ಲ್ಹಾನಾಂ ಥಾವ್ನ್ ವ್ಹಡಾಂಚಿ ಕವಿತೆಚಿ ಉರ್ಬಾ ಆನಿ ಹುಮೆದ್ ವಾಡಯಿಲ್ಲೆಂ ಕವಿತಾ ಫೆಸ್ತ್
ಮಂಗ್ಳುರ್ ಶಕ್ತಿನಗರಾಂತ್ ಆಸ್ಚ್ಯಾ ವಿಶ್ವ ಕೊಂಕಣಿ ಕೇಂದ್ರಾಂತ್ ಕವಿತಾ ಟ್ರಸ್ಟಾನ್ ಮಾಂಡುನ್ ಹಾಡಲ್ಲೆಂ ಧಾವ್ಯಾ ವರ್ಸಾಚೆಂ ಕವಿತಾ ಫೆಸ್ತ್ ಹಾಜರ್ ಆಸಲ್ಯಾ ಕವಿತಾ ರಸಿಕಾಂಕ್ ದಾಧೊಸ್ಕಾಯೆಂತ್ ನ್ಹಾಣಂವ್ಚ್ಯಾಂತ್ ಯಶಸ್ವಿ ಜಾಲೆಂ ಮಾತ್ರ್ ನ್ಹಯ್, ಜಿವಿತಾಂತ್ ಸುಖ್ ಭೊಗುಂಕ್ ಆಶೆತೆಲ್ಯಾಂನಿ ಕವಿತಾ ತಸಲ್ಯಾ ವಾಟಾಂನಿ ಸಯ್ತ್ ಚಮ್ಕುನ್ ವಚ್ಯೆತಾ ಮ್ಹಣುನ್ ಪಾಚಾರಿಲಾಗ್ಲೆಂ.
ಕೊಂಕಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಠಾನ್ ಹಾಂಚ್ಯಾ ಜೋಡ್ ಪಾಲ್ವಾನ್ ಮಾಂಡುನ್ ಹಾಡಲ್ಲ್ಯಾ ಹ್ಯಾ ಫೆಸ್ತಾಚಿ ಸುರ್‍ವಾತ್ ಬೆಂಡಾ ವ್ಹಾಜ್ಪಾ ಸಾಂಗಾತಾ ಪುರ್ಶಾಂವಾರ್ ಜಾಲಿ. ಬಾರ್ಕೂರ್‍ಚ್ಯಾ ಫ್ರೆಂಕ್ಲಿನ್ ಆನಿ ಪಂಗ್ಡಾನ್ ಕವಿತಾ ಟ್ರಸ್ಟಾಚೆಂ ಆಶಯ್ ಗೀತ್ ಗಾಯ್ತಚ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸ್ ಆನಿ ಕಾರ್ಯದರ್ಶಿ ಕಿಶೋರ್ ಗೊನ್ಸಾಲ್ವಿಸಾನ್ ಸಯ್ರ್ಯಾಂಕ್ ವೇದಿಕ್ ಆಪೊವ್ನ್ ವೆಲೆಂ. ಕಿಶೋರ್ ಗೊನ್ಸಾಲ್ವಿಸಾನ್ ಯೆವ್ಕಾರ್ ಉಲೊವ್ಪ್ ಕರ್‍ತಚ್ ಮುಕೆಲ್ ಸೈರಿಣ್ ಇಂಗ್ಲಿಷ್ ಕವಯಿತ್ರಿ ತಶೆಂ ಲೇಖಕಿ ಮೇನಕಾ ಶಿವದಾಸನಿ ತಶೆಂ ಕೊಂಕಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಟಾನಾಚೊ ಅಧ್ಯಕ್ಷ್ ಬಸ್ತಿ ವಾಮನ್ ಶೆಣೈ ಹಾಂಣಿ ಟ್ರಸ್ಟಾಚ್ಯಾ ವಾಂಗ್ಡ್ಯಾಂ ಸವೆಂ ವಾರ್‍ಯಾರ್ ಗುಲೊಬಾಚ್ಯೊ ಪಾಕ್ಳ್ಯೊ ಉಬೊವ್ನ್ ಫೆಸ್ತಾಕ್ ಚಾಲನ್ ದಿಲೆಂ.
ತ್ಯಾ ಉಪ್ರಾಂತ್ ಟ್ರಸ್ಟಾಚ್ಯಾ ದಾನಿಂನಿ, ಮೋಗಿಂನಿ, ಹಿತಚಿಂತಕಾಂನಿ, ಕವಿಂನಿ ವೇದಿರ್ ದವರಲ್ಲ್ಯಾ ಕಡಾಯಾಂತ್ಲ್ಯಾ ಉದ್ಕಾಂತ್ ಪಾಕ್ಳ್ಯೊ ವೊತುನ್ ಹ್ಯಾ ಫೆಸ್ತಾಕ್ ರಂಗ್ ಹಾಡ್ಲೊ ಆನಿ ತಾಂಚೊ ಸಹಕಾರ್ ಭಾಸಾಯ್ಲೊ.
ಹ್ಯಾ ಸಂದರ್ಭಾರ್ ಉಲಯಿಲ್ಲ್ಯಾ ಬಸ್ತಿ ವಾಮನ್ ಶೆಣೈನ್ "ಚಡ್ ಆನಿಂ ಚಡ್ ಕಾರ್‍ಯಿಂ ಹ್ಯಾ ವಠಾರಾಂತ್ ಕರುಂಕ್ ಜಾಯ್" ಮ್ಹಣುನ್ ಸಾಂಗುನ್ ಫೆಸ್ತಾಕ್ ಯಶಸ್ವಿ ಮಾಗ್ಲಿ. ಹ್ಯಾಚ್ ಸಂದರ್ಭಾರ್ ಮೇನಕಾ ಶಿವದಾಸನಿನ್ ಸ್ಟೀವನ್ ಕ್ವಾಡ್ರಸಾನ್ ಬರೊವ್ನ್ ಕವಿತಾ ಪಬ್ಲಿಕೇಶನ್ಸಾನ್ ಪರ್ಗಟಲ್ಲೊ 'ಬಾನ್ನೆಂ' ಕವಿತಾ ಲೇಖನಾಂಚೊ ಪುಸ್ತಕ್ ಲೋಕಾರ್ಪಣ್ ಕೆಲೊ. ವಿತೊರಿ ಕಾರ್ಕಳಾನ್ ಪುಸ್ತಕಾವಿಶಿಂ ಆನಿ ಲೇಖಕಾವಿಶಿಂ ಮ್ಹಾಯೆತ್ ದಿಲಿ.
ಹ್ಯಾ ಸಂದರ್ಭಾರ್ ಉಲಯಿಲ್ಲ್ಯಾ ಸ್ಟೀವನ್ ಕ್ವಾಡ್ರಸಾನ್ ಬಾನ್ನೆಂ (ಬಾಂದ್ನೆಂ) ಸಬ್ದಾಚೊ ಅರ್ಥ್ ವಿವರುನ್ ಸಾಂಗ್ಲೊ. ಕಶೆಂ ಕೃಶಿಕಾಂ ಮಧೆಂ ಉದಕ್ ಬಾಂಧುನ್ ದವ್ರುಂಕ್ ಆನಿ ಉದಕ್ ಸೊಡುಂಕ್ ಬಾನ್ನ್ಯಾಚೊ ಉಪೇಗ್ ಜಾತಾ ಮ್ಹಣುನ್ ತಾಣೆ ಸಾಂಗ್ಲೆಂ.
