ಕಾವ್ಯ ರಸಿಕಾಂಕ್ ದಾಧೊಸ್ ಕೆಲ್ಲಿ ಸಾಸ್ತಾನ್ ಕವಿಗೋಷ್ಟಿ
ಕವಿತಾ ಫೆಸ್ತಾಸವೆಂ ಕವಿತಾ ಮೊಗಿಂಚೆಂ ವರ್ಸ್ ಸುರು ಜಾತಾ. ಉಪ್ರಾಂತ್ ಸರಾಸರ್ ಮ್ಹಯ್ನ್ಯಾಕ್ ಏಕ್ ಪಾವ್ಟಿಂ ಮ್ಹಳ್ಳೆಬರಿ ಗಾಂವಾಂ ಗಾಂವಾಂನಿ ಕವಿಗೋಷ್ಟಿ ಸಾದರ್ ಜಾತಾತ್. ಪಾಟ್ಲ್ಯಾ ಧಾ ವರ್ಸಾಂನಿ ಕವಿತಾ ಟ್ರಸ್ಟಾನ್ ಸುರು ಕೆಲ್ಲ್ಯಾ ಕೊಂಕ್ಣಿ ಕವಿತೆಕ್ ಅಂತರಾಷ್ಟ್ರೀಯ್ ಪಾಂವ್ಡೊ ಆನಿ ಮರ್ಯಾದ್ ಜೊಡುನ್ ದಿಂವ್ಚ್ಯಾ ವಾವ್ರಾನ್ ಹೊ ಸಂಪ್ರದಾಯ್ ಸುರು ಕೆಲಾ. ಆಪಾಪ್ಲ್ಯಾ ಗಾಂವಾಂನಿ ಕವಿಗೋಷ್ಟಿ ಕರುಂಕ್ ಕಾವ್ಯ ರಸಿಕ್ ಹುಮೆದಿನ್ ಫುಡೆಂ ಯೆತಾತ್.
ಫೆಬ್ರೆರ್ 21 ತಾರಿಕೆರ್ ಆಯ್ತಾರಾ ಸಾಸ್ತಾನ್ ಲಾಗ್ಸಾರ್ ಆಸ್ಚ್ಯಾ ಆಲ್ವಿನ್-ಸುಜಾತಾ ಆಂದ್ರಾದೆ ಜೊಡ್ಯಾಚ್ಯಾ ``ಆಶಿಯಾನಾ'' ಘರ್ಚ್ಯಾ ಆಂಗ್ಣಾಂತ್ ಆಪುರ್ಬಾಯೆಚಿ ಕವಿಗೋಷ್ಟಿ ಸಾದರ್ ಜಾಲಿ. ಹ್ಯಾ ಕಾರ್ಯಾಕ್ ಯೆವ್ಕಾರ್ ಮಾಗ್‌ಲ್ಲ್ಯಾ ಟ್ರಸ್ಟ್ ಅಧ್ಯಕ್ಷ್ ಮೆಲ್ವಿನ್ ರೊಡ್ರಿಗಸಾನ್ ಕವಿತಾ ಭೊಂವಾರ್ ವಿಸ್ತಾರಾಂವ್ಚ್ಯಾ ವಾವ್ರಾಚಿ ವಳಕ್ ಹಾಜರ್ ಆಸ್‌ಲ್ಲ್ಯಾಂಕ್ ಕರುನ್ ದಿಲಿ. ಕವಿಗೋಷ್ಟಿಚೆಂ ಸುಂಕಾಣ್ ಆಂಟನಿ ಬಾರ್ಕೂರಾನ್ ಹಾತಿಂ ಧರ್‌ಲ್ಲೆಂ. ಗುಲ್ಜಾರಾಚ್ಯೊ ಶಾಯರಿ, ಮೆಲ್ವಿನ್, ಕಿಶೂ, ವಿಲ್ಸನ್ ಕಟೀಲ್ - ಹಾಂಚ್ಯೊ ಕವಿತಾ ತಶೆಂಚ್ ಥೊಡ್ಯೊ ವಾಟ್ಸ್‌ಅಪ್ ಕವಿತಾ ಮಧೆಂ ಮಧೆಂ ಸಾದರ್ ಕರುನ್ ತಾಣೆಂ ವೆವೆಗ್ಳ್ಯಾ ಕವಿತಾ ರುಪಾಂಚಿ ಝಳಕ್ ದಿಲಿ.
