ದಾಯ್ಜಿ ದುಬಾಯ್ ಫುಡಾರ್‌ಪಣಾಂತ್ 2017 ವರ್ಸಾಚೆಂ ಇಕ್ರಾವೆಂ 'ಕವಿತಾ ಫೆಸ್ತ್' ದುಬಾಯ್ ಶೆರಾಂತ್
ಹ್ಯಾಚ್ 2016, ಎಪ್ರಿಲ್ ಮ್ಹಯ್ನ್ಯಾಚೆ ನೋವ್ ತಾರಿಕೆರ್ ದಾಯ್ಜಿ ದುಬಾಯ್ ಸತ್ರಾವ್ಯಾ ವರ್ಸುಗೆಚ್ಯಾ ಸಂದರ್ಭಾರ್ 'ಸತ್ರಾವೊ ದಾಯ್ಜಿ ಸಾಹಿತಿಕ್ ಪುರಸ್ಕಾರ್' ಆಪ್ಣಾಯಿಲ್ಲೊ ಸಾಹಿತಿ ಮೆಲ್ವಿನ್ ರೊಡ್ರಿಗಸ್ ಹಾಕಾ ಉಲ್ಲಾಸುಂಚೆಂ ಏಕ್ ಮಟ್ವೆಂ ಕಾರ್ಯೆಂ ದಾಯ್ಜಿ ದುಬಾಯ್ ತಶೆಂಚ್ ದಾಯ್ಜಿ ರಂಗ್ ಮಂದಿರ್ ಹಾಂಣಿ ಮಾಂಡುನ್ ಹಾಡಲ್ಲೆಂ.
ಎಪ್ರಿಲಾಚೆ 21 ತಾರಿಕೆರ್ ಬ್ರೆಸ್ತಾರಾ ಸಾಂಜೆರ್ ದುಬಾಯ್ ಕರಾಮಾಂತ್ಲ್ಯಾ 'ಸಿವೆಸ್ಟಾರ್ ಭವನ್' ರೆಸ್ಟೊರೆಂಟಾಚ್ಯಾ ಸಭಾಸಾಲಾಂತ್ ಚಲಲ್ಲ್ಯಾ ಹ್ಯಾ ಕಾರ್ಯಾಕ್ ಕವಿ, ಬರಯ್ಣಾರ್, ಲೇಖಕ್, ನಾಟಕಿಸ್ತ್, ಕಲಾಕಾರ್ ತಶೆಂಚ್ ಸಭಾರ್ ಸಂಘ್ ಸಂಸ್ಥ್ಯಾಂಚೆ ಕಾರ್ಭಾರಿ ಹಾಜರ್ ಆಸಲ್ಲೆ.
ಕಾರ್ಯ ನಿರ್ವಾಹಕ್ ನಾನು ಮರೋಲ್ ಹಾಣೆ ಸರ್ವಾಂಕ್ ಯೆವ್ಕಾರ್ ಮಾಗ್ಲೊ ಆನಿ ಸಾಹಿತಿ ಮೆಲ್ವಿನ್ ರೊಡ್ರಿಗಸ್ ಹಾಚಿ ವೊಳಕ್ ಕರುನ್ ದಿಲಿ. ಸುನಿತಾ, ಆಶು ಆನಿ ಡಾಯ್ನಿ'ನ್ ಪ್ರಾರ್ಥನ್ ಗೀತ್ ಗಾಯ್ಲೆಂ.
ಸಾಹಿತಿ ಮೆಲ್ವಿನಾನ್ ಕವಿತಾ ಟ್ರಸ್ಟಾಚೊ ಶೆವೊಟ್ ಆನಿ ಪಾಟ್ಲ್ಯಾ ವರ್ಸಾಂನಿ ಹೆಂ ಟ್ರಸ್ಟ್ ಏಕ್ ಬಳಾದೀಕ್ ಕೊಂಕ್ಣಿ ಚಳುವಳ್ ಜಾವ್ನ್ ರೂಪಿತ್ ಜಾವ್ನ್ ಆಯಿಲ್ಲ್ಯಾವಿಶಿಂ ಸವಿಸ್ತಾರ್ ಮಾಹೆತ್ ದಿಂವ್ಚೆಂ ಉಲೊವ್ಪ್ ಪಡ್ದ್ಯಾರ್ 'ವಿಶುವಲ್ಸ್'ಸವೆಂ ದಿಲಿ. "ಪಾಟ್ಲ್ಯಾ ಸಭಾರ್ ವರ್ಸಾಂ ಥಾವ್ನ್ ದುಬಾಯ್ ಶೆರಾಂತ್ ಕವಿತಾ ಫೆಸ್ತ್ ಚಲಯ್ಜಾಯ್ ಮ್ಹಣುನ್ ದಬಾವ್ ತಶೆಂ ಹುಮೆದ್ ಆಪ್ಣಾಕ್ ಲಾಬ್ಲ್ಯಾ. ದುಬಾಯಾಂತ್ಲ್ಯಾ ಸರ್ವ್ ಲೊಕಾಂಚೊ ತಶೆಂ ಸಂಘ್ ಸಂಸ್ಥ್ಯಾಂಚೊ ಪಾಟಿಂಬೊ ಮೆಳ್ಳೊ ತರ್ 'ಕವಿತಾ ಫೆಸ್ತ್ 2017' ದುಬಾಯಾಂತ್ ಆಯೋಜಿತ್ ಕರ್‍ಚಿ ಆಶಾ ತಾಣೆ ಉಗ್ತಾಯ್ಲಿ ಆನಿ ಸವಿವರ್ ಆಟಾಪ್ಚೊ ಏಕ್ ಪ್ರಸ್ತಾಪ್ ಸಭೆರ್ ದವರ್‍ಲೊ.