ಮುಕೆಲ್ ಸೈರಿಣ್ ಜಾವ್ನ್ ಆಯಿಲ್ಲ್ಯಾ ಮೇನಕಾ ಶಿವದಾಸನಿನ್ "ಕವಿತೆಕ್ ಮೋಲ್ ದೀಂವ್ಕ್ ಕಳಿತ್ ನಾಸ್ಚ್ಯಾ ಸಂಸಾರಾಂತ್ ಕವಿತಾ ಹಾಡ್ಚೆಂ ಕಾಮ್ ಸುಲಭಾಯೆಚೆಂ ನ್ಹಯ್" ಮ್ಹಣ್ ಆಪ್ಲೆಂ ಉಲೊವ್ಪ್ ಸುರು ಕೆಲ್ಲ್ಯಾ ತಿಣೆಂ, ಆಯ್ಲೆವಾರ್ ಕೊಂಕಣಿ ಕವಿತಾ ಶೆತಾಂತ್ ಜಾಲ್ಲಿ ವಿಶೇಸ್ ವಾಡಾವಳ್ ಸಬಾರ್ ದಾಕ್ಲ್ಯಾಂ ಸವೆಂ ಸಾದರ್ ಕೆಲಿ. ಮುಖಾರುನ್ ತಿಣೆಂ ಮ್ಹಳೆಂ "ಕವಿ ಮ್ಹಳ್ಳ್ಯಾರ್ ಭಾರಿಚ್ ಧೈರಾದಿಕ್. ಹಾಂವೆಂ ಅರ್ಧೆ ಪಾತ್ಯೆಣೆನ್ ಮುಂಬಯಾಂತ್ "ಪೋಯೆಟ್ರಿ ಸರ್ಕಲ್" ಆರಂಭ್ ಕೆಲ್ಲೆಂ -1986 ಇಸ್ವೆಂತ್. ಪುಣ್ ಸಾಲ್ ಭರ್ತಿ ಜಾಲ್ಲೆಂ". ತಿಚ್ಯಾ ಉಲೊವ್ಪಾಚೊ ಪ್ರಮುಖ್ ವಿಶಯ್ ಜಾವ್ನಾಸಲ್ಲೊ ಕವಿತೆಚಿ "ಕ್ವಾಲಿಟಿ ಯಾ ಗುಣಾಮೋಲ್". "ಆಜ್ ಕಾಲ್ ಕವಿತಾ ಫಾಯ್ಸ್ ಕರುಂಕ್ ಸಬಾರ್ ವಿಧಾನಾಂ ಮೆಳ್ತಾತ್ - ಇಂಟರ್ನೆಟ್, ಸೋಶಿಯಲ್ ಮೀಡಿಯಾ, ಬ್ಲೋಗ್ ಅಶೆಂ. ಇಲ್ಲೇಂಯ್ ಚಾಳಿನಾಸ್ತಾಂ, ಗಾಳಿನಾಸ್ತಾಂ ಹ್ಯೊ ಕವಿತಾ ಫಾಯ್ಸ್ ಜಾತಾತ್, ಹ್ಯಾ ನಿಮ್ತಿಂ ಕವಿತೆಚಿ ಖಾತಡ್ ಜಾಲ್ಯಾ. ಹೆಂ ಚುಕಯ್ಜಾಯ್.
"ಕವಿತಾ ಬರಯ್ತಾನಾ ಕವಿತೆಚೊ ವಿಶಯ್ ಕಿತ್ಲೊ ಪ್ರಮುಖ್‌ಗೀ ತಿತ್ಲೆಂ ಗರ್ಜೆಚೆಂ "ಕವಿತೆಚೆಂ ಶಿಲ್ಪ್". ಸಾರ್ಕೆಂ ವ್ಯಾಕರಣ್, ಸಾರ್ಕ್ಯಾ ಜಾಗ್ಯಾರ್ ಅಲ್ಪ್ ವಿರಾಮ್, ಪೂರ್ಣ್ ವಿರಾಮ್ ಇತ್ಯಾದಿ. ತಿತ್ಲೆಂಚ್ ಗರ್ಜೆಚೆಂ ಆಸಾ ಕವಿತಾ ತಿದ್ವುಂಚಿ. ಕವಿತಾ ಮ್ಹಳ್ಳ್ಯಾರ್ ಭೊಗ್ಣಾಂಚೊ ವ್ಹಾಳೊ, ದೆಕುನ್ 'ಹಾಂವ್ ಕವಿತಾ ಏಕ್ ಪಾವ್ಟಿಂ ಮಾತ್ರ್ ಬರಯ್ತಾಂ ಆನಿ ತ್ಯಾ ಉಪ್ರಾಂತ್ ಆಪ್ಡುನ್ ಪಳಯ್ನಾ' ಮ್ಹಣ್ಚೆಂ ಸಾರ್ಕೆಂ ನ್ಹಯ್. ಕವಿತೆಚೆಂ ಶಿಲ್ಪ್ ಸುಧ್ರಾಂವ್ಚಿ ಏಕ್ ನಿರಂತರ್ ಪ್ರಕ್ರಿಯಾ.
"ಕವಿತೆಚೆಂ 'ಗುಣಾಮೋಲ್' ಉಂಚಾಯೆಕ್ ಪಾವೊಂವ್ಚೆಂ ಗರ್ಜೆಚೆಂ ಕಿತ್ಯಾಕ್ ಕವಿತೆಚಿ ಸಾಧ್ಯತಾಯ್ ವಿಶೇಸ್. ಕವಿತಾ ಭಾಶೆಚಿ ವಿವಿಧ್ ಸಾಧ್ಯತಾ ಆನಿ ವೈವಿಧ್ಯತಾ ಭಾಯ್ರ್ ಹಾಡ್ತಾ. ತಶೆಂಚ್ ಸಮಾಜಾಚ್ಯಾ ಸವಾಲಾಂಚೆರ್ ಉಬ್ಜಲ್ಲಿ ಕವಿತಾ 'ಬದ್ಲಾವಣೆ'ಕ್ ಕಾರಣ್ ಜಾತಾ. ಕವಿತಾ ಬರೊಂವ್ಚಿ ಏಕ್ 'ಎಕಾಂತಾ'ಚಿ ಪ್ರಕ್ರಿಯಾ. ಪುಣ್ ತಿ ಸಮಾಜಾಕ್ ಪಾವೊಂವ್ಚಿ ಗರ್ಜ್‌ಯ್ ಆಸಾ. ತಶೆಂಚ್ ಭುರ್ಗ್ಯಾಂಕ್ ಹಾಂತುಂ ಮೆತೆರ್ ಕರಿಜಾಯ್, ಕಿತ್ಯಾಕ್ ತಿಂ ಆಮ್ಚೊ ಫುಡಾರ್. 10000 poets for change ಮ್ಹಳ್ಳೆ ಚಳ್ವಳೆ ದ್ವಾರಿಂ ಹಜಾರೊಂ ಕವಿಂನಿ ಕವಿತಾ ಲಿಖ್ಲ್ಯೊ ಮಾತ್ರ್ ನ್ಹಯ್ ಸಬಾರ್ ಸಮಾಜಿಕ್ ಸಮಸ್ಯಾಂ ವಯ್ರ್ ಕಾಮ್ ಸಯ್ತ್ ಕೆಲೆಂ (ದರ್ಯಾ ತಡ್ ನಿತಳ್ ಕರ್‍ಚಿ, ಸ್ತ್ರೀ ಶೋಷಣ್ ಅಶೆಂ). ತಶೆಂ ಕವಿತಾ ಮ್ಹಳ್ಳ್ಯಾರ್ ಬದ್ಲಾವಣ್ ಹಾಡುಂಕ್ ಸಕ್ಚೆಂ ಏಕ್ ಮಾಧ್ಯಮ್" ಅಶೆಂ ಮ್ಹಣಾಲಿ ಮೇನಕಾ ಶಿವದಾಸನಿ.
ಮ್ಯಾಕ್ಸಿಮ್ ಲೋಬೊಚ್ಯಾ ಅಧ್ಯಕ್ಷಪಣಾರ್ ಚಲಲ್ಲೆ ಕವಿಗೋಷ್ಟಿಂತ್ ಜೆರಾಲಿನ್ ಪಿಂಟೊನ್ ಇಂಗ್ಲಿಷ್ ಕವಿತಾ ವಾಚ್ಲಿ ತರ್, ಅಬ್ದುಲ್ ಸತ್ತಾರ್ ಗೂಡಿನಬಳಿನ್ ಬ್ಯಾರಿ ಕವಿತಾ ವಾಚ್ಲಿ. ಎಂಡ್ರ್ಯೂ ಎಲ್ ಡಿಕುನ್ಹಾನ್ ಕೊಂಕಣಿಕ್ ತರ್ಜನ್ ಕೆಲ್ಲಿ ತಾಚಿ ಬ್ಯಾರಿ ಕವಿತಾ ವಾಚ್ಲಿ. ಜ್ಯೋತಿ ಚೇಳ್ಯಾರುಚಿ ತುಳು ಕವಿತಾ ಪಯ್ಲೆಂ ಕೊಂಕಣಿಂತ್ ಕ್ಯಾಥರಿನ್ ರೊಡ್ರಿಗಸಾನ್ ವಾಚುನ್ ಜಾತಚ್, ಜ್ಯೋತಿನ್ ತುಳುಂತ್ ವಾಚ್ಲಿ. ಕೊಂಕಣಿಂತ್ ಪ್ರಕಾಶ್ ಪಾಡ್ಗಾಂವ್ಕಾರ್, ಆರ್. ರಾಮನಾಥ್, ಶರತ್‌ಚಂದ್ರ ಶೆಣೈ, ಸ್ಮಿತಾ ಶೆಣೈ, ಮಾವ್ರಿಸ್ ಡೇಸಾ ಶಾಂತಿಪುರ, ಇಕ್ಬಾಲ್ ಸಯೀದಿ ಆನಿ ಮ್ಯಾಕ್ಸಿಮ್ ಲೋಬೊನ್ ಕವಿತಾ ವಾಚ್ಲ್ಯೊ.
