ಕೊಂಕಣಿ ಕವಿತಾ ಸಾದರ್ ಸರ್ತ್: ಉಡುಪಿ ಥಾವ್ನ್ ಸ ಜಣಾಂ ಫೈನಲಾಕ್
ಕವಿತಾ ಟ್ರಸ್ಟ್ ಆನಿ ದಿ ಎಕ್ಸ್‌ಪ್ರೆಶನ್ಸ್ ಹಾಂಣಿ ಸಾಂಗಾತಾ ಮೆಳುನ್ ಅಖಿಲ್ ಭಾರತ್ ಕೊಂಕಣಿ ಕವಿತಾ ಸಾದರ್ ಸರ್ತೆಚೊ ಉಡುಪಿ ಪಾಂವ್ಡೊ, ಹ್ಯಾಚ್ ಒಕ್ಟೋಬ್ರಾಚ್ಯೆ 8 ತಾರಿಕೆರ್ ಆಯ್ತಾರಾ ಸಕಾಳಿಂ ಬ್ರಹ್ಮಾವರ್ ಭಾಗೆವಂತ್ ಕುಟ್ಮಾಚ್ಯೆ ಇಗರ್ಜೆ ಇಸ್ಕೊಲಾಚ್ಯಾ ಸಾಲಾಂತ್ ಮಾಂಡುನ್ ಹಾಡ್ಲೊ.
ಸರ್ತೆಚ್ಯೆ ಸುರ್‍ವೆರ್ ಕವಿತಾ ಟ್ರಸ್ಟ್ ಸ್ಥಾಪಕ್ ಮೆಲ್ವಿನ್ ರೊಡ್ರಿಗಸಾನ್ ಸರ್ವಾಂಕ್ ಯೆವ್ಕಾರ್ ಮಾಗ್ಲೊ, ತ್ಯಾ ಉಪ್ರಾಂತ್ ತಾಣೆಂ ಸರ್ತೆಚಿಂ ನೆಮಾಂ ವಿವರುನ್ ಸಾಂಗ್ಲಿಂ. ಫಿರ್ಗಜೆಚೊ ವಿಗಾರ್ ಫಾ. ವಿಕ್ಟರ್ ಫೆರ್ನಾಂಡಿಸ್ ಹಾಜರ್ ಆಸುನ್ ಸರ್ವಯ್ ಸ್ಪರ್ಧಿಕಾಂಕ್ ತಾಂಣಿ ಬರೆಂ ಮಾಗ್ಲೆಂ. "ಹಾಂವೆಂ ಪೂರ್ವ್ ಭಾರತಾಂತ್ಲ್ಯಾ ಜಾಯ್ತ್ಯಾ ಫಿರ್ಗಜಾಂನಿ ವಾವ್ರ್ ಕೆಲಾ. ಥಂಯ್ಸರ್ ಬೈಬಲಾಂತ್ಲ್ಯಾ ಕೀರ್ತನಾಂಚೊ ವಾಚನ್ ಸ್ಪರ್ಧೊ ಚಲ್ತಾ. ಪುಣ್ ಕವಿತಾ ವಾಚನ್ ಸ್ಪರ್ಧೊ ಯೆದೊಳ್ ಪರ್‍ಯಾಂತ್ ಹಾಂವೆಂ ಆಯ್ಕುಂಕ್ ನಾ. ಹೊ ಮ್ಹಜೊ ನವೊಚ್ ಅನ್ಭೋಗ್" ಮ್ಹಣುನ್ ತಾಂಣಿ ಹ್ಯಾ ಸಂದರ್ಭಾರ್ ಸಾಂಗ್ಲೆಂ. ಫಿರ್ಗಜೆಚೊ ಉಪಾಧ್ಯಕ್ಷ್ ರವಿಪ್ರಕಾಶ್ ಗೊನ್ಸಾಲ್ವಿಸ್ ತಶೆಂ ಕಾರ್ಯದರ್ಶಿ ಆನಿ ಕವಿ ಕ್ಲೋಡಿ ಬ್ರಹ್ಮಾವರ್ ಹ್ಯಾ ಸಂದರ್ಭಾರ್ ಹಾಜರ್ ಆಸಲ್ಲೆ.
ವೊರಯ್ಣಾರ್ ಜಾವ್ನ್ ಎವ್ರೆಲ್ ರೊಡ್ರಿಗಸ್, ಕಿಶೂ ಬಾರ್ಕೂರ್ ಆನಿ ಎಂಡ್ರ್ಯೂ ಎಲ್. ಡಿಕುನ್ಹಾ ಹಾಂಣಿ ಸಹಕಾರ್ ದಿಲ್ಲೊ ತರ್, ವಿತೊರಿ ಕಾರ್ಕಳಾನ್ ಸಗ್ಳೆ ಸರ್ತೆಚೆಂ ಸುಂಕಾಣ್ ಹಾತಿಂ ಧರ್‍ಲೆಂ. ಭುರ್ಗ್ಯಾಂಚ್ಯಾ ವಿಭಾಗಾಂತ್ ಪಾಂಚ್ ಜಣಾಂನಿ ಭಾಗ್ ಘೆತಲ್ಲೊ ತರ್ ವ್ಹಡಾಂಚ್ಯಾ ವಿಭಾಗಾಂತ್ ಬಾರಾ ಜಣಾಂನಿ ಭಾಗ್ ಘೆತಲ್ಲೊ.