ಉಪ್ರಾಂತ್ ಚಲಲ್ಲಿ ಚರ್ಚಾ ಡಾಯನ್ ಡಿಸೋಜಾನ್ ಚಲೊವ್ನ್ ವೆಲಿ. ಹಾಜರ್ ಆಸಲ್ಲ್ಯಾ ಸಂಘಟನಾಂಚ್ಯಾ ಮುಕೆಲ್ಯಾಂನಿ, ಉದ್ಯಮಿಂನಿ ದಾಯ್ಜಿ ದುಬಾಯ್ ಎಕ್ತಾರಾಚ್ಯಾ ಫುಡಾರ್‌ಪಣಾಖಾಲ್ ಚಲೊವ್ಯೆತಾ ಜಾಲ್ಲ್ಯಾ ಹ್ಯಾ ಕವಿತಾ ಫೆಸ್ತಾಕ್ ಸಹಕಾರ್ ದಿತಾಂವ್ ಮ್ಹಣುನ್ ಭಾಸಾವ್ಣಿ ಕೆಲಿ.
ಕಾರ್ಯಾಚೊ ಆಖ್ರೇಚೊ ವಾಂಟೊ ಜಾವ್ನ್ ಚಲ್‌ಲ್ಲ್ಯಾ ಕವಿತಾಗೋಷ್ಠಿಂತ್ ದಾಯ್ಜಿ ದುಬಾಯ್ಚ್ಯಾ ಸಾಂದ್ಯಾಂನಿ ತಶೆಂಚ್ ಸೈರ್‍ಯಾ ಕವಿ-ಕವಯಿತ್ರಿಂನಿ ಆಪ್ಲ್ಯೊ ಕವಿತಾ ವಾಚುನ್ ಜಮ್‌ಲ್ಲ್ಯಾ ಕವಿತಾಪ್ರೇಮಿಂಕ್ ಧಾದೊಸ್ ಕೆಲೆಂ. ಹ್ಯೆ ಕವಿಗೋಷ್ಠಿಂತ್ ಮೆಲ್ವಿನ್ ಪಾಯ್ಸ್ ಆಲ್ಲಿಪಾದೆ, ರೊಬಿನ್ ಮೆಂಡೋನ್ಸಾ ನಿರುಡೆ, ಡ್ಯಾರೆಲ್ ಡಿ'ಸೋಜಾ ವಾಮಂಜೂರ್, ಕ್ಲೆಮೆಂಟ್ ಕಾರ್ಡೋಜಾ ಬೋಳಾ, ಆರ್ಥರ್ ಪಿರೇರಾ ಒಮ್ಜೂರ್, ರೊಬರ್ಟ್ ಫೆರ್ನಾಂಡಿಸ್ ಉದ್ಯಾವರ್, ಕಿಶೋರ್ ಗೊನ್ಸಾಲ್ವಿಸ್ ಬಾರ್ಕುರ್, ಮೆಲ್ವಿನ್ ರೊಡ್ರಿಗಸ್ ಆನಿ ಗೊಂಯ್ಜಿ ಕವಯಿತ್ರಿ ಸಿಧ್ಧಿ ಶೇಟ್ ರಾಯ್ಕರ್ ಹಾಂಣಿ ಆಪ್ಲ್ಯೊ ಕವಿತಾ ವಾಚ್ಲ್ಯೊ.