ತ್ಯಾ ಉಪ್ರಾಂತ್ ನೆಲ್ಸನ್ ಆನಿ ಲವೀನಾ ರೊಡ್ರಿಕ್ಸ್, ದುಸ್ರೊ ಚಾಫ್ರಾ ದೆಕೊಸ್ತಾ ಸ್ಮಾರಕ್ ಕೊಂಕಣಿ ಕವಿತಾ ವಾಚನ್ ಸ್ಪರ್ಧೊ ಭುರ್ಗ್ಯಾಂ ಖಾತೀರ್ ಚಲ್ಲೊ. ಫೈನಲಾಕ್ ಆಯಿಲ್ಲ್ಯಾ ಸತ್ರಾ ಭುರ್ಗ್ಯಾಂನಿ ಹಾಂತುಂ ವಾಂಟೊ ಘೆತಲ್ಲೊ. ಮೆಲ್ವಿನ್ ರೊಡ್ರಿಗಸನಾ ಸರ್ತೆಚಿಂ ನೆಮಾಂ ಸಾಂಗ್ಲಿಂ. ಸ್ಮಿತಾ ಶೆಣೈ, ಎಡ್ಡಿ ಸಿಕೇರ್, ಎಂಡ್ರ್ಯೂ ಎಲ್ ಡಿಕುನ್ಹಾ, ವಿಲಿಯಮ್ ಪಾಯ್ಸ್, ನೂತನ್ ಸಾಖರ್‌ದಾಂಡೆ ಆನಿ ಮೆಲ್ವಿನ್ ರೊಡ್ರಿಗಸ್ ವೊರಯ್ಣಾರ್ ಜಾವ್ನ್ ಆಸಲ್ಲಿಂ. ವಿತೊರಿ ಕಾರ್ಕಳಾನ್ ಸೂತ್ರ್ ಸಂಚಾಲನ್ ಕೆಲೆಂ.
ದೊನ್ಪಾರಾಂ ಜೆವ್ಣಾ ಉಪ್ರಾಂತ್ ರೋಹನ್ ಆನಿ ಲವೀಟಾ ಮೊಂತೇರೊ ಪಾಂಚ್ವೊ ಅಖಿಲ್ ಭಾರತ್ ಕೊಂಕಣಿ ಕವಿತಾ ವಾಚನ್ ಸ್ಪರ್ಧೊ ಚಲ್ಲೊ. ವೀಸ್ ಯುವಜಣಾಂನಿ ಹಾಂತುಂ ವಾಂಟೊ ಘೆತಲ್ಲೊ. ಕಿಶೂ ಬಾರ್ಕೂರ್, ಮ್ಯಾಕ್ಸಿಮ್ ಲೋಬೊ, ಅರುಣ್ ಸಾಖರ್‌ದಾಂಡೆ, ಕುಸುಮ್ ಅಗರ್ವಾಲ್, ಗುರು ಬಾಳಿಗಾ ಆನಿ ಮೆಲ್ವಿನ್ ರೊಡ್ರಿಗಸ್ ವೊರಯ್ಣಾರ್ ಮ್ಹಣುನ್ ಆಸಲ್ಲೆ. ವಿತೊರಿ ಕಾರ್ಕಳಾನ್ ಸಹಕಾರ್ ದಿಲೊ.
ತ್ಯಾ ಉಪ್ರಾಂತ್ ಕಲಾಕಾರ್, ದಿಗ್ದರ್ಶಕ್ ತಶೆಂ ಕವಿ ಎಡ್ಡಿ ಸಿಕೇರಿನ್, ಕವಯಿತ್ರಿ ನೂತನ್ ಸಾಖರ್‌ದಾಂಡೆಲಾಗಿಂ ಚಲಯಿಲ್ಲೊ ಸಂವಾದ್ "ಮ್ಹಜಿ ಜೀಣ್, ಮ್ಹಜಿ ಕವಿತಾ" ಹಾಜರ್ ಆಸ್ಲಲ್ಯಾಂಕ್ ಯೆದೊಳ್ ಜಾಯ್ನಾತಲ್ಲೊ ಅನ್ಭೋಗ್ ದಿಂವ್ಚ್ಯಾಂತ್ ಸುಫಳ್ ಜಾಲೊ ಮ್ಹಣ್ಯೆತ್. "ಲ್ಹಾನಪಣಾರ್ ಘರಾ ಮುಕಾರ್ ಆಸಲ್ಲೆ ಲೈಬ್ರರಿಂತ್ ಹಾಂವ್ ಮಸ್ತ್ ವೇಳ್ ವಾಚ್ತಾಲಿಂ. ತಶೆಂಚ್ ಮ್ಹಜ್ಯಾ ಲ್ಹಾನ್ಪಣಾರ್ ಆವಯ್ ಬಾಪಾಯ್ಕ್ ಹೊಗ್ಡಾಯಿಲ್ಲೆಂ, ಕೊಲೆಜಿಂತ್ ಗಾಯಾನ್ ಕರ್‍ತಾನಾ ಜ್ಯೂನಿಯರ್ ಭುರ್ಗ್ಯಾಂನಿ ಕೆಲ್ಲೊ ಗಲಾಟೊ, ಶೆಜಾರಾ ಕುಟ್ಮಾಂತ್ ಕಾಜಾರಾ ವೆಳಾರ್ ಜಾಲ್ಲೆಂ ಎಕ್ಸಿಡೆಂಟ್... ಅಸಲ್ಯಾ ಘಡಿತಾಂನಿ ನಿರ್ಶೆಲ್ಲೆ ಜಿಣಿಯೆನ್ ಮ್ಹಾಕಾ ಕವಯಿತ್ರಿ ಕೆಲೆಂ" ಅಶೆಂ ಮ್ಹಣಾಲಿ ನೂತನ್. "ತಶೆಂಚ್ ಹಾಂವ್ ಬರಯಿಲ್ಲಿ ಕವಿತಾ ವ್ಹರುನ್ ಮ್ಹಜ್ಯಾ ಗುರುಕ್ ದಾಕಯ್ತಾಲಿಂ, ತಾಂಣಿ ದಿಲ್ಲ್ಯಾ ಹಿಶಾರ್‍ಯಾಂ ಪ್ರಕಾರ್ ಚಲ್ತಾಲಿಂ. ಪುಣ್ ಆತಾಂಚಿಂ ಭುರ್ಗಿಂ ಅಶೆಂ ಕರಿನಾಂತ್. ಮ್ಹಜೆಲಾಗಿಂ ವಿಚಾರುನ್ ಯೆಂವ್ಚಿಂ ಮಸ್ತ್ ಉಣೆ" ಮ್ಹಣುನ್ ತಿಣೆಂ ಸಾಂಗ್ಲೆಂ.
"ಕವಯತ್ರಿ ನ್ಹಯ್ ಮ್ಹಣ್ ತುಕಾ ಕೆನ್ನಾಂಯ್ ಭೊಗಲ್ಲೆಂ ಆಸಾ?" ಮ್ಹಣುನ್ ಎಡ್ಡಿನ್ ವಿಚಾರಲ್ಲ್ಯಾ ಸವಾಲಾಕ್ ತಿಣೆಂ "ವ್ಹಯ್, ಜೆನ್ನಾಂ ಸ ಯಾ ಸಾತ್ ಮ್ಹಯ್ನೆ ಕಿತೆಂಚ್ ಝಳ್ಕನಾ ತೆದ್ನಾಂ ಅಸಲೊ ದುಬಾವ್ ಯೆತಾ" ಮ್ಹಳೆಂ.