ಮೆಲ್ವಿನ್ ರೊಡ್ರಿಗಸ್, ಆಂಡ್ರೂ ಡಿಕುನ್ಹಾ, ಕಿಶೂ ಬಾರ್ಕೂರ್, ರೊಬರ್ಟ್ ಉದ್ಯಾವರ್, ಕ್ಲೊಡಿ ಬ್ರಹ್ಮಾವರ್, ನವೀನ್ ಪಿರೇರಾ ಸುರತ್ಕಲ್, ಸ್ಟೀವನ್ ಲೂವಿಸ್ ಹಾಣಿ ಆಪ್ಲ್ಯೊ ತಶೆಂ ಆಪ್ಣಾಕ್ ಪಸಂದ್ ಜಾಲ್ಲ್ಯೊ ಹೆರ್ ಕವಿಂಚ್ಯೊ ಕವಿತಾ ಸಾದರ್ ಕೆಲ್ಯೊ.
ಆಂಟನಿ ಬಾರ್ಕೂರಾನ್ ಆಪ್ಲಿ `ಯೆಣೊ ಕವಿತಾ ಸಾದರ್ ಕರ್‍ತಚ್ ಆಂಡ್ರೂ ಡಿಕುನ್ಹಾನ್ ತಾಚೆಸವೆಂ -ತಿ ಕವಿತಾ ಉದೆಲ್ಲಿ ಘಡಿ ಆನಿ ಕವಿತೆ ಪಾಟ್ಲ್ಯಾ ಘಡಿತಾವಿಶಿಂ ಸಂವಾದ್ ಚಲಯ್ಲೊ. ಆಪ್ಲ್ಯಾ ಗಾಂವ್ಚೊ ಏಕ್ ತರ್ನಾಟೊ ಅವ್ಘಡಾಕ್ ಸಾಂಪ್ಡುನ್ ತೀನ್ ಮ್ಹಯ್ನೆ ಮರ್ಣಾಸವೆಂ ಝುಜ್ತಾನಾ, ತಾಚ್ಯೆ ಆವಯ್ಚೆಂ ಕಾಳಿಜ್ ಕಿತೆಂ ಚಿಂತ್ತಾಲೆಂ? ಮ್ಹಳ್ಳ್ಯಾ ಚಿಂತ್ಪಾನ್ ಸುರು ಜಾಲ್ಲಿ ಹಿ ಕವಿತಾ, ಮೋರ್ನ್ ಜಾವ್ನ್ ದೇಡ್ ವರ್‍ಸಾ ಉಪ್ರಾಂತ್ ತಿಕಾ ಭೆಟ್ತಾನಾ ತ್ಯಾ ದುಖಾಚಿ ತೀವ್ರತಾ ಉಣಿ ಜಾಂವ್ಕ್ ನಾತ್‌ಲ್ಲಿ ಪಳೆವ್ನ್ ``ಪುತ್ರ ಶೋಕ ನಿರಂತರ" ಮ್ಹಳ್ಳೆಂ ಸಮ್ಜುನ್, ಕವಿತಾ ಫುಡೆಂ ವೆಲಿ ತರೀ ಸಂಪಂವ್ಕ್ ಸುಮಾರ್ ದೋನ್ ವರ್‍ಸಾಂ ಲಾಗ್ಲಿಂ ಮ್ಹಣ್ ಆಂಟನಿನ್ ಸಾಂಗ್ಲೆಂ.