ಹ್ಯೆ ಸರ್ತೆಂತ್ ಭಾಗ್ ಘೆತಲ್ಲ್ಯಾ ಸರ್ವಾಂಕ್ ರವಿಪ್ರಕಾಶ್ ಗೊನ್ಶಾಲ್ವಿಸಾನ್ ಕವಿತಾ ಟ್ರಸ್ಟಾಚಿಂ ಪುಸ್ತಕಾಂ ತಶೆಂ ಪ್ರಮಾಣ್ ಪತ್ರಾಂ ವಾಂಟ್ಲಿಂ. ಹ್ಯಾ ಸಂದರ್ಭಾರ್ ಹಾಜರ್ ಆಸ್ಲಲ್ಯಾ ಮಥಾಯಸ್ ಕುಟಮ್ ಕವಿತಾ ಪುರಸ್ಕಾರ್ ಜೊಡ್ಪಿ ಕವಿ ಇಕ್ಬಾಲ್ ಸಯೀದಿ ಹಾಂಣಿ ಏಕ್ ಗಝಲ್ ಸಾಂಗ್ಲಿ.
ಫೈನಲಾ ಖಾತೀರ್ ವಿಂಚುನ್ ಆಯಿಲ್ಲ್ಯಾಂಚಿಂ ನಾಂವಾಂ ಹ್ಯೆಪರಿಂ ಆಸಾತ್:
ನೆಲ್ಸನ್ ಆನಿ ಲವೀನಾ ರೊಡ್ರಿಕ್ಸ್ - ಚಾಫ್ರಾ ದೆಕೊಸ್ತಾ ಸ್ಮಾರಕ್ ಭುರ್ಗ್ಯಾಂಚಿ ಅಖಿಲ್ ಭಾರತ್ ಕೊಂಕಣಿ ಕವಿತಾ ಸಾದರ್ ಸರ್ತ್:
ಮೊಹಮ್ಮದ್ ಸುಹೇಯ್ಲ್, ಭಟ್ಕಳ್
ರೆವೊನ್ ಡಾಯಸ್, ಉಡುಪಿ
ರೋಹನ್ ಆನಿ ಲವೀಟಾ ಮೊಂತೇರೊ - ಯುವಜಣಾಂಚಿ ಅಖಿಲ್ ಭಾರತ್ ಕೊಂಕಣಿ ಕವಿತಾ ಸಾದರ್ ಸರ್ತ್:
ಸಾರಾ ಡಿಸೋಜಾ, ಮೂಡುಬೆಳ್ಳೆ
ಆಲ್ಕಾ ಪವಿತ್ರಾ ಲುವಿಸ್, ಬ್ರಹ್ಮಾವರ್
ರೋಶ್ನಿ ಆಳ್ವ, ಕುಂಟಾಳ್‌ನಗರ್
ಫರಾದ್ ಅಲಿ, ಭಟ್ಕಳ್
कोंकणी कविता सादर सर्त: उडुपी थावन स जणां फैनलाक
कविता ट्रस्ट आनी दी एक्सप्रेशन्स हांणी सांगाता मेळून अखिल भारत कोंकणी कविता सादर सर्तेचो उडुपी पांवडो, ह्याच ओक्टोब्राचे ८ तारकेर आयतारा सकाळीं ब्रह्मावर भागेवंत कुटमाच्ये इगर्जे इस्कोलाच्या सालांत मांडून हाडलो.
सर्तेच्ये सुरवेर कविता ट्रस्ट स्थापक मेल्विन रोड्रिगसान सर्वांक येवकार मागलो, त्या उपरांत ताणें सर्तेचीं नेमां विवरून सांगलीं. फिर्गजेचो विगार फा. विक्टर फेर्नांडीस हाजर आसून सर्वय स्पर्धिकांक तांणी बरें मागलें. "हांवें पूर्व भारतांतल्या जायत्या फिर्गजांनी वावर केला. थंयसर बैबलांतल्या कीर्तनांचो वाचन स्पर्धो चलता. पूण कविता वाचन स्पर्धो येदोळ परयांत हांवें आयकुंक ना. हो म्हजो नवोच अनभोग" म्हणून तांणी ह्या संदर्भार सांगलें. फिर्गजेचो उपाध्यक्ष रविप्रकाश गोन्साल्वीस तशें काऱ्यदर्शी आनी कवी क्लॉडी ब्रह्मावर ह्या संदर्भार हाजर आसल्ले.
वोरयणार जावन एवरेल रोड्रिगस, किशू बार्कूर आनी एंडऱ्यू एल. डिकुन्हा हांणी सहकार दिल्लो तर, वितोरी कार्कळान सगळे सर्तेचें सुंकाण हातीं धरलें. भुरग्यांच्या विभागांत पांच जणांनी भाग घेतल्लो तर व्हडांच्या विभागांत बारा जणांनी भाग घेतल्लो.
ह्ये सर्तेंत भाग घेतल्ल्या सर्वांक रविप्रकाश गोनसाल्विसान कविता ट्रस्टाचीं पुस्तकां तशें प्रमाण पत्रां वांटलीं. ह्या संदर्भार हाजर आसलल्या मथायस कुटम कविता पुरस्कार जोडपी कवी इकबाल सयीदी हांणी एक गझल सांगली.
फैनला खातीर विंचून आयिल्ल्यांचीं नांवां ह्येपरीं आसात:
नेल्सन आनी लवीना रोड्रिक्स - चाफ्रा देकोस्ता स्मारक भुरग्यांची अखिल भारत कोंकणी कविता सादर सर्त:
मोहम्मद सुहेयल, भटकळ
रेवोन डायस, उडुपी
रोहन आनी लवीटा मोंतेरो - युवजणांची अखिल भारत कोंकणी कविता सादर सर्त:
सारा डिसोजा, मूडुबेळ्ळे
आल्का पवित्रा लुवीस, ब्रह्मावर
रोश्नी आळवा, कुंटाळनगर
फराद अली, भटकळ