"ಆಪ್ಣಾಕ್ ಚಡಿತ್ ಆಂವಡಲ್ಲ್ಯಾ ಕವಿತಾಂ ಪಯ್ಕಿ, ಮನೋಹರ್ ಬಾಬಾಚಿ "ಲೋಕ್‌ಶಾಯ್" ಕವಿತಾ ಏಕ್ - ಹಿ ಆಮಿ ಕಿತ್ಲೆ ಪಾವ್ಟಿಂ ತಾಚೆಕಡೆ ಸಾಂಗುಂಕ್ ಲಾಯ್‌ಲ್ಲಿ ತೆಂ ಲೇಕ್ ಕರುಂಕ್ ಜಾಂವ್ಚೆಂನಾ. ತಿತ್ಲೀಯ್ ಉತ್ತೀಮ್ ಕವಿತಾ ತಿ" ಅಶೆಂ ಎಕಾ ಸವಾಲಾಕ್ ತಿಣೆಂ ಜಾಪ್ ದಿಲಿ.
ತಿಚಿ 'ದೆಣೆ' ಕವಿತಾ ಫಕತ್ ಏಕ್ ಸ್ತ್ರೀ ಲಿಖುಂಕ್ ಸಕ್ತಾ. ತಿ ಉದೆಲ್ಲಿ ಕಶಿ? ಮ್ಹಣುನ್ ಎಡಿನ್ ವಿಚಾರಲ್ಲ್ಯಾ ವೆಳಾರ್ ನೂತನಾನ್ "ಮ್ಹಜ್ಯಾ ತಿಸ್ರ್ಯಾ ಬಾಳಾಕ್ ಭುರ್ಗಿಂ ನಾತಲ್ಲೆ ಮ್ಹಜೆ ಭಯ್ಣಿಕ್ ಪೊಸ್ಕೊ ಜಾವ್ನ್ ದಿತಾನಾ" ಮ್ಹಣುನ್ ಜಾಪ್ ದಿಲ್ಲೆ ತವಳ್, ಸಭಿಕಾಂ ಮಧೆಂ ಮೊನೆಪಣ್ ರೆವ್ಡೊನ್ ಗೆಲೆಂ ಆನಿ ಕ್ರಮೇಣ್ ಎಕೆಕ್ಲ್ಯಾಂನಿ ತಿಕಾ ತಾಳಿಯೊ ಪೆಟುನ್ ಲಾಂಬಾಯೆಕ್ ಶಾಭಾಸ್ಕಿ ಉಚಾರ್‍ಲಿ. ಥೊಡ್ಯಾಂಚ್ಯಾ ದೊಳ್ಯಾಂನಿ ದುಖಾಂ ಭರಲ್ಲಿಂ ಹ್ಯಾ ಸಂದರ್ಭಾರ್ ದಿಸುನ್ ಆಯ್ಲಿಂ.
'ಪಾಸ್ವರ್ಡ್' ಕವಿತೆ ವಿಶಿಂ ಎಡಿನ್ ವಿಚಾರಲ್ಲ್ಯಾ ಸವಾಲಾಕ್ ಜಾಪ್ ಜಾವ್ನ್ "ಜೆದ್ನಾಂ ಮ್ಹಜೊ ಪೂತ್ ಹರ್‍ಯೆಕಾ ವೆಳಾರ್ ಪಾಸ್ಳೆಂತ್ ಲ್ಯಾಪ್‌ಟೋಪ್ ಘೆವುನ್ ಬಸುನ್ ಆಸ್ತಾಲೊ, ತೆದ್ನಾಂ ಮ್ಹಜಿ ವಿನತಿ ಆಸಲ್ಲಿ, "ವೆಚ್ಯಾ ಫುಡೆಂ ತುಜ್ಯಾ ಕಾಳ್ಜಾಚೊ ಪಾಸ್ವರ್ಡ್ ಮ್ಹಾಕಾ ದಿವುನ್ ವಚ್" ಮ್ಹಣ್. ಎಕೆ ಆವಯ್ಚೆ ಆಕ್ಲಾಸ್ ಹೆ" ಅಶೆಂ ತಿಣೆಂ ಸಾಂಗ್ಲೆಂ.
ನೂತನಾಚೊ ಪತಿ ಕವಿ ಅರುಣ್ ಸಾಖರದಾಂಡೆಕ್ ಮನಾಂತ್ ದವ್ರುನ್ ಎಡಿನ್ "ಘರಾಂತ್ ದೊಗಾಂಯ್ ಬರಯ್ತಾತ್ ತೆದ್ನಾಂ ಕಿತೆಂ ಚಲ್ತಾ?" ಮ್ಹಣುನ್ ವಿಚಾರಲ್ಲ್ಯಾ ಸವಾಲಾಕ್ "ಫಾಯ್ದೊ ಮ್ಹಳ್ಳ್ಯಾರ್ ಮ್ಹಜೊ ಪತಿ ಮ್ಹಜೊ 'ವಿಮರ್ಶಕ್' ಆನಿ 'ಮಾರ್ಗ್‌ದರ್ಶಕ್'. ತಶೆಂ ಘರಾ ಬರೊವ್ಪಾಚೆಂ ವಾತಾವರಣ್ ಉರ್‍ತಾ. ತಶೆಂ ಆಮಿ ಸರ್ವ್ ವಿಶಯಾಂತ್ ಎಕಾಮೆಕಾ ನಾಕ್ ಚೆಪಿನಾಂವ್. ತಶೆಂ ಸ್ವಾತಂತ್ರಯ್ ಉರ್‍ಲಾಂ. ಪುಣ್ ಘೊವ್-ಬಾಯ್ಲ್ ಮ್ಹಣ್ತಾನಾ, ಆಮೀಂಯ್ ಸಾಮಾನ್ಯ್ ಮನ್ಶಾಂ - ಕಿತೆಂ ತರೀ ಗೊಂದೊಳ್ ಯೆತಾ, ತೊಂದ್ರೆ ಯೆತಾತ್. ತೆಂ ಆಮಿ ಸುಧಾರ್ಸುನ್ ವೆತಾಂವ್" ಅಶೆಂ ನೂತನ್ ಮ್ಹಣಾಲಿ. "ಜೆನ್ನಾಂ ಪತಿ ಆಪ್ಲ್ಯಾ ಕಾಮಾರ್ ವ್ಯಸ್ತ್ ಆಸ್ತಾಲೊ ಆನಿ ಹಾಂವ್ ಕಾಮ್, ಘರ್-ದಾರ್, ಭುರ್ಗಿಂ ಆನಿಂ ಬರೊವ್ಪ್ - ಸಾಂಬಾಳುಂಕ್ ಕಷ್ಟಾತಾಲಿಂ. ತೆದ್ನಾಂ "ಮ್ಹಾಕಾ ಸುಟಿ ಜಾಯ್" ಅಸಲೆ ಕಾಲೆತಿಚಿ ಕವಿತಾ ಮ್ಹಜೆ ಥಂಯ್ ಉದೆಲಿ" ಅಶೆಂ ತಿಣೆಂ ಹ್ಯಾ ಸಂದರ್ಭಾರ್ ಸಾಂಗ್ಲೆಂ.
"ಸಾಹಿತಿಕ್ ವಾವ್ರ್, ಘರ್ ಆನಿ ಕಾಮ್ - ಹೆಂ ಸಕ್ಕಡ್ ಕಶೆಂ ಸಾಂಬಾಳುನ್ ವ್ಹರ್‍ತಾಯ್?" ಮ್ಹಳ್ಳ್ಯಾ ಎಡಿಚ್ಯಾ ಸವಾಲಾಕ್ "ಬ್ಯಾಂಕಾಚೆಂ ಕಾಮ್ - ಮ್ಹಜ್ಯಾ ಸಾಹಿತಿಕ್ ವಾವ್ರಾಕ್ ಸಾಂಗಲ್ಲೆಂ ನ್ಹಯ್. ತರೀ ಬ್ಯಾಂಕಾಚೆ ಜಿಣ್ಯೆಚ್ಯೊ ಸಬಾರ್ ಗಜಾಲಿ ರೂಪಕ್ ಜಾವ್ನ್ ಕವಿತೆಂನಿ ಆಯ್ಲ್ಯಾತ್ - ಬ್ಯಾಂಕಾಕ್ ವೆತಾನಾ ತಕ್ಲಿ ಕಾಡ್ನ್ ಭಿತರ್ ಚೆಪುನ್ ಕಂಪ್ಯೂಟರಾಂತ್ 'ಲೊಗಿನ್' ಜಾಂವ್ಚೆಂ, ತಶೆಂಚ್ ಘರಾ ಯೆತಚ್ ಕುಜ್ನಾಂತ್ 'ಲೊಗಿನ್' ಜಾಂವ್ಚೆಂ. ಹ್ಯಾಚ್ ವೆಳಾ ಆಮಿ ತೆಗಾಂ ಕವಯತ್ರಿಂನಿ ಮೆಳುನ್ "ತ್ರಿವೇಣಿ" ಮ್ಹಳ್ಳೊ ಪಂಗಡ್ ಕರುನ್ ಕವಿತಾ ಲೊಕಾಮೆರೆನ್ ಪಾವೊಂವ್ಚೆಂ ಕಾಮ್ ಕೆಲೆಂ. ಅಸಲಿಂ ಪ್ರಯತನಾಂ ಆನಿ ಚಡ್ ಜಾಯ್ಜಾಯ್" ಮ್ಹಣುನ್ ತಿಣೆ ಸಾಂಗ್ಲೆಂ.