ಗಾಂವಾಕ್ ಆಯ್ಲ್ಯಾರೀ ಗೊಮ್ಟೆ ಸಕಯ್ಲ್ ನಿರ್ಜಿವ್ ಜಾಲ್ಲಿ ಕೂಡ್ ಪಳೆಂವ್ಕ್ ಆಪ್ಣಾಕ್ ಧಯ್ರ್ ನಾಸ್ತಾನಾ ಆಸ್ಪತ್ರೆಕ್ ಭೆಟುಂಕ್ ವಚನಾತ್‌ಲ್ಲ್ಯಾ ಆಪ್ಲ್ಯಾ ಭಿಂವ್ಕುರ್‌ಪಣಾವಿಶಿಂ ಉಲಯಿಲ್ಲ್ಯಾ ಕವಿನ್, ಮೊರ್ಚುರಿಂತ್ಲ್ಯಾ ಮೊಡ್ಯಾಕ್ ಆಪಡ್ತಾನಾ ತಿ ಥಂಡಾಯ್ ಆಪ್ಣಾ ಭಿತರ್ ಕ್ರೂರ್ ಶೀತಳಾಯ್ ಜಾವ್ನ್ ರಿಗುನ್ ಧೊಸ್ತಾನಾ ಆಪ್ಣಾಕ್ ತ್ಯೆ ಆವಯ್ಚೆ ದುಖಿಚಿ ತೀವೃತಾ ಕಳ್ಳಿ ಮ್ಹಣ್ ಸಾಂಗುನ್ ತಿ ಸಂಪವ್ಕ್ ಜಾಯ್ತೆಂ ಚಡ್ಪಡಲ್ಲೆವಿಶಿಂ ಕಳಯ್ಲೆಂ.
ಕವಿನ್ ಹೊ ವಿವರ್ ದಿಲ್ಲ್ಯಾನ್ ಥಂಯ್ಸರ್ ಹಾಜರ್ ಆಸ್‌ಲ್ಲ್ಯಾಂಕ್ ತಿ ಕವಿತಾ ನವ್ಯಾ ಉಜ್ವಾಡಾನ್ ಸಮ್ಜುಂಕ್ ಸಲೀಸ್ ಜಾಲೆಂ. ಕಿತ್ಯಾಕ್ ತ್ಯೆ ಆವಯ್ಕ್ ಆನಿ ತ್ಯಾ ತರ್ನಾಟ್ಯಾಕ್ ಹಾಜರ್ ಆಸ್‌ಲ್ಲ್ಯಾ ಪಯ್ಕಿಂ ಜಾಯ್ತಿಂ ಜಣಾಂ ವೊಳ್ಕತಾಲಿಂ. ತಾಂಕಾಂ ವಿಸ್ರುನ್ ಗೆಲ್ಲೆಂ ಏಕ್ ಘಡಿತ್, ಫಕತ್ ಎಕ್ಯೆ ಕವಿತೆ ಮುಖಾಂತ್ರ್ ಆಪ್ಲ್ಯಾ ಗಾಂವ್ಚ್ಯಾ ಕವಿನ್, ಭೋವ್ ತೀವ್ರತಾಯೆನ್, ಶಾಸ್ವಿತ್ ಕರ್ನ್ ದವರಿಲ್ಲೆಂ.
ಪತ್ರಾಡೆ, ನಾತ್ನ್ಯಾಚಿ ಮಾಣ್ಣಿ ಆನಿ ಮುಗಾ ಉದಕ್ ದೀವ್ನ್ ಆಂದ್ರಾದೆ ಜೊಡ್ಯಾನ್ ಸರ್ವಾಂಚಿಂ ಪೊಟಾಂ ಥಂಡ್ ಕೆಲಿಂ.