ಕವಿತಾ ಫೆಸ್ತ್ 2017 ದುಬಾಯಾಂತ್ ಮಾಂಡುನ್ ಹಾಡ್ಚೆಂ ಕವಿತಾ ಟ್ರಸ್ಟಾಚೆಂ ನವೆಂ ಯೋಜನ್ ದುಬಾಯಾಂತ್ಲ್ಯಾ ಕೊಂಕ್ಣಿ ಕವಿತಾ ಮೋಗಿಂಕ್ ತಶೆಂಚ್ ಸಾಹಿತ್ಯ್ ಪ್ರೇಮಿಂಕ್ ಏಕ್ ಹುಮೆದಿಚೆಂ ಟೋನಿಕ್ ಜಾಂವ್ಕ್ ಪಾವ್ತೆಲೆಂ ಮ್ಹಣ್ಚ್ಯಾಂತ್ ದುಬಾವ್ ನಾ.
ಭಾತ್ಮಿ: ರೊಬರ್ಟ್ ಫೆರ್ನಾಂಡಿಸ್ ಉದ್ಯಾವರ್
ತಸ್ವೀರ್ ಕುರ್ಪಾ: ಪ್ರಕಾಶ್ ಕಿಶೋರ್ ಡಿಸೋಜಾ
दायजी दुबाय फुडारपणांत २०१७ वर्साचें इक्रावें 'कविता फेस्त' दुबाय शेरांत
ह्याच २०१६, एप्रील म्हयन्याचे नोव तारकेर दायजी दुबाय सत्राव्या वर्सुगेच्या संदर्भार 'सत्रावो दायजी साहितीक पुरस्कार' आपणायिल्लो साहिती मेल्विन रोड्रीगस हाका उल्लासुंचें एक मटवें काऱ्यें दायजी दुबाय तशेंच दायजी रंग मंदीर हांणी मांडून हाडल्लें.
एप्रीलाचे २१ तारकेर ब्रेस्तारा सांजेर दुबाय करामांतल्या 'सिवेस्टार भवन' रेस्टॉरेंटांतल्या सभासालांत चलल्ल्या ह्या काऱ्याक कवी, बरयणार, लेखक, नाटकिस्त, कलाकार तशेंच सभार संघ संस्थ्यांचे कार्भारी हाजर आसल्ले.
काऱ्य निर्वाहक नानू मरोल हाणे सर्वांक येवकार मागलो आनी साहिती मेल्विन रोड्रीगस हाची वोळक करून दिली. सुनीता, आशू आनी डायनीन प्रार्थन गीत गायलें.
साहिती मेल्विनान कविता ट्रस्टाचो शेवोट आनी पाटल्या वर्सांनी हें ट्रस्ट एक बळादीक कोंकणी चळुवळ जावन रूपीत जावन आयिल्ल्याविशीं सविस्तार माहेत दिंवचें उलोवप पडद्यार 'विशुवल्स'सवें दिली. "पाटल्या सभार वर्सां थावन दुबाय शेरांत कविता फेस्त चलयजाय म्हणून दबाव तशें हुमेद आपणाक लाबल्या. दुबायांतल्या सर्व लोकांचो तशें संघ संस्थ्यांचो पाटिंबो मेळ्ळो तर 'कविता फेस्त २०१७' दुबायांत आयोजीत करची आशा ताणे उगतायली आनी सविवर आटापचो एक प्रस्ताप सभेर दवरलो.
उपरांत चलल्ली चर्चा डायन डिसोजान चलोवन वेली. हाजर आसल्ल्या संघटनांच्या मुकेल्यांनी, उद्यमिंनी दायजी दुबाय एक्ताराच्या फुडारपणाखाल चलोव्येता जाल्ल्या ह्या कविता फेस्ताक सहकार दितांव म्हणून भासावणी केली.
काऱ्याचो आखरेचो वांटो जावन चलल्ल्या कवितागोष्टींत दायजी दुबायच्या सांद्यांनी तशेंच सैरया कवी-कवयित्रिंनी आपल्यो कविता वाचून जमल्ल्या कविताप्रेमींक धादोस केलें. ह्ये कविगोष्टींत मेल्विन पायस आल्लिपादे, रोबीन मेंडोन्सा निरुडे, डॅरॆल डी'सोजा वामंजूर, क्लेमेंट कार्डोजा बोळा, आर्थर पिरेरा ओमजूर, रोबर्ट फेर्नांडीस उद्यावर, किशोर गोन्साल्वीस बार्कूर, मेल्विन रोड्रीगस आनी गोंयजी कवयित्री सिध्धी शेट रायकर हांणी आपल्यो कविता वाचल्यो.
कविता फेस्त २०१७ दुबायांत मांडून हाडचें कविता ट्रस्टाचें नवें योजन दुबायांतल्या कोंकणी कविता मोगिंक तशेंच साहित्य प्रेमिंक एक हुमेदिचें टोनीक जावंक पावतेलें म्हणच्यांत दुबाव ना.
भात्मी: रोबर्ट फर्नांडीस
तस्वीर कुर्पा: प्रकाश किशोर डिसोजा