ನಾಸೊಸ್ಣಿಕಾಯೆವಿಶಿಂ ಉಲೊವ್ನ್, "ಜೆದ್ನಾಂ ವಿಚಾರ್‌ವಾದಿಂಚಿ ಖುನಿ ಜಾಲಿ ತೆದ್ನಾ ಬೆಜಾರ್ ಜಾಲೆಂ. ಪುಣ್ ಉಪ್ರಾಂತ್ ತಾಕಾ ರಾಜಕೀಯ್ ರಂಗ್ ಆಯ್ಲೊ" ಮ್ಹಳ್ಳ್ಯಾ ತಿಣೆಂ "ಕವಿತಾ ಏಕ್ ವಾಟ್ ಆಮ್ಕಾಂಚ್ ಖಾಲಿ ಕರುಂಕ್. ಅಶೆಂ ಕೆಲ್ಯಾರ್ ಆನಿ ಭಾಯ್ರ್ ದಿಲ್ಯಾರ್, ನವ್ಯಾಕ್ 'ಜಾಗೊ' ದಿಲ್ಲೆಬರಿ ಜಾತಾ" ಮ್ಹಳೆಂ.
ಟ್ರಸ್ಟಿ ವಿಲಿಯಮ್ ಪಾಯ್ಸಾನ್ ಎಡ್ಡಿ ಸಿಕೇರ್ ಆನಿ ನೂತನ್ ಸಾಖರ್‌‍ದಾಂಡೆಚಿ ವೊಳಕ್ ಕರುನ್ ದಿಲ್ಲಿ ತರ್, ಮೆಲ್ವಿನ್ ರೊಡ್ರಿಗಸಾನ್ ತಾಂಕಾಂ ಯಾದಸ್ತಿಕಾ ದೀವ್ನ್ ಮಾನ್ ಕೆಲೊ.
ಸಾಂಜೆಚಿ ಚಾ-ಕಾಫಿ ಜಾತಚ್ ಸಮಾರೋಪ್ ಸಮಾರಂಭ್ ಚಲ್ಲೊ. ಮುಕೆಲ್ ಸೈರೊ ಜಾವ್ನ್ ಕವಿ ಅರುಣ್ ಸಾಖರ್‌ದಾಂಡೆ ಆಸಲ್ಲೊ. ಮಾನಾಚೆ ಸೈರೆ ಜಾವ್ನ್ ರೋಹನ್ ಮೊಂತೇರೊ ಆಸಲ್ಲೊ ತರ್ ಬಸ್ತಿ ವಾಮನ್ ಶೆಣೈ, ಮೇನಕಾ ಶಿವದಾಸನಿ, ಮೆಲ್ವಿನ್ ರೊಡ್ರಿಗಸ್ ಆನಿ ಕಿಶೋರ್ ಗೊನ್ಸಾಲ್ವಿಸ್ ಹಾಜರ್ ಆಸಲ್ಲೆ.
ಹ್ಯಾ ಸಂದರ್ಭಾರ್ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ಕವಿ ಎಮ್. ಪಿ. ರೊಡ್ರಿಗಸ್ ಹಾಂಕಾಂ ಭೆಟಯ್ಲೊ. ಕವಿಚಿ ಪತಿಣ್ ಜೆಸ್ಸಿ ರೊಡ್ರಿಗಸ್ ವೇದಿರ್ ಹಾಜರ್ ಆಸಲ್ಲಿ. ಎವ್ರೆಲ್ ರೊಡ್ರಿಗಸಾನ್ ಕವಿಚಿ ವೊಳಕ್ ಕರುನ್ ದಿತಚ್, ಮಾನ್ ಪತ್ರ್ ವಾಚುನ್ ಸಾಂಗ್ಲೆಂ.
ಪುರಸ್ಕಾರ್ ಸ್ವೀಕಾರ್ ಕರುನ್ ಉಲಯಿಲ್ಲ್ಯಾ ಎಮ್. ಪಿ. ರೊಡ್ರಿಗಸಾನ್ "ಸುರ್ವಾತೆರ್ ಸಿಲಾ ಮಿನೆಜ್ ಆನಿ ಮರಿದಾಸ್ ಅಸಲ್ಯಾ ಮ್ಹಾನ್ ವ್ಯಕ್ತಿಂ ಸವೆಂ ಹಾಂವ್ ವಾಡ್ಲೊಂ ತರೀ, ಉಪ್ರಾಂತ್ ಗಲ್ಫಾಕ್ ಗೆಲೊಂ ಆನಿ ಥಂಯ್ ಸುಮಾರ್ ಎಕ್ವೀಸ್ ವರ್ಸಾಂ ಬರ್ಪಾ ದೆಣೆಂ ಲಿಪುನ್ ಉರ್‍ಲೆಂ. ತೆಂ ಉಸ್ತಿಲ್ಲೆಂ 'ಮೆಲ್ವಿನ್ ರೊಡ್ರಿಗಸ್' ತಸಲ್ಯಾಂಚ್ಯಾ ಪ್ರೋತ್ಸಾಹಾನ್. ಮ್ಹಾಕಾ ಪ್ರಾಸ್ ಆನಿಂ ಛಂದಸ್ಸ್ ಮ್ಹಳ್ಳ್ಯಾರ್ ಭಾರಿಚ್ ಆಕರ್ಶಣ್. ಹೆಂಚ್ ಮ್ಹಜ್ಯಾ ಕವಿತೆಂನಿ ದಿಸುನ್ ಆಯ್ಲಾಂ ಆನಿ ದಿಸುನ್ ಯೆತಲೆಂ. ಕವಿತಾ ಸಂಪೂರ್ಣತೆಕ್ ಏಕ್ ವಾಟ್ ಆನಿ ಹಿ ವಾಟ್ ಅಂತ್ ನಾತಲ್ಲಿ ವಾಟ್. ಹೆ ವಾಟೆರ್ ಚಮ್ಕೊಂಚ್ಯಾ ಸರ್ವ್ ಲ್ಹಾನಾಂಕ್ ಬರೆಂ ಜಾಂವ್" ಅಶೆಂ ತಾಂಣಿ ಸಾಂಗ್ಲೆಂ.
ಚಾರ್ಲ್ಸ್ ಆನಿ ತೆರೆಜಾ ರೊಡ್ರಿಗಸ್ ಸ್ಮಾರಕ್ ಕವಿತಾ ಬರೊಂವ್ಚೆ ಸರ್ತೆಂತ್ ಇನಾಮಾಂ ಜಿಕ್ಲಲ್ಯಾಂಕ್ ಹ್ಯಾ ಸಂದರ್ಭಾರ್ ಇನಾಮಾಂ ವಾಂಟ್ಲಿಂ. ಪಯ್ಲೆಂ ಇನಾಮ್ ಜೊಡಲ್ಲೊ ಓಸ್ಟಿನ್ ಡಿಕುನ್ಹಾ, ಬಿಜೈ, ದುಸ್ರೆಂ ಇನಾಮ್ ಜೊಡಲ್ಲೊ ಮಾರುತಿ ಮುತುಗರ್, ಗೊಂಯ್ ಹ್ಯಾ ವೆಳಾರ್ ಹಾಜರ್ ಆಸಲ್ಲಿಂ. ತಿಸ್ರೆಂ ಇನಾಮ್ ಜೊಡಲ್ಲೆಂ ಅಶ್ಮಾ ಗೋವೆಕಾರ್ ಹಾಜರ್ ಜಾಂವ್ಕ್ ನಾ. ಹೆ ಸರ್ತೆಂತ್ 281 ಭುರ್ಗ್ಯಾಂನಿ ವಾಂಟೊ ಘೆತಲ್ಲೊ. ಮಾವ್ರಿಸ್ ಡೇಸಾ ಆನಿ ವಿತೊರಿ ಕಾರ್ಕಳ್ ಹಾಂಣಿ ವೊರಯ್ಣಾರ್ ಮ್ಹಣುನ್ ಕಾಮ್ ಕೆಲ್ಲೆಂ.