-ವಿತೊರಿ ಕಾರ್ಕಳ್
काव्य रसिकांक दाधोस केल्ली सास्तान कवीगोष्टी
कविता फेस्तासवें कविता मोगींचें वर्स सुरू जाता. उप्रांत सरासर म्हयन्याक एक पावटीं म्हळ्ळेबरी गांवां गांवांनी कवीगोष्टी सादर जातात. पाटल्या धा वर्सांनी कविता ट्रस्टान सुरू केल्ल्या कोंकणी कवितेक अंतराष्ट्रीय पांवडो आनी मऱ्याद जोडून दिंवच्या वावरान हो संप्रदाय सुरू केला. आपापल्या गांवांनी कवीगोष्टी करुंक काव्य रसीक हुमेदीन फुडें येतात.
फेब्रेर २१ तारिकेर आयतारा सास्तान लागसार आसच्या ऑल्वीन-सुजाता आंद्रादे जोड्याच्या ``आशियाना'' घरच्या आंगणांत आपुरबायेची कवीगोष्टी सादर जाली. ह्या काऱ्याक येवकार मागल्ल्या ट्रस्ट अध्यक्ष मेल्विन रोड्रिगसान कविता भोंवार विस्तारांवच्या वावराची वळक हाजर आसल्ल्यांक करून दिली. कवीगोष्टिचें सुंकाण आंटनी बार्कूरान हातीं धरल्लें. गुलजाराच्यो शायरी, मेल्विन, किशू, विल्सन क्टील हांच्यो कविता तशेंच थोड्यो वाट्साप कविता मधें मधें सादर करून ताणें वेवेगळ्या कविता रुपांची झळक दिली.
मेल्विन रोड्रिगस, आंड्रू डिकुन्हा, किशू बार्कूर, रोबर्ट उद्यावर, क्लोडी ब्रह्मावर, नवीन पिरेरा सुरत्कल, स्टीवन लूवीस हांणी आपल्यो तशें आपणाक पसंद जाल्ल्यो हेर कविंच्यो कविता सादर केल्यो.
आंटनी बार्कूरान आपली `येणो कविता सादर करतच आंड्रू डिकुन्हान ताचे सवें -ती कविता उदेल्ली घडी आनी कविते पाटल्या घडिताविशीं संवाद चलयलो. आपल्या गांवचो एक तर्नाटो अवघडाक सांपडून तीन म्हयने मर्णासवें झुजताना, ताच्ये आवयचें काळीज कितें चिंत्तालें? म्हळ्ळ्या चिंत्पान सुरू जाल्ली ही कविता, मोर्न जावन देड वरसा उपरांत तिका भेटताना त्या दुखाची तीवरता उणी जावंक नातल्ली पळेवन ``पुत्र शोक निरंतर" म्हळ्ळें समजून, कविता फुडें वेली तरी संपवंक सुमार दोन वरसां लागलीं म्हण आंटनीन सांगलें.
गांवाक आयल्यारी गोमटे सकयल निर्जीव जाल्ली कूड पळेवंक आपणाक धयर नासताना आस्पत्रेक भेटुंक वचनातल्ल्या आपल्या भिंवकूरपणाविशीं उलयिल्ल्या कवीन, मोर्चुरिंतल्या मोड्याक आपडताना ती थंडाय आपणा भितर क्रूर शीतळाय जावन रिगून धोसताना आपणाक त्ये आवयचे दुखिची तीवृता कळ्ळी म्हण सांगून ती संपवक जायतें चडपडल्लेविशीं कळयलें.
कवीन हो विवर दिल्ल्यान थंयसर हाजर आसल्ल्यांक ती कविता नव्या उज्वाडान समजुंक सलीस जालें. कित्याक त्ये आवयक आनी त्या तर्नाट्याक हाजर आसल्ल्या पयकीं जायतीं जणां वोळकतालीं. तांकां विस्रून गेल्लें एक घडीत, फकत एक्ये कविते मुखांत्र आपल्या गांवच्या कवीन, भोव तीवरतायेन, शास्वीत कर्न दवरिल्लें.
पत्राडे, नात्न्याची माण्णी आनी मुगा उदक दीवन आंद्रादे जोड्यान सर्वांचीं पोटां थंड केलीं.
-वितोरी कार्कळ