್ಯಾಕ್ ಗರ್ಜೆಚಿ ಮ್ಹಳ್ಳೆವಿಶಿಂ ದಾಕ್ಲ್ಯಾಂ ಸಮೇತ್ ಉಲಯಿಲ್ಲ್ಯಾ ಮೆಲ್ವಿನಾನ್ ಮುಕ್ಲೆಂ ಕವಿತಾ ಫೆಸ್ತ್, ಜನವರಿ 11 ತಾರಿಕೆರ್ ಬಾರ್ಕೂರ್‍ಚ್ಯಾ ಚೌಳಿಕೆರೆಂತ್ ಜಾತಲೆಂ ಮ್ಹಣೊನ್ ಜಾಹೀರ್ ಕೆಲೆಂ.
ತ್ಯಾ ನಂತರ್ ಕವಿ ಎಂಟನಿ ಬಾರ್ಕೂರಾ ಸಾಂಗಾತಾ ಮೆಲ್ವಿನ್ ರೊಡ್ರಿಗಸಾನ್ ಸಂವಾದ್ ಚಲಯ್ಲೊ. ಎಂಟನಿನ್ ಆಪ್ಲ್ಯೊ ‘ಕುದ್ರ್ಯಾ ಭೊಂವ್ತಣಿ’ ತಶೆಂ ‘ಅಮೇರಿಕನ್ ಏರ್‌ಪೊರ್ಟಾಂತ್ ಏಕ್ ಡ್ರೀಮ್’ ಕವಿತಾ ವಾಚುನ್ ಸಾಂಗ್ಲ್ಯೊ. ಆಪ್ಲ್ಯಾ ಕುದ್ರ್ಯಾಚೆರ್ ಘಡೊನ್ ಗೆಲ್ಲ್ಯೊ ಹಜಾರಾಂನಿ ಕಾಣಿಯೊಂ ಆಪ್ಣಾಕ್ ಹುಮೆದಿಚ್ಯೊ ಝರಿ ಕಿತ್ಯಾಕ್ ಆನಿ ಖಂಯ್ಚ್ಯಾ ಕಾರಣಾಂ ಖಾತೀರ್ ಜಾಂವ್ಕ್ ಸಕ್ಲ್ಯೊನಾಂತ್ ಆನಿ ಆಪುಣ್ ನಿಮಾಣೆಂ ಆಮೇರಿಕೆಕ್ ಕಸೊ ವಚುನ್ ಪಾವ್ಲೊಂ ಮ್ಹಳ್ಳ್ಯಾ ಜಿವಿತಾಂತ್ಲ್ಯಾ ಎಕೆ ಉತ್ರೊಣೆವಿಶಿಂ ಮೆಲ್ವಿನಾನ್ ವಿಚಾರಲ್ಲ್ಯಾ ಸವಾಲಾಂಕ್ ಎಂಟನಿನ್ ಜಾಪಿ ದಿಲ್ಯೊ. ಹಾಜರ್ ಆಸಲ್ಲೊ ಚಡಾವತ್ ಲೋಕ್ ಹ್ಯಾ ಕುದ್ರ್ಯಾಂನಿ ಜಿಯೆಲ್ಲೊಚ್ ಆಸಲ್ಲ್ಯಾನ್, ಎಂಟನಿನ್ ಆಪ್ಲ್ಯಾ ಕವಿತಾಂ ಮಾರಿಫಾತ್ ಜಾಹೀರ್ ಕೆಲ್ಲಿ ಸಂವೇದನಾಂ ಹ್ಯಾ ಸಂವಾದಾ ಮುಕಾಂತ್ರ್ ತುರ್ತಾನ್ ಸರ್ವಾಂನಿ ವೊಳ್ಕುಂಕ್ ಸಾಧ್ಯ್ ಜಾಲೆಂ. ಖಿಣಾನ್ ಹರ್‍ಯೆಕ್ಲ್ಯಾಂಚೆ ಮತಿಂತ್ ಕುದ್ರ್ಯಾವಯ್ಲ್ಯೊ ನವ್ಯೊ ನವ್ಯೊ ಕಾಣಿಯೊಂ ಉಡಾಸಾಂತ್ ಆಯ್ಲ್ಯೊ ಮ್ಹಣೊನ್ ಹಾಜರ್ ಆಸಲ್ಲ್ಯಾಂನಿ ಸಾಂಗ್ಲೆಂ.
ಕ್ಲೊಡಿ ಬ್ರಹ್ಮಾವರ್ ತಶೆಂ ಕಿಶೂ ಬಾರ್ಕೂರಾನ್ ಕವಿಗೋಷ್ಟಿಚೆಂ ಸುಂಕಾಣ್ ಚಲಯ್ಲೆಂ ಆನಿ ಕವಿಂಚಿ ವೊಳಕ್ ಕರುನ್ ದಿಲಿ.
ಸ್ಟೀವನ್ ಲುವಿಸಾನ್ ಆಪ್ಲ್ಯಾ ಹಾಸ್ಯ್ ಚುಟ್ಕುಲಾಂ ನಿಮ್ತಿಂ ಖೂಬ್ ಹಾಸಯ್ಲೆಂ. ಕ್ಲೊಡಿ ಬ್ರಹ್ಮಾವರಾನ್ 'ಆಶೆತಾಂ ಹಾಂವ್' ಕವಿತಾ ವಾಚ್ಲಿ ತರ್, ಮೆಲ್ವಿನ್ ರೊಡ್ರಿಗಸಾನ್ 'ರೊಳ್ಣಿ' ಆನಿ 'ದೇವಿ ನಿನ್ಕಾಸಿ' ಕವಿತಾ ವಾಚುನ್ ಸಾಂಗ್ಲ್ಯೊ. ಡೇವಿಡ್ ಸಿಲ್ವಾ, ಕಲ್ಯಾಣ್‌ಪುರ್ ಹಾಣೆ 'ಭಿಯೆನಾಕಾ' ಆನಿ 'ತುಕಾಚ್ ತುಂ ಪಳಯ್‌ರೆ' ಕವಿತಾ ವಾಚ್ಲ್ಯೊ ತರ್, ಕಿಶೂ ಬಾರ್ಕೂರಾನ್ 'ಧಾಕ್ಟ್ಯಾ ದೆವಾಚಿಂ ಭುರ್ಗಿಂ' ಕವಿತಾ ಸಾದರ್ ಕೆಲಿ. ಎಂಡ್ರ್ಯೂ ಡಿಕುನ್ಹಾನ್ 'ದೂಖ್ ಆನಿ ಫಾತರ್' ಕವಿತಾ ವಾಚ್ಲಿ. ಹಾಜರ್ ಆಸಲ್ಲ್ಯಾ ಎರಿಕ್ ಸೋನ್ಸಾನ್ ಎಂಟನಿಚಿ ಆನಿ ಎಲ್‌ಸ್ಟನ್ ಡಿಸೋಜಾನ್ ಪಿಯುಸ್ ಜೇಮ್ಸ್ ಕರುಗಳ್ನಡೆಚ್ಯೊ ಕವಿತಾ ವಾಚುನ್ ಸಾಂಗ್ಲ್ಯೊ.
ಮೆಲ್ವಿನ್ ರೊಡ್ರಿಗಸಾನ್ ಧನ್ಯವಾದ್ ದೀವ್ನ್ ಘರ್‍ಚ್ಯಾ ಯೆಜ್ಮಾನಿಕ್ ಭೆಟ್‌ವಸ್ತ್ ಸಮರ್ಪಿಲಿ.