ಭುರ್ಗ್ಯಾಂಚ್ಯಾ ತಶೆಂ ಯುವಜಣಾಂಚ್ಯಾ ಕವಿತಾ ವಾಚನ್ ಸರ್ತೆಂತ್ ಭಾಗ್ ಘೆತಲ್ಲ್ಯಾ ಸರ್ವಾಂಕ್ ಹ್ಯಾ ಸಂದರ್ಭಾರ್ ಪ್ರಮಾಣ್ ಪತ್ರಾಂ ವಾಂಟ್ಲಿಂ. ಜಿಕ್ಲಲ್ಯಾಂಕ್ ಇನಾಮಾಂ ದಿಲಿಂ.
ಲ್ಹಾನಾಂಚೊ ವಿಭಾಗ್:
ಪಯ್ಲೆಂ: ಶೀವೊನ್ ಸೆರಾವೊ, ಮೂಡಬಿದ್ರಿ
ದುಸ್ರೆಂ: ನಿಶೆಲ್ ಡಿಆಲ್ಮೇಡಾ, ಮಂಗ್ಳುರ್
ತಿಸ್ರೆಂ: ಪ್ರಿಥುಮಾ ಮೊಂತೇರೊ, ಮಂಗ್ಳುರ್
ಸಮಾಧಾನಾಚಿಂ ಇನಾಮಾಂ: ಲ್ಯಾರಿಸಾ ಡಿಸೋಜಾ, ಉಡುಪಿ; ವೀನಲ್ ಡೇಸಾ ಉಡುಪಿ ಆನಿ ವೆನ್ಸಿಟಾ ಡಾಯಸ್, ಮಂಗ್ಳುರ್.
ವ್ಹಡಾಂಚೊ ವಿಭಾಗ್:
ಪಯ್ಲೆಂ: ಅಂತರಾ ಭಿಡೆ, ಗೊಂಯ್
ದುಸ್ರೆಂ: ಪ್ರಾದ್ನ್ಯಾ ತಾರಿ, ಗೊಂಯ್
ತಿಸ್ರೆಂ: ದತ್ತರಾಜ್ ನಾಯ್ಕ್, ಗೊಂಯ್
ಸಮಾಧಾನಾಚಿಂ ಇನಾಮಾಂ: ಲವೀಟಾ ಪಿಂಟೊ, ಉಡುಪಿ; ಶಾಂಭವಿ ಸಿನಾಯ್, ಗೊಂಯ್; ಸುಶ್ಮಿತಾ ಪೈ ಕಾಣೆ, ಗೊಂಯ್; ವಿಶಾಲ್ ಗಾಂವ್ಕಾರ್, ಗೊಂಯ್ ಆನಿ ವೃಕ್ಷಾ ಕರ್ಮಲಿ, ಗೊಂಯ್
ಮುಕೆಲ್ ಸಯ್ರೊ ಜಾವ್ನ್ ಉಲಯಿಲ್ಲ್ಯಾ ಅರುಣ್ ಸಾಖರ್‌ದಾಂಡೆನ್ "ಕವಿತಾ ಆನಿ ಕವಿ ಹಾಂಕಾಂ ವೆಗ್ಳೆ ಕರುಂಕ್ ನಜೊ. ಸಾಹಿತ್ಯಾಚ್ಯಾ ಹೆರಾ ಪ್ರಕಾರಾಂನಿ ಪುಣೀ ಅಸಲೆಂ ಪ್ರಯತನ್ ಕರುಂಯೆತಾ, ಪುಣ್ ಕವಿ ಆನಿ ಕವಿತಾ ಕೆದಳಾಯ್ ಸಾಂಗಾತಾ ಪಳೆಜಾಯ್. ತಶೆಂಚ್ ಕವಿನ್ ಕವಿತೆಂನಿ ನವೆ ಸಬ್ದ್, ಬರೆ ಸಬ್ದ್ ಹಾಡ್ಚೆಂ ಗರ್ಜೆಚೆಂ. ನಾಂತರ್ ಕವಿತಾ ಪರಿಣಾಮ್‌ಕಾರಿ ಜಾಯ್ನಾ. ಕವಿತಾ ಲೊಕಾಕ್ ಪಾವಜಾಯ್, ಬರಿ ಕವಿತಾ ಮ್ಹಳ್ಯಾರ್ ತೆ ಕವಿತೆನ್ ಕಾಳ್ಜಾಕ್ ಆಪ್ಡೂಂಕ್ ಜಾಯ್ ಆನಿ ಸದಾಂಕಾಳ್ ತಿ ಕಾಳ್ಜಾಂತ್ ಉರೊಂಕ್ ಜಾಯ್.
ಪುಣ್ ಆತಾಂ ಆಮಿ 'ಗಿರಾಯ್ಕಿ' ಜಾಲ್ಯಾಂವ್. ಅಸಲ್ಯಾ ಕವಿತೆಂಚೆ 'ನಿರ್ಮಾಪಕ್' ಉಣೆ ಜಾಲ್ಯಾತ್. ದೆಕುನ್ ಬರಿ ಕವಿತಾ ಆಯ್ಲೆವಾರ್ ಚಡಾವತ್ ಮೆಳನಾ. ಕೈಫೆ ಆಜ್ಮಿ ತಸಲ್ಯಾಂನಿ ತಾಂಚ್ಯಾ ಕವಿತೆಂನಿ 'ಫಿಲೊಸೊಫಿ' ದಿಲಿ ಆನಿ ತ್ಯಾ ದೆಕುನ್ ಕವಿ ನಾ ತರೀ ಕವಿತಾ ಉರ್‍ಲಿ. ಕವಿ ದಿಸಾಚ್ಯಾ ಚೊವೀಸ್ ವೊರಾಂಯ್ ಕವಿ ನ್ಹಯ್. ಏಕ್ ಕವಿತಾ ಜೆದ್ನಾಂ ಉದೆತಾ ತೆ ಘಡಿಯೆ ತಿ ಕವಿತಾ ಕವಿ ಥಾವ್ನ್ ಮೆಕ್ಳಿ ಜಾತಾ. ಆನಿ ತಿ ಉರ್‍ತಾ, ಅಸಲೆ ಕವಿತೆಕ್ 'ಲಿಮಿಟ್' ನಾ" ಅಶೆಂ ಆಪ್ಲ್ಯಾ ಭಾಶಣಾಂತ್ ತೊ ಮ್ಹಣಾಲೊ.
ಗುರು ಬಾಳಿಗಾನ್ ಧನ್ಯವಾದ್ ಸಮರ್ಪಣ್ ಕೆಲೆಂ. ಸಕಾಳಿಂ ಥಾವ್ನ್ ಸಾಂಜ್ ಪರ್‍ಯಾಂತ್ ಎರಿಕ್ ಸೋನ್ಸ್ ಹಾಣೆ ಕಾರ್ಯೆಂ ಸಾಂಬಾಳ್ಳೆಂ.
ಭಾತ್ಮಿ: ಎಂಟನಿ ಬಾರ್ಕೂರ್
ತಸ್ವೀರ್ ಕುರ್ಪಾ: ನೊರ್ಬರ್ಟ್ ಪಾಯ್ಸ್
ल्हानां थावन व्हडांची कवितेची उरबा आनी हुमेद वाडयिल्लें कविता फेस्त
मंगळूर शकतिनगरांत आसच्या विश्व कोंकणी केंद्रांत कविता ट्रस्टान मांडून हाडल्लें धाव्या वर्साचें कविता फेस्त हाजर आसल्या कविता रसिकांक दाधोसकायेंत न्हाणंवच्यांत यशस्वी जालें मात्र न्हय, जिवितांत सुख भोगूंक आशेतेल्यांनी कविता तसल्या वाटांनी सयत चमकून वच्येता म्हणून पाचारिलागलें.
कोंकणी भास आनी संसकृती प्रतिष्ठान हांच्या जोड पालवान मांडून हाडल्ल्या ह्या फेस्ताची सुरवात बेंडा व्हाजपा सांगाता पुरशांवार जाली. बारकूरच्या फ्रेंकलीन आनी पंगडान कविता ट्रस्टाचें आशय गीत गायतच अध्यक्ष मेल्विन रोड्रिगस आनी कार्यदर्शी किशोर गोन्सालविसान सयऱ्यांक वेदीक आपोवन वेलें. किशोर गोन्सालविसान येवकार उलोवप करतच मुकेल सैरीण इंगलिष कवयित्री तशें लेखकी मेनका शिवदासनी तशें कोंकणी भास आनी संसकृती प्रतिषटानाचो अध्यक्ष बस्ती वामन शेणै हांणी ट्रसटाच्या वांगड्यां सवें वाऱ्यार गुलोबाच्यो पाकळ्यो उबोवन फेस्ताक चालन दिलें.
त्या उपरांत ट्रस्टाच्या दानिंनी, मोगिंनी, हितचिंतकांनी, कविंनी वेदीर दवरल्ल्या कडायांतल्या उदकांत पाकळ्यो वोतून ह्या फेस्ताक रंग हाडलो आनी तांचो सहकार भासायलो.
ह्या संदरभार उलयिल्ल्या बस्ती वामन शेणैन "चड आनीं चड कारयीं ह्या वठारांत करूंक जाय" म्हणून सांगून फेस्ताक यशस्वी मागली. ह्याच संदरभार मेनका शिवदासनीन स्टीवन क्वाड्रसान बरोवन कविता पब्लिकेशन्सान पर्गटल्लो 'बाननें' कविता लेखनांचो पुस्तक लोकारपण केलो. वितोरी कारकळान पुस्तकाविशीं आनी लेखकाविशीं म्हायेत दिली.
ह्या संदरभार उलयिल्ल्या स्टीवन क्वाड्रसान बाननें (बांदनें) सब्दाचो अर्थ विवरून सांगलो. कशें कृशिकां मधें उदक बांधून दवरूंक आनी उदक सोडूंक बान्न्याचो उपेग जाता म्हणून ताणे सांगलें.
मुकेल सैरीण जावन आयिल्ल्या मेनका शिवदासनीन "कवितेक मोल दीवंक कळीत नासच्या संसारांत कविता हाडचें काम सुलभायेचें न्हय" म्हण आपलें उलोवप सुरू केल्ल्या तिणें, आयलेवार कोंकणी कविता शेतांत जाल्ली विशेस वाडावळ सबार दाकल्यां सवें सादर केली. मुखारून तिणें म्हळें "कवी म्हळ्ळ्यार भारीच धैरादीक. हांवें अर्धे पातयेणेन मुंबयांत "पोयेटरी सरकल" आरंभ केल्लें -१९८६ इस्वेंत. पुण साल भरती जाल्लें". तिच्या उलोवपाचो प्रमुख विशय जावनासल्लो कवितेची "क्वालिटी या गुणामोल". "आज काल कविता फायस करूंक सबार विधानां मेळतात - इंटरनेट, सोशियल मीडिया, ब्लोग अशें. इल्लेंय चाळिनास्तां, गाळिनास्तां ह्यो कविता फायस जातात, ह्या निमतीं कवितेची खातड जाल्या. हें चुकयजाय.
"कविता बरयताना कवितेचो विशय कितलो प्रमुखगी तितलें गरजेचें "कवितेचें शिल्प". सारकें व्याकरण, सारक्या जाग्यार अल्प विराम, पूर्ण विराम इत्यादी. तितलेंच गरजेचें आसा कविता तिदवुंची. कविता म्हळ्ळ्यार भोगणांचो व्हाळो, देकून 'हांव कविता एक पावटीं मात्र बरयतां आनी त्या उपरांत आपडून पळयना' म्हणचें सारकें न्हय. कवितेचें शिल्प सुध्रांवची एक निरंतर प्रक्रिया.
"कवितेचें 'गुणामोल' उंचायेक पावोंवचें गरजेचें कित्याक कवितेची साध्यताय विशेस. कविता भाशेची विविध साध्यता आनी वैविध्यता भायर हाडता. तशेंच समाजाच्या सवालांचेर उब्जल्ली कविता 'बदलावणे'क् कारण जाता. कविता बरोंवची एक 'एकांता'ची प्रक्रिया. ಪುಣ್ ती समाजाक पावोंवची गर्जय आसा. तशेंच भुरग्यांक हांतूं मेतेर करिजाय, कित्याक तीं आमचो फुडार. १०००० पोएट्स ङोर च्हनगे म्हळ्ळे चळवळे द्वारीं हजारों कविंनी कविता लिखल्यो मात्र न्हय सबार समाजीक समस्यां वयर काम सयत केलें (दर्या तड नितळ करची, स्त्री शोषण अशें). तशें कविता म्हळ्ळ्यार बदलावण हाडूंक सकचें एक माध्यम" अशें म्हणाली मेनका शिवदासनी.
म्याक्सीम लोबोच्या अध्यक्षपणार चलल्ले कविगोष्टींत जेरालीन पिंटोन इंगलिष कविता वाचली तर, अब्दुल सत्तार गूडिनबळीन ब्यारी कविता वाचली. एंडऱ्यू एल डिकुन्हान कोंकणीक तर्जन केल्ली ताची ब्यारी कविता वाचली. ज्योती चेळ्यारुची तुळू कविता पयलें कोंकणींत क्याथरीन रोडरिगसान वाचून जातच, ज्योतिन तुळूंत वाचली. कोंकणींत प्रकाश पाडगांवकार, आर. रामनाथ, शरतचंद्र शेणै, स्मिता शेणै, मावरिस डेसा शांतिपुर, इकबाल सयीदी आनी म्याक्सीम लोबोन कविता वाचल्यो.
त्या उपरांत नेल्सन आनी लवीना रोडरिक्स, दुसरो चाफ्रा देकोसता स्मारक कोंकणी कविता वाचन स्परधो भुरग्यां खातीर चल्लो. फैनलाक आयिल्ल्या सतरा भुरग्यांनी हांतूं वांटो घेतल्लो. मेल्विन रोडरिगसना सरतेचीं नेमां सांगलीं. स्मिता शेणै, एड्डी सिकेर, एंडऱ्यू एल डिकुन्हा, विलियम पायस, नूतन साखरदांडे आनी मेल्विन रोड्रीगस वोरयणार जावन आसल्लीं. वितोरी कारकळान सूत्र संचालन केलें.
दोनपारां जेवणा उपरांत रोहन आनी लवीटा मोंतेरो पांचवो अखील भारत कोंकणी कविता वाचन स्परधो चल्लो. वीस युवजणांनी हांतूं वांटो घेतल्लो. किशू बारकूर, म्याक्सीम लोबो, अरूण साखरदांडे, कुसुम अगरवाल, गुरू बाळिगा आनी मेल्विन रोड्रीगस वोरयणार म्हणून आसल्ले. वितोरी कारकळान सहकार दिलो.
त्या उपरांत कलाकार, दिगदर्शक तशें कवी एड्डी सिकेरिन, कवयित्री नूतन साखरदांडेलागीं चलयिल्लो संवाद "म्हजी जीण, म्हजी कविता" हाजर आसलल्यांक येदोळ जायनातल्लो अनभोग दिंवच्यांत सुफळ जालो म्हणयेत. "ल्हानपणार घरा मुकार आसल्ले लैबऱरींत हांव मस्त वेळ वाचतालीं. तशेंच म्हज्या ल्हानपणार आवय बापायक होगडायिल्लें, कोलेजींत गायान करताना ज्यूनियर भुरग्यांनी केल्लो गलाटो, शेजारा कुटमांत काजारा वेळार जाल्लें एक्सिडेंट... असल्या घडितांनी निर्शेल्ले जिणियेन म्हाका कवयित्री केलें" अशें म्हणाली नूतन. "तशेंच हांव बरयिल्ली कविता व्हरून म्हज्या गुरूक दाकयतालीं, तांणी दिल्ल्या हिशाऱ्यां प्रकार चलतालीं. ಪುಣ್ आतांचीं भुरगीं अशें करिनांत. म्हजेलागीं विचारून येंवचीं मस्त उणे" म्हणून तिणें सांगलें.
"कवयत्री न्हय म्हण तुका केन्नांय भोगल्लें आसा?" म्हणून एड्डीन विचारल्ल्या सवालाक तिणें "व्हय, जेन्नां स या सात म्हयने कितेंच झळकना तेदनां असलो दुबाव येता" म्हळें.
"आपणाक चडीत आंवडल्ल्या कवितां पयकी, मनोहर बाबाची "लोकशाय" कविता एक - ही आमी कितले पावटीं ताचेकडे सांगूंक लायल्ली तें लेक करूंक जांवचेंना. तितलीय उत्तीम कविता ती" अशें एका सवालाक तिणें जाप दिली.
तिची 'देणे' कविता फकत एक स्त्री लिखूंक सक्ता. ती उदेल्ली कशी? म्हणून एडिन विचारल्ल्या वेळार नूतनान "म्हज्या तिसऱ्या बाळाक भुरगीं नातल्ले म्हजे भयणीक पोसको जावन दिताना" म्हणून जाप दिल्ले तवळ, सभिकां मधें मोनेपण रेवडोन गेलें आनी क्रमेण एकेकल्यांनी तिका ताळियो पेटून लांबायेक शाभासकी उचारली. थोड्यांच्या दोळ्यांनी दुखां भरल्लीं ह्या संदरभार दिसून आयलीं.
'पासवर्ड' कविते विशीं एडिन विचारल्ल्या सवालाक जाप जावन "जेदनां म्हजो पूत हरयेका वेळार पासळेंत ल्यापटोप घेवून बसून आसतालो, तेदनां म्हजी विनती आसल्ली, "वेच्या फुडें तुज्या काळजाचो पासवर्ड म्हाका दिवून वच" म्हण. एके आवयचे आकलास हे" अशें तिणें सांगलें.
नूतनाचो पती कवी अरूण साखरदांडेक मनांत दवरून एडिन "घरांत दोगांय बरयतात तेदनां कितें चलता?" म्हणून विचारल्ल्या सवालाक "फायदो म्हळ्ळ्यार म्हजो पती म्हजो 'विमर्शक' आनी 'मार्गदर्शक'. तशें घरा बरोवपाचें वातावरण उरता. तशें आमी सर्व विशयांत एकामेका नाक चेपिनांव. तशें स्वातंत्रय उरलां. पुण घोव-बायल म्हणताना, आमींय सामान्य मनशां - कितें तरी गोंदोळ येता, तोंद्रे येतात. तें आमी सुधारसून वेतांव" अशें नूतन म्हणाली. "जेन्नां पती आपल्या कामार व्यस्त आसतालो आनी हांव काम, घर-दार, भुरगीं आनीं बरोवप - सांबाळूंक कषटातालीं. तेदनां "म्हाका सुटी जाय" असले कालेतिची कविता म्हजे थंय उदेली" अशें तिणें ह्या संदरभार सांगलें.
"साहितीक वावर, घर आनी काम - हें सककड कशें सांबाळून व्हरताय?" म्हळ्ळ्या एडिच्या सवालाक "ब्यांकाचें काम - म्हज्या साहितीक वावराक सांगल्लें न्हय. तरी ब्यांकाचे जिणयेच्यो सबार गजाली रूपक जावन कवितेंनी आयल्यात - ब्यांकाक वेताना तकली काडन भितर चेपून कंपयूटरांत 'लोगिन' जांवचें, तशेंच घरा येतच कुजनांत 'लोगिन' जांवचें. ह्याच वेळा आमी तेगां कवयत्रिंनी मेळून "त्रिवेणी" म्हळ्ळो पंगड करून कविता लोकामेरेन पावोंवचें काम केलें. असलीं प्रयतनां आनी चड जायजाय" म्हणून तिणे सांगलें.
नासोसणिकायेविशीं उलोवन, "जेदनां विचारवादिंची खुनी जाली तेदना बेजार जालें. पुण उपरांत ताका राजकीय रंग आयलो" म्हळ्ळ्या तिणें "कविता एक वाट आमकांच खाली करूंक. अशें केल्यार आनी भायर दिल्यार, नव्याक 'जागो' दिललेबरी जाता" म्हळें.
ट्रस्टी विलियम पायसान एड्डी सिकेर आनी नूतन साखरदांडेची वोळक करून दिल्ली तर, मेल्विन रोड्रीगसान तांकां यादस्तिका दीवन मान केलो.
सांजेची चा-काफी जातच समारोप समारंभ चल्लो. मुकेल सैरो जावन कवी अरूण साखरदांडे आसल्लो. मानाचे सैरे जावन रोहन मोंतेरो आसल्लो तर बस्ती वामन शेणै, मेनका शिवदासनी, मेल्विन रोड्रीगस आनी किशोर गोन्सालविस हाजर आसल्ले.
ह्या संदरभार मथायस कुटम कविता पुरस्कार कवी एम. पी. रोड्रीगस हांकां भेटयलो. कविची पतिण जेस्सी रोड्रीगस वेदीर हाजर आसल्ली. एवरेल रोडरिगसान कविची वोळक करून दितच, मान पत्र वाचून सांगलें.
पुरस्कार स्वीकार करून उलयिल्ल्या एम. पी. रोडरिगसान "सुर्वातेर सिला मिनेज आनी मरिदास असल्या म्हान व्यक्तीं सवें हांव वाडलों तरी, उपरांत गलफाक गेलों आनी थंय सुमार एकवीस वर्सां बरपा देणें लिपून उरलें. तें उस्तिल्लें 'मेलविन रोडरिगस' तसलयांच्या प्रोत्साहान. म्हाका प्रास आनीं छंदस्स म्हळ्ळ्यार भारीच आकर्शण. हेंच म्हज्या कवितेंनी दिसून आयलां आनी दिसून येतलें. कविता संपूर्णतेक एक वाट आनी ही वाट अंत नातल्ली वाट. हे वाटेर चमकोंच्या सर्व ल्हानांक बरें जांव" अशें तांणी सांगलें.
चार्ल्स आनी तेरेजा रोड्रीगस स्मारक कविता बरोंवचे सरतेंत इनामां जिकलल्यांक ह्या संदरभार इनामां वांटलीं. पयलें इनाम जोडल्लो ओसटीन डिकुन्हा, बिजै, दुसरें इनाम जोडल्लो मारुती मुतुगर, गोंय ह्या वेळार हाजर आसल्लीं. तिसरें इनाम जोडल्लें अशमा गोवेकार हाजर जावंक ना. हे सरतेंत २८१ भुरग्यांनी वांटो घेतल्लो. मावरिस डेसा आनी वितोरी कारकळ हांणी वोरयणार म्हणून काम केल्लें.
भुरग्यांच्या तशें युवजणांच्या कविता वाचन सरतेंत भाग घेतल्ल्या सरवांक ह्या संदरभार प्रमाण पत्रां वांटलीं. जिकलल्यांक इनामां दिलीं.
ल्हानांचो विभाग:
पयलें: शीवोन सेरावो, मूडबिद्री
दुसरें: निशेल डिआलमेडा, मंगळूर
तिसरें: प्रिथुमा मोंतेरो, मंगळूर
समाधानाचीं इनामां: ल्यारिसा डिसोजा, उडुपी; वीनल डेसा उडुपी आनी वेन्सिटा डायस, मंगळूर.
व्हडांचो विभाग:
पयलें: अंतरा भिडे, गोंय
दुसरें: प्रादन्या तारी, गोंय
तिसरें: दत्तराज नायक, गोंय
समाधानाचीं इनामां: लवीटा पिंटो, उडुपी; शांभवी सिनाय, गोंय; सुश्मिता पै काणे, गोंय; विशाल गांवकार, गोंय आनी वृक्षा करमली, गोंय
मुकेल सयरो जावन उलयिल्ल्या अरूण साखरदांडेन "कविता आनी कवी हांकां वेगळे करूंक नजो. साहित्याच्या हेरा प्रकारांनी पुणी असलें प्रयतन करुंयेता, ಪುಣ್ कवी आनी कविता केदळाय सांगाता पळेजाय. तशेंच कवीन कवितेंनी नवे सब्द, बरे सब्द हाडचें गरजेचें. नांतर कविता परिणामकारी जायना. कविता लोकाक पावजाय, बरी कविता म्हळ्यार ते कवितेन काळजाक आपडूंक जाय आनी सदांकाळ ती काळजांत उरोंक जाय.
पुण आतां आमी 'गिरायकी' जाल्यांव. असल्या कवितेंचे 'निर्मापक' उणे जाल्यात. देकून बरी कविता आयलेवार चडावत मेळना. कैफे आजमी तसलयांनी तांच्या कवितेंनी 'फिलोसोफी' दिली आनी त्या देकून कवी ना तरी कविता उरली. कवी दिसाच्या चोवीस वोरांय कवी न्हय. एक कविता जेदनां उदेता ते घडिये ती कविता कवी थावन मेकळी जाता. आनी ती उरता, असले कवितेक 'लिमिट' ना" अशें आपल्या भाशणांत तो म्हणालो.
गुरू बाळिगान धन्यवाद समर्पण केलें. सकाळीं थावन सांज पर्यांत एरीक सोन्स हाणे कारयें सांबाळ्ळें.
भातमी: एंटनी बारकूर
तस्वी़र कुरपा: नॉर्बट